الله يرحم ذيك الايام اللي كنا ندور فيها ..........كسرة الخبز دواره

وتذكر كريم ايام الشقاء والتعب يوم انهم يشتغلوا من الصبح لليل ويالله يلاقو اللي يسد رمقهم

وتذكر عيشته ويا امه وابوه في البيت اللي داخل الديره ، النوم والقعده في نص الليل من الحر

وفي ايام الشتاء يالله يالله يتدفى الواحد ، ويتذكر يوم ان ابوه يجيه ذاك اليوم

أبو حسين:- وين بيزات الشغل اليوم

كريم:- ما عندي شي اليوم

أبو حسين:- انا لله وانااليه راجعون ، وانا اللي اعتبرك الرجال لعبت بالبيزات يعني ؟؟

كريم:- قلت لك ما عندي شي ما حصلت شغل اليوم

أبو حسين:- وتكذب بعد ، وابو علي اللي خلاك تشتغل في بيتهم تدخل الرمل يعني ما اعرف انا

كريم:- بعدهوه ما عطانا بيزات ولا عطانا شي

أبو حسين:- بعد ما عطاكم هاه ، انا اخليك تشتغل حق تساعدني مو علشان امبى اشغلك يا ولدي وانت

تعرف الحال كيفه صاير ولازم تعرف هالشي قبل كل شي ولا تفكر انااشغلك حق شي فاني ودام انته منت

راضي تعرف هالشي براحتك بس هاه ، لا تقول ليي امبى شي وامبى حاجه ، ما الك الا كسوة شتاء

وكسوة صيف وهذا كل اللي عندي وواجب عليي يا ولدي

كريم:- خلاص وهذا اللي امباه .

أبو حسين:- خلاص اجل يا ولدي براحتك بس مفل ما قلت الك ، لا تجيني في يوم وتقول ليي سوي ليي

وافعل ليي

كريم:- لا مانا جاي اقول لك ، وانا بيزات اللي احصلها با اجمعها وبا اضمها

أبو حسين:- ان شاء الله عاد ما تضيعها على حوايج فاضيه

كريم:-لا تخاف وحتى لو هذي بيزاتي وانا حر فيها

أبو حسين:- والله ياولدي مانا عارف انته من وين جايه الك هالطماعه من وينه لا علمتك اياها

ولا درستك وياها

كريم:- خلاص انا بيزاتي وانا با اسوي فيها اللي امبى

أبو حسين:- أجل نتفق على شي فاني بعد ونتحسب للامور اللي بتصير

كريم:- نتفق نتفق ليش لا

أبو حسين:- حتى لو صار عندي بيزات لا تقول ليي تمبى شي من عندي ، بيزاتي وانا حر فيها بعد هاه

كريم:- حتى لو صار عندك ملايين الدنيا ما امبى من عندك شي

أبو حسين:- خير اجل فمان الله

كريم:- فمان الله وحفظه

صحيح ان ابويي يتعامل ويانا من واحنا صغار على مبدأ الرجوله والمسئوليه ، يعني بمصطلح هالأيام

بدمقراطيه ، وهوه اللي خلانا نصير على اللي احنا عليه بس ما يصير نترك كل شي لغيرنا واحنا نتفرج

تذكر كريم يوم ان ابوه ويا ابو علي اشتغلوا ويا بعض ومن شي لشي لامن ذاك اليوم راحوا الظهران

ولد ابو علي وشغلهم وياه في الشركة ( ارامكو) وقاموا يستلموا لفلوس بس ما كان يشوف ابوه يصرف الا

الشي اللي يحتاجه وبعدين عرف السر ، ابوه يشتري اراضي وبيوت من هنه وهناك ، وعقارات في القطيف

وفي الدمام ، وبعد ما توفت امه وعرس على ام حسين ما خلاه لحاله وسوى اله غرفه خاصه في البيت

الجديد ، وعامله معاملة الرجال بس ما كان يعطيه فلوس الا الكسوتين ، شتاء وصيف بس

وبعد فتره راح في يوم يسأل ورى ابوه وعرف ان عنده عمارتين في الدمام وعنده فلوس، بس ماتجرأ انه

يسأله انه يعطيه شي ، وصحيح ابوه هوه اللي توسط اله انه يشتغل في ارامكو بعد بس وين ، العقار غالي

وهوه يمبى يتزوج ، صحيح ان ابوه ما خلاه لحاله في زواجه ، وحتى شهر العسل دفع تكاليفه من اوله

لآخره ، وصحيح ان البيت اللي هوه عايش فيه حلال ابوه

بس مهما يكون هذا ما يمنع انه يطالب بورث من ابوه ، ولا يمنع انه يسوي اللي سواه

ليش عاد حسين احسن مني في ويش ، ولا هذي مريموه مرت ابو عمران في ويش احسن مني عاد

هم يلعبوا في الفلوس وانا اتفرج ؟؟

ما يصير واللي سويته انا هوه الصح ، لامتى بيعيش يعني ؟؟؟ ولا ويش كل هالفلوس يعني ؟؟

انا الحين اقوم اروح انام ويصير خير بكره الصباح

اروح للمحامي واعرف ويش صار .

ونام كريم علىهالامل والتفكير في القادم من الايام بس ............حسبته ما زبطت

حسين بعد ما طلع من عند اخوه كريم وصل للسياره ولقى ان زوجة اخوه واقفه جنبها وهيه تصيح

وقف حسين من الصدمه اللي لقاها ...معقوله كريم اخويي مسوي حاجه في مرته ؟؟

الله يستر ....هاه ام علي ويش فيش ؟؟

أم علي:- ما ادري ويش في اخوك يا ابو ازهر ، صاير مو طبيعي ، مو مخلي ولا مبقي ويماني اسوي حاجات

لا ترضي الله ولا النبي

حسين:- انا لله وانا اليه راجعون ، خير يا ام علي ويش فيه اخويي

أم علي:- اخوك يتمنى الموت لابوك ويتمناه اليوم قبل بكره

حسين:- اعوذ بالله ، لهدرجه وصل فيه الامر

أم علي:- اي والله وكل هالشي عشان لفلوس ياابو ازهر

حسين:- الله يلعن لفلوس اللي تعمي لنفوس

أم علي:- وياليت عاد محصلين من عنده خير لو شر ، اخوك اللي مصبرني عليه انت تعرف لاويش

حسين:-الله يعنش يا ام علي انتين الحين عودي بيتك واستهدي بالله ويصير خير يا ام علي

أم علي:- خلاص يا ابو ازهر اني با اطلب الطلاق عيشتي في بيت ابويي اهون عليي من هالشي

حسين:-لا لا يا ام علي انتين بينش وبينه عشرة عمر ما يصير تهدمي هالش في لحظه

أم علي:- عشرة العمر كلها جحيم يا ابو ازهر واني اشوفه يسوي اللي ما يرضي الله ولا نبيه

حسين:-ما عليه يا ام علي تحملي بعد هذا النصيب

أم علي:- لا كل شي تحملته الا ان كريم يرفع عليي السكين .

حسين:- هاااااااااااه يرفع سكين ، لا هذا ما ينسكت عليه

أم علي:- ويش بايدي يا ابو ازهر اني خايفه على روحي وعلى الجهال

حسين:- والحين وين بتروحي ؟؟؟

أم علي:- اذا ما عليك كلافه ودني بيت ابويي

حسين:- يالله اركبي وامرنا لله

أم علي:- رحم الله والديك وبكره اجي البيت والله يعين

حسين:- الله يعين

ووصل ام علي لبيتهم وهوه يفكر في أخوه وطلبه ووضعه ويا مرته وتزاحمت الأفكار في راسه

وما وعى الا وهوه عند المستشفى وراح على طول لغرفه ابو عمران وجلس هناك ، وبعد شوي

جلس ابو عمران من نومه وشاف حسين وهوه ينود على الكنبه ونادى عليه شوي شوي

ويوم شاف انه ما يجاوب فكره نايم بس هوه يشوفه يغفي ويرد يحرك راسه ، وقام نادى عليه بقوه شوي

وانتبه ابو ازهر من نومته

أبو عمران:- هاه ابو أزهر كيف حالك

حسين:- الحمد لله انت بشرنا عنك ، ويش قال الدكتور الك

أبو عمران:- ابد عقب ما طلعتوا من عندي بس جاء اليي وسوى تحليل والحمد لله استقرت الحاله

حسين:- الحمد لله

أبو عمران:- وانت ويش سويت ويا اخوك ؟؟

حسين:- ابد ما وصلت وياه الى شي .

أبو عمران:- يعني مو راضي يسحب القضيه له

حسين:- توقع بكم يمبى يسحب القضيه ؟؟

أبو عمران:- بكم يعني ؟؟ يساوم على صحة ابوه يعني!!!!

حسين:- ويش اسوي اله بعد يا النسيب ، يمبى يقول لك مليونين .

أبو عمران:- هااااااااااه ، اعوذ بالله

حسين:- اي والله بس مانا عراف ويش اسوي انا الحين

أبو عمران:- لا تفكر في شي يا خوك خلها على الله وتنحل يا النسيب

حسين:- ونعم بالله

أبو عمران:- انته قوم الحين نام الك شوي

حسين:- با اروح اتطمن على الوالد و........

أبو عمران:- لا تروح الحين اكيد ابوك نايم الحين

حسين:- وويش دراك عنه ؟؟؟

أبو عمران:- مو يوم طلعتوا من عندي قمت ووصيت د أحمد انه يجيب ليي أخبار ابوك وعرفت عن اللي صار

اله كله ، بس اليوم طلعوه من العنايه وودوه غرفه فانيه وهوه الحمد لله بخير وعافيه

حسين:- والله مانا عراف ويش اسوي اله يالنسيب

أبو عمران:- ابوك يمبى اله عنايه وانه ما يحس انه فقيل عليكم لازم تخلوه انه يحس بأنه هوه الكبير وكلمته

مسموعه وانه يكون زي ما هوه قبل لا يصير اله هالشي

حسين:- اي والله صدقت يالنسيب

أبو عمران:- المهم انت الحين روح نام شوي وريح بالك اكيد وراك شغل بكره

حسين:- اي والله ورايي شغل وشغل مهم بعد بكره

أبو عمران:- يالله يالنسيب خلينا ننام ههههههههههه

حسين:- تصبح على خير يالنسيب

أبو عمران:- وانته من أهله ، صحيح الا با أسألك.

حسين:- آمر

أبو عمران:- طلبت الجهاز لو بعدك ؟؟

حسين:- الا طلبته ووصل بس للحين ما استلمته بكره ان شاء الله استلمه

أبو عمران:- على خير يالنسيب ، تصبح على خير

حسين:- وانته من أهله

وطلع حسين وهوه يفكر في المشاكل اللي صارت اله ومن مشكله لمشكله ، وأيقن بأن ابتلاء الله سبحانه

وتعالى له على قدر ثقته في الله سبحانه وتعالى ........

وراح الشقه ومن وصل الا مستقبلتنه ام حسين بالسؤال والكلام

أم حسين:- وينك يا ولدي وينك ، هذي سواه تسويها في امك ما ترد عليها ولا تجي ليها يا يمه

حسين:- يمه ما فيه شي تعالي وبا ااعلمش ويش اللي فيه بالتمام والكمال

أم حسين:-ايه قول ليي وطمنني يا ولدي اني قلبي مو قاعد في محله على ابوك قول ليي يا يمه

حسين:- د تعالي وقعدي انتين الحين

أم حسين:- اني ما بقعد الا لامن تقول ليي ويش فيه ابوك ولا ويش ما جيت ليي الليله

حسين:- قعدي وبا اقول لش يا يمه

أم حسين:- داني قعدت يا يمه

حسين:- ابويي اليوم المغرب صابته جلطه فانيه

أم حسين:- ياااااااااااااااااااااااااعلي ياااااااااااااااااااا اميرالمؤمنين يااااااااااااااااااااااااااااعلي

حسين:- بس الحمد لله طلع منها بخير لا تخافي ولا تختلعي يا يمه ترى انا مافيي شده اشوف دموعش

بعد يا يمه ، وعلشان كده انا قلت لزهراء تخليش عندها علشان لا تروحي ويايي المستشفى يا يمه

أم حسين:- ( وهيه تطالع في زهراء) يعني تعرفي يا بتي ولا قلتي ليي ، افا بس افا

زهراء ما تحملت هالعتب من عند ام حسين وعلى طول راحت لغرفتها والدمعه في عيونها ورمت روحها

على السرير .

حسين:- يا يمه زهراء ما ليها ذنب وانا اللي طلبت منها هالشي

أم حسين:- ادري يا يمه انها ما ليها ذنب بس تعرف اني ما اتحمل هالشي يا يمه

حسين:- على العموم الحين ابويي بخير وصحة وسلامه ويمبى منش ان تدعي له بالسلامه

أم حسين:- الله يطلعه لينا بالسلامه ويعود مزهر ومورد ياااااااااارب

حسين:- يارب يا يمه والحين با اقوم انام تراني هلكاااااااااااان مررررررررره ولانا قادر اخف عمري يا يمه

أم حسين:- قوم يولدي ولا تنسى من الصبح با اروح لابوك مو تقول ليي بعدلا

حسين:- ان شاء الله يا يمه من الصبح اوديش ، يالله قومي نامي الليله وان شاء الله بكره اوديش بدل اليوم

أم حسين:- اجل اني ما با انام الا ويايي ازهر

حسين:- ما يصير خاطرش الا طيب

أم حسين:- وقول لزهراء بعد اني ما قصدتها بشي بس طلعت مني غصب هالكلمه عاد

حسين:- زهراء طيبه وحنونه وتعرف عنش انش ما تقصدي يا يمه بس هيه حساسه شوي اكيد والضغط

اللي خليته عليها هوه اللي خلاها تروح الغرفه

أم حسين:- اي والله عارفه هالشي يا ولدي بس تعرف قلب المره على رجلها ويش يصير فيه

وقام حسين وباس راس امه وراح لزهراء الغرفه ولقى زهراء باسطه سجادتها وهيه تقرأ

« مُناجاة المُطيعين للهِ »
اَلّلهُمَّ اَلْهِمْنا طاعَتَكَ، وَجَنِّبْنا مَعْصِيَتَكَ، وَيَسِّرْ لَنا بُلُوغَ ما نَتَمَنّى مِنِ ابْتِغاءِ رِضْوانِكَ، وَاَحْلِلْنا بُحْبُوحَةَ جِنانِكَ، وَاقْشَعْ عَنْ بَصائِرِنا سَحابَ الاْرْتِيابِ، وَاكْشِفْ عَنْ قُلُوبِنا اَغْشِيَةَ الْمِرْيَةِ وَالْحِجابِ، وَاَزْهَقِ الْباطِلَ عَنْ ضَمائِرِنا، وَاَثْبِتِ الْحَقَّ في سَرائِرِنا، فَاِنَّ الشُّكُوكَ وَالظُّنُونَ لَواقِحُ الْفِتَنِ، وَمُكَدِّرَةٌ لِصَفْوِ الْمَنايِـحِ وَالْمِنَنِ، اَلّلهُمَّ احْمِلْنا في سُفُنِ نَجاتِكَ وَمَتِّعْنا بِلَذيذِ مُناجاتِكَ، وَاَوْرِدْنا حِياضَ حُبِّكَ، وَاَذِقْنا حَلاوَةَ وُدِّكَ وَقُرْبِكَ، وَاجْعَلْ جِهادَنا فيكَ، و هَمَّنا في طاعَتِكَ، وَاَخْلِصْ نِيّاتِنا في مُعامَلَتِكَ، فَاِنّا بِكَ وَلَكَ وَلا وَسيلَةَ لَنا اِلَيْكَ اِلاّ اَنْتَ، اِلـهي اِجْعَلْني مِنَ الْمُصْطَفَيْنَ الاَْخْيارِ، وَاَلْحِقْني بِالصّالِحينَ الاَْبْرارِ، السّابِقينَ اِليَ الْمَكْرُماتِ الْمُسارِعينَ اِلَى الْخَيْراتِ، الْعامِلينَ لِلْباقِياتِ الصّالِحاتِ، السّاعينَ اِلى رَفيعِ الدَّرَجاتِ، اِنَّكَ عَلى كُلِّ شَيْء قَديرٌ، وَبِالاِْجابَةِ جَديرٌ بِرَحْمَتِكَ يا اَرْحَمَ الرّاحِمينَ .
وجلس على السرير ويوم خلصت سلم عليها وخبرها باعتذار امه

زهراء:- لا لا يا ابو أزهر ما فيني شي بس حزة الحزه خفت ان امك تشوف دمعتي وقمت دشيت الغرفه

حسين:- الله يرحم والديش يا أم أزهر

زهراء:- وحسيت اني سويت شي غير بس ما هدأت نفسي الا يوم قريت هالدعاء

حسين:- بارك الله فيش يا ام ازهر ، اجل امي تقول لش ما بتنام الا ويا ازهر

زهراء:- لا تالي تتعذب وياه ، تعرفه هوه ما ينام متواصل وبيجننها

حسين:- لا هيه خلاص قالت اذا مرتك سامحتني خلها تجيب ازهر ليي با انام وياه

زهراء:- تامر امر ام حسين

حسين:- يالله قومي وديه ليها ، تراني انا مرررررره هلكاااااااااااااان وبكر ه ورايي شغل واااااجد

زهراء: الله يقويك ويساعدك يارب

حسين:- يالله انا با انخمد الحين

زهراء :- تنام نوم العوافي يا غناتي

حسين:- تصبحي على خير

زهراء:- وانته من اهله

وطلعت زهراء من الغرفه وخلت حسين وهوه نايم ...........

>>>>يتبع ان شاء الله

راجع مع جزئين ان شاء الله تعالى
اليله ان شاء الله تعالى
ومع الردود

فقط أطلب العذر منكم
للغيبه للظروف

فمان الله