كسرة خبز .......إجتماعية..

[المميزة]

يعطيك العافية ابو زين
جزء اكثر من رائع
بس صاير يشد الاعصاب
هذا كريم العلة وش جابه الحين ياعليييي في ولد يسوي كدا في ابوه والله ولاد اخر زمن انشا الله يخسر القضية على قولة جدتي جعله ما يربح لادنيا ولا آخرة هع
في الانتظاااار

[king of love]

في الانتظار الله لا يربح كريم لا دنيا ولا آخرة

[أحبك ياغلا عمري]

جزء رائع ومميــــــــز
يعطيك العافيه اخوي وننتظر الجديد

[صمته جرحني]

يعطيك العافية خيوا ع القصة الاكثر من ممتعة


تراني قريت القصة في يومين ///// بدينا بالمهايط جاية متاخر وتتكلم


لاجد بس ليش صارت احولهم بالشكل هذا مو قلنا تعدلت كسرت خاطري مريم وحالتة زوجها مسكينة ماتهنت

وحسين بعد من مشكلة لثانية شراح يتحمل ليتحمل الله يعينة


وهذا كريمو من وين طلع لنا لو يطيح بيدي بس كان علمتة /// مشمرة عن ساعديها ومستعدة للطق


لاتطول علينا في انتضار التكملة

تحياتي

[فاطمة المعصومة]

يسلموووووووووووووووووووووووو
يلا ننتظر الجزء الجديد

[ام فراس]

طولت علينا بالجزء وينك
ننتظر بفارغ الصبر
تحياتي

[واحد فاضي]

أصبح الوضع حساس وخطير في المستشفى

وكريم في الجانب الآخر بعد خروجه من بيت أبوه ذهب مباشرة للمحكمة ليقدم دعوى (حجر )

ووكل محامياً ليتابع له الموضوع واتفق معه على نسبة معينة في حال كسب القضية وأخذ الوصاية

والتوكيل المباشر

في المستشفى اتصل حسين بـ د أحمد واخبره بالوضع ، وجاء د أحمد بسرعة البرق ليستعلم عن اوضاع

أبو حسين وأبو عمران ......وخرج د أحمد الى حسين وأهله ...

د أحمد:- حسين ممكن تجيني المكتب

حسين:- خير يا دكتور بشرني

د أحمد:- انته تعال ويايي المكتب وبتعرف كل شي

أم حسين:- ويش صاير يا ولدي لا تهبط قلبي وقول لي طمنني

حسين:- خلاص اماه با اروح انا ويا ابو إسراء وبا اشوف ويش يقول

أم حسين :- يا ولدي قلبي مو متطمن ، الله يغربل الفلوس اللي تعمي النفوس

د أحمد:- ما فيه شي يا أم حسين ان شاء الله كل شي يصير زين والدكاتره مو مقصرين ووصيتهم على أبو

حسين

أم حسين :- وأبو عمران بعد له

د أحمد :- ووصيتهم عليه بعد لا تخافي ام حسين

حسين:- رحم الله والديك يا ابو إسراء

د أحمد:- ما سوينا شي يا خوك ، ولو كان عندي وقت الحين كان قعدت وياهم بس عندي عمليه

ضروري اكون موجود فيها لأن وضعها حساس ، لازم اراجع بعض الحاجات من بعض الكتب

حسين:- الله يعطيك العافيه وسامحنا اذا فقلنا عليك يا خوك

د أحمد:- لا لا ..لا تقول كده يا خوك هذا واجب علينا

حسين:- والحين نروح المكتب

د أحمد:- يالله مشينا

حسين:- خلاص اماه با اروح ويا ابو اسراء وراجع ليكم ان شاء الله

وراح حسين ويا ابو اسراء المكتب ..........

د أحمد:- شوف يا خوك انا ما امبى اخوفك بس ....

حسين:- بس ويش يا خوك ، تراني ما اتحمل ...قول اللي عندك ولا تغبي عني شي

د أحمد:- يا خوك تعرفني انا على طول دغري يعني ما با اجاملك بعد ، الوضع شوي حساس ويمبى اله

قلب قوي

حسين:- ويش فيه ترى قلبي بيطيح بسرع عجل وقول ويش فيه يا خوك

د أحمد:- بالنسبه لوضع ابوك ...الجلطه أثرت عليه ...وللحين تحت المراقبه وبكره يشوفوا نتيجتها

حسين:- الله يستر ، الله يستر ، الله يلعن الفلوس واللي يتابعها

د أحمد:- انا امبى منك توعدني بشي واحد

حسين:- آمر تدلل ياابو اسراء

د أحمد:- ان شاء الله بكره يصير ابوك زين ولا يعين خلال الاسبوع الجاي ، بس بشرط لا يصير له اي عارض

ولا عصبيه تخلي قلبه يتسارع في الضربات ولا عواقبها ما هي زينه عليه ويمكن تسلبه حياته او بأخف

الاضرار شلل لا سمح الله

حسين:- والله يا خوك ويش اقول لك ، ابويي غصب عنه بيصير عليه ضغط

د أحمد:- لا ويش يا خوك تقدروا تـ........

حسين:- يا خوك ، اخويي الكبير رافع قضية حجر وهيه السبب في هالأزمة اللي يمر فيها الوالد ترى

د أحمد:- افا ، لهالدرجة يسوي الولد في ابوه ، اعوذ بالله

حسين:- وأعظم يا خوك ، اذا صار الولد ...استغفر الله ....

د أحمد:- لا تكمل يا خوك عارف بألمك وحاسس به

حسين:- زين وأبو عمران ويش وضعه

د أحمد:- ما أخفيك ياخوك ، ابو عمران تعبان مرررره بس يعني الشباب بعد مهم مقصرين

حسين:- ويش صار اله يا خوك

د أحمد:- انته تعرف ان عنده فشل كلوي وانه يعتمد على وحدة الغسيل ، وهوه صابه ضغط دم مرتفع ولا

قال للدكتور وتسبب هالضغط في تأزم الحالة اللي عنده

حسين:- الله المعين ، والحين ويش حالته

د أحمد:- ليوم أطلع والدكاتره بعدهم يحاولوا يسووا له غسيل كلوي وتعديل لوظايف الأعضاء وان شاء الله

يتحسن وضعه ، بس هوه اهم شي يحافظ على روحه ويبلغ عن أي شي يصير له

حسين:- هوه اهم شي يطلع من هالازمة على الاقل وبعدين يصير خير

د أحمد:- صحيح الدكتور عطاني هالورقه اللي فيها الجهاز ويوقل لك ان سعره حوالي 30 الف دولار وان اسم الشركة وموقعها مكتوب وخلهم يشحنوا الجهاز بأسرع وقت

حسين:- ما فيه مشكله بكره اكلمهم بنفسي ، اهم شي هوه يقوم بالسلامة

د أحمد:- ان شاء الله ، والحين روح طمن الأهل

حسين:- نطمنهم شوي والله يعين على كريم وسواياه

د أحمد:- الله يعينك يا خوك الحين انت راعي الحمل وانت ابو العايله هذي كلها يا خوك الله يساعدك

حسين:- الله يعطيك العافيه ، ما قصرت يا خوك

د أحمد:- ما يونا الا الواجب واقل من الواجب بس بكره ان شاء الله با اقعد وياكم ونتطمن سوا عليهم فنينهم

حسين:- الله يرحم والديك ويسلمك

وطلع حسين وراح للعائله .......وأول ما شافته ام حسين ........

أم حسين :- ويش يا ولدي بشر عساه خير

حسين:- ان شاء الله خير ، بكره تطلع النتيجه وما نجي الا وابويي صاير احسن ان شاء الله

أم حسين:- وشوه بكره بس نجي ، اني طلعه من هالمستشفى ما با اطلع

حسين :- لاويش اماه ويش بتستفيدي من اقعده هنه ، بدل ما تروحي البت وتدعي اله انه يقوم بالسلامة

أم حسين :- قلت الك طلعه من المستشفى ماني طالعه الا وابو حسين ويايي

حسين:- الله يسلمش اماه ، على شاني ، ابويي محتاج الراحه الحين

أم حسين:- ما أقدر يا ولدي ، هذي الره الفانيه اللي يطيح فيها وأخليه لحاله يعني ...الله يلعن لفلوس اللي

تغير لنفوس .

حسين :- يالله قومي يالله يماه ...وانتين يا أم عمران قومي ويانا

مريم :- اني أقوم ، ما قمت من هنه الا ويانا .........

حسين :- قومي خيّه قومي لا تزيدي المواجع علينا له ...أبو عمران ان شاء الله بيصير خير وتتحسن حالته

قومي وفي الطريق أقول لش ويش في أبو عمران له

مريم :- والله مالي قلب أخليه بس يالله على أمرك يا خوك

وطلعوا من المستشفى والحزن يخيم عليهم كلهم وكيف لا والأحباب مرضى بين الحياة والموت ، وكلوا

أمرهم الى الله العلي العظيم ..........

أما عبدالله الذي خابت آماله في ردة الفعل التي كان ينتظرها من د أحمد فهو يعيش صراع نفسي مع

نفسه فلا هو استفاد من الهجوم المباشر على زهراء وللآن لا يعرف نتيجة ما فعله بـالدكتور أحمد

وأخذ الصراع يداهمه يسويها وينزل التصوير في النت .....ولا يحارس ويشوف ، صراع يرقص عليه ابليس طرباً

ويتقاذف صاحبه ، ولابد للمجرم من خطأ يكلفه الكثير الكثير ..............

زوجة عبدالله وفي اثناء تنظيفها اليومي للبيت لاحظت بعض الاوراق وسيدي ملفوف بعنايه موضوع في مكان

غير متوقع ، أخذت الاوراق وبدأت في قراءة محتواها ................صدمة أفقدتها توازنها حتى لم تعد تدري

ما تفعل .........ضمت الاوراق وقررت أن تشاهد السيدي ...لكن متى

-- افضل وقت هوه يوم هالعبدالله يطلع المغرب ، ما يرجع الا آخر الليل ولا اله خلق .....

لكن هي ما ربطت أي شيء في رأسها بالأحداث التي صارت في الأيام الأخيرة ، صديقتها تغيرت عليها في

الفترة اللي راحت ، أقول ليها تطلعي السوق تقول لا أمبى أقعد ويا البنات ، كلمتني عن مشكله بس ما

كملتها ويايي ، وأني مستشارتها الخاصة .........ويش فيها تغيرت ما أدري ........وهالإسم زهراء وين

سامعتنه أني ...وين ، وين .......ما اتذكر الحين بس أكيد سامعتنه .....يالله ما عليي بس الحين أمبى

أعرف ويش فيه السيدي هذا وويش مسوي هالرجال اللي مهو آدمي

يالله با أحارس لامن يطلع وأشوف ....تصبري يا صقعوووه لامن يطله رجلش له ......وجلست تنتظر

وطال بها الانتظار ..........لأن عبدالله هاليوم رايح عقله من التفكير ، وشوي يطلع وشوي يدش

وهيه تحارسه يطلع على عادته ........وصبّرت روحها لامن جاها الفرج ...........ومن طلع وتأكدت انه

مشى بسيارته ...على طول شغلت السيدي بعد ما قفلت الباب وخلت المفتاح في القفل .......

ولم تتحمل ما شاهدته ..................( ولنا عودة هنا بالذات )

محمود بعد ما مشى من عند د أحمد قعد يفكر في عبدالله هذا .......

...معقوله هذا عبدالله يسوي كده .....ولاويش وهوه مهو محتاج لشي أبداً ........لعن الله الشيطان

صدق الكلام اللي لول نسمعه .....الشيطان يزين لك كل شي ويلبسه احلى فياب ومن تخلص من هالشي

تتمنى انك ما لمست حاجه ولا سويت حاجه .......بس تعود مره فانيه وفالفه ........... عبدالله يسوي كده

وهوه الهادي واللي ما يبين عليه .........الله عليك يا عبدوووووه .......إهدى يا محمود اهدى وخلك رزين

مو وقت تعصيبه الحين ..........اوووه نسيت ما اتصل بحسين بعد

واتثل بحسين مره ومرتين وفلاف بس ما فيه جواب ..........ويش فيه حسين بعد ......الله يستر .....يالله

ارسل له رساله ..........( أخوك اتصل بي ضروري ضروري ...في أي وقت ).......

وراح لشغله وهوه يفكر في هالمصايب اللي تتحذّف عليه من كل جهه ............


وانتظر اتصال حسين وباله مشغول ..........وجاء الاتصال من عند فاطمه ..........

الوه ...نعم فاطمه .....وشو ......متاه ........الحين جاي .....خلاص غناتي العصبيه مهي زينه

الش .....خلاص له .........خلاص دانا جاي يا غناتي ..........دقايق وأنا عندش .......

>>>>يتبع ....ومع الردود أيضاً ان شاء الله

[المميزة]

يعطيك العافية ابو زين
ياعلي صار يبى ليي كل ماقرا القصة اخلي جنبي علبة الكلينكس
بس بصراحة الجزء روووعة صحيح انه كله مصايب >> اسكتي بلاجلة حياء
بس تسلسل الاحداث اكثر من رووعة
وانشا الله زوجة عبد الله تتلف السيدي وتقهر هالعلة الله ياخذه
وكريمااااو الله لايوفقه جليل الحياء بيقتل ابوه من القهر هذا ولد هذا >> سدي حلجج جدتي هع
مرة ثانية يعطيك مليون عافية
وفي انتظار بقية الاجزاء

[أحبك ياغلا عمري]

مشكوووووور على الجزء
يعطيك العافيه

[صمته جرحني]

يسلموا ع البارت

بس حرااااااام كلة مصايب الله يعينهم

في انتضار التكملة

[أمينه]

الله يعطيك ألف عافيه أخوي

في إنتظار البقيه بفارغ الصبر

[أبصرت النور]

يالله اني كل يوم استنى البارت اتنزله ولا اشوف شيء متحمسه طولت القصه ما ليها نهايه ليكون فلم مدبلج
استناها اتخلص عشان بقرأ قصه جديده لا اتخربط ويضرب مخي

[eman.7]

يعطيك العافيه ننتظر ...............



تحياتي

[مجنونة وحلوة]

تسلمي خيـــتو
على القصة
اعجبتني كثير
**تحياتي**
$$مجنونة &حلوة $$

[eman.7]

متى تنزلها بسرعه ملينااااااااااا



تحياتي