..................................
العصر في بيت العمه ابتسام (أم عبد العزيز)
اللي كان جالس بالصاله أم عبدالعزيز ومحسن وهنادي

محسن ويكلم أمه: أماااااه وينهي ندوه صاير ليها أكثر من أسبوع ماتقعد ويانا ولا تتغذى حتى ماتسولف, جه مريضه..!!
أم عبد العزيز: وش دراني عنها أني, بس أمس سألتها وش فيش قالت رأسها كله يعورها وماتحب تقعد ويانا وفروحوه موجوده لإن تقول بيزيد عليها
محسن ورفع حاجب: الله يالدنيااااااا, الحين ندوه المزعجه هالهداره دي اللي صراخها وهدرتها توصل لأخر الدنيا الحين ماتحب الإزعاااااج, سبحان اللي يغير ولا يتغير
هنادي: افففف محسنوه خلنا نروح بيت خالي والله ملل
محسن: لإن أنا فاضي لش, مكلف بمللش أنا, انقلعي خلي عزيزوه يوصلش
أم عبد العزيز: وانته ويش عندك ماتوصلنا هيه, وش ناقصنك, سياره وعندك وش من عذر بعد..؟؟؟
محسن: أماااااااه أنا مواعد أصلاً أصدقائي أبطلع وياهم, تمبيني أكنسل الطلعه عشان ست الحسن والدلال هناديوه والله ماسويتها
هنادي وتخصرت: ماعليه لكن اللي يعطيك وجه هالمره ويسوي لك باستا, ارويك لكن يامحسنوه الزفت
محسن تنرفز: مااااااااالت عليش من زينها باستا جب جب جب اللي يشوفش يقول الشيف رمزي
هني جئ عبدالعزيز ودخل عليهم الصاله: السلام
الكل: وعليكم السلام
هنادي بمصلحه: هلا وغلا هلا بالغالي هلا ومرحبا بسندي بأخوي الكبير, عساااااااك على القوه يالغالي (وتناظر محسن تقهره)
عبدالعزيز وجلس وياهم: هلا بيش, ويش هالإستقبال الحار أكيد وراش مصلحه (وغمز ليها)
هنادي وحكت رأسها: ايه امبى منك شي (وبتردد) امباك توديني بيت خالي
عبد العزيز وضحك: هههههههههههههههههههه كل هالمصلحه وهالإستقبال عشان توصيله أما أنش نكته هههههههههههههه جان طلبتيها بدون ماتتعبي نفسش بهالف والدوران, خلاااص عشر دقايق وأجهزي
هنادي وفرحت: يسسسسسسسسسسسسس
فرح اللي كانت تلعب يو اس بي: اني بأد بالوه (اني بعد باروح)
هنادي: لا تحلمي واجد انجبي ما بأخذش
فرح وبرطمت: ليث (ليش)
هنادي: لا والله مافي قعدي ويه امي مالي شغل بش
فرح وخلاص على وشك دموعها تطيح: امبى ألأب ويه هثن (امبى ألعب ويه حسن)
هنادي وتنرفزت: انقلعي منااااااااااااااااك فاضيه لش
محسن: هي ترى مافي روحه اذا ما أخذتي فروح
عبدالعزيز: ليش ما تمبيها تروح وياش..؟؟
هنادي بقهررر: لإن باحط دوبي ودوبها: فرح عيب, فرح هذا غلط, فرح لاتسوي شطانه, فرح وفرح واني بصراحه أمبى أروح أخذ راحتي مو أقول جوزي وهوني
فرح وطاحت دمعه من عيونها: أوأدث ما أثوي ثتانه (أوعدش ما اسوي شطانه)
أم عبدالعزيز: يلااااا عاد هناديوه أخذي أختش وياش
هنادي: افففففففففف انزين (وراحت فوق تسأل ندى إذا بتروح وياها)
.......................................
في بيت أم مازن..
كانت ريناد قاعده بغرفتها وضااااايق خلقها موووووت
ماحد معاها أمها ومستحيل بتقعد وياها لإن بكل بساطه مستحيل تفتح وياها مواضيع بنوتيه وهي مو من عمرها فـ ماراح تستفيد شي
ريناد: اففففففففففففففففففففففففففف والله زهق لو مدرسه أهون أقلها نقعد مع بشـــر ونسووووولف, ياربي ويش هالعيشه دي, عطله على الطل الناااس تسافر وتروح وتجي واني منلطعه هنــي, ماقول غير مالت عليي
ماليي إلا أرووووح لزهرو اني وعدتها أروح ليها
خلاص ابقوم اتجهز وبتصل لخالي رضي يوصلني

(( ابقوول لكم نبذه مختصره عن الخال رضي أخو أم جاسم وأم مازن
اسمه رضي عمره 39 سنه متزوج وزوجته مره طيوبه وحساسه بنفس الوقت أسمها سوسن وعمرها 31 سنه طبعاً ماعندهم أولاد وصار ليهم متزوجين فوق الـ 8 سنوات بس الله ماكتب ليهم وهم صابرين ومتحملين وينتظرون فرج رب العالمين عليهم, هو المسؤول عن عائلة أم ريناد بما إنه ماعندهم أعمام, طيب ومتفاهم ويحب ريناد موووت ويعتبرها بنته, أما مازن فما تعجبه حركاته ولا حتى أسلوبه وتصرفاته ودائماً ينتقده بس يحبه ويدعي له بالهدايه ))

ريناد أخذت جوالها ودقت على زهره
ريناد: هاااااااااا يالخايسه ياللي ماتستحي على وجهش
زهره: بل وش صاااااير
ريناد: ماكأنه عندش صديقه تسألي عنها, (وقالت بمزح) ياخساااااااااارت شبابي اللي ضيعته عليش انتين وفطمووووووووووه الخايسه
زهره من سمعت كلامها فطست ضحك: نايبه اللي يشوفش عجوووووووز بينش وبين الموت شعره, وبعدين يالخايسه أشوفش انتين اللي حارقه جوالي وإلا تلفون بيتنا أتصالات
الجده وفلصت زهره بما إنها قاعده جنبها: جه ويش فيها العجوز هيه مو ماليه عيونش جــــــــه
زهره وشالت الجوال: هداويه أماااااه ويش فيش أنتين, أني ماقصدش اف (وحطت جوالها من جديد) هااااااااا ويش تمبي
ريناد: ماعلينا ويش عندش بعد نص ساعه هع هع هع باجي لش
زهره وفرحت: قولي والله حركاااااااات خلاص أنتظرش
(وصارت بينهم سوالف وعلي محترق ومستانس على إن يفتكر فاطمه هي اللي بتجي بيتهم وبعدها سكرت)
زهره بفرحه: ايمانوه سوي ليي كيكة بلييييز بتجي صديقتي
علي ونط في السالفه: أي صاحبه فاطمه لو ريناد..!!
زهره بخبث: فطوووم
ابتسم علي ابتسامه عررريضه وهو مايدري بنوايا أخته
زهره وفيها الضحكه: اووش أقصد رينادوه الدبه
علي ورفع حاجب: اهاا اوكي أنا بطلع غرفتي بنام ليي شويات (وراح)
زهره هني خلاااااااااااااص تأكدت من مشاعر أخوها 100% بس باقي تتأكد من فطموه نفسها
..............................
هنادي وتحاول في أختها تروح وياها
ندى بعصبيه: اففففففف مابروح
هنادي: إلا مافي بتروحي
ندي ووصلت حدها: أقولش مابروح غصب هي
هنادي بخبث ومكر: يمكن تشوفي الحُب هناك بالغلط
ندى برتباك: أي حُب واي خرابيط
هنادي ودزتها: علينااااااا ندوه وجسوم وين راح (وغمزت ليها) ترى مكشوفه انتين على فكره لاتفتكريني هبله ما أفهم عليش, من يوم أحنا صغار وانتين تعشقيه وأخر مره يوم يجو بيتنا ولما نزلتي بالغلط وشافش وشفتيه كيف كانت حالتش وقتها, كل هذا واي حُب واي خرابيط
ندى وعصبت بقوه: هناديوه انقلعي عن وجهي بلا تفاهات
هنادي بترجي: تكفي ندوي تكفــــي طلبتش مابي اروح بروحي أمباش ويايي
ندى وصعب عليها أختها: أنزين انقلعي بقوم ألبس
هنادي بفرحه: اووووووووووكي (وطلعت)
....................................