المشاركة الأصلية كتبت بواسطة ms.beeboo
المشهد الأول :
في المدرسه ...
المعلمة : أين واجبك
الطالبة : ببرود وتعوج فمها : ماحلييييت
المعلمة : ليش ماحليتي
الطالبة : كان عندنا ضيوف ومامداني
المعلمة : طيب ذاكرتِ الدرس السابق
الطالبة : لا طبعاً
المعلمة : ليــش
الطالبة : لأني كنت غايبة
المعلمة : كنتِ غايبه هذي مشكلتش مو مشكلتي .. كنتِ غايبه لازن تستعدي لليوم الدراسي . والمدرسه مو للتسلية واهمالك لدروسك راح ينزل من درجاتك وبالتالي يؤدي الى سقوطك ان استمريتِ على ها الحال ...
الطالبة : بطريقة غير مهدبه .. اوووووف
المعلمة : اشوف الكلام كأنه مو عاجبك
الطالبه : ايه مو عاجبني لأن ماعندش الا اني حاطة دوبش ودوبي .
الطالبة : مافيه بيني وبينك أي شيء عشان احط دوبي ودوبك وأنا ادور على مصلحتك .. وأسلوبك هذا مو أسلوب طالبة مهذبه وعشان كذا بكره لازم تجيبي ولية امرك ..
المشهد الثاني :
البنت تدخل على امها وهي تبكي وواضعه يديها على عينيها
الطالبة : ايه... ايه ... ايه ...
الأم : ( تضرب على صدرها ) دهتني يني .. خـــداج خـــــداج ويش فيش خلف ابويي
الطالبة : اماه خلاص ماني رايحه المدرسه
الأم : الاواه ياغناتي
الطالبة : المعلمه حاطه دوبها ودوبي
الأم : دهتها النايبه .. ولاوا حاطه دوبها ودوبش
الطالبة : كل الطالبات تعاملهم معاملة عدل إلا أني من دون البنات هزأتني
الأم : لاتصيحي ياغناتي .. لاتصيحي يخداج أني بكره اروح المدرسه وأشابقها قدام اللي يسوى واللي مايسوى ... أكيد تغار منش ها المعلمة .. عجل الاوا حاطه دوبها ودوبش ..
الطالبة : ايه اماه شابقيها
الأم : اشابقها .. ام الخضر والليف هذي .. تحسب ان ماوراش احد ..
الأم بتوعد :(أني اراويش فيها )
المشـهد الثالث :
الأم تحضر مع البنت في المدرسة وتقف أمام الباب وتخلع نعليها الزنوبتين وتجلس... وترفع يديها الى ابنتها وتقول : روحي ناديها .. روحي قولي اليها امي على الباب تحارسش
الطالبه تطرق الباب بتعال وقبل ان تتكلم تخاطبها المعلمة : اين ولية امركِ؟
الطالبة تذهب الى الأم وتهمس في اذنها والمعلمة وراءها ..
ووتتكلم الأم بصوت عال : وينهيه المعلمه ؟
الطالبة : داهيه اماه .. عندش اياها .
الأم تفز من مكانها وتحيي المعلمة تحيه حاره وتحضن المعلمة بباعين طويلين .. والمعلمة واقفه
ألأم : الاوا يخلف طوايفي تشابقي خداج وحاطه دوبش ودوبها .. مو زين عليش من الله ..
المعلمة : تفضلي اولاً ياأمي العزيزة ..
ثانياً انت ليش جايبه خديجة المدرسه ..
الأم : جايبتنها عشان تتعلم عجل الاواه جايبتنها !!
المعلمة : لاكن خديجة ماتبغى تتعلم وماتحل واجباتها ..
الأم : لا ياغناتي اني بتي على طول تذاكر وتحل الواجب .. هي قيلة ليي
المعلمه تنادي خديجة ...
المعلمة : ليش امس قومتش ..
تطأطأ البنت رأسها خجلاً
المعلمة : هل قمتِ بحل الواجب
الطالبة : لا
المعلمة: ها ذاكرتِ الدرس السابق
الطالبة بخجل : لا
المعلمة بانتصار.لقد سمعت كلام ابنتك بنفسك..فكيف تريدينها ان تنجح..
أنا قصدي حينما أشد علها أن تهتم بمذاكرة دروسها والا فكيف تريدينها أن تنجح..
ألام تضع يديها على فمها وبخجل:يوه دهتني النايبة.
ونتيجة لأبنتها:فسل الله حضش يخدجوه..فشلتيني ويا المرة..
وأني جاية بشابقها فكرتها ماتشتهي بتي .. اتاريها تهتم بمصلحتها اكثر مني الا طايره من بيت الى بيت .. ولو اني اراقبها تذاكر ولا لأ كان عرفت ان بتي ترى اللي مايعرفك مايقدرك .. وبصراحه بتي حطتني في موقف مستحيل انساه طول حياتي ..
تخاطب الأم البنات قائلة : يابناتي اسمعوا كلامي وقبل ماتشتكوا على معلماتكم وتحطوا أهاليكم في مواقف محرجه لازم تحاسبوا نفسكم .. والله فشيله والله فشيله..
تح ــيآتي
السلام عليكِ أختي ms.beeboo المسرحية عيشتني اشوي في جو إمي الگديحيه الله يرحمها
و المسرحيه كاملة و شاملة من ناحية التأليف و المغزى الثقافي و التعليمي و لعلها تصلح أن تقال على خشبه مسرح
و لا أنتقدها لغويا لأني لست مخول في ذلك، و لو أنا اللي مؤلفنها يمكن ما أباجيد حباكة اسلوبك الجميل اللي رأيته في نظري ناجح
بس وجدت إنش إن كنتِ اكديحية الأصل فأنت أكيد ناصرية الرباء و ما عرضتيها على جدتش أولا، لأن كثير من المفردات القديحية فيها خانتش، و خلينا ناخد عينه:
حلييييت = تستوي حلااايت
كان عندنا ضيوف = چان عدني اضيوف لأن أهل "الگديح" يكسروا آخر الكلمه
كنت غايبة = كنت غايبي
دهتني يني = أول مره أسمعها تنسب إلى أهل الگديح
خلف أبويي = خلف إمي
أني بكره اروح المدرسه = أني باچر أروح المدرسه
هي قيلة ليي = هي كالت ليي / أو كايله ليي
اللي مايعرفك مايقدرك = ما ايكدرك أو ايفمنك
اتاريها ما هي اكديحيه = عفاريهي
و الكثير من التحريف في الحروف لازم تتغير مثل كل حروف الـ قاف لازم تتحول إلى [ك]
و حروف الكاف إلى [چ]
و الثاء تتحول إلى فاء كما في: اكثر = أكفر مفلا
و يخدجوه = يخجاااااوه
بشابقها = بشابكها
اراقبها = اراكبها
معلماتكم = معلماتكِم
و أين المفردات: عفر، و حك واه، و عصار واه و غيرهِم
مثلا: الاوا يخلف طوايفي تشابقي خداج وحاطه دوبش ودوبها
اتصير:الاواه يخلف إمي تشابكي خداج، وحك واه حاطه دوبش ودوبها، چيه، عفر ما عندش الا هيه
و كلمة عصار واه اختفت تماما من الديره و هي تعني عجل ويه بالگطيفي
و سامحيني بتي على اللقافة و الدخول في عرض الموضوع لأن اللغه يجب أن تكون لغة إمِي لكديحيي و كما قلتِ [الكديمي] و إلا فماهي اكديحيي و لا هي كديمي
و السموحه بتي ms.beeboo مرة أخرى
رد مع اقتباس
المفضلات