اللهم صل على محمد وآل محمد وعجل فرجهم ياكريم...


في هالمتصفح راح اكون اكثر من صريحه.. واتمنى كل من يرد على موضوعي
يحكم ضميره في البدايه ويواجه بصفحه بيضاء ويعترف بأخطاءه.. مو على شان ناخذ عنه فكره.. لا..
على شان يعاهد نفسه ما يكررها و يحسن من ذاته للأفضل..

سؤال اطرحه في بداية نقاشي..

اين نحن من مأتم ابي عبدالله الحسين عليه السلام..؟؟
موقعنا فيه بالضبط ويش يكون؟؟
متفرج !!
مجرد مستمع!!
متفاعل مع المصيبه !!

عدة امور توضح موقعنا..

المتفرج.. هو اللي مايدري الله وين حاطنه.. بالمختصر ( مفهي ) بمعنى:
صاحو .. باصيح.. لطمو .. بالطم.. لا تستغربو .. فيه من هالصنف في كل مجلس ..
ممن همهم البركه .. ويطلعو لك بعدين من المجلس.. بركة بيت فلان مو زي بيت فلان.. او..
كل يوم بيت فلان بركتهم ست رول ابو نص ريال..
عجيب !! همي دبتي يعني ... الله يبارك فيها ويزيدها كمان وكمان..

الصنف الثاني .. مجرد مستمع .. بدون أي تفاعل.. متناسيا (( من لم يبك على مصاب الحسين فليتباكى )) بمعنى الحديث..
سبحانك ربي .. ابدا ما يحرك ساكن... بس خله يحدث موقف ظريف لو بالصدفه ما مانع و ضحك لك لو فرد بوزه شبرين بأبتسامه عريضه..
ماعلينا .. الله يهديه..

البعض .. يجيك ما يحترم اداب المجلس...
منها مسالة الجوال..
فمايحط جواله عالصامت.. حتى مع الحث على فعل هالشي..
وتجيك اعذار ..
مثلا مجلس نساء مرتبطين بمجلس الرجال باي وسيلة اتصال..
يجي قبل محاضرة السيد او الشيخ..
ياجماعه جوالاتكم عالصامت..
تجيك الحريم.. لا بس الرجال عالصامت لأنه يتضرر المايك
!! صحيح !!
ليش وهو عالصامت ما فيه ذبذبات ..!!

صامت ليش !؟
على شان لا يلهي المستمعه بأتصالاته ورناته..
معروفه النفس البشريه مفطوره على الفضول..
رن جوال تلاقي كل الروس تلتفت لمصدر الصوت..

الأعظم اذا رد على المكالمه في وسط المحاضره..
احترم اللي يخطب قدامك وتقيد بأداب المجلس شوي !! \\ طبعا كلامي للنساء والرجال على حد سواء..

رحم الله من ذكر القائم من آل محمد فقام..

تتعثر لك بأثنين لو ثلاثه مبسطين مايقومو !!
ليش ,...؟؟
بتعبكم القومه.
والا في دعاء الفرج لولينا المنتظر ..
يدعي وهو مبسط..
ليش !! ماتدري ان من اداب الدعاء القيام واستقبال القبله..؟؟
ما تحترم وليك ووصيك وحسين زمانك بالوقوف ليش..!!
بس في المدرسه اذا بتجاوب على سؤال ترز طولك.. لكن للأمام عليه السلام.. قاعد..
ما شالله ...
القيـــام و الأنحناء مقرون بذكر القائم عجل الله فرجه كما الصلوات مقرونة بذكر محمد صل الله عليه وآله..


انسان ما يقوم ويقدر عظمة امامه لدى ذكره .. وين ينصره ويتحمل المشقه في سبيل الحق .. وهو اقلها ما يقوم ..


(( مممم خايف على المكان عفر )) !!


الوقووف له ثواب لا يعد ولا يحصى..
سواء مع دعاء الفرج..
او بذكر القائم للقيام..
او مع المصرع..
لا عظمة كعظمة الوقوف..
استثني اللي ليهم ظروف واحكام خاصه.. ويخشى عليهم الضرر من هالوقفه..


واللي يتضايقو ويتأففو من الزحمه.. و ما عندهم استعداد للأزاحه والتوسيع ولا بقدر سم واحد..
ليش عاد.. !! خل اخوك يشاركك المصيبه ولا تحرم نفسك الأجر بهالتضايق..

يجيك واحد.. متربع وفارش عمره ولا بعد يمد رجوله.. لا هو شايب ولا مريض ولا همك الله..
وفئه تجيب كراسي,, عاد واقف عادي .. لو تبع الرحلات هاللي بدون رجول..
ويسدحه عالأرض .. افترش لك مساحه.. طيب وبعدين... ؟؟

مايمدي احد يقعد جنبه ولا وراه.. من برودة الحديد في هالجو .. وفوق هذا الحديد يضايق ..
ماعليه فيه ناس ما تتحمل وتحتاج لهالقعدات ولهالكراسي ..

بس اذا شفت شباب وخصوصا الحريم .. البنااات.. كل وحده جت بكرسيها ..
احم ... وقعدت ولا هامنها... دلاعه صراحه اعتبرها و انانيه ..
وتصيح بعدين..
نأتيك زحفا يا حسين..

بكرسيش عفر بتزحفي ..!!

والا الأشكال واللبس اللي اني بنيه تلفت نظري مو بعد رجال !!

ابغى افهم حجاب ابو نفخه وشفايف ورديه كنها ماكله بوظه لو شاربه فيمتو .. وكرستاله في الخشم..
هذي وين موقعها في مجلس ابي عبدالله الحسين !!؟؟
وتالي تسمع صرختها..
لبيك ياحسين..

الحسين بريء من هيك اصناف..
و حسين زماننا المهدي ما يحتاج هيك لنصرته.. !!

او اللي ولادها كلهم معاها.. وتجيك في وسط المجلس .. هذا يصارخ وهذا يهدر وهذا رايح وجاي وشوي ينداس بطنك منه..

يا اميروه ويش فيش على المسكينه...؟؟ويش تسوي بعد هالأم ..تبغى تتسمع..!!



لا عااااد هذي مهي حجه.. تلم اولادها.. تعلمهم اصول المجلس.. تضبطهم.. اذا ما يفيد اللهم ادفع البلا ..
تقعد معاهم في مكان بعيد عن اكثر المستمعه لا يحوشهم ضرر .. مو في وسطتهم..!!

سلبيات كثيره اللي نشوفها في مآتمنا
ما تنعد.. اللي يذكر موقف يشاركنا فيه لعل راعيه يقرأه ويبطله المرات القادمه..
بس هذا فيض من غيض..
والله يكون بالعون..

كلامي هذا بهدف النصيحه لا التقريع والتهزيأ

ان كنت عازما على التغيير
فعفى الله عما سلف ان كان تصرفك ايها القارئ مشابها لما ذكرت..


وهنيئا لمن اخذ ثواب كل مجلس وراعى ادابه وحق الله واوليائه والناس فيه..



لا للهروب هنا..
نعم للرد والمواجهه..

و وفقكم لكل خير
دمتم بحفظ الرحمن