وســـــــــام
رميت كورة الطائره بقوه..مسكين فراس جات في وجهه:هههههههه..أنت مو حق لعب
خفت وأنا أشوفه يفصخ نظارته بحذر..مريت من تحت الشبك الفاصل بين الفريقين:صار لك شي؟؟
فتح عيونه وقال:وش هالعب وسامووه..كسرت عدسه نظارتي(رفع يده)..أنا أنسحب..مقد أكمل
سعود بسخريه:والله أن عقلك يوزن بلد يا دكتور..أحد يلعب بنظارته..هههههه تفكر نفسك في غرفة العمليات!!
شال وائل يده من على خده وقال الى فراس:الغلط منك..احد يلعب مع ناس أقل منه مستوى..شوفني جالس أتفرج.
سعود بغرور:صح عليك يا وائل..أجل في أحد يلعب مع أولاد يدلعوا مثل البنات(يقصد فراس)..والله ناس تبسموا ومن زود الوناسه يلعبوا بدون ما يركزوا>>طبعا يقصدني
ااااااااااه لو تدري يا سعود وش فيني كان ما حكيت..صحيح أنا أصغر منك..بس شكلي رح أجرب الزواج والحب قبلك..مدري أمي الحين فتحت الموضوع مع أم محمد والله لا..ياخوفي تقول المكان مو مناسب..ميعاد دخلت مزاجي من يوم أشوفها في حديقة بيتنا..جاء على بالي أحاول أشوفها اليوم..بس تعوذت من ابليس..وحسيت هالحركات أنا كبير عليها..خلاص كلها كم يوم وتصير زوجتي..هو في وحده تقدر ترفضني!!
صحيت من أفكاري على صوت وائل يسأل عن الساعه..جاوبته أسكته:خمس وكم دقيقه
طلع وائل جواله من جيبه:صار لي ساعتين أدق على ناصر ما يرد..هو قال أنه رح يجي لنا المزرعه..بس جواله كله مغلق!!
رد فراس وهو يلعب بالرمل برجلينه:يمكن أنه نايم..ناس وايد أيام أجازتهم ياخذوها نوم!!
لفيت وجه وائل:يالغالي وش جايك على الرجال؟؟
حسيت في رده العصبيه:يعني ما تشوفه؟؟كيف جالس لوحده..هالمغرور مع نظراته..كأنا قدامه حشرات
رفعت كتوفي وأنا أبعد خصله من على عيوني..وأحط يدي على غصن الشجره:اللي مو فاهمته..ليش جاء؟؟
أنسدح فراس على رجل وائل:يمكن خواته أصروا عليه يجي!!عشان كذا هو مقهور.
دورت محمد وسعود بعيوني..وأنا توني أنتبه من عدم وجودهم:وين راحوا الشياب؟
قام فراس وهو يتثاوب:شكلهم دخلوا يشوفوا المباره..الحين رح تبدى!!أنا بقوم أدخل أنام(أشر لنا بيده وراح)
جلست على الكرسي الخشبي اللي بدون مسند جنب وائل وحطيت يدي على كتفه:وش فيك ياخوي..اللي يشوفك ما يقول هذا خطيبته (وغمزت)معاه في نفس المكان
حسيته مكتئب وماله خلقي..حتى اجوبته يا معصب يا يسكتنا فيهم..طلعت جوالي ودقيت على فجر:هلا فجور..أنتي وين..زين معاك جود؟؟..طيب قولي لها وائل يستناها عند ملعب الطائره..ايه الحين..يالله باي
لف علي وهو مقهور:ليش سويت كذا؟؟
وقفت وسحبت خشمه:ياغبي لا تخلي(أشرت على فيصل) وجود مثل هالاشخاص..يقهرك..عيش حياتك
مشيت شوي ولفيت له:من قدك ياخوي..أبتسم بس لا تخلع البنت من تكشيرتك
وما كملت مشي لين شفته أبتسم
..............
فجــــــــــــــــــــــــــــــر
جات ميعاد المربوشه تسحبني من يدي..وقطعت سرحاني في فراس..كنت متأزمه صار لي فتره مو قصيره وأنا أحبه..وللحين ما يدري..أبي أسوي شي يحسسه بحبي له..ااااااااااف كم مره عطيت نهى هدايا ورسايل توصلهم له..شكل هالرجال ما يفهم..أو يمكن ما يحبني..لازم أشوف طريقه..وأسمع بنفسي أنه يكرهني..بس لا مابي أسمعها..أخاف يصير لي شي..بعدين كيف أكمل حياتي بدون شي..على الاقل أفكر فيه؟؟وأحلم بالمستقبل معه..ربي جاب هالمربوشه وأنهت هالصراع النفسي اللي أعيشه
ميعاد وهي تجرني:تعالي..عندنا معك موضوع
سحبت يدي وقلت وأنا أغطي شعري بحجابي اللي طاح:زين بس خفي على يدي شوي
أخذتني وين ما جود جالسه..وهنا حسيت بالفرحه..يمكن جايبيني يقولوا لي أن فراس يحبني..بس في داخلي أقول..والله أنك خبله يا فجر..وتفكيرك طفولي حيل
جلست وأنا أتنفس بقوه..ورفعت يدي الى السماء:يا جعل رجال يجي ويسرقك في ليله مضويه يا ميعادووه..هلكتيني يا غبيه!!
ميعاد بتهديد وهي تقلد حركاتي:شوفي..اللي أوله شرط أخره سلام..مو تجلسي طول الوقت تأشري يمين يسار بيدك..لو ترى من الحين أربطهم..فهمينا السالفه بدون حركات
كلمت جود وأنا أسوي نفسي أحقر ميعاد:وش فيها هالبنت..أول ساحبتني باقي شوي ويدي تنكسر..وبعدين تهدد!!
مسكت ميعاد دقني وقالت بهدوء:نبغى تعلمينا بحقيقة عمتنا هدى؟؟؟؟؟؟؟
بلعت ريقي وأنا أحس حلقي جف وقلت بهدوء:حقيقة وشو؟؟
حسيت أن المكان هدوء..ما عداء صوت ضحكات عبود وهو يلعب..وميعاد تاخذ رمل من على الارض وتحطه على حضني..كنت أشوفها بس مو مهتمه..تكلمت بعد دقايق كأنها سنين من الصمت:تذكري أخر مره نجي فيها بيتكم؟؟
هزيت راسي لها بصمت وكملت:رحت أنادي عمتي هدى من غرفة وسام..لما دخلت لقيت الغرفه ظلام..أفتكرتها نايمه..توسطت الغرفه ولقيت لاب توبها على السرير..ومدري ليش جاني فضول..رحت وشفت على الشاشه صفحة نت تتحمل..لما تقربت شفت(ناظرت عيوني ثواني وقالت)..شفت يا فجر أجسام عـــ ـــاريه..شفت شي ما ينشاف(تنهدت ميعاد وقالت)أنتي يا فجر أقرب وحده لها..أنتي اللي تاخذينها الطبيب..أنتي اللي تزوريها..فهميني الموضوع؟؟
لما قالت أجسام أرتحت..وكأن شي ثقيل على كتفي وأنزاح..كنت خايفه أنها شافت صورها لو شي..بس أشوا شافت الغير مو هي!!!!!!!
هذي ميعادوه داهيه..وأكيد مرح تترك الموضوع يمر كذا..لما حسيت الثقل على رجلي ناظرت في رجلي وأنصعقت..وقفت وأنا أبعد الرمل عني:الله ياخذك..عبيتيني رمل!!
فكت جود حجابها..وحركت رقبتها يمين ويسار..تحرك شعرها:جود!!وش فيك؟؟كأنك تعبانه.
حركت راسها بالنفي وقالت:لا بس أفكر في عمتك..وفوق كذا مدري ليش عيت تجي معنا..وجلست بالبيت لوحدها
جلست وأنا أحرك يديني ومعصبه:جود..وش قصدك..أكيد قصدك أنها ما جلست الا على عشان يفضى لها الجو..وتسوي اللي تبي
غمضت جود عيونها..وكأنها توقفني عن الكلام..بس بعدين حسيت بيديني وحطيتهم بحضني وأبتسمت بخفه:مقدر عليك..خايفه على عيونك..خلاص مرح أحرك يديني!!
ساد الصمت..وتنهدت وقلت:صدقوني مدري وش أسوي معاها..عمتنا..يمكن اللي سواه جدي أثر عليها
قاطعتني ميعاد بعصبيه:كل الناس تصير عندهم مشاكل..كلنا يمكن يجي يوم ويدمرنا..المفروض في ذي الاوقات نتقرب من ربنا..ننسى الماضي بشي يفيدنا..مو نعصي ربنا..فجر أنتي وش تقولي!!
ظليت على هدوئي وكملت:كذا مره أخذها لدكتور غصب..بس هي تعاند وما تشرب الادويه..ولا تسمع كلام الطبيب..كذا مره تشكي لي..هي ما ودها تسوي كذا..صدقوني انها تزعل من نفسها..وحاولت تترك هالاشياء عنها..بس صار أدمان بالنسبه لها
حطت جود يدينها على وجهى:يا دافع البلاء..عمتي تمشي الى النار برجولها..يارب أنك تهديها
نزلت رقبتي على الارض:لا تنسوا أنفسكم..عمتنا كانت محتاجه حنان..محتاجه أنفس أرواح قلوب توقف معها..تساعدها تتخطئ محنتها..بس كلكم تركتوها..لين شافت شي يعوضها عنكم..لا تعاتبوها والسبب أنتم!!!!!..لو سمعت يا ميعاد..أن هالكلام واصل الى أحد غيرنا..لا تلومي الا نفسك
وقفت وأنا معصبه منهم ومشيت رايحه مجلس النساء..في هالوقت دق علي وسام..قفلت منه..ولفيت الى جود بدون نفس:جود..وسام يقول أن وائل ينتظرك عند ملعب الطائره
...............