انين .. ويش سويتي فيني؟؟
تدري دخلت الموضوع وما دريت مين العضويه؟؟
وعلى طول صرت اقرا القصه واني متأثره..
كنت افطر وقفت اكل وصارت عيوني غرقانه دموع...
احس هالشخصيه اللي تتكلمي عنها اثرت فيني وشي قريب مني ..
وشوي يوم اوصل للنهايه..
ومازال انين قلبي عايش على ذكراك...
وعبدالله عيسى..
جتني غصه ,, وقلبي صار يدق بالسرعه..
ركبت فوق ..
اشوف مين العضويه..
انين القلب..
يعني المقصود فعلا قريب مني..
خالي الحنون .. الله يرحمه.. اللي على خبرش ما تعلقت في واحد من خوالي من فتره الله يحفظ له شبابه الا لأنه كان يشبهه في الأخلاق والشكل شوي
بس .. صراحه..
ماااحد مثل المرحوم في طيبته وحنانه واخلاقه ..
عايشين في سيهات.. وعلى خبرش مانعرف ويش ام الحمام بالشهر مره نجي بيتكم..
ماكنت اعرفكم عدل كان عمري وقتها 5 سنين تقريبا..
وكان الوحيد اللي يزورنا كل اسبوع ولا يقطعنا..
المرحوم الغالي..
ملامحه حاشاي انساها.. اتذكره عدل..
كان يفرحنا لازم يجيب وياه اغلب الأحيان حاجات بسيطه .. حلاوه ربيان.. المهم يفرحنا..
كنت اكبر اخوتي والوحيده اللي افهم عليه..
كان حنون.. وطيب وعمره ما صرخ علي ولا حقرني..
كنت اميروه الطفله اللحوحه كثيرة الأسئله .. ونحيسه لأبعد حد..
كان لما يصلي وقت السجود اركب فوقه وتجي امي تصارخ بي ..
ولما يفرغ من صلاته ماذكره ابدا كان يعصب فيني.. بالعكس .. كاان يمزح وياي ويجاكرني..
تعودت عليه وانتظر متى يطق باب الشقه وتقول امي خالش عبدالله جى..
وفجأه..
انقطع..
اسبوع..
اسبوعين..
وخلالهم امي ماكانت امي..
كل تعبانه و تطلع
ابوي كان يقول مريضه تروح المستشفى.. وهي لا كانت تروح الفاتحه
كنت لما اسألها عنه تداري المها وتقول مسافر..
تخيلو..
مادريت عنه الا بعد سنه..
ساعتها.. ويش كان موقفي...؟؟
ما صحت..
ما صرخت..
مشاعري متفاجأه ودمعتي متحجره..
فهيت زي مايقولو..
وقعدت كم ساعه ساكته.. وافكر فيه.. ومو مستوعبه يعني ويش مات...!!
بس قلبي لازال عايش على ذكراه
وما انساه في كل مناسبه
وفي كل وقت على بالي ..
ودايما اترحم عليه..
حبيب وغالي...
يارب ارحم عبدالله عيسى وتغمده بواسع مغفرتك.. واجعل الجنه مستقره ومثواه..
تسلمي حبيبتي عالطرح
صياح واني اكتب
الله لا يحرم الغالي من الذكرى ولا من الدعاء
دمتي بخير
وبحفظ الرحمن
المفضلات