وغاااااااااااب قمر البيت
بسم الله الرحمن الرحيم
اللهم صلي على محمد وال محمد وعجل فرجهم وارحمنا بهم ياكريم
في شي يتركز في دهن الاطفال لين يكبرو ما يقدرو ينسوه خصوصا معاملة لكبار ليهم سوئآ كانت زينه لو شينه
أتذكر لما كنت صغيره كان الي اخو من ذون اخواني يعاملني معامله وااااااااااااااايد حليوووه
يعني ممكن لانه كنت اني بنت بين اولاد او لاني صغيره ما ادري
كل الا اعرفه كنت بالنسبه له يدهينه لا تنكتين يدلع فيني بشكل زااايد عن اللزوم
لما اتضارب مع اخواني لصغار حتى لو ما عورني الضرب اصيح بصوت عاااالي بس عشان يسمع ويطلع منة غرفته ويجي يهاوش اخواني
اول ماحد يزعلني يصيحنيما اروح الى امي على طول ادخل غرفته ياخدني باحضانه يقول لي كلام وااااااايد يفهمني الصح من الغلط ويمسح ادموعي وتجيء امي تشيلني وتقول اخوك تعبان من الدواام خليه ينام
كان يطلع معاااي حتى المشاوير العاديه لو بيروح يشتري الفواكه
رحت المدرسه صار المسئول عني اكثر يشتري حتى اللوح ويخطهم لي بيده ,,,تحط المدرسه في مريولي شريطه صغيره جنب الكلر (لشاطرين ) لما اجي البيت على طووول ارويها وياه بداخلي أقول <شوف مجهودك>
يقول شاطره بس مره تانيه ابغاه تكون حمراء مو خضراء
<بيضاء - جيد><خضراء - جيد جدا ><حمراء - ممتاز>
جت العطله أول سنه نسافر فيها لي بعد المدرسه كانوا اهلي لما نسافر نغيب شهر
طبعا اخوي مو معانا عشان عمله
بعد غياب شهر اتدكر هذا الموقف عدل كنت اسبح اول ما رجع من الدوووام سلم على اهلي وسأل عني وجئ يستناني على باب الحمام <<كرمكم الله
أول ماطلعت كان بس علي فوطهاجئ على طول وحماني قهرتني حركته وقلت اله اني كبيره مو صغيره الحين بذاخلي مستحيه من شكلي
كبر حبي اله اكثر واكثر كنت دلوعته كنت حبيبته الصغيره وكان اللي حياتي
يوم رجعت من المدرسه اجئ على طول وحملني حتى ما فكر يشيل الشنطه من علي كان فرحان وااااااااايد ,,نزلني ثقيله وهو يصخك
بعدين اسمع من امي انها خطبت بت عمي الى اخوي
كان شعوري عادي
اتزوج اخوي في نفس بيتنا وكانت اله غرفتين بدل وحده
ف يوم زي كل مره لما اتهاوش مع اخواني على طول رحت الى اخوي هجوم على الباب وافتحه بدون استادان كان جالس يسولف مع بنت عمي امـــــــــــي وراي عيب تعالي ونفس الوقت اخوي من داخل تعالي
صكيت الباب بقووووووووووووووه ورجعت مقهوووووره
من بنت عمي احس اخدت اخوي مني
مرت الايام صارت بنت عمي هي الا تداكر لي وتعلمني وتخط اللوح لي ,, صارت تسوي اللي كل شي يسويه اخوي ,, اخدت على ايدها الشريطه الحمراء ,,
تطلع معاي الى اي مكان ,, تعلقت فيها خصوصا ما كان عندي خواااات في البيت
وفي ليلة الميشومه كانت ليلة سبت كان أخوي في رحله مع اصحابه كان معاه في السياره اقرب شخص اله ولد عمتي وقدر الله وصار عليه الحادث
كان اخوي الا يسوق نزل ولد عمتي واخد اخوي بأحضانه لين وقفوا كل اصحابه ونقلوه الى المستشفى .......و..............الخ
في نفس الليله كنت بذخل انام
فجئه
صوت مرة خالي وهي ترتجف وتصيح
رااااااااااااااااااااااااااح الشبـــــــــــــــــــــــــــــــــاب
أمي كانت في المطبخ مجرد بس شافت مرة خالي بهدي الحاله رمت لصحون الا بيدها
ولدي فيه شي ؟؟؟؟!!!
مرة خالي,,
عبــــــــــــــــد الله ماااااااااااااااااااااااااااااااااااااات
كنت بالصاله الا فوق اسمع بس الصوت مندهله صرت ما افكر وما اعرف وش اسوي وتحجرت لدموع بعيوني ماني مستوعبه كلمة مووووت
كل الا سويته رحت غرفته اخديت صورته وضميتها بين اياديي عبد الله الحين راح تجيء
شوي الصوت صااااار اقوى واقوى
طلعت ورحت جلست على الدرج اول ما شافت اعيوني منظر امـــــــــــــــــــــــــــي فجعني هز كياني صحتني من شرودي كانت وسط الصاله ممدوده ارايلها تضرب على راسها شعرها منفوش
والنسوان حولها تهديها
اهنا خلاص حسيت فقدت الامل ترجمت فكرت موووووت في مخي ان ماراح يرجع الغالي
صارت دموعي تنزل وقلبي يرجف وبداخلي اصرخ وينك يا خوي تجي تشيلني بين احضانك ماراح اقول لك لا
وينك يالقلب الحنون صار اللي يومين ما شفتك
لا ترووووووووووووووووووووووح
غاااااااب نور البيت
صار ظلمه وكئيب غابت البسمه من شفتي واني طفله غااااااااب من يدللني
ارجع يا ربيع الشباب ارجع يا ربيع طفولتي
مرت السنوات كبرت
واكتشفت ان مازال ولد عمتي محتفظ بقميصه الملطخ بدمااء عبد الله
كان محبوب عند كل من يعرفه كان حنون على اهله وغير اهله
وبقت ذكرى أخي في ذاكرتي مخزنه لا يمحوها الدهر على مر السنين
وما زال أنين قلبي عايش على ذكراك
رحمك الله يا أخويورحم الله من قرأ لروحك الفاتحه
(عبدالله عيسى )
بِسْمِ اللهِ الرَّحْمنِ الرَّحِيمِِ
﴿ 1﴾الْحَمْدُ للّهِ رَبِّ الْعَالَمِينَ ﴿ 2﴾ الرَّحْمـنِ الرَّحِيمِ ﴿3﴾مَالِكِ يَوْمِ الدِّينِ ﴿ 4﴾ إِيَّاكَ نَعْبُدُ وإِيَّاكَ نَسْتَعِينُ ﴿ 5﴾ اهدِنَــــا الصِّرَاطَ المُستَقِيمَ﴿ 6﴾ صِرَاطَ الَّذِينَ أَنعَمتَ عَلَيهِمْ غَيرِ المَغضُوبِ عَلَيهِمْ وَلاَ الضَّالِّينَ ﴿7﴾
رد مع اقتباس
المفضلات