بسم الله الرحمن الرحيم
السلام عليكم ورحمة الله وبركاته ..
بقول الكم سالفة حصلت لي من كم يوم وعفست حياتي فوق تحت
بس أتمنى تكملوا القراءة للنهاية لان جد السالفه مهمة
وأبي الكل ينتبه الى نقطة فيها منشان مايوقع فيها ..
راح أقول الكم سالفتي بالعامية عشن أقدر أوصف الكم كل إلي صار ..
في يوم الاثنين الماضي تاريخ 12/11/ 1429ه
وكعادتي بعد منتصف الليل دخلت على المسن وسلمت على كل الموجودات في قائمة الاصدقاء عندي ..
ومن ضمنهم وحده من صديقاتي ما اسولف وياها الانادراً
وهذاك اليوم شفتها وسلمت عليها وماسولفت أي شي غير لاني كنت مشغولة
أبغى انزل موضوع التصويت للمسابقة وظليت ساكته عنها وكملت شغلي
وحملت الصور وابتديت أكتب في الموضوع
الا هي تسألني (على أساس إنها صديقتي) مشغولة
فقلت الها عادي اذا تبين شي عادي مو مشكلة
الا هي تسألني
مشتركة في موقع الترجمة للميكروسوفت
فقلت الها لا
الاهي تقول لي انها تبغى تشترك في الموقع بس طالبين ايميل صديق عادي احط أيميلش فقلت الها عادي حطية ..
الا هي تقول لي راح يرسلون لك رسالة وأبيك تردين ترسلينها لي عشان تتفعل العضوية
فقلت عادي مو مشكلة
وصلت الرساله فتحتها وابد ماجى على بالي أقرأ المحتويات
لاني شفتها كلها إنجليزي وعلى الرغم من إن عندي إلمام باللغة الانجليزيه لكني طنشت لاني مشغولة أبي اخلص إلي بيدي
المهم اني رسلت الرساله وانتهيت
وظليت جالسه على موضوعي
ودارت بيني وبينه سالفة طويلة عريضة مو بصدد ذكرها الحين
بس المهم إني كنت مرة مستغربه من الكلام الي ينقال وكان شوق المحبة معي على المسن
فكنت اوصل الها الكلام بحدافيرة فقامت تقول لي ان ماحسها طبيعيه
وصرنا نتكلم عن اختراق الايميلات والهكر ومن هذي السوالف
الاتدخل بنت عمة البنت الا هي تقول لي احذفي ايميل بنت خالي لان أخترقوه ...
المهم أنا ماعرفت ويش أسوي خلاص دارت الدنيا فيني
وعلى طول قلت الى شواقه مو عارفة ويش اسوي فقالت لي احذفي الايميل على طول
وفعلا حذفت الايميل
وكلها دقايق الا ايميلي تقفل عندي وشبك عنده
المهم صارت سالفه طويلة عريضه
فكلمت صديقتي ابغاها تحدف ايميلي من عندها وتعطي الكل خبر لان يمكن يسوي وياهم نفس الي سواه معاي
فقالت لي اذا عندك إيميل ماتستخدميه اشبكي منه وكلميه وحاولي تتفاهمي وياه
وفعلاً شبكت من الايميل الثاني حقي وكلمته وحاولت اتفاهم معاه
وكان يطلع الاخ سني وحاقد على الشيعة
فقام يسبني ويقول لي روحي خلي الخميني ينفعك انتي والخمة الي معك
وبوريك شغلك وراح تشوفين ..
المهم أنا ماسكت خبرت الاهل منشان اخلي مسؤليتي
ورسلت الى كل الي مضافين عندي رسايل على جوالتهم بحدف ايميلي
فدقت علي بنت اخوي وخبرتها بالسالفه
فقالت لي انها بتدخل على اساس انها ماتدري شي عن السالفه
وقام سوى الها نفس السالفة وهي ارسال الرساله
بس هي ماقامت رجعت ارسلتها اليه
قامت تقرأ الرسالة وطلع مفادها بعد الترجمة إني موافقة إني أرسل إليه الباسوورد حقي ....
والمهم إن وحده نسيتها وماجات على بالي
و البنت دخلت على الساعه خمس وشافت الايميل حقي شابك
وأفتكرت إنها اني وتعالي ياسوالف
كان يقوم الاخ يسوي الها نفس الحركة الي سواها لي
الي وهي سالفة الرساله
وهي قامت ورسلت الرساله و أخترق الايميل حقها
ومامداها تخبر أحد الاهو عمل نفس السالفه مع وحده من المضافين عندها في الايميل وأخترق الايميل حقها

يعني الحين صرنا أربع ضحايا
في يوم واحد ..
المهم إن بعد يوم من السالفة كلمتني البنت الي أخترقوا أيميلي من أيميلها
وقالت لي إنه أخترق الجهاز حقها وزرع الها ملفين تجسس
واحد قدر أخوها يحذفه بس الثاني قالوا لازم يتفرمت الجهاز
وقالت لي لازم افرمت الجهاز حقي
وفعلا خليت زوج أختي يفرمت الجهاز حقي والحمدلله رجع لي جهازي اليوم سالم غانم ..

بس أتمنى أن الكل ينتبه قبل يرسل أي رساله إلى أي أحد
وبالذات إذا كانت الرساله بالانجليزي
أن يشوف محتواها منشان مايصير فيه مثل إلي صار لي ..

وقبل هذا كله إنه ينتبه الى الي قاعد يكلمه فلو حس إن الشخص
صاير غريب أو تصرفاته غريبه
ينتبه قبل يتكلم أو يسوي أي شي معاه ...
والاهم من هذا كله إنه مايقبل أيميلات غريبه
لان صديقتي جاتها الاضافه وهي قبلت وصار الي صار ..

والحين الموضوع الي صار خلاني أخذ عبرة و أفكر مليون مرة قبل أسوي
أو أسولف أي شي مع أي أحد ..

وطبعا الموضوع وصل الى سلطات عليا وأكتشفوا إن هذي عصابة
يبون يوقعون أكبر عدد من البنات
والظاهر إن المستهدفين هم بنات الشيعة
حسب مافهمت من الاخ إلي أخترق أيميلي
لانه مرة كان الحقد مبين في كلامة ..
بس إن شاءالله راح يقدرون يوصلون الهم ويورونهم شغلهم ,,
وإذا حصل أي تطورات في الموضوع راح أخبركم ...
دعواتكم بتسهيل الامور ..
يعطيكم العافية
دمتم موفقين لكل خير ..

همــــــــ الصمت ــــــــــــس ..