الحلقة الثانية
* * * * * * *

لا تكابر !


طرقت الباب ،، و دخلت ..
شفت (سلطان) واقف عند النافذة
ما ادري وش يراقب ؟
سلّمت عليه و ما رد عليّ ..
رفعت صوتي :

- إحـم إحـم ! أقـول : العوافي يا طويل العمر !


انتبه لي ،،
و رد عليّ من دون ما يلتفت صوبي

- هلا ياسر ...

من نبرة صوته ، حسيت أنه به شي ..
سألت :

- خير ...؟ كأنك تعبان أو متضايق ؟


ما رد علي ،، و هذا اللي أكّد لي أن به شي ..
قلت يمكن ما يبي يقول لي ،،
اجل ندخل في موضوع الشغل ..

- بغيت نراجع البنود للمرة الأخيرة قبل الاجتماع ..

- الحين يا ياسر ؟ ما له داعي ..

- عجب ! أنت اللي قايل لي أمس !

- خلاص ياسر ،، احضر الاجتماع وحدك و بالنيابة عني ، و الا أقول ،، أجله الى بكرة ..


تفاجأت !
أمس كنا حضّرنا كل شي ،،
و هذي أول مرة يقول لي فيها أجّل !
الرجّال مو طبيعي ..
كان واضح عليه أنه ضايق الصدر ...
رديت سألته مرة ثانية :

- فيه شي سلطان ؟
ما انت طبيعي .. قل لي يا أخوي ..
توني مخليك عال العال قبل ساعة !
وش صار ؟؟؟

- ما فيه شي يا ياسر ،، ما ودي أحضر اجتماع الحين ..

- أنا مو تايه عنك يا سلطان !
مو توّنا نعرف بعض .. قل لي يمكن ترتاح ؟
أنا قريبك و صديقك و زميلك
في الدراسة و العمل و أقرب الناس لك ..
و الا ( الأحباب ) نسوك الأصحاب ؟؟؟


فجأة ،
إلا و وجه الرجّال منعفس علي ،،
و ضرب بإيده على النافذة و زين ما كسرها ..
كأن الجملة اللي
قلتها صابت الهدف بالضبط ..

سكت عنه لحظة ،،
أعرف سلطان ،،
مو من النوع اللي يعصّب بسهوله ،،
و مو أي شي يقدر يأثر عليه..
(أشياء معينة) ممكن تخليه بهذه الحالة ....

- قمر ...

قلت الاسم ،،
ودي اختبر ردة الفعل ،، و ما اخطيت الهدف ..
بس سمعني لف راسه فجاة صوبي و خزني بنظرة
اعرفها زين ..
قدرت اشوف بعيونه كلام كثير مكبوت ...
و قدرت أشوف يدينه و هي تنقبض بقوّه و عصبية
كأنه يحاول يمسك نفسه عن الانهيار ...
لكنه ، ما قدر ...

على الكنبه اللي كانت جنبه ،،
ارتمى بانهيار ،،
و رفع راسه و غمض عينه و أخذ نفس طويل ...
و طلع بتنهيده مريرة ...

سمحت لنفسي ،، بعدما تراخت اعصابه المشدودة شوي ،،
اني أسأل :

- وش جد ؟

ما تردد كثير ،، و نطق و قال :

- كانت هنا ..

اندهشت ! و سألته باستغراب :

- متى ؟؟؟

- قبل ما أنت تجي بشوي ..

- و ... ايش صار ؟

- جت ... تقل لي ... فيه واحد خطبها ..

مرّت لحظة صمت ،،
هالمرّة ما سألت ، هو قال بنفسه :

- بسّام قريبها ، اللي تعرفه ..

- آه ،، بسّام .. و الله و النعم فيه ...

- رجّال طيب و أخلاقه ممتازة ، و يستاهل كل خير .... بس ...
... ما يستاهلها ...