بسم الله الرحمن الرحيم

اللهم صل على محمد وآل محمد الطيبين الطاهرين

اليوم صارت لينا سالفه أنا ويا واحد من الشباب
وسويتها على شكل قصيصه


مر عليي - بنسميه أبو علي - وركبت وياه السياره

ورحنا لمحل مواعين

أنا:- ويش بتشتري من هالدكان ، وويش عرفك تشتري مواعين ؟؟
أبو علي :- با أشتري طاسه وملاعق لأمي .


أنا:-الله يعينك أجل .
أبو علي :- لا ويش ؟

أنا:- أكيد بتقول لك مو زينين روح عودهم .
أبو علي :- شدعوه يا خوك ، وفاني شي هذي حق بيسووا لأخويي الصغير الروعه .

أنا:- وشوه بيسووا له
أبو علي :- الروعه ، لا تقول ليي ما تعرفها بعد

أنا:-لا أعرفها بس من زمان ما شفت أحد يسويها
أبو علي :- خلاص داهيه أمي بتسويها وتعال شوفهم

وإشترك خويي الاغراض ورحنا بيتهم وبعد ما سلمت على أمه قعدنا شوي وقال ليها
خويي - واحد فاضي - بيشوفش تسوي الروعه حق يكتب عنها في منتدى الناصره

قالت الحجيه ما يخالف .......دام للناصره ما يخالف

الروعه يسووها بهالشكل

ايجيبوا طاسة ماي ويحطوا فيها ماي فاتر
ويوموا يصخنوا الحديده ...لو الكمشه على الضو لامن تصير حمرررررررررراء

ويجيبوا الجاهل في الحضن ويقربوا الطاسه ويخلوا الجاهل يطالع فيها

ويجيبوا تالي الحديدة ويحوها في الماي وتسمع ...تششششششششششششششششش
تشششششششششششششششششششششش

وتروح الروعه عنه

أنا :- زين حجيه لاويش يسووها ؟؟

الحجية :- هذا يا غناتي اذا الجاهل إختلع من شي ولا شي يسووها اله.

أنا :- أسمع وقت اللي يسووها يقولوا شعر ولا ما أدري ويش تسموه

الحجيه :- تصبر شوي وبتسمعني أسويها وإحفظها انته بعد لا ويش اتحجى الك أني ، دنته بتشوفنا نسويها

أنا :- على بركة الله .

وفعلاً حموا الكمشه وجابوا الجاهل وحطته - أم ...أبو علي في حضنها وتالي حطت الكمشه الحاره الحاميه في الماي وقال الماي
تشششششششششششششششششششششششش
والجاهل يطالع ....ومن سمع التششششششششششش
قام لصياح

والحجيه تقول ......وقت ما تحط الحديدة في الماي

روعه من الروعه إطلعي
كان من الجيران إطلعي
كان من أم الخضر والليف إطلعي
كان من الدعيدع إطلعي
كان من الحساد إطلعي
كان من صديق ولدي أبو علي ( اللي هوه أنا ) إطلعي
..........

وكان من ............وكان من

وما خلت أحد الا قالت بإسمه حتى الجنانوة والصالحين

وتالي أخذت تبلة ماي من الطاسه ومسحت بها بدن الجاهل ورشت على أياديه وأراجله

وقامت بعدين رشت شوي في الحوي
وشوي على باب المجلس
وشوي على باب البيت الرئيسي

لامن خلص الماي

والجاهل سكت ......وسكنت الروعه ........ونام الجاهل

وخلصت وملصت ...جت الديايه وخبّصت


يالله اللي فيه الروعه بنخلي ...أمه لأبوعلي .......تسوي له روعه من الروعه


خالص التحيات
فمان الله