مرحبا

اني ضد هالفكره ... وبشده بعد..
بس في حالات سمعت بها وناجحه...
و بطريقه شريفه بالمره.. بعيده عن المسنجر والشات واي خلوه بينهم ثنينهم

اليكم هالقصه.. وتحملو هدرتي

شاب .. اعجب بقلم.. ركزو.. قلم وافكار وطريقة فتاه في ردودها ومواضيعها في المنتديات...
وظل تقريبا سنه او اكثر يتابع مواضيعها وردودها ... و يدرس طريقة تفكيرها...
لين قرر يقدم على خطوه...
وهو وحظه عاد لاقى قبول او رفض...
رسل رساله خاصه.. للفتاه يطلب منها رقم ابوها او اخوها او ولي امرها..
وكانت اول رساله منه ليها في حياته..
ووضح ليها بطريقة مهذبه انه معجب بأفكارها واسلوبها .. وما الى ذلك..

ويبغى يكون الوصل بطريقه شرعيه..ترضي الله ورسوله واهل بيته..

البنت من خلال تعامل هالشاب في المنتدى.. لاحظت التزامه و ادبه.. مع ذلك ما غلفته بغلاف الأمان .. ما تدري يمكن في النت طبع وفي الحقيقه العكس تماما..!!
صدته.. ولا ردت عليه... و ما عطته رقم ابوها

الرجال تعب ومصر على رايه ونيته شريفه...
قرر وهو خايف يرسل رقمه وقال ليها .. عطيه ابوش .. مو قصدي ارقمش .. ابغاه فعلا يكلمني والله يشهد بنيتي...

البنت استغربت اصراره وتمسكه...
قعدت ويا امها وخبرتها بالموضوع
الأهل واثقين في بنتهم ومتفتحين وما شكو بأي شي ..
خذ ابوها الرقم وكلمه .. وتطمن من نواياه
وبعد كم يوم جو اهله في زياره يشوفو البنت
اللي عجبتهم .. و الله تمم ليهم على خير...


عاد هذي قصه زيجه ناجحه ..وشريفه
من بين الف زيجه فاشله و باطله..
من هالعالم المتسع..

عموما .. من هدرتي هذي حبيت اوضح.. اصابع الكف مهي سواسيه..
ومن كل شي يجي الخير والشر

واختلاف الرأي لا يفسد في الود قضيه..

دمتم بخير
وبحفظ الرحمن