بسم الله الرحمن الرحيم
اللهم صل على محمد وآل محمد الطيبين الطاهرين

اليوم يا محفوظين السلامه وإحنا نتمشى بالسياره
أنا ويايي أخونا شبكه

مرينا على واحد من الشباب في مزرعتهم
الا نشوفه يجمع ( قلب ) النخيل اللي طايحين
وسألناه لاويش ؟؟
قال لينا هذولا حق أمي تسوي بهم مراوح وحصير وقفاف
قلت له خلاص بنروح نسوي ويا الوالده مقابله حق شبكة الناصره الثقافيه ...حصرياً

وافق ورحنا وياه
دخلنا البيت وسلمنا على والدته
أنا :- السلام عليكم ورحمة الله ، قواش الله أم علي
أم علي :-الله يقويكم ويسلمكم ، تفضلوا تفضلوا تقهوو

شبكة:- أكرمش الله ، لو سومحتي أم علي بنسوي وياش لقاء حق المنتدى
أم علي :- أيهوه ، أني مو أي منتدى أسوي له لقاء
أنا :- هذي شبكة الناصره الثقافيه
أم علي :- أيه دام الناصره ما ميش مشكله تفضلوا

أنا :- نمبى نسألش كيفه تسوي المراوح والحصران والزبلان

أم علي :- مو بس الحصران والمراوح نسويها
شبكه :- أيه قولي لينا ويش اللي تسويه ؟؟

أم علي :- يا غناتي أول شي المراوح والحصران والزبلان والسفر والقفاف نسويهم من قلوب النخله
أما الخصف والقاعودات والقلات نسويهم من الفقر والخضر

أنا :- زين كيفه تسووهم

أم علي :- انتون تقهووا أول شي وكلو ليكم من هالميوه الزينه

وتقهوينا وبدأت أم علي تسولف .......
أم علي :- أول شي نجيب السعف ( القلوب والفقر والخضر ) ونسحتهم ونجمعهم كل صره بصرتها

وما يضر يابسين ولا بعدهم خضران

اليلبس اذا بغينا نسفه أول شي ننقعه في الماي ومن يلين
نبتدي نقشمه قشوم صغيره
والحين بعد يبيعوه مقشم ومصبوغ
واللي تمبى تصبغه في البيت تسويه
يصبغوه مقشرة الرمان ولا بالخضر أخضراني
ومفلات هالشي يعني
( وامتنعت عن الادلاء بأي تصريح عن الالوان ومصادرها ) <<سر المهنه

وتالي نبتدي نصف القشوم في إيدنا

شي حق المراوح أبو فلاف أو أربع وشي حق الحصير أبو فمان أو تسع أو عشر نصفهم ونخولفهم ونقعد نسف فيهم
وأهم شي يكونوا مشدودين عدل علشان لا تنفقر السفه وتخترب ونسوي على قد السعف اللي عندنا مفلات الشريط ونلفه على بعضه
واذا بغينا نسوي شي به
نجيب العقب واللي يجي بعدد السلا اللي في السعفه وقبل الخوص وهذا حق نخيط به اللي نسفه

أنا :- زين الحين اذا سفيتوه بييبس مره فانيه

أم علي :- أيه بعد ننقعه في الماي شوي بس وتالي نبتدي نخيط فيه على الشي الا نمباه سفره ، قفه ، واللي ينطلب منا

شبكه :- زين والخصف كيفه تسووه

أم علي :- الخصف نسويه بالسرعه بالسرعه يعني مو لازم مررره عدل مسوى هوه يحطوا فيه التمر ولا يحتاج نسوي فيه الوان وأشكال
نجيب الخوص ولا نقشمه ، الخوصه بخوصتها ونصفها في إيدنا ونفس الشي نسويه مفلات الاشرطه وتالي نخيطه بعد

أنا :- الله يعطيش العافيه والصحه والسلامه ياااااارب
شبكه :- رحم الله والديش

أم علي :- والدينا ووالديكم يارب ، متاه بتحطوا المقابله في منتداكم

شبكه :- ما يهمش الحين بس شوي وبنحطها

أم علي :- أجل هاكم خذا هالمروحه



وهالحصير

وهالقفه




وبعد شويه با أخلي ود بتي يوريني
في التتر نت اللي يدشوا ويشوفوا المقابله

وبا أشوف أني يقولوا رحم الله والديش يا أم علي ولا لا ؟؟

ويش يا شباب

بتقولوا ليها رحم الله والديش ولا بتروحوا

تراها تقول اللي يقول بتعطيه مروحه يبرد على روحه بها

خالص التحيات
فمان الله