((19))

تدور الافكار الغريبه براسي
اسئل نفسي مليون سؤال وسؤال

يا ترى وش الي غيرك يا حمد ؟

وش الي خلاك ترجع تدللني وتنسيني ولا ترضى حتى نذكر شي من الي صار ؟

وش الي خلاك ؟؟

غريبه كنت اتوقع بعد شوفته لبدر انه يعزم على طلاقي أو انه يزيد بتعذيبه لي !!

الله العالم وش الاسباب الحقيقيه الي خلتك اطيب من الطيب نفسه !!

...........

مرت الايام وحمد معي مثل السمن على العسل

أخذ لي شقه ثانيه جديده وفيها كل سبل الرفاهيه

وكنت سعيده لكن في مكان مظلم بشخصية حمد

اعتقد انه راح يجي يوم وينفجر و...

........

مرت الاسابيع بسرعه

ما بين صمت وصبر

كلمتين بينهم اتصال قوي

ان بديت بالصمت راح تتعلم الصبر

وان اتقنت الصبر اتقنت الصمت

والصلاح بيد رب العالمين

الشكوى لغير لله مذله

اشتكي لك يا رب العالمين

وادعوك فأستجب دعائي

نسيه ونسيني همي وغمي وفرج عني

واصلح ما بيننا

صلاح زوجي معي هو صلاحي

وهدايتي هو هدايته ان شاء الله ..

يا علام الغيوب يا شارح الصدور

استجب لي دعائي

يا رب العالمين

بعد انتهائي من صلاتي

دخل علي حمد

كلمه وحده وبعدها دارت الدنيا فيني

انتي طالق ..!!!!

انتي طالق يا امل طالق !!!

نسيت صلاتي وسجودي ودعائي

وكل الي تذكرته او الي عزمت

عليه الاستعداد للهجوم ..

الاستعداد لمواجهة حياة جديده تحت

منطلق جديد اسمه بداية النهايه

مطــــــــــــلقه !!

ما عاد يهمني المسمى الاجتماعي

ما عاد يهمني الناس وكلامهم

وش الي يخليني احسب حساب احد

محد رحمني حتى انا ما رحمت روحي

انتهيت ما ادري والله ان كنت انتهيت

يمكن انتهيت لكن لسه فيني روح

ومدام فيني روح ما عاد راح انزل روحي

لحـــــــــــمد واسئله عن سبب طلاقي المفاجأ

من بعد ما عشت مع هالاسابيع القليله بين الصمت والصبر ..

ركبت معه السياره لكن هالمره ركبت ورااا

ما عاد فيه شي يربطني فيه لا حب بالحرام ولا عشق بالحلال

مجرد ورقه فيها اسمي واسمه ورقة الطلاق

وصلني عند اهلي

وقال بكره اجيك الصباح ونروح للمحكمه ..

وصدقيني يا امل انك ما راح تحصلين مين يحبك كثري

أنا ..

حمد اسكت ما عدت ابي اسمع صوتك

اكرهك واكره كل شي فيك حتى صوتك وهمسك ونفسك

ما عدت اطيقك ولا عدت ارغب بوجودك بأي شكل من الاشكال بحياتي

تدري يا حمد انت ما تحبني

الي يحب يغفر لمحبوبه

الي يحب يرحم

لكن انت بشر حالك من حالي

يمكن يوم تغلط اكبر من غلطي بحق نفسي واهلي وناسي

لكن انا ..

ما فكرت اني بضيع من دونك وبعد كلمة الطلاق وش بيصير فيني ؟

انا جلست عندك كزوجه والله يعلم فيني

قد ايش ندمانه على فعلتي وطلبت العفو والمغفره من رب العالمين

لكن ..

انت فكرت بنفسك وبس ..

اسمع انا ماني ضايعه ان ما كان في احد يتمنوني

مثل ما يقولون البنات الف من يتمناني

لكن انا بقول لك في واحد يتمناني وانت تعرفه

ايه ايه قبل ما تنطق هو بدر

بدر ..

الي انت ما قدرت عليه انك تستر علي

وانك تحافظ علي وترحمني من الناس

هو راح يكون اوفى منك واقدر منك انه يكون زوجي بالحلال

وراح اذكرك يا حمد ..

...........

نزلت من السياره

ودخلت بيت اهلي وانا كلي أسف على كلامي

له ما كنت ناويه اني ارجع لبدر لكن كان كلامي

لمجرد اني اقهره اني اخليه يفهم اني ما عدت بايره عند اهلي

.........

وفعلا طلع الصبح علي وهالتلفون ما سكت من مكالمات

حمد لي ..

الين الصبح رديت على التلفون

الو
أمل

اسمع يا حمد

انا جاهزه للمحكمه نتلاقى هناك

انا راح اجي بالتاكسي ما يحتاج توصلني

انا حره وطليقه الآن

وانت طليقي

لا ما ابي اطلق

بسئل الشيخ عن حكم الطلاق

قلتها وانا معصب وانا ندمان

تتوقع تفرحني بالخبر هذا !!؟؟

بالعكس

انا الي كنت ابي الطلاق وانت قدمت مطلبي

على طبق من ذهب ..

بتنازل لك عن كل شي

المهر الي ما قدرت اني المسه لحبسي الاجباري معك بالشقه

ولشبكتي الي لحمي ما عاد يقدر يستحمل شي يلامسه

خذ كل شي

كل شي

خذ الارض الي عطيته لأبوي بدون ما انا اتدخل

انت تصرف معه اقتله احرقه ما عاد يهمني ابوي

نتلاقى بالمحكمه ..

وفعلا تنازلت عن كل حقي المهر

والشبكه وكل شي مع ان الطلاق منه

مو انا الي طلبته منه ..

لكن ..

كنت الاحظ نظرت الحسره والندم بعين حمد

بعد ما استلمت ورقتي من المحكمه

مشيت عنه كأنه غريب

كأنه ما قد مره شفته بحياتي ولا كان لي معه صله ..

.............

رجعت البيت ..

رتبت الغرفه ..

أنا مطلقه ..

ولي مطلق الحريه ..

برجع للدراسه ..

اكيد ما دروا عني المدرسه اني تزوجت

لو دروا عني اكيد راح يفصلوني ..

ما اعتقد انهم يدرون ..ما اعتقد ..

باقي اسابيع قليله على بداية السنه الدراسيه الجديده

وكل زميلاتي بالمدرسه راح ينتقلون للصف الاول الثانوي بالمدرسه الثانيه ..

الا انا ...

احسن لي ولهم ..
اكيد محد يبي صداقتي الآن ...

واكيد انا ابي ابتدي دراستي بمدرسه وصف بدون

زميلاتي عشان ما اسمع الي يكدر جو وصفر حياتي الي ببتديها من جديد ..

جهزت نفسي للمدرسه وانا كلي عزم اني اكشخ من اول يوم ولا على بالي احد

وفعلا ما عاد أهلي يتدخلون بحياتي ومشت السفينه براكبها الوحيد

الي هي انا لحالي وحيده كالعاده ..

الظاهر الصف الثالث متوسط فال نحس علي دائما

السنه مثل السنه الي فاتت اخلص الفصل الاول والثاني تبتدي المشاكل من جديد

حمد رجع يكلم اخوي وابوي يبي يردني ..

وانا ..

ما عدت ابيه بكل كياني ارفضه رفض تام ..

بالاخير اخوي قال لي

تراهو مو مصدق ان الرفض منك

يقول ان امل تبيني وانكم انتم مو موافقين لرجوعها ...

والحل يا اخوي ؟ وش تبيني اسوي ؟


انتي موافقه ؟

لاااااااا

خلاص بدخله بالصاله واطلعي قدامي قولي له انك رافضه

وفعلا دخلت عليه وانا متغطيه من راسي الى رجولي

ما ابيه يشوف مني أي شي يحرم عليك تشوف ظفري يا حمد

من بعد ما تنازلت عني ..

كلمتين ودخلت لغرفتي مره ثانيه

حمد ما ابيك ..

وبس ما عرفت وش صار فيه من هذاك اليوم

ولا عاد شفته فتره طويله

مع انه لسه ولد الجيران

لكن انا دخلاتي وطلعاتي من المدرسه الى البيت

حتى المدرسه ما اطلع الا من بدري

وارجع من ورى البيت والدهاليز عشان ما امشي بالشارع

ما ابي اشوفه ولا اشوف احد يناظرني بنظره تذكرني بفضيحتي

...........

المشكله الرئيسيه بعد الفصل الثاني من دراستي

اتصال بدر المفاجأ

ليلتها كنت ادرس واكتب واجباتي

صوته رجع لي احساس ما كنت ابي اتذكره ابد

أمل كيفك ؟

بخير يا بدر

انت كيفك ؟

ماني بخير

ليه ؟

انتي السبب

بدر انسى الي صار خلاص ما عاد الكلام بيفيد ابد

أحبك وأتمناك لي

وانا بعد تتوقع اني ما عدت احبك

لكن يا بدر ...

ما قدرت اكمل الا صوت اخوه

من الطرف الثاني

كان شايل سماعة التلفون من الطابق الثاني من بيتهم

سمعني وانا اتكلم معه

قال :

انتي يا .......

ما راح تخلين اخوي بحاله .....

انتي الي ...........

لك وجه يا ......

والله لشتكي عليك بالشرطه

سكرت السماعه وانا ارتجف ..

قلت لنفسي ليـــــــــــــه كل هذا يحصل لي

وش الغلط الي سويته ...

هو الي اتصل وانا كنت ابي اوضح له كل شي

عشان كل واحد يروح بحال سبيله ...

ليه؟؟

كلها دقايق رجع التلفون يرن

ويا لجرأتي لسه فيك تشيلين التلفون يا امل

الووو

انا بدر

اسمعيني يا امل ما عليك من اخوي انا احبك وابيك

والله ابيك

قولي انك موافقه انك تتزوجيني

انا ما صدقت متى تطلقتي

وش قلتي يا امل ؟

ما ادري

نفس القصه انت بعد راح تتزوجني

لكن ما راح تقدر تعيش معي سعيد

اهلك والي صار ما راح تقدر تنسى

صدقيني يا امل صدقيني انا غير عن هالحمد

انا بدر نسيتيني يا امل ؟ نسيتي كلامي لك ؟

ما انسى يا بدر وقفتك معي وانا حتى بأصعب الظروف

ما انساها لك لكن .. خايفه من الي جاي .. خايفه ...

............

تواعدنا بعد هالمكامله نرجع حبنا رغما على الكل

وانسى خوفي واحلم باليوم الجديد الي يخليني اكون فيه

زوجه له وهو زوج لي ..

لكن جت الحزينه بتفرح مالأتلهاش مطرح مثل ما يقول المثل المصري

وفى بوعده اخوه وراح اشتكى علي

جت لي احضاريه من مركز الشرطه يطلبون جيتي عندهم

وانا كلي خوف وارتجف من الي بيحصل

دخلت هناك سجلوا اسمي واقوالي

قلت لهم ان تلفونا ما يطلع مكالمات

وان الي متصل هو بدر مو انا

هذا الكلام الي كنا متفقين عليه انا وبدر يومها ..

وكل الي صار انهم كتبوا تعهد اني ما اكلمه ابدا واني

ما اقرب صوبه ولا هو يكلمني ولا يحاول الاتصال فيني

بأي طريقه ممكنه ...

.........

طلعت من عندهم وانا احمد الله ان محد من البيت عرف

بالسالفه هذي ورجعت البيت ولا كأن شي صاير ..

وما مداني افتح باب الغرفه الا التلفون يرن ...

الو

أمل حبيبتي كيفك ؟

بدر الله يهديك وش الي خلاك تتصل ؟

انت ما تخاف ؟

هههههههههههه ولا كأنهم هددونا صح ؟

ما عليكي منهم يا حبيبتي ..

كيفك انتي انسي الي صار وركزي على دراستك الآن

وكلها اسبوع وينزل لي القرض واجيك برسم الخدمه الين بيت

اهلك اخذك ونعيش مع بعض بالحلال يا امل ..

صدق يا بدر ؟

ما اعتقد يا بدر احس كل ما افرح بشي يطلع شي ينكد علي حياتي

كلها و ترجع الامور تسيء اكثر واكثر ..

الله كريم يا أمل

الله كريم

يتبع