الحلقة 48 ..

سوسن تحس نفسها مهي طبيعيه.. تجاهلت هالأحساس بحجة انها متأثره على علا والموقف اللي صابها .. ونامت...

3 الفجر...قعدت وهي تعبانه عدل مهي قادره.. وابو مالك لسا مارجع...
حاولت تقوم تحس جسمها كله متوروم والآم مو طبيعيه..
تحسست جوالها واتصلت على علا..

علا كان فيها ارق .. تفكر في ليلى واللي صار ليها.. وكلام زينب اللي جاها في الصميم..وحاسه بالذنب.. الا تشوف جوالها يولع ويطفي ..
كان عالصامت.. صارت تطالع الشاشه وهي مذهوله ..
ــ سوسن!!
ردت:
ــ هلا... وينش ويش صاير
سوسن حدها قالت:
ــ آآآه
بتعب شديد..
علا اختلعت.. وقامت بالسرعه راحت ليها لقتها مهي طبيعيه.. صارت تتصل على ابوها جواله مقفل.. << كانت بطاريته مخلصه وهو ما انتبه..
علا مهي عارفه ويش تسوي وحالتها حاله .. وسوسن نص غايبه عن الوعي..
صارت تفكر ويش ممكن تسوي ..
راحت رسلت لهشام رساله... كتبت له تعال ضروري سوسن محتاجه المستشفى..
هشام نايم وما سمع نغمة الرساله..

انتظرت علا يتصل تحس انه درى بالسالفه .. نصف ساعه مرت لا حس ولا خبر ..
وبتردد اتصلت على هشام .. اول اتصال مارد...
علا مهي عارفه ويش تسوي.. رجعت اتصلت .. ثاني اتصال فتح هشام عيونه انتبه .. كان مقصر صوت النغمه.. انتبه للضوا وبصعوبه قرا الأسم من النعس..
وقعد قعود .. وصار يهوس ويش فيها متصله هالحزه .. وعلا ؟؟!!!!
رد عليها بأرتباك..
ــ هلا..
علا مهي عارفه ويش تقول على طول لا سلام ولا كلام:
ــ هشام بسرعه تعال بيتنا سوسن تعبانه...
هشام طفر من سريره..
ــ يالله.. جاي جاي..

وبالسرعه حتى زرر قميصه غلط .. وطلع يركض .. عشر دقايق هو عندهم..
دخلته علا ومسك سوسن نزلها وراحو المستشفى..


تحت سقف هالمستشفى ...
اجتمعو بالصدفه 3
حميد في غرفته الى اجل غير مسمى..

ليلى متنومه بالمغذي وجنبها امها.. واخوها علي...

وعلا توهم داخلين بسوسن اللي على طول طوارئ .. وطلعو ملفها ,, بيشوفو الحالات المسبقه ليها..
علا متوتره وفوق انها متوتره مستحيه من هشام حدها ولا هي عارفه ويش تسوي.. !!
من دخلو سوسن غرفه خاصه دخلت وياها .. وقعدت..

هشام:
ــ يالله يالله..
تغطت علا..
هشام : ــ خيه .. ابو مالك حق ويه مقفل جواله وينهو..؟؟
ــ في الشركه بس مادري لويه مقفلنه..
ــ عساه خير ..

علا عور بقلبها شكل هشام.. متوتر كان بالمره.. وفوق هذا منظره مبهدل .. لفت نظرها القميص اللي مو مزرر عدل.. في نفس الوقت اللي كانت تطالع طريقة التزرر هشام بالصدفه انتبه لروحه وصار يسكرهم عدل ..
علا استحت حست انه انتبه عليها.. شالت عيونها عنه.. وصارت تتأمل سوسن وهي تدعي الله يقومها بالسلامه..


في غرفه قريبه..ام علي بحزن:
ــ وين نولي على عمرنا.. من مصيبه لمصيبه.. افففففف .. ياليتك ظليت ميت يا صالح في نظرنا.. ولا درينا بك بهالحال .. استغفر الله ياربي..
علي قاعد يتفرج على الرايح والجاي للمستشفى من النافذه ..
ويحس قلبه يغلي غلي على صالح وتصرفه.. وفي باله..
ــ مستحيل تكون منت قاصد او مجبور.. مستحيل .. والله اخر شي توقعته تطلع بهالخسه والنذاله ياصالح.. وترسل اغراضك لينا بعد.. انتقم الله منك على هالسواه اللي فعلتها فينا..يالله الطف بنا وغير الحال...

وهشام قاعد في الأنتظار .. اتصل عليه ابو مالك..
ابو مالك وهو خايف بالمره:
ــ خير يا هشام ويش صاير وينكم.. ؟؟
ــ انت اللي وينك جوالك مقفل..
ــ البطاريه مخلصه كانت وماكنت ادري بها رجعت مالقيت سوسن ولا علا ولما فتحت الجوال لقيت المكالمات. وينكم وويش صاير
ــ في مستشفى الـ... ,, سوسن رجعت حالتها زي ذاك اليوم ورجعناها..
ابو مالك.. من قال له هشام زي ذاك اليوم.. انصرع.. وانقبض قلبه.. ورجعت على باله فصول الحلمه..
وطيران المستشفى...


جوال علي يرن,, بيت خاله..
علي متعود اذا بيت خاله اتصلو وهم طالعين محل.. يعني زينب فيعطيه ليلى على طول
ــ اماه.. زينب متصله..
ام علي خذتها تكلمها.. وكانت تسأل عن ليلى واخبارها..
علي رجع وقف عند النافذه الا ينتبه لأبو مالك يدخل المستشفى..
علي انقبض قلبه وتذكر حميد وصار في باله :
ــ معقوله؟؟ معقوله جاي الى اخوه..؟؟؟
بيطلع من الغرفه ام علي سكرت الجوال..
ــ هاك.. وين رايح امي ؟؟
علي وهو طالع :
ــ لحظات وباجي..
طلع علي من القسم تبع تنويم النساء بيروح جهة غرف الرجال بيشوف غرفة حميد دخل عليه ابو مالك لو لا؟؟
لقى ابو مالك طافها وراح جهة قسمهم...
علي في باله:
ــ مايندرى مين مريض عنده.. !!
صار يطالع في باب غرفة حميد..تنهد:
ــ الله يغير حالك ياحميد افتكرته تذكرك..

رجع الغرفه لقى امه تنود تعبانه..
ــ اماه قومي ارجعش البيت..
ــ لالا بقعد وياها..
قومي برجع انا وياها.. قومي ريحي ماتقدري انتين..
ــ عطاك العافيه امي.. بالغه فيك ياغناتي..

وصل امه البيت.. ورجع لأخته انسدح عالكرسي وصار يقلب الأفكار ,, على صالح،، وحميد لما شاف ابو مالك..على اخته ومؤيد واللي سوته.. من فكر لفكر لين نام...

صندوق قفله حديد.. وجاسم قاعد يطق فيه..
مع كل طقه يسمع ناس تصيح .. وواحد يقول له..
كثر الطق يفك اللحام..

فتح عيونه وصار يطالع في السقف..
ــ خير اللهم اجعله خير..
طلع لقى زينب قاعده في الحوش..
ــ مانمتي؟؟
ــ لا ماجاني نوم قلت اطلع اشم الهوا واحارس الأذان..
ابو جاسم قعد:
ــ اييييه... نحارس وياش اليوم..
ــ مانمت انت بعد؟؟
ــ لا .. نمت لي كم ساعه... وقعدت..
ــ يعني...
ــ مادريتي عن بت عمتش؟؟
ــ توي متصله من كم ساعه كلمتني عمتي تقول الحمدلله نايمه ..
ــ خير اللهم اجعله خير...

الله اكبر الله اكبر..
ابو جاسم..
ــ يالله تزيح الهم وتكشف الغم.. نقوم نتمسح ونصلي.. روحي قعدي امش..

راحت زينب الغرفه وانصرعت.. امها مهي عالسرير نايمه ولا هي في الغرفه..
و لا شافتها تطلع طول الوقت هي في الحوش..
طلعت لأبوها وهي منصرعه..
ــ يباااااه.....



للبارت.. بقيه...