الحلقة التاسعة عشر..

اتصلت ليلى مكتب المحامي...
وعطته ابوها..
رد السكرتير..
ابو علي بعد ما سال عن المحامي..
بذهول واندهاش ..
ــ هااااااااا...؟؟؟ من متى ؟؟؟!!
ام علي انصرعت ..
ــ ويش صاااير ؟؟
ابو علي يرمي السماعه عالأرض وهو يسب ويلعن وحالته حاله.. ومعصب حده ..
وشوي انقلبت حالته وصار يصيح ..
ام علي قلبها خلاص مهي قادره.. :
ــ داخله عليك بالزهرا ويش قااااايل لك ؟؟ ويش فيك..؟؟
ابو جاسم بصوت متكسر:
ــ ولد الحرام.. سافر .. وسكرتيره يقول كم يوم ويسكرو مكتبه .. ناس وايد رافعين عليه قضايا استغفلهم باقهم وانحاش..
ام علي حطت ايدها على راسها وصارت تهز و تون:
ــ آآآآآآه .. جعله ما يربح.. جعله مااا يتهنى .. حار وناار في جثته..
وصارت تضرب على فخذها.
ــ ويلي عليك ياولدي.. ويلي عليييك يا وحيدي.. الحين ويش بنسوي..شلون بندبر عمرنا.. من وين نجيب محامي .. ؟؟
ليلى وريما واقفين مذهولين .. بس دموع تصب ..
ابو علي .. هدووء... ما يملك أي تعليق ..
التفتت ام علي لليلى :
ــ اتصلي بيت خالش.. خلي خالش يجي..
ابو علي بعصبيه حزينه:
ــ عبدالرحيم وعبدالرحيم.. تعب عبدالرحيم.. ويش بيسوووي لينااا..!!! وايد عليه همومه..
ام علي ما تحملت وصارت تصيح:
ــ ويش بيدي .. هااا.. ماعندي الا هالأخو...
ابو علي حز في نفسه .. وبهمس متكسر ..
ــ ايييه.. اتصلي به.. ويش بيدنا.. انا لا حول لي ولا قوه..
ام علي حست بتأنيب ضمير..
ــ ما اقصد يا بو علي .. افهمني عاد وقدر موقفنا..
ابو علي بهدووء:
ــ فاهم.. فاهم.. اتصلي يابتي وشوفيه..
ليلى اتصلت بيت خالها .. قالو ليها خالها في الزراعه...
ولما عرفو ويش صاير فيهم...
زينب صارت تصيح وتدعي...
لبست عباتها بتروح لأبوها الزراعه ..
ام جاسم :
ــ يابتي اكو اخووش نايم خله هو يروح..
زينب وصياح وحالتها حاله:
ــ اخوي .. اخوي من الصبح مو هنا.. امااه.. ياغافلين ليكم الله

ام جاسم فتحت باب غرفة ولدها الا هو فعلا مو موجود وبقهر وحرقة قلب:
ــ ياعساااك خنااقه..

وطلعت زينب .. وابدا مهي في وعيها ولا هي حاطه في بالها الخوف المعتاد من عادل ولا انها تصادف اشرف كالعاده..

وبين ماهي تمشي صار المطر يطيح..
الا سياره مرت بسرعه فيها صايع.. من الأشكال المشبوهه.... وطفرت عليها ماي من الطريق..
زينب شوي وتصيح.. لازم كل طلعه ليها سالفه.. والقدر يجبرها انها تطلع ... والا كل مره تقول التوبه ما طلعت ..
وبلا وعي من االقذاره والحاله اللي هي فيها صرخت..
ــ و حررررررريقه تحرررقك..

نوافذ السياره مفتوحين.. سمعها الصايع ...
ولا شافت الا السياره تريوس ..
اختلعت .. وقلبها صار يطق .. سوت روحها ما تشوف شي والوضع عادي..

وصلت السياره لعندها..
الصايع يصفر : ــ اقوول.. اول مره اشوف انوثه تصارخ كذا .. ؟؟ خير ياحلو .. ليش هالصريخ
زينب تقلبت الوانها .. صفرا .. حمرا.. زرقا .. اختنقت بتصيح .. قلبها يطق بشكل مو طبيعي ..
صارت تمشي ولا عليها.. وهو يمشي جنبها على خفيف..
رجع يتعيلف :
ــ مممم حريقه تحرقني هاا.. زين الجوو باااارد .. والمطررر يطييييييح... اركبي بس اوصلش ..
زينب خلاص بدت تصيح...

الصايع يبغى يخوفها زياده.. قام وهو يمشي على خفيف فتح الباب
الا بصرخة زينب:
ــ آآآآآآآآآآه
ولا تشوف الا عادلوه .. طافر ليهم ,, ويمسك الصايع من كلر بلوزته .. ويحوشه بقس على وجهه..
وقف سيارته... ونزل له::
ــ آآآه يابن الـ........... ... مين انت على شان تمد ايدك .. منت الا واحد مينوون..
ويصير يترفس في بطنه.. وعادل يصرخ ويصيح...

عاد زينب حزتها تمنت اشرف يطلع.. بس ما طلع.. صارت تصارخ..
طلعو كم واحد من بيوتهم.. وراحو يفكو الصايع عن عادل..

زينب هربت .. ويش توقف تسووي.. !!

وصلت للمزرعه وهي حالتها حاله بتمووت من التعب .. لقت في وجهها ابوها حاط فوق راسه كيس كبير عن المطر..
هو من شافها اختلع.. زينب ما تجي الا اكيد في سالفه قويه..
تلقاها وهي تصيح وحالتها حاله..
ــ ويش صااااير...؟؟ ويش فيش ؟؟؟؟
ــ علي...المحامي .. باق فلووسهم وانحاش..
ــ اناااااااا لله واناااااا اليه لرااجعووون.. حسبي الله ونعم الوكيل..

وغطى ابو جاسم بته وياه بالكيس و اتجهو بيت ابو علي..

ام عادل تداوي في ولدها :
ــ ويلي ياولدي .. ناقص انت طق وترضرض عظامه..
ــ آآآآآييي.. مممااااحد قققال له قققلييييل الحيييااااا ... يأأأذذذي زززينب
ــ ياربي .. ماعليك من احد.. ولبك ولب عمرك انت..
ــ مممااااايصصصيييير..
ــ ولويه ما يصير ؟؟
ــ مرررتي و اددااافع عنننها .. لاااازم
ــ ههههههههههههههههههه انا لله.. ما يسوى علينا ذاك القول.. خلاص حطيتها في بالك..
ــ اييييه .. ولا ابببغى غيييرررهااا..
ام عادل بغصه وفي بالها:
ــ ايييه.. خلف الله عليك ياولدي.. ياليتني اقدر احقق هالشي وافرح فيك.. منى روحي والله.. بس ويش بيدي.. الحمدلله رب العالمين على عطيته..
عادل : ــ بس هالتشششلللخ اهووون من هذذذاك .. فييي الزززرررنوووق ططاااحوو ففيييني دسست لوو مااامؤؤيد شااالني شششان متت..
ــ وي بعيد الشر عنك .. مؤيد ؟؟ وين هذا بفريقنا؟؟
ــ لاااا مو فريقنا .. هناااك في الفررريق الثاااننني
ــ شفت امه؟؟
ــ اييه ام مؤؤؤيييد طيييبه وتحببني داااوتني و عطتتتني شاااي وتاااوه و بتتتها جججووود احللييوه وخفففيفة دم..
ام عادل ابتسمت : ــ يالله وحشووووووني ... كبرت جود؟؟
عادل يأشر بأيده .. : ــ هالكككبررر...
ــ يالله ليهم وحشه... تصدق ياولدي .. على ايام ما كنت عايشه في ذاك الفريق ومن بيت خال لبيت عم... وحالتي ما يعلم بها الا الله.. ما كنت اشوفها الا هي تزورني وتخفف عني .. وتسأل عن اخباري .. خوية جدتك المرحومه.. ياعلي ذكريااااات,,, قول اندل بيتهم لو شي .. خلف الله علي..
ــ اننننننااااااااا اننندددله..
ــ والله.. صحيح... اجل يبغى لي ازووورهم..
ــ جااابوووني ذااك الييوووم بس عباااسسسوه ما دخخخلهم .. طررراخ صفففق الببباااب في وجهههم
ام عادل انصرعت :
ــ هاااااا .. احلف .. وتوك تقول يا لخاااااااايب !!
ــ وووالله .. ووويش دررراني ... وصصلووني بالسسسيااارة وعببباسسسو من شششافني صار يسسب مااالت علللييك وعلللى امككك سبش ترى اماه بعدد..
ــ واني ويش ماخذه منه غير السبايب .. ياعلي فشيله وعلى قلبي .. جزاة خيرهم... لا يبغى لي ازوورهم لازم.. طيح وجهنا حجي عباس ما قصر..


تابع>>