ليلى طلعت منام وفرشته.. وطلعت شرشف بتغير شرشف سريرها...
علا بأستنكار..
ــ لويه تغيريه؟؟
ــ بتنامي على سريري الليله واني على المنام..
ــ لالا.. تسلمي فديتش خليني على المنام...
ــ هذاني باغير الشرشف لش...
ــ غناتي مو هذا القصد.. بس سريرش هو لا اصير فوق وانتين تحت..
ــ مااايصير بعد انتين ضيفتي انيمش تحت واني فوق..
ــ عااادي ههههههههه ويش فيها..؟؟ تدري شلون..

وخرت علا المنام .. وشالت منام سريرها ونزلته على الأرض...
وهي تشيله طاح على وجهه وانفتح بالمقلوب ..دفتر .. شكله دفتر ذكريات او ما شابه..
ــ اوه.. آسفه مادريت في شي ...
ليلى شالته وحطته في الدرج: ــ عادي شدعوه..
ريما جاها فضول ... دفتر ويش هذا؟؟؟
في حياتها ما شافت ليلى تكتب؟؟؟

طفو الليتات وانسدحو يسولفو...
علا صارت تسأل ليلى عن هواياتها و اهتماماتها..
ليلى ابتسمت..
ــ ههههههههه تصدقيني اذا قلت لش مادري.. ما شوف شي اتميز به..
ــ ليش عاد.. تلاقيش عندش بس مدفونين ما تدري عن روحش...
وبعفويه كملت كلامها..
الدليل الدفتر .. شكلش كاتبه...
ليلى في الظلام ما يبين.. ارتسمت ملامح الحزن على وجهها.. وبهدوء..
ــ لا .. ماني كاتبه ولا شي .. دفتر خرابيش هذا ..
ــ يعنوو..
ــ انتين ويش هواياتش؟؟
ــ اني.. الرسم...
ريما نطت بالسالفه:
ــ الله حركتاااات .. ترسميني اجل ؟؟
علا : ــ هههههههه لا بعدني ما وصلت لهالمرحله..
ليلى : ــ ويش ترسمي.. ؟؟
ــ ارسم لوحات زيتي..
ــ تمام ما شالله عليش ؟؟ الحين عندش لوحه ترسميها..
ــ ايه لعاشوراء .. باقي ليها اللمسات الأخيره بعد 3 ايام باسلمها..
ــ عليش بالعافيه ومأجوره.. لعاشوراء ؟؟ وبعد ثلاثة ايام... بعد ثلاثة ايام يبدي شهر ذي الحجه...
ــ ايه بس يبغوها قبل على شان ينضمو الوضع و العرض و هالسوالف..
ــ الله يوفقش ان شالله..
ــ ويش رايش تروحي وياي المعرض التابع للحسينيه .. تتفرجي يومها على اللوح
ــ ان شالله.. تسلمي غناتي..

ريما : ــ ناااااااس ونااااس .. واني ما بتاخذووني؟؟
علا : ــ ههههههههههه ولا يهمش .. لويه ما ناخذش...


في التوقيف.... ايده على خده وحاط الهم في القلب ...
كان معاه واحد موقوف مدمن خمر.. وآثار السكر شوي بعدها فيه...
علي مو طايق الوضع ولا اللي وياه.. والحزن مرسوم في وجهه وعيونه غرقانه دموع..
ما سمع الا السكران:
ــ انت.. هيه.. ويش فيك عافس هالسحنه..
وصار يهربد موال..
لااااا تشتكي للناااس.. لاضاق بالك..
الناااس ماتملك مسره .. ولا ...ويــــــــــش ..
علي يطالع فيه وصمت ابدا ولا كلمه..
السكران يكمل : ــ اف منك.. ولا ياااس
ولا تحسبك في التعاااسه لحالك..
اعرف ترى عاااايش معك في الدنيا اجناااس..
هههههههههه زيي .. شوفني .. هذانا وياك مفلوت هنا حالي من حالك... لا برطمت ولا انقهرت

علي جته غصه... ـــ حاله من حالي ... اييييه الله العليم بحالي ..
السكران يكمل :
ــ الناااس حالهم مثل حاااالك
والكل من مر الليالي شرب كاس ..
ويقعد جنب علي و يضرب على ظهره :
ههههههههههه انا اللي خاطري الحين في كاااس...


علي تنرفز مو طايقنه ولا طايق ريحته ولا طايق هربدته ولا الوضع ولا المكان ولا شي ... صرخ صرخه حد ما عنده ..
ــ وخرررررررررر عني ...
السكران نقز :
ــ بسم الله ههههههههه ويش فيك عدال .. تقول جربان اوخر عنك.. تشني البخت..
علي بقهر :
ــ الجربان انظف منك يالتعبان..
السكران :
ــ ههههههههههههههههه اقوول الله عالنظافه اللي جابتك هنا .. هههههههههههه قال انظف قال..

علي ما تحمل .. نزل راسه بين ركبه .. يحس بقهر الظلم بحسره والم ...

صارت دموعه تسيل على ثوبه.... و في باله ..

ــ صادق في اللي يقوله.. أي نظافه اللي جابتني هنا.. على آخر عمري اتسمى حرامي... يالله الطف بحالي ...


ام علي ما غمض ليها جفن.. دمعاتها تسيل وصوت نفسها ينسمع ...
ابو علي انقلب على ظهره.. مد ايده ومسك ايدها ..
ــ اييه يا ام علي.. الله كريم.. هدي بالش ... خلي ايمانش بالله قوي..
ــ و النعم بالله .. احاتيه يابو علي .. احاتيه.. اكل لو ما اكل الحين... نايم لو صاحي... اللي وياه في التوقيف مين... اشوى الجو شتا لا يموت من الحر... ماني قادره اتخيل ولدي هناك...
وتصير تصيح...
ابو علي ضغط على ايدها.. وسالت دمعته على خده...

ريما :
ــ علا .. تسمعي اغاااني؟؟؟
علا بأستنكار: ــ لأ ...
ريما : ــ غررريبه
ليلى : ــ ويش الغررريب بالله.. تفكري الناس كلها زيش..
ريما بسخريه : ــ لا زيش..
علا : ــ هههههههه ويش فيكم .... ولويه قلتي غريبه...
ليلى : ــ ما تستحي لأنها..
ريما : ــ مالش شغل. خليت لش الحيا....
علا: ــ لويه بتتشابقو الحين.. وحق ويه قلتي غريبه؟؟؟؟؟؟
ريما: ــ لا بس كل البنات الغنيات اللي اعرفهم يسمعو ولا بعد اجنبي وبعدة لغات..
علا : ــ ههههههههههههه وليش يعني كل الغنيات يسمعو.. عندهم سيوله يشترو ليهم يعني.. والا ويش القصد!!!
ريما : ــ خخخخخ شدراني بس انتين اول وحده تمر علي كذا...
علا : ــ ان شالله مو آخر وحده.. وان شالله انتين بعد تبطلي تسمعي...
ريما : ــ خخخخخ على خير..
ليلى : ــ ياليت تهون.. ابدا ما عندها حتى نيه انها تهون..
علا : ــ لا ان شالله بتهون..
ريما حطت السماعه .. و لا عندها فيها .. تغطت بالبطانيه.. وفي بالها:
ــ شلة مطوعين و يللا عاد بيقعدو يحنو على راسي...


جاسم في غرفته .. طلع من تحت سريره كرتون فيه راديوين و 3 جوالات.. وصار يقلب فيهم.. وفيه غصه ... شوي بدأ يصيح.. ويعتب على حاله..
ــ انا فاشل.. عاطل باطل.. بس عديم انسانيه وضمير.. هذا اللي ماتوقعت اوصل له..

باب غرفته يطق .. ارتبك وبسرعه دخلهم في الكرتون تحت سريره...
ــ ممميين...!!
ــ اني زينب...
ــ ويش تبغي.؟؟
ــ ابغاك بقعد وياك..
ــ مابغى اقعد ويا احد...
ــ افتح زين...
ــ مانى فاتح .. روحي عني...
ــ زين باجيب لك اكل ما تبغى..
ــ ماااااااابغى شي ...
ــ زين كيفك...بالطقاق

راحت عنه زينب وفي قلبها حره.. تبغى تسأله عن تفاصيل السالفه وشلون عرف حميد و من متى.. بس ابدا مقفله النفسيه مع جاسم.....

حميد في صندقته منسدح... يتقلب يمين وشمال يبغى ينام موعارف...
قام من منامه وهو يتحمق..
ــ اففف اتقلب كني دجاج شوايه.. لو فيني نومه نمت.. اطلع احسن لي ..

طلع وقعد عالبحر.. شاف طراد علي مربوط.... راح ركبه وقعد فيه.. وبلا وعي صار يسترجع ذكرياتهم وطلعاتهم .. ومقالبهم في بعض...

صار حميد يحاول يطرد شبح هالذكريات... ما يبغى يتذكر شي .. يحاول قد ما يقدر يموت صوت الضمير الحي بداخله...

لين تذكر يوم ينقذه من الغرق ...
ساعتها ما قدر يتحمل...

غطى وجهه بكفوفه وصار يصرخ و يضرب في روحه..
ــ انا ليش سويت كذا.. نذل .. انا نذذذذل...

قام و رمى روحه في البحر .. وصار يكفخ الماي وهو يسب في نفسه... لين تعب ورجع عالطراد رمى روحه .. ونام...

سجاد.. ما جاله نوم.. طلب من امه بألحاح تخليه سهران وياها .. لين يرجع ابوه الصبح من العمل وبعدين اذا نامو بينام ...

وافقت امه .. وخلته يطالع سبيس تون.. مسلسل ريمي..
كان اخو ريمي ( آرثر) ما يمشي مثله.. وفي هالحلقه مشى...

امل كانت عندها هوايه .. تسوي اكسسوارات يدويه.. خشبيه وخرز وخيوط,,, من حركتات البنات هاليومين.. وتبيعهم...

كانت تشك قلادة خرز,,, ولا سمعت الا ولدها ..
ــ اماااااه..
اختلعت امه وجت له تركض..
ــ ويش فيك...؟؟؟؟؟؟
سجاد وفي عيونه لمعة دموع الأ مل ممزوجه بأبتسامه كسيره ببراءة طفوله..
ــ آرثر.. مشى...
امه قعدت جنبه وحوطته بذراعها.. وباسته:
ــ فديتك..
ــ بمشي انا زيه صح
ــ ان شالله غناتي.. ان شالله..
ــ هو شكله اكبر مني .. يعني اذا صرت قده بمشي.. امااه تتوقعي كم عمره..
امل ابتسمت: ــ عمره !!.. الله يخلي الواحد يمشي في أي عمر.. يمكن انت تمشي الحين .. يمكن اكبر منه.. الله العالم..
ابتسم سجاد ابتسامة رضا.. ورجع يتابع الكراتين..

قامت امل وهي سرحانه.. وتفكر في حال ولدها.. و في قلبها تدعي يارب ما يطول ويفرجها عليه...

وبين ماهي تشك خرزات العقد. جى على بالها حسين... شكت الأبره بصبعها..
ــ آي...
ضغطت عليه وفي بالها..
ــ الله يستر...

حسين عمله كله حديد في حديد.. مسؤولين عن انابيب البترول صيانه و تمديد و غيرها من هالشغلات المتعلقه بها...

صارت مشكله وبالغلط طاح بيب كبير على رجول حسين... اغمى عليه من ثقل البيب و نقلوه المستشفى على طول.....
الى الملتقى..