الساعه 2 الظهر ..
جاسم فتح باب غرفته.. الا امه وابوه واخته في الحوش قاعدين يتغدو..
ابو جاسم ماله خلقه فما كلمه ولا اخذ وعطى وياه.. باله ويا اخته ومصيبتها..
ام جاسم:
ــ تعال تغدى..
جاسم : ــ مابغى مالي نفس..
ــ ايه.. على هواك ...
دخل الحمام وغسل .. ورجع غرفته بدل ثيابه وطلع ..
ابو جاسم ينفض ايده:
ــ سد الله نفسك مثل ما انت ساد نفسي.. لا حيا.. لا مستحى.. لا صلاه.. لا عباده.. لا طوع لا ادب.. آآآه الله يصبرني عليه..
ام جاسم بهدوء : ــ الله يهديه..
وقام ابو جاسم:
ــ روحي بيت اختي وطمنيها اني باروح اليوم لعلي ...
ــ ان شالله..
زينب بعد ماقام ابوها تهمس لأمها:
ــ ويش يسوي ابوي لعلي بالضبط؟؟
ــ والله مادري يابتي .. اللي ادري به يكفله ... يطلع على كفالته لو صار ماصار وما لقو علي بعيد الشر عنه .. ياخذو ابوش بداله..
ــ يعني.. عساه خير.... تتوقعي يحتاجو محامي..؟
ام جاسم بحزن: ــ ويلي عليهم.. لا ان شالله سهاله.. المحامي تكاليفه وايد يا بتي..
ــ اييه.. الله كريم...
جاسم راح الصندقه لحميد... ما لقاه فيها ...
قعد على الباب... ساعه .. ساعتين.. ماجى..
وين راح هذا؟؟
شوي الا بجية عادل..
جاسم في باله : ــ اففففففف ويش جابه مالي خلقه..
ولا شافه الا تعثر ويطيح يتشدخ :
ــ آآآآآه...
ويرجع يقوم ينفض روحه ويشدخ نعاله ويلبسه..
جاسم ماقدر صار يضحك عليه و لا انتبه له الا نعاله مقطوع...
عادل:
ــ قققووووه جججاااسسسموه
ــ جاسموه في عينك...
ــ ووويش تسسسووي برررى... ححممميد ررراح سووووق السسسمك شششفته..
ــ يعني.. وانا اقول وينا راح.. نسيت ... عدل نعالك مقلوب.. و لويه ما تغيره مقطوعه طبقه...!!
عادل يرفع ثوبه ويطالع نعاله تحت..
ــ هههههههههههههههه خبل قققااالللو لك .. مانى خببل حققق اغيييررره.. قطططعته على ظههر حسسسنوووه الأغبررر,,, تمباااني اغييررره .. كل من سأأألني قلت له سااالفته..
ــ هههههههه خبل وربي .. الله يخلف عليك.. عيون ونعال عوران... وعيونك من ويه؟؟
ــ من فججعوووه عببباااسوه.. فلللعني ببترري .. هههههههههههه تصصصدق انهياااكل البتتتاااررري
ــ اصدق انك زهقتني اقوم احسن لي ...
وقام عنه....
وفي القسم.. ابو جاسم يحاول يخلص اجرائات الكفاله...
الضابط سمح له يكفله ويطلعوه يومين على ذمة التحقيق ومو بعيده يرجعو يستجوبوه...
ابو جاسم فرح.. وطلعو علي ...
حضن خاله وصار خاله يصيح.. و علي يمسح على ظهره:
ــ خلاص ياخال...
ابو جاسم يمسح دموعه بغترته .. ويبتسم:
ــ مشينا ياولدي .. والله كريم...
طلعو من القسم.. علي يحس روحه كأنه محبوس شهر مو بس يوم بليله...
وصلو البيت.. وطقو الباب...
وكانو كلهم قاعدين في المجلس ينتظروه..
ام علي مع طقة هالباب قلبها طاح..
قامت هي تركض وفتحته..
الا بدخلة علي عليها..
ــ ولددددي...
حضنته بالقوه ,, وصارت تصيح
طلعت ام جاسم من المجلس وصارت تصلي على محمد وآل محمد بصوت عالي...
زينب حضنت ليلى وصارو يصيحو من الفرح...
علي راح لأبوه وباس راسه.. ابوه مسكه و حضنه ويللا صياح...
الكل يتحمد له بالسلامه..
وبعد ما ارتاح علي .. وسبح .. رجع ليهم المجلس بيقعد وياهم شوي..
امه صارت تسأل فيه..
ــ وكيفا كذا ياولدي .. من ويه ... لويه تهموك..؟؟
علي مو قادر يتكلم ولا يبغى يتكلم ويقول الحقيقه .. وولد خاله جاسم له صله بالموضوع .. يكفي ابو جاسم جى وكفله ... مسكين عالنيات مايدري ولده ورى حبسته..
ــ والله مادري ,, يقولو شافو في طرادي حوايج مخشوشين مادري مين اللي خاشنهم...
ابو علي : ــ زين يمكن حق حميد مو هو وياك بالطراد..؟؟
علي يحاول يكون طبيعي :
ــ لا كشفو البصمات ماعليهم بصماته...
ريما نطت : ــ اجل بصماتك اللي عليهم..!!
علي صار يطالعها بقهر..
ليلى : ــ بصماته في عينش ..
ريما : ــ ويش قلت اني,,, و دام لا بصماتك ولا بصماته .. لويه اجل خذوك..
ليلى عصبت فيها :ــ ريموو وبعدين.. ؟؟
زينب ودها تقوم لريمو وتطيح فيها بدست..
علي مو عارف ويش يقول:
ــ لأن الطراد الي وبأسمي .. ماندري مين اللي كايدنا وناوي لينا بالشر وخش المسروقات فيه..
ام علي : ــ انتقم الله منه.. جعله ما يربح ولا يتهنى..
علي : ــ اخليكم باقوم انام شوي ,,, ما نمت شي ..
ام علي : ــ نوم العوافي يا بعد ابوي...
ليلى : ــ نام في غرفتنا اكو في منام مفروش ما شلته...
ـــ زين...
وراح علي غرفة خواته.. رمى روحه عالمنام.. وعلى طول راح في سابع نومه من التعب..
المغرب رجعو بيت ابو جاسم بيتهم.. وشافو جاسموه قاعد ياكل عيش ويرمي عالدجاج في الحوش يأكلهم..
ابو جاسم وهو داخل صار يتحمق عليه:
ــ ها,, طايح هالحظ,,, يرحم الدجاجات ويأكلهم .. واهله ما ياخذو منه لا حق ولا باطل..
جاسم نفر بقايا اللي في الصحن للدجاج وراح المطبخ ..
ابو جاسم:
ــ ولعنه ,, يعرف يعاند اسود الوجه..
ام جاسم وزينب راحو المطبخ
ام جاسم... يازعم بتبشر ولدها .. لأنه هو اللي جاب الخبر عن علي ليهم ,, وبأبتسامه عريضه:
ــ ولد عمتك علي .. طلع اليوم
جاسم اختلع : ــ هاا.. ويش طلعه؟؟
ــ ويش فيك مختلع..؟؟
ــ لا بس .. كنت احاتيه وسالفته مهي هينه... شلون طلع بهالسرعه.. ... ايه... الحمدلله..
ــ طلع على كفالة ابوك .. كلما بغوه بينادوه ويحققو وياه ما بيحبسوه عندهم.. والله كريم ان شالله و ينفي عنه التهمه..
جاسم مرتبك.. وتعفست احواله زياده.. ولا هو عارف ويش يسوي..
ام جاسم بتساؤل:
ــ اني مو ماكل مخي الا هالحميد..
جاسم : ــ ها.. ويش فيه..؟؟
ــ هو كل ويا علي ومتشارك وياه في الطراد جق ويه خذو علي وخلوه.. قال ويه بصماته مهي على الحوايج... وخذو علي على حساب انه الطراد بأسمه..
جاسم مو عارف ويش يرد:
ــ ايه.. مادري
وطلع من المطبخ..
زينب : ــ ويش فيه هذا..؟؟
ام جاسم : ــ ويش دراني عنه.. حاله مو طبيعي..
ــ اقص ايدي اذا ما يعرف شي و ساكت..
ــ مايعرف ويه؟؟ وويش دخله في حميد .؟؟ ويش عرفه به ..؟؟؟
ــ ويش دراني .. اجل لويه هالأرتباك وهالخوف..
ــ اهوو من يوم يومه اخوش جبنه.. فالح يتشيطر علينا بس..
ــ يجوز...
تابع>>
المفضلات