رد مع اقتباسالحلقة ((1))
الجو بارد,, الساعه 9 الليل ,, والرعد صوته يثير الخوف في النفس .. والمطر كل ساعه يزيد ,, ليلى في بيتهم تدور في الغرف بصفاري ومغاطس وطاسات.. تحطهم يتجمع فيهم ماي المطر ..بيتهم دور واحد..و قديم و يخر ماي من السقف ..
ليلى :
ــ ريماا.. ريمااااا..
ريما منبطحه على بطنها وتحرك رجولها فووق وتحت .. وتطالع تلفزيون.. وزي ما يقولو عمك اصمخ..!!
ليلى :
ــ ريموووووه..
ريما بملل :
ــ هاااااااااااه..
ــ صار لي ساعه ازعق.. ما تردي حق ويه..؟؟
ــ اتابع الفيديو كليب .. تعالي شوفي لبسها يجنن مو..
ليلى بقهر طفته :ــ كم مرره قلت لش لا تتابعي هالسخافات.. حرام ما تفهمي ..
ريما والكلام مو عاجبنها : ــ اففف حرام وحرام.. اللي يسمع ويش مطلعه.. كلهم كم قناه عربسات .. لو نركب هوت بيرد ويش بتسوي بتشيلي التلفزيون عني.. طالعه لي فيها مرجع ومطوعه !!
ليلى حمقت من طول لسان اختها وصرخت:
ــ هوت قررد يفلعش ان شالله.. حركيني .. وبلا قلة حيا ومسخره .. اشوف النصيحه في هالزمن ما تتقبلوها .. وعدلي قعدتش..
ــ مو ياهله اني ولا احتاج نصايحش ..ولويه اعدل قعدتي ..
ــ قعدتش غلط يرجع اخوش من برى الحين و يشوفش.. تأدبي هاااا..
كانت منسدحه على بطنها و رافع سيقانها تحركهم في الهوا..
ريما: ــ اهوو ولو شافني ؟؟ ويش مسويه..!!
ليلى حمقت و طراااااخ..
و ترمي الصفاري في الأرض ..
ابوعلي كان نايم في الصاله .. ليلى نسيت انه نايم.. ويقوم مختلع ويقعد وهو قاعد..
ويفتح عيونه وبلا وعي :
ــ ونااااايبه... هااااداااااااااويه..
ليلى انتبهت وهي منحرجه وفيها ضحكه على خلعة ابوها:
ــ آسفه يُبه نسيت انك نايم هنا ..
ريما : ــ صار لينا ساعه نتشابق ما قعدت .. من ليلوه المزعجه كل متحكمه فيني .. لا تطلعي هالقناه .. لا تقعدي كذا.. لا تلبسي كذا.. حتى في النومه تطفي الليت غصب وتقول نامي لا تسهري كل شي على كيفها..!!
ابو علي : ــ عاد يا بنات ما تستملو من هالسنطوانه اللي تنعاد كل نوبه <<((سنطوانه=اسطوانه بلهجة الشياب))..
ام علي جت كانت تحاتي ولدها علي للحين ما رجع .. وقاعده كل شوي تتصل بجواله مقفل ..
ــ اهووو وتاليتها وياكم كل شباق .. اففف اني بالي بالة ولدي للحين ما عود والمطره كلما ليها تزيد..
ابو علي : ــ عاد يا ام علي ولدش مو ياهل كبير وشايل عمره .. ان شالله خير يوصل الحين بالسلامه..
ام علي :
ــ وكبييييييير وشاااااااايل عمره..؟؟ ما اخاف عليه يعني ؟؟؟
. ياربي ان شالله مو نازل في البحر ..
ابو علي : ــ اهووو غيره عندهم مَرَه وولاد .. رجال هذا ما ينخاف عليه
ام علي والكلام مو عاجبنها : ــ اهوو عني انت.. ويش بيدي عليه من وادي لوادي قال مره وولاد .. الله يبلغني ان شالله .. اني امه واحاتيه خلني بس..
ابو علي رجع انسدح: ــ انا لله ما بيدبحش الا هالخوف انام احسن لي ..
ام علي بهمس مقهور : ــ نام بس نام.. ما شغلتك الا تتعيلف..
ليلى : ــ حركيني دوري وياي من وين يخر السقف و حطي طاسات وصفاري
ريما : ــ اففففففف حنا ويا هالبيت المهتري .. ويش هالحاله .. ماني قايمه انتين اخبر بمحلهم,, كل سنه وهذي شغلتش
ــ ما تيوزي عن طولة لسانش هاا.. مادري افلع هالصفريه على راسش؟؟
ابو علي : ــ توتوتو عاد يامره ما تشوفي بناتش نبغى ناخد لينا غفوه
ام علي : ــ اهووو ما هم يهال ,,غفووة ويه قوم الغرفه و نااام موليه بعد غفوه ..
ابو علي : ــ اتاني عشاي مادري متى بتحطوه.. وبعدين قلتيها بناتش ما هم يهال تحاتي علووه إلويه الحين..
ام علي : ــ ايييهي عليك وعلى تعيلفك من حاجه لحاجه.. اقول .. ليلى خلي الصفاري لريموه وقومي انشبي لأبوش طاسة عيش ولبن خله ياكل وينام ..
ابو علي يعدل قعدته:
ــ ايه قالوها نوم الظالم عباده
ام علي ماليها خلق : ــ ووووووويش فيك؟؟؟ ويش دخل ظالم ما ظالم ؟؟؟
اني بالي بالة ولدي ,,, وانت ضرب تعيلف من الصبح للحين.. !!
ليلى جابت عشا ابوها:
ــ هاك يبا
ابو علي يمد ايده يتحسس..
تحط ليلى الطاسه في ايده اليسار والملعقه في ايده اليمين
ابو علي : ــ جزاش الله خير يابتي .. ملحتيه
ليلى : ــ ايه ملحته..
ابو علي : ــ بسم الله ..
وصار ياكل ..
ــ الا اقول يا ام عليو.. اخبار جارتش بعدها مخوبلتنش بثياب بناتها
ام علي:
ــ مالي زااغر ..هااا.. ويش جاب هالطاري..
ابو علي فيه الضحكه ,, ويكمل تعيلف وهو ياكل ..
ــ لا .. بس اسأل نسولف عن هالصخه والمحاتاه اللي دابحينش..
ام علي منقهره:
ــ وما دورت سالفه الا سالفت هالمصفعه ويا بناتها المتشيرطات..كل يومين نطو علي غيري هالموديل وقصري وسوي وزيدي الفتحه عجل يافرج الله...
ــ ههههههههه ويش عليش المهم تخيطي انتين عساهم تفصخو
ــ ويش علي منهم هاا.. ويش علي منهم .. حق ويه تسأل اجل ... حق ويه!!
ابو علي حط الملعقه في الطاسه وحطهم على جنب :
ــ اهووو بالعه راديو حشا ,, تصبحو على خير ..
وقام يتحسس الجدار رايح لغرفته بينام...
ام علي : ــ وانت من اهله ..
وفي بالها.. ــ يااابرووود اعصاابك...
ريما وهي تدور بالصفاري قاعده تطبل : ــ اففف زهقت اني خلوه يخر..
ليلى فضت كم طاسه فاضو من الماي::
ــ اقول ريوم فضي الطاسات الباقي وانتين ساكته ,, وطيورش هاللي ضاربه طبل خليها تركد عورتي راسنا..
ــ اوووه يماااه .....شوفو صرفه لهالبيت اخرتها بينهد فوق روسنا..
ام علي تشيل طاسة ابو علي و بلا وعي صارت تحرك بالملعقه وبنبره هاديه وحزينه :
ــ ويش بيدنا يا بتي .. شايفه بيد ابوش واخوش شي... حتى اني اشتغل بهالمكينه ولاني ملحقه.. ؟؟
ليلى عورت بقلبها امها .. :
ــ ريمووه .. كل سنه هذي اسطوانتش .. اذا بتحني وبتزني بلاها هالمساعده روحي قعدي وريحي .. اني باشيل هالصفاري..
ــ ايه زين.. مفكره ويش باسوي .. زين جت منش .. يللا تصبحو على خير..
ام علي : ــ .. الله يهديش يا بتي.. وانتين من اهله..
صارت ام علي تعاون ليلى على مسح الأرض و التنظيف وتفريغ الطاسات ..
والمطر يزيد .. وقلب ام علي يحاتي ازيد..
وفي الصندقه قريب البحر.. في الرطوبه البارده.. و حواليهم برادات السمك الطازج ,, دخان السجاير يتعالى .. حميد وعلي .. صديقين صار ليهم 7 سنوات .. تلاقو في البحر .. وبظروف مثل هالجو .. طلع علي من البحر والمطر غزير وهو تعبان ..مالقى الا صندقة حميد... اللي طلع له ودخله وقعد وياه لين خف المطر .. وصارو كل يوم يتقابلو في البحر حزة الصيد.. سوالف و حكايات لين تطورت العلاقات....
كل شي يعرفه عن حميد.. ويش يحب ويش يكره كم عمره .. قصصه وحكاياته.. الا هالأسئله اللي حيرت علي فيه طول هالسنين..
... ولد مين هو؟؟؟
وليش عايش هنا..؟؟؟
و الفلوس اللي يحصلها من شغلته.. تكفيه لأكثر من اكل وشرب .. وهو مكتفي بالأكل والشرب وعايش في هالصندقه..وين يودي الباقي ؟؟
علي : ــ يالله هالمطر مو راضي يخف .. وجوالي طفت البطاريه...
(( صندقة حميد طبعا مافيها كهرب ,, و لا عنده جوال))
حميد يفطفي السيجاره : ــ ياخوك ويش بيدك.. والله الجو يخوف وسيارتك مهي حمل لهالمستنقعات بالطريق .. اشك كم متر وبتطفي عليك.. شوف جوالك يمين يسار مافي ابراج..
علي : ــ افف لااا ..
وتطيح نقطة ماي على شعر علي ..
حميد يرفع راسه : ــ اوهووو هنا بعد يخر ...
ويحط صحن ..
علي يتنهد ويبتسم : ــ الله يعوض عليك و علينا ,, ايييه ياحميد تدري ويش نفسي الحين...
حميد يحط ايده ورى راسه ويتسند عالجدار ويتنهد هو الآخر :
ــ ايييه .. غرشة بيبسي معرقه تبرد الأفاد..
علي فتح عيونه:ــ معرقه في عينك هههههههههه وبيبسي انا في ويه وانت في ويه.. لا اطلع لك سمكه من البراد واسطرك بها...
ــ ههههههههههه,, عادي ياخوك كل واحد .من نظافتي... زفر انا في كل الأحوال.. ايه نفسك في ويه يا حظي...!!
ــ جعلني ما اصير حظك لا بالله,, ههههههه على شان يصير طايح عدل...
ــ هههههههههههه دون حظي .. صل على محمد بس ياخوك واحمد ربك ..
ــ الحمدلله ,, اللهم صل على محمد وآل محمد... آآآخ يا خوك ودي ..
حميد يطبل عالبراد : ــ ودي ارووح الغاضريه .. ودي ازوور الغالي حسين..
علي : ههههههههههه غربل الله شرك انا هذا اللي باسطره
ــ افااا يعني ماودك ؟؟
ــ وجهك اكيد ودي .. ووودي وودي...
ــ ااااااه,, انا ودي ان اعرس واجيب ولاد..هههههههههه..
علي سكت و جته غصه على خويه وعلى روحه وفي باله :
ــ يالله كان انا في امل الله يعطيني هالمراد.. العوض على الله في حالتك ياخوي.. لا ندري ويش اصلك وويش فصلك و لا انت راضي تتكلم .. ايييه يجي لك يوم وتعلمني...
حميد يفرك بطنه: ــ انا يوعاااااان... ويش ودك انت خلصني ..
ــ ويش ودي ويش دعوه فاتح مطعم ,, بتقوم بتملح سمشتين و شوية فلفل وبتشويهم ..
ــ هههههههههههههه ياربي .. ويش ودك من دي ساعه و ما قلت
ــ ايه ههههههههه تشيه انت تخلي الواحد يركز,, ايه ياحميد ودي اغير حالنا .. حال اهلي .. نعدل بيتنا عالأقل . بيت جدي هو اساسا ويوم توفى الله يرحمه ورثه ابوي.. وهو وحيده زين بعد لو عندي اعمام شاركونا فيه... ااااه يا حميد.. ودي اساعد ابوي باللي اقدر عليه .. بس ما باليد حيله..
حميد سكت وابتسم ..
علي يكمل : ــ خواتي ودي في يوم اطلعهم السوق .. ما يشترو ليهم شي الا من العيد للعيد.. نفسي افرحهم حالهم حال هالبنات.. ولا عاد الكبيره .. تبخل على نفسها بالقوه.. اذا توفرت فرصه تشتري شي في غير الأعياد,, تعطي الفلوس لأختها الصغيره... آخر شي عيد الفطر ماشرت ليها .. هالصغيره عجبتها لبسه غاليه.. عاد وياها دي الطلبات ما تخلص,, فقالت ذيك ما تبغى شي .... والحاله ياخوك كسيفه .. وهي تعور بقلب ابوي ما يبغاها اقل من خوياتها .. وربك يعين..
حميد تنهد : ــ الحمدلله على كل حال...
علي .. : ــ عورت راسك ياخوك بهدرتي بس وربي ابغى افضفض مو قادر
حميد يحط ايده على ظهر علي ويصير يمسح:
ــ لا ياخوك شدعوه انا وياك اخوان..
علي يبتسم لحميد ..ويحسه ملجأه الوحيد لاضاقت الدنيا عليه..
تابع..,,>>
في شوق لغداً والجزء الجديد
المفضلات