الحلقة 47 ..


اشرف كان يطالع في النافذه.. من الزهق في الرايح والجاي.. وبس شاف ابو جسوم يتمشى ويا زينب من بعيد ..
نزل بلا وعي يررركض من غرفته .. ويطلع من باب البيت ولا ينتبه للدرج عدل .. نسى درجه
وطرررم طرااااخ على وجهه ..
زينب شهقت... وبنفس الوقت جتها ضحكه بس عور بقلبها وصارت تداري ..
ابو جاسم من شافه انشدخ راح له يركض .
ــ بسم الله على عمرك ياولدي قوم قوم.. تعورت؟؟
اشرف مو متعور من الشدخه.. اشرف بيمووت من الأحراج..
وقام وابو جاسم ماسكنه..
ولا رفع وجهه الا مبينه في جبهته الضربه..
ابو جاسم يمسكها..
ــ ويلي .. تورمت.. تعورك..
اشرف يفز على عمره ولا كن شي صار..
وبأحراج:
ــ لالا حصل خير...
ابو جاسم: ــ خير ان شالله .. انتبه مره فانيه ولا تستعجل..
اشرف مره بيموت ويلعن الساعه اللي خلته ينزل فيها ..
ــ ان شالله..
ــ سلم على ابوك..
ــ يوصل ..
ومشى ابو جاسم ووراه بته..
واشرف مره يحس روحه قد النمله ويسب ويلعن في نفسه ياليته ظل فوق ولا طلع..

زينب :
ــ ولا نشوفه الا انشدخ على وجهه..
ريما :
ــ هههههههههههههههههههههههههه ياعلي فاتني
زينب:
ــ حرام عليش عور بقلبي ..
ــ اتحداش ماجت لش ضحكه..
ــ ههههههههه صراحه جتني.. بس بلعتها..
ليلى ساكته بس تسمعهم..
زينب :
ــ ويش صاير ..؟؟
ريما : ــ من شروط الحداد التزام الصمت..
زينب خزت ريما بنظره.. ريما بقهر..:
ــ اف حتى انتين .. اهوو بس..
ليلى بهدوء:
ــ باقوم اسلم على خالي..
زينب :
ــ قومي باقوم وياش نقعد وياهم احسن..
ريما : ــ وراااكم.. عالأقل ناس تسولف...

ما مداها ليلى بتدخل وكانو في غرفة الخياطه امها وابوها وخالها... الا تسمع ابو جاسم:
ــ افاا وليش مهي راضيه؟؟
ام علي بهداوه : ــ ما غير صالح.. رحمة الله عليه .. خبره كدر حياتها وخلاها بهالحاله..
ابو علي : ــ لا ليلها ليل ولا نهارها نهار.. بغيناها تخف وتنسى .. خفت شوي ومن جى مؤيد شاريها اعتفست احوالها ورجعت للهم..
ابو جاسم : ــ انا لله..
زينب تدف ليلى:
ــ دخلي ويش فيش وقفتي..
ليلى دموعها في عيونها:
ــ مابدخل خلاص ..
ورجعت الغرفه..
زينب :
ــ ياعلي ويش صاير؟؟ ويش سمعت..
ريما :
ــ اهوو تزهقو.. بدخل اني وياهم بابسط..
مامداها دخلت..
ــ قواك الله خالي..
ــ هلا هلا بتي .. شحوالش..
ــ حياك الله..

ام علي تبغى تصرف ريما ترجع وياهم ليكملو سوالفهم...
ــ امي ريما.. قومي شوفي عندنا موز لو لا .. نسيت ماحطيت ويا الفاكهه..
ابو جاسم فهم عليها وجت له ضحكه..
ريما ببرود: ــ ماعندنا .. ماشرينا اصلا ..
ام علي : ــ زين روحي شوفي اختش ويش فيها..
ريما بتحمق: ــ ويش فيها بعد كل نكد في نكد..
ام علي :
ــ اوهوو ويا هالعناد..
ريما : ــ قولي افارق ماتبغوني ..
ــ اخيرا فهمتي..
ــ وففففف مادري وين ارووح اني على عمر روحي..
ابو علي: ــ ام لسانين..
ــ اطلع الصاله احسن لي للتلفزيون..
ام علي : ــ احسن لش..
وطلعت
ابو جاسم:
ــ ههههههههههههه مسكينه..
ام علي : ــ الا لساان مغربلنا ومغربلنها..
ــ الله يهديها يارب..
ــ ان شالله..

وصارو يتكلمو عن مؤيد واخلاقه ويفكرو شلون يخلو ليلى توافق..
زينب في الغرفه تحاول تفهم ويش صاير .. وويش فيها ليلى.. بس ليلى شاده على عمرها وسرحانه.. ماشافتها الا قامت فتحت الدرج وطلعت دفتر صغير مسجله فيه ارقام تلفون..
وعلى طول راحت الصاله..
واتصلت..
ريما: ــ يوووووو تتصلي في مين..؟؟
زينب طلعت : ــ ويش صااير؟؟!!

و لا يشوفو ليلى الا ارتبكت :
ــ السلام عليكم..
مؤيد: ــ عليكم السلام...
ــ موجوده ساره؟؟
ــ ايه.. لحظه..

ونادى على ساره..
ساره: ــ مين؟؟
ــ مادري.. خخخخ حلاتي اسأل بنيه مين انتين..
ــ خخخخخ ويش دراني..
وردت..
ــ هلا..
ليلى تحاول تعدل صوتها:
ــ هلا ساره..
ساره بعفويه فرحانه:
ــ هلااا ليلى هلا غناتي..
مؤيد كان بيروح عنده شغله .. من سمع اسم ليلى وقف .. ورجع عند راس ساره يتصوخ..
وبعد سؤال عن الحال ..
ليلى بأرتباك..
ــ ساره.. غناتي.. بقول شي وابغاكم تفهموني وماتزعلو مني..
ساره قلبها حسها.. وبأرتباك:
ــ تفضلي ..
ــ غناتي.. اخوش عالعين والراس.. مايعيبه شي .. رجال والنعم فيه والف من تتمناه.. بس العيب فيني اني ..
ساره جتها غصه وهي تطالع اخوها اللي يترقب خبر حليو من هالمكالمه..
ساره توخر عنه بالتلفون.. هو خاف .. السالفه اكيد ماتفرح..
ساره بهدوء:
ــ ليش يالغاليه؟؟ ويش فيش من عيب .. ؟؟
ليلى : ــ اني انسانه مجروحه عايشه على الماضي..
ريما قامت بالسرعه لغرفة الخياطه:
ــ الحققوووووووووووووووووووو..
ام علي انصرعت: ــ ويش صااااير؟؟
ــ ليلو استخفت اتصلت بيت ام مؤيد واكي تقول ليهم ماتبغى ولدهم..
ابو علي وقف .. ولأول مره يصرخ بحمق:
ــ لاااااااااا لهنااا السالفه مصخت..
طلعو ليها .. لقوها خلصت المكالمه وزينب واقفه ومنصرعه من تصرف ليلى..وفهمت السالفه ..
ابو جاسم طلع ورى ام علي اللي بصريخها لأول مره بهالحال على ليلى.
ــ وين قاعدين حنااا.. سكتناا وايد.. توصل فيش المواصيل تتصلي للناس وترفضيهم..
ليلى سكووت ..
ابو علي صرخ:
ـ وكأني طوف في هالبيت.. لا راي ولا مشوره.. وين قاعدين الرجال جاي ويا اهله وشارينا .. تبيعيه وبهالطريقه.. لا حيا ولا مستحى..
ليلى انفجرت:
ــ لا تضغطو علي قلت ليكم مابغاه.. مابغاه ... وانتون كل يوم هدره علي .. والحين لخالي بعد..
ابو جاسم اثرت فيه كلمة بعد.. وبعفويه:
ــ افااا.. ماتبغيني ادري..
ليلى ارتبكت:
ــ لا مو هذا المقصد.. بس اني تعبانه وماحد يفهمني.. خلوني بحالي مابغاه..
ام علي معصبه.. ومتوتره.. مسكت ليلى من بلوزتها وسحبتها بأتجاه غرفتها..
ــ رووحي.. رووحي عيشي في النكد على طول.. احرمينا واحرمي روحش الفرح.. خلش على ذكرى اللي مات.. وموتي بالحيا وياه.. روحي .. ولا تراويني وجهش..
ليلى تأثرت وايد.. اول مره امها تعاملها كذا..
دخلت غرفتها وسكرت الباب..
ابو جاسم وزينب صارو يهدو في ام علي اللي كانت منفعله:
ــ بتحرمنا الفرح.. مابغينا يجي لينا ونعيش ايامه.. بتقتلنا هالبنيه.. نكدها مو طبيعي..
ابو علي قعد:
ــ انا لله وانا اليه لراجعون..
ابو جاسم:
ــ جيبي لأمش ماي..
ام علي: ــ ولا ادري متى بتفك هالعقده وبيتغير حالها.. مفكره روحها الحين ياهله.. بكره تندم اذا راحت عليها..

ليلى في الغرفه تسمع كلام امها وصياح..


تابع>>