ضعنا يا صبرنا...

[Princess]

تابع الحلقة 39

علا مهي عارفه ويش تسوي.. مر عليها هالموقف من سنين.. صارت المواقف تتسارع للورا.. امها ومرضها ونفس ارتباك ابوها وصرخته عليها وهي طفله تجيب العباه لأمها.. نفس الموقف انعاد وكأنه كان بالأمس..

علا قلبها انقبض .. صارت تركب الدرج وهي تشاهق ودموعها تنزل بعفويه.. وبهمس مخنوق تنادي..

ــ اماااه...

نزلت بالعباه.. تريزا صارت تعاونهم على سوسن.. سميره حست بشي مو طبيعي طلعت تشوف الوضع.. سألت علا .. علا ماردت ماليها بالتها.. رجعت ركض فوق بتلبس عباتها بتروح وياهم...

سألت تريزا...

تريزا بخوف ..

ــ مايدري.. ماما سوسن تعبان واجد..

سميره : ــ الله يسترر...

علا نزلت وطلعت ركض وراهم... وتوجهو للمستشفى..

في بيت ابو علي.. تجهيزات العزومه قايمه قومه ..

الرجال قعدو في المجلس.. ابو علي و علي وعبدالرحمن..

والحريم معاهم زينب ام جاسم مارضيت تجي وياهم...

ليلى :

ــ وين ريمو تجي تعاوننا ؟؟

رزان : ــ لا خليها تكفين عطيتها حنين لا تأذينا بحوستها ... تمسكها لين ما نخلص ..

ــ يعنوو..

زينب : ــ ويش تبغي في ريما.. اني باخلص اللي في ايدي وباسويه..

ليلى : ــ لا بس ابغاها ترتب سفرتنا احنا مدة نجهز بقايا الأكل و نوصله للمجلس..

علي :

ــ يالله .. يــــــالله..

زينب توها تسمع صوته.. جت وهو مو موجود...

من سمعت صوته طفر قلبها..

ام علي :

ــ يارجا الله.. تعال امي..

وتغطو رزان وزينب..

زينب من دخل علي ..

على استحياء ومهي عارفه ويش تقول وبهداوه:

ــ الحمدلله عالسلامه ولد عمتي...

ما سمعها علي..

ليلى عادت له..

ــ يتحمدو لك بالسلامه..

علي : ــ الله يسلمكم .. ياهلا...

وسأل ليلى بهداوه.. ــ مين.؟؟

ليلى بأبتسامه : ــ زينب بت خالي..

علي رجع ورد عليها: ــ هلا بت الخال.. اخباركم عساكم زينين..

ــ الحمدلله..

ــ وين مرت خالي حق ويه ماجت وياكم..

ــ ما رضيت..

ــ خير ان شالله..

اخذ علي تبسي فيه كم حاجه وراح المجلس...

عادل على الغدا قاعد... يحاول يقص اللحمه صايره خشنه شوي.. وهو يحاول فيها طفرت من ايده وطارت عالأرض.. صرخ حد ماعنده..

ــ ووووووووووف خششششششششنه..

ام عادل بملل :

ــ لحمة ما ليونها.. يوم لانت طفروها..

ــ هااااااا..

ــ ههههههههه جعلك سعاده على هالتفهي اللي فيك...

ــ يعني ويه.. لحمممممة ما نييموووها يوم ويه هههههههههههه نسيت الباقي..

ــ غربال.. ويش جاب طاري النوم.. شوف اللحمه مالانت عدل من الطباخ.. و انت من الحوس لينتها وشوي تقصها ويوم خلاص قريب طفرتها..

ــ يعني ووييييييه؟؟

ــ خناااااااااااااقه.. املش راسي اني.. هونت .. مايعني شي ..

ــ كلالااااام ضضبعااان مادررري من وووين تجيبيه...

ــ ياعلي .. استح على وجهك.. ويلووموني فيك ويقولو خبل .. اعقل .. اني امك عيب..

ــ ههههههههه زين زين.. لحمة ويييه دي اماااه؟؟؟

ــ تيس..

عادل فتح عيونه ومنصرع:

ــ تتتتتتتتيس!!!!!

ــ بسم الله ايه.. حق ويه منصرع؟؟؟

ــ تشيه ياااااااككككلو الرجاااااااال؟؟

ــ ههههههههههههههه لااااا زين منك امل .. زين يوم عرفت التيس رجال.. ينوكل لويه ما ينوكل

عادل يبتسم وابتسامته من الأذون للأذون..

ــ اييييه واعرف بعد مين مرررة التيس..

ــ مين؟؟

ــ البغغغغغغغله

ــ هههههههههههههههه بغله اللي ترفسك.. ياربي بتموتني.. مرت التيس الصخله..

ــ يووووو صدق... اللي هي الخروووفه مو..

ــ لااا..

ــ اه بعددددد ويييييييه؟؟؟

ــ غربال .. درس حديقة حيوان مو غدا... الصخله هي العنز .. شعرها ناعم.. الخروف جاعد معكرش..

ــ مااااااااحد قال ليها ما تستشششووور

ــ نااااااايبه وويش عرفك بالأستشوااار واني ما عندي ولا استشووور؟؟؟؟؟

عادل يرقص حواجبه..

ــ من التلفزيووون..

ــ مامخرب مخك ومخلنك مطيور وملسون غير فجعة هالتلفزيون...

تابع>>