و احترقت الخيام..
وجرت النساء سبايا...

رزان خلاص .. من هول الموقف .. طلعت من الزحمه وقعدت على الرصيف .. وصارت تصيح..

لحقتها ليلى وصارت تقص ليها بعدين ويش صار في السبايا..

و انتهت التمثيليه....
الا بدخلة ضبعه تركض لماي النهر الأحمر اللي مسوينه بالساحه..
حامله غرشة ماي فاضيه..
الصبيان يكلموها..
حجيه .. ويش تسوي؟؟ حجيه الماي مو زين..!!!.
وهي محمقه و لا عندها فيها .. وعاطتنهم الأذون الصمخه...
وتصيح وتسب في يزيد وآل يزيد و اصحاب يزيد.. ماخلت ولا بقت سبه..
وتعبي في ذيك الغرشه...

خلوها على راحتها.. بس كلموها اهم شي لا تشرب منه لأنه فيه الوان تضر...

عادل دخل وسط الساحه وصار يراكض فيها ويغبر ..
الا يلفت نظره مصطفى بعده ما بدل لبسه التنكري لدور الشمر..
ويهجم عليه ويمسكه ويدحن فيه في الرمل .. ويدوس فبطنه..
وهو يسب فيه:
ــ الله يلللللللللعنننك .. ياااا قاااتل .. يااااا........ يااااا...............

ناصر فتح عيونه هو الثاني ما غير ثيابه .. وراح يركض هو ويا اشرف لعادل يفكوه عن مصطفى..
مصطفى يحاول يشيل عادل عنه .. حاشه بكم بقس بس ما يفيد ..
عادل مستميت و مره قايم له قومه عدله..
اشرف وناصر يسحبوه..
عادل فتح عيونه ومسك ناصر..
ــ ما مت..؟؟ انت ماااااااا متتتتتتتت....
ناصر :
ــ عادل .. ويش فيك .. نمثل حنا...
ــ قتلللللللللك هذا الـ....... الــ............
اشرف يصرخ فيها:
ــ خلاااااااااص ويش هالسبايب .. عادلوه باقص لسانك .. قلنا لك نمثل مافيه شي ناصروه هاشووف .. شووف..
عادل قام من على بطن مصطفى:
ــ ايه.. حسسسببباااالي متت.. دبحححك هالـ.... الـ....

اشرف :
ــ وتاااااااااااااااااليتها.. قدامي البيت يللاااااااا..
عادل مد برطمه:
ــ اممممممي مااااهي في البيييت..
ــ امشي ولا تكثر هدره...

مصطفى قام وهو ينفض روحه :
ــ يلعن شكلك لو مانت خبل شان دست بطنك في القاع..
ناصر يطالع فيه على جنب:
ــ ايه .. زين.
مصطفى بقهر:
ــ ويش قصدك؟؟
ناصر شلق بوزه شبرين:
ــ لاااااا سلامتك.. يعطيك العااافيه..
ــ حسبالي بعد..الله يعافيك..

وراح مصطفى سيارته كان حاط فيها ثوبه.... وفي طريقه للسياره..
مرو عليه صبيان صغار شالو حجر وصارو يرمو عليه..
ــ ياشمر يالعين.. ياشمر..
مصطفى فتح عيونه:
ــ خناقه.. والله بلشه و ابتلشتها ما يسوى علي هالدور.. فااااااااااارقووو..
وهم يشيلو حجر ورمل ويرمو عليه..
شوي الا بضربة حجره كبيره لسيارته جهة بابه..,, شهق شهقه وفتح الباب بسرعه بيركض ورى الصبي .. بس فلت منه..
رجع لسيارته..
ــ ويلي على كامريتي ويلي .. انشمخت.. يا عسااااااااك ويش اقول...


سوسن في السياره راجعين مع علا من التمثيليه..
سوسن:
ــ ابداع وربي .. الله يعطي الشباب العافيه
هشام :
ــ ان شالله يارب .. اتقنو التمثيل .. بس زحمة الناس والجو ابدا ما يشجعو.. برد و التنظيم مومره .. الله يقدرهم على العالم والزحمه في السنوات الجايه..
سوسن : ــ يارب.. الا علا صحيح.. متى يوم افتتاح المعرض..
علا بهمس بالكاد ينسمع وكان هشام حاط عزا:
ــ 23 هالشهر..
سوسن :
ــ قصرر عالصوت ماني سامعتنها.. كم؟؟
علا بنفس الدرجه صوتها ماعلته:
ــ 23 هالشهر..
سوسن..
ــ ماسمعش .. ويش فيش تساسري روحش...!!
هشام ابتسم..
ــ 23 هالشهر..
سوسن :
ــ ما شالله عليييييييك.. الحين هي وراي ولا سمعتها .. سمعتها انت؟! تتصووووخ..
علا حست بأحراج.. هي تهمس حق لا يسمعها .. يقوم هو اللي يسمعها..
هشام ضحك..:
ــ يعني ويش اسوي .. اسكر اذوني...
سكت شوي..
ــ مممممم بتلقف.. معرض ويش هو لكن؟؟
سوسن ابتسمت :
ــ مادرريييت.. علا رسامه وليها لوحه في معرض بالجمعيه الخيريه بيفتحوه 23 هالشهر..
ــ ما شالله تبارك الله.. والله تمام.. بتروحو اكيد..
ــ اكيدين و انت اللي بتودينا..
ــ حااضريين..عسى في يوم للرجال لو بس حريم..؟؟
سوسن تسألها..
ــ علا فيه رجال؟؟
علا بهمس :
ــ ايه الرجال الليل والحريم العصر..
سوسن :
ــ اف ولو اني ما سمعتش عدل بس اكيد سمعش ...
هشام ضحك:
ــ ايه.. الحمدلله على شان لا يفوتنا الفن..
علا تلون وجهها.. وتحس روحها صخنت..

عادل مع اشرف في السياره..
اشرف يحاول يفهم فيه ان اللي شافه تمثيل واللي حقيقه من زماان..
بس ابد مو داخل في مخ عادل .. كل شوي ينط له بسؤال..

مره يقول له اجل ويش الدم اللي يطلع..
ومره يقول له ليش طاح من على الحصان..

وكل دقيقه سؤال..
لين وصل لهالسؤال:
ــ مين الحرررريم اللي طلللعو من الخيييمه المحترررقه..؟؟
اشرف :
ــ اهل الحسين عليه السلام.... حرمه .. خواته.. وعياله..
ــ توووك تققووول تمثيل..!!
ــ ياربي ياعادل افهمني .. يمثلو دورهم..
ــ كككيفا ويااااكم حررريم وشلللون ناااصصصر حضضضن المرررره هههههههههههههههههعيييييييييب..
ــ ههههههههههههههههههههههههههههه والله وتعرف العيب تمام والله.. مهم حريم هذيلا رجاللابسين عباه..
عادل فتح عيونه:
ــ قلللللللللة حيييييييييييااااااااا.. ررررجاااال خنييييتتتتووووااااه..
اشرف فتح عيونه:
ــ وووووووووويه؟؟ هههههههههههههههههههههههههههه استغفر الله ياربي .. عادلوه انشب لااصكك كف.. يمثللللللللو قلت لك يمثلللللللو....
ــ عييييييييب حق ويه يلبسووو عبااااه..!!
ــ انا لله.. وصلنا بيتكم.. انزل بس كني انفخ في قربه مفقوعه.. ..

ونزل عادل وهو يضرب فكر..
حاول يفتح الباب .. مقفل .. صار يطقه مافتح له احد..
ــ افففففف تحححب امممي عبااااسسسوه اكتتتتررر مني.. ويننناااا اررروح.....؟؟؟

في بيت ابو علي ..
طبعا بعد ما وصل ابو علي سلام علي لأمه وخواته....

ظلت ام علي فتره تصيح ومتأسفه مالحقت على ولدها..
ام جاسم تهدي فيها ..
ــ سلام الله على الشباب .. ساعد الله امهاتهم اللي فقدوهم.. هدي ياغناتي.. اجر وعافيه ..
يالله هدت و رجعت لحالتها..

في المجلس..
ابو جاسم : ــ الله يقوي الشباب.. تمنيت جاسمو يكون له دور وياهم .. بس خايب وطايح حظ
ابو علي :
ــ شوي شوي عالولد يا خوي.. حالته حاله شكله بيصخن..
ــ انا لله ناقصنه وناقص بلاويه..

جاسم منسدح يسمعهم بس باله مو وياهم ويا حالته .. وفكره متهوس لا يكون صابه ما صاب حميد..

عبدالرحمن كان قاعد وياهم.. ويسألهم عن الأشياء اللي يبغى تفاصيلها من التمثيليه.. وابو علي وابو جاسم يعطوه الجواب..

عبدالرحمن:
ــ طيب يا العمام.. ابي ماعليكم امر .. ارقام لشيوخ.. ومكان تواجدهم.. ابي اتواصل معهم اكثرواعرف كل اللي ابيه.. يجزاكم خير..
ابو علي : ــ على عينا وراسنا.. ولا يهمك ياولدي.. وربي يوفقك ان شالله ويسهل امورك..
ــ يارب آمين..

تابع>>