الحلقة 23 ..


ليلى وريما انصرعوا من صريخ امهم.. وقامو ليها يركضو..
علا شبحت بعيونها و صار قلبها يدق بالسرعه .. وفي بالها .. الله يستر .. وبدت تحس بحالتها و حظها كل ما تجيهم الا بفال نحس ..
امل مختلعه : ــ ياساتر استر

ليلى راحت لأمها تهديها شان تفهمها ..
وبالها ويا ابوها اللي اخذ السماعه وبدا عليه الشحوب و التعب وشوي بدى يصيح وياها.. صارت تحاول تفهم ..
ابو علي ودموعه تصب وبصوت مبحوح : ــ انا لله و انا اليه راجعون.. من متى ..
وشوي يقول : ــ ماادااايم الا سبحانه.. تسلم اخوي ... ما قصرت.. اقرب وقت نشوف احد يجي يستلم اغراضه..

ريما جاها مغص في بطنها ..
ليلى قعدت عالأرض مختلعه.. و صارت تهز في امها .
ــ امااااه ويش صاير ...؟؟؟!!!
ريما :: ــ اماااه ,, مين اللي مااات...!!
ام علي ما ترد ... نفسها غايب وماسكه قلبها وصياح..
ليلى خلاص مهي عارفه ويش تسووي ..
ــ امااه .. يبااه .. ويش صاااير؟؟

ابو علي رمى السماعه... و بصياح شديد .. رفع غترته و صار يمسح دموعه :
ــ ولد عمتكم...
ليلى جاها الرد زي الصاعقه ..
ــ صالح.. صالح .. ويش فيه..؟؟
ام علي تضرب فخذها وتنووح : ــ يا مطول الغيباااات...
ليلى خلاص تحس لسانها انخرس ..
ومهي عارفه ويش تقول ... تحجرت بالمره..
ريما صارت تصيح وتستفسر ..
ــ متى ؟؟ وويش بالضبط ... !!
ابو علي بتعب ومنهار : ــ صار له اسبوع.. حادث سياره.. الحين هذا واحد وياه في غرفتهم بالسكن..
ريما : ــ ومن اسبوووووووع توه يتصلل..!!!!!!
ــ مادري ويش يقول توه شايف جواله مدري ويش سالفته ماااادري يا بتي خفي عني اساله مانى قادر..
ليلى مهي قادره .. قامت وصارت تسحب رجولها سحب ..
وصلت المجلس ووجهها احمر ..
امل بخوف : ــ خير ليلى.. ويش فيكم .. عسى ما شر ..؟؟
ليلى دموعها صارت تصب بعفويه بدون احساس تتناثر ..
تسندت على باب المجلس و صارت تقعد شوي شوي ...
لين طاحت بأنهيار.. و بصوت مبحوح هادئ ومتقطع..:
ــ ولد عمتي............ توفى..
امل اختلعت وارتبكت : ــ انا لله وانا اليه راجعون.. الله يرحمه ويطول بعمركم .. الله يعظم اجركم...
علا مهي عارفه ويش تقول .. وبألم و ارتباك : ــ الله يعظم اجركم..

امل مستحيه حدهااا.. بدون شي تحس الوقت مو مناسب لحناها في هالبيت ,,
مو بعد تطلع حالة وفاه مفاجأه..
اتصلت في حسين يجي ليهم..

وصارت علا تحاول تنشف في ايدها وهي لسا ما اكتملت..
و يهدو في ليلى... عشر دقايق.. وبأرتباك مهم عارفين يعطو ليلى فلوسها
.. الا جوال امل يرن .. حسين وصل ..

قامت امل وهي مستحيه .. عظمت الأجر لليلى و صارت تصبر فيها.. علا قعدت على ركبها وحطت كفها على كتف ليلى .. وصارت تهمس ليها :
ــ الصبر غناتي والله يهونها ويفرجها عليكم..
ليلى بس دموع ..
امل وقفت في الممر ونادت على ريما..
جت ريما وحالتها حاله.. عطتها امل الفلوس وبهداوه:
ــ هذا حقكم غناتي يعطيكم العافيه.. والله يعظم اجركم..
وطلت الصاله على ام علي وابو علي سلمت عليها وعظمت اجرهم ..
وقبل ما تطلع قالت لريما :
ــ روحي لأختش اكي على باب المجلس وحالتها حاله.. الله يكون بعونكم..
ريما وهي صياح :
ــ ويلي على اختي خطيبها ما الووومها...
علا انصرعت : ــ خطيبها ؟!
ريما تسمح دموعها : ــ ايه من لما كانو صغار.. الله يرحمه..
امل : ــ انا لله.. الله يرحمه و يهون عليكم ..

طلعو .. ركبو السياره.. وحسين يتعيلف ويسخر :
ــ انتبهوو لا تدعبسو سيارتي وتوصخوها..
امل : ــ نشف .. ما يووصخ..
ولا يسمعو ورى الا صياح... فجأه كذا..
حسين انصرع.. وكان سجاد ورى..
ــ ويش صاير؟؟؟ سجاد ويش فيكم..
سجاد خايف : ــ مادري ,, علا تصيح على ويه...
شوي الا امل قدام اشتغلت هي الثانيه صياح..
حسين وقف على جنب .
ــ بسم الله الرحمن ,, ويش فيكم؟؟ على ويه ؟؟
امل بصوت متكسر :
ــ الله يكون بعونهم ويساعدهم بيت كله مآسي .. من شي لشي .. لله صبرهم ..
الله لا يضيع اجر هالصبر و يعوضهم ويفرج عليهم..

هي تقول كذا .. وعلا تزيد صياح..
حسين يستفسر ويش صاير فيهم...
وصارت امل تعلمه ...

على باب المجلس ظلت متحجره.. بس الدموع تصب .. كفها اليمين حطته جهة قلبها و ضمت بلوزتها بالقوه.. وضمت كفها اليمين بكفها اليسار..
وصارت تتنفس بالقوه شوي صارت تشاهق ..
جت ليها ريما فتحت علبة لأختها على التسريحه وحطت فيهم الفلوس..:
ــ ليلى .. ليلى قوومي ...
ليلى ويش فيش ...؟؟

ليلى ابدا لا حياة لمن تنادي ..
صارت ريما تحاول فيها .. سندتها عليها وودتها الغرفه... قعدت ليلى على سريرها صايره ما كنها في الدنيا .. ريما خايفه عليها سدحتها وغطتها .. وصارت تمسح على راسها وهي تصيح ..:
ــ ليلى غناتي خلاص هدي روحش و نامي ...
ليلى عيونها على السقف وما في الا الدموع...
طلعت عنها ريما و سكرت الباب..


ابو جاسم قبل لا يرجع الزراعه ,, قال بيقعد ويا ولده .. طق الباب .. جت له صرخة جاسموه :
ــ خلووووووني بروووحي مااااااااابغى شي ..

ابو جاسم رفس الباب رفسه وبصرخه :
ــ تخلخلت ضلوعك وراحت روحك .. افتح لا افتح راسك ..

قام جاسم على طوله يركض عدّل حالته مسح دموعه وفتح الباب..
ابو جاسم دخل وقعد على السرير ..
وصار يطالع في جاسم وهو واقف...
ــ تعال اقعد ابغاك في سالفه..
جى جاسم وقعد على الأرض قدام ابوه..
ابو جاسم : ــ ويش بك..؟؟
جاسم ساكت ما يرد..
ابو جاسم : ــ لا تخليني تشني قاعد ويا طوفه ..
جاسم بأرتباك مو عارف ويش يقول :
ــ ااا.. على حميد .. متضايق عليه.
ــ اييه.. انا قايل لأمك و اختك ..
ماعلينا .. الله يقومه بالسلامه ..
اسمع.. في اقرب وقت تمر على اشرف ولد جارنا عبدالله... و تقول له انا جاسم عبدالرحيم.. بيعرفك على طول.. وبياخذك يفصلو لك بدلة حق شغلك في البقاله..
جاسم فتح عيونه : ــ بدله .. بقاله؟؟ ويشو؟؟
ــ لا تستهبل علي .. بقالتهم الكبيره يبغوك سكرترري فيها..
جاسم : ــ بف خخخ.. ايه فهمت.. ان شالله..
ــ ضحكت من سرك.. هذا اللي فالح فيه.. انتبه عدل ولا تصير حمار و تضيع الشغله.. خوش رجال اجودي زين يوم قبل بك..
جاسم يتحمق بينه وبين نفسه:
ــ زين يوم قبل بي .. بلاه مايدري بي حرامي لو يدري لو على قص رقبته مابغاني..
ابو جاسم : ــ ويش تهربد؟؟
ــ ها... ولا شي..
و قبل لا يقوم ابو جاسم من على السرير .. حرك رجوله.. على ورى وطقت في الكرتون.. استغرب ويش هالطقه.. ورجع طقه..
ــ ويشو تحت كرفايتك..؟؟
جاسم انقلب لونه ازرق من الخوف:
ــ هاا.. ,, كرتون ... كرتون فيه عفستي الزايده كتب وخرابيط..
ــ ايه.. زين .. يللا لا تنسى اللي وصيتك عليه...

وطلع ابو جاسم من الغرفه..
جاسم شوي ويغمى عليه,, يحس كنه منكب عليه ماي باااارد..
قام قفل الباب وراح للكرتون وصار يقلب في اللي فيه.. ويخشهم بين الكتب وهو يتنافض.. وفي باله :
ــ لمتى وهذا حالي؟؟
تابع>>