ضعنا يا صبرنا...

[آخر شقآوهـ ..~]

أموورتي هلا والله هلا حيااش
منوره النآصره بأهلها غنآتو
سلم الله عمرش غناتي وان شاء الله السنه الجايه نروح وتروحي ويانا
...
..
.
أما جزء فله مع زنبووه المفهيه وأبوها النكته
مو طبيعيين يضحكو بالقووووه
تسلمين حيآتو ع الجزء
ننتظر الجديد
تحياتونا

[آسوآآر الآلــمـ]

جميل أختي أميرة

عجبني الجزء مررررة

الله يعطيكـ العافية أختي

وعساكـ ع القوة ....

[Hussain.T]

يؤؤؤؤؤؤ

ويش بيصير ؟؟؟؟؟

الله يصبرني ليوم السبت

[روعة الدنيا]

هلللووو

اميره شنو هد الكلم شنو هدى الجزء فــــــــــــله


اميره امتى تكملهبفقع راسش

امزح معش

الله يعطيكِ العافيه

جـــــــــــــــــــــاري الانتطار

تحياتي

روعة

[جـــــوان]

الجزء مرة روعة

بس مسكينة علا ما تستاهل اللي يصير معاها

[دمعة على السطور]

الجزء ممتاز جداً..
صدقيني ماادري ويش أقول كل مرة حاجة أقول يمكن توفي تعبش في هالقصة..
الله يقويك يارب.
ويوفقك الكريم..
بحق محمد وآله الطاهرين..


بانتظار السبت..
أو يمكن الغد..
إن شاء الله..

موفقة لكل خير إن شاء الله تعالى..
..دمتي بعين المولى الجليل..

[دمعة على السطور]

كأني من زمان مااقرأ في القصة..
ما كأن بس اليوم...
جاري انتظار الغد...
موفقة غاليتي..
..دمتي بعين المولى الجليل..

[الــــنـــاري]

شكلها مافي جزء الا السبت
<رايح جاي كل اشوي يدور جزء جديد ضايع
قلت مابرد الا بعد ماقرأ جزئين بس الظاهر لازم بعد كل جزء
شكر وعرفان
يعطيك العافية خيتي
ومانبي نكلف عليك زيادة
خليك على راحتك
ويامطول صبرنا> ضعنا ياصبرنا
تمنياتي لك بالتوفي
والف الف مبروك على الـ20%
ادري لقافية مني كل مرة ادقق خخخ

يلا باقوم انام وبكرى انشاء الله خير > يقولون الشياب الصباح رباح

اسمحو ليي على الهدرة الزايدة بس هذي آثار النعس
دمتم بود

[Princess]

مرحبا

تسلمو لي والله من كل مكروه لا خلا ولا عدم..

كبريااؤوو.. تشتغلي جزار على غفله؟؟ بتذبحيني .. ياساتر.. سني سكاكينش عدل بس.. ورفقا بي ,, هههههههههه والله يخلي بعض الناس اللي يفهمو عدل ويفهموش ..
ضحووكه.. يؤ يؤ السنه الجايه وياش خوش .. الله يتقبل اجل من الحين << كف .. هههههههه تسلمي لي والله
روعة الدنيا هههههههههه بحط على راسي صفريه تجنبا للفلعه اللي بتصيبني منش .. نورتي حبابه
دمعه عالسطور دوم هالحماس حبابه تسلمي على هالتفاعل الأكثر من رائع.. يعطيش الف عافيه
اسوار ,,شبل ,, جوان.. لا تحرموني هالنور..يعطيكم الف عافيه جميعا على التواصل والتواجد الجميل ..
الناري .. هههههههههههههه غربل الله شرك.. خوش هلوسه ماقبل النوم.. تسلم من كل شر من ذوقك.
وما شالله عليك وعلى ملاحظاتك.. لا لقافه ولا شي .. سبحان الله كنك من انتبهت هذيك المره.. وزاد التحميل في احلامي

اليكم الجديد..

[Princess]

الحلقة 21

في صندقة حميد..
جاسم ينبش في الأوراق .. عل وعسى يشوف شي غريب وله قيمه.. لو خيط يوصله لهالأسرار اللي بحياة حميد..
الا بطيحة الذيب عليه..
ــ جاسموه.. ويش تسوي؟؟؟

جاسم تصروع :
ــ بسم الله الرحمن.. ادور ورق لحميد ضروري
ــ ورق ويه؟؟
ــ مريض هو في المستشفى .. ورق لتحاليل له من زمان..
ــ اهااا.. ما يشوف شر .. من متى مريض؟؟
ــ الشر ما يجيك... من فتره هو تعبان والحين ترقد.... خير تبغى منه شي ؟؟ اقول لك أي مستشفى وتروح له؟؟
ــ لاا.. بس خبرك حصلنا لينا طلعه جديده .. و هالمره مزرعه في الـ..... ,, ما مره طبينا هالديره.. وهالمره ناويين نشوف رزقنا فيها..هاا.. بتروح ويانا لو ما تمشي الا بحميد؟؟
جاسم صار يفكر...
ــ لا .. بروح وياكم..
ــ اووووكيه .. الليله امرك هنا.. و نروح لبقايا الشله..

وطلع الذيب..
جاسم قلبه يصافق .. وفي باله مليون الف فكر..
تعب من التدوير كلها اوراق دراسه وكلها من مدارس عراقيه.. وكلهم بأسم امجد..
اخيرا لقى جواز سفر .. فتحه وصار يقلب اوراقه.. الا صورة قديمه لحميد وايضا بأسم امجد..
واختام البلدان اللي سافر ليها..
مافي الا العراق..!!
والجواز قديم.. من لما كان تقريبا عمر حميد 17 سنه بالكثير ,, ومنتهيه مدته..

جاسم يحس قلبه يطق.. وهو يكشف هالحقائق.. وزادت التعقيدات في راسه.. ماهو فاهم ليش امجد صار حميد.. وليش عايش في هالصندقه دام هو ولد خالد آل ...
اخذ الجواز وطلع..


على باب بيت مؤيد..
ام عادل : ــ متأكد هذا هو البيت..اني شاكه مو اللي جنبه. تغير وايد كأنه,,. اني مازرتها الا مره وحده اني الله لا يعود ذاك يوم ما اطيق ذكراه..
عادل : ــ ايييييييه متأكد... حققق ويييه ما تطييقي ذككررراه...؟؟
ــ اهووو عني..

و تطق الجرس..
فتح ليها مؤيد.. من شاف عادل ابتسم له:
ــ هلاااا.. هلااا بعادل..
عادل شق البوز شبرين:
ــ تذذذذككككككرررني !!
ــ ههههههههههههه مامداني انساك غربل الله شرك كلها كم يوم من شفتك..
ــ هاااادي امممي جت تبغغغى تشششوووف امممك..
مؤيد : ــ هلا خيه.. تفضلي حياش..
مؤيد دخل البيت ونادى :
ــ يـــــــالله دخلو داخل .. رجال بيدخل...
دخلهم المجلس وراح ينادي على امه..

ام عادل قلبها يطق.. وترجع بها الذكريات..
ــ اني تعبت من حياتي .. لا ابو ولا ام ولا اهل ما عندي الا انتون وخوالي وصايرين تتعازمو علي كل اسبوع عند واحد وكل واحد يعاملني شكل واحد زي الشغاله وواحد ما شغلته الا يأذي في ولدي ويسخر ويآمر عليه... وواحد اولاده لاعبين بنا كنا حياوين.. ليش ماتحسو فينا.. محنا اوادم حنا..
خالها : ــ بسس.. لا بارك الله فيش ..
ام عادل تصيح : ــ اني ويش ذنبي اتجارم بجرم اهلي.. اذا امي وابوي خذو بعض غصبن عن اهاليهم .. اصير اني الضحيه..
ــ امش حطت روسنا بالطين لما هربت وياه هاللي ما يتسمى.. على ويش يعني .. غني .. ؟؟ اهله من درو به بياخذ امش قومو الدنيا وطربقوها فوق راسه.. كفايه ابوه تبرى منه لما انحاش وياها.. أي حب واي بطيخ.. شوفي حوبتنا طلعت في ولدش..الله العالم بعد حملت فيش متى قبل لا تنحاش وياه وتعرس عليه لو بعد النحشه...
ام عادل مهي قادره : ــ استغفر ربك.. لا ترتكب ذنوب.. ترحم عليهم بدل هالكلام..
ــ استغفر الله ربي منش ومن بلااويش..
ــ وين ارووح ..؟؟؟ قلت ليكم بقعد في بيتي.. قلتو لي بيعيه..
ـــ ايه ,, مافي حريم عندنا تقعد لحالها في بيوت.. تبغي يخلى لش الجو.. وتعيدي سالفة امش .. العرق دساس..
ــ الله يسامحك.. انتون ومنتون طايقيني.. اعمامي نفس الشي .. ماعندهم سالفه الا ابوي اللي كسر كلمتهم وشوه سمعة العايله.. و اني حالتي لله ويا هالولد... ماعندك رحمه ما تحسو .. ابغى فلوس بيتي بدبر عمري ولا عليكم مني
ــ مافي لش عندنا فلووس
ــ ويش تقوووول..!!! انتون قلتو لي ابيع البيت واسلمكم المبلغ يازعم بتبنو لي شقه في بيت امي ,, وللحين ماني شايفه شي..
ــ بيت امش .. هه.. اقول انسي .. هالمبلغ ما يساوي سمعتنا .. صار بيت آل ... علج في حلوق اللي يسوى واللي ما يسوى.. .. كل من طرانا قالو ايه هذيلاك اللي بنتهم انحاشت ويا حبيبها.. سودت وجهنا..
ــ ما اقول الا سود الله وجه الظالم .. واللي ياكلو اموال اليتامي
ــ وييييييييش قصدش؟؟
ــ قصدي اللي اقصده..
خالها ضربها بالعقال .. ضرب ... وهي تستنجد بخوالها الباقي بس ماليهم كلمه اذا حكم الكبير خلاص ..
طلعت من البيت وحالتها حاله... وما لقت ليها مأوى الا بيت ام مؤيد.. اللي لمتها كم يوم و كانت ليها مثل الأم و ازيد..
ام مؤيد اللي بكلامها وحنانها عوضتها عن شقى الأيام والحرمان...

ــ هلا امي .. هلا .. هلا .. هلا بعد ابوي..
قطعت السرحان ام مؤيد بهالترحيب الحار..
وبلا شعور ام عادل قامت ليها وحضنتها وصارت تصييح..
ام مؤيد تمسح على ظهرها:
ــ وي .. الصلاة على محمد وآل محمد.. ويش بش يا بتي؟؟
ــ وحشتووني..
ام مؤيد ابتسمت:
ــ لا توحشتي على حبيب يا غناتي.. بسم الله عليش قعدي قعدي.. شحوالش وشحوال الدنيا وياش.. شدعوه من عرستي ما شفناش
ام عادل ومبين عليها قساوة الظروف والشحوب طاغي على ملامحها ومخلتنه اكبر من عمرها:
ــ ايييه ياخاله.. ويش اقول لش .. ما اعظم من الخوال والأعمام الا هالريل .. الحمدلله على كلحال.. اهم شي ساتر علي ولامني في بيته..
الا بصوت مؤيد يتنحنح:
ــ يالله يالله.. عادل .. ياا عادل..
عادل طفر من جنب امه : ــ هاا..
ام عادل تفلصه وبحمق : ــ كم مره قلت لك قول نعم..
عادل : ــ آآآي... مؤؤؤؤؤؤؤؤؤؤييييد عوووود نااادي علييي..
مؤيد برى مستغرب : ــ حق ويه؟؟
ــ نااااااااااادي..
ــ عاااادل..
ــ نعـــــــــــــم..
ــ تعال برى الحوش نقعد..
ــ مانا .. ابغى امي.
ــ تعال لا تصير زي اليهال .. الرجال ما يقعدو ويا الحريمات..
ــ ززززززين...

وطلع له..

ام مؤيد صارت تضحك عليه..:
ــ غربل الله شره.. سنين ما تلحق .. كان ابو 12 سنه عفر لو 13 سنه يوم تعرسي..
ام عادل ابتسمت.. وتنهدت من قلب:
ــ ايييه يا خالتي سنين ما تلحق الحين ابو 22 سنه.. الله يغير حاله... اما احوالي الحمدلله.. ولو انها ما تسر لا عدو ولا صديق..
ام مؤيد حطت ايدها على فخذ ام عادل :
ــ الصبر يابتي.. الله يعينش على هالريل صراحه.. من قَبَلنا عليه وهو مكشر ما يعبر ..
ــ اسمحو لي والله.. فشلني وياكم..
ــ شدعوه غناتي.. عرفناه وعرفنا اطباعه .. وانتين اجوديه وبت حلال .. وتستحملي .. لله صبرش..والله يعوض عليش ان مو في هالدنيا في الآخره ان شالله..
ــ يارب ياكريم ,,.. اخبارش انتين واخبار بناتش ومؤيد..
ــ .. يابتي من عرستي وتركتي عالفريق من دي 9 سنين عفر تقريبا .. صارت سوالف شي يفرح وشي يذبح من الحزن.. وهااادي حال الدنيا...

وصارت ام مؤيد تقص على ام عادل اللي صار فيهم و في الفريق من تركته ..

جاسم دخل البيت بسرعه قبل لا احد يشوفه.. ودخل غرفته.. طلع كرتون اللي فيه الحوايج المبيوقه اللي خاشنهم.. وحط فيه الجواز ورجع دعسه.. بدل ثيابه وراح الصاله..
زينب تطلع مسلسل .. كانت منسدحه من دخل جاسم
اختلعت وقعدت قعاد :
ــ بسم الله الرحمن على عمررررررري .. من متى جيت..؟؟
ــ ليش طلعت انا؟؟؟
ــ عن الظرااااااااافه.. من الصبح انت منت هنا... والحين قريب يأذن المغرب .. تستهبل علي..
ــ فكينا واللي يرحم والديش عن الحنه والهدره الزايده..
ــ زييييين بافكك..

شوي..
.. ــ يوعان.. وين امي؟؟
ــ طلعت..
ــ وين راحت..؟؟؟
ــ وانت ما تسأل عنها الا لبطنك.. صحيح همي دبتي..
ــ عن التعيلف زين..
ــ وين راحت... بعد
وتغيرت نبرة صوتها ... صارت هاديه وكسيره..:
ــ راحت تتسلف من فلانه وعلانه. هي ويا ابوي ... حق علي ..
جاسم من سمع طاري علي ,, حس بطنه يعوره وتذكر حميد وحالته..
ــ وويش صاير؟؟
زينب تطلعه على جنب:
ــ قول ويش اللي مو صاير .. ليش انت تدري عن دنياك ووين الله حاطنك..
ــ زينبوه عن ثقالة الدم وويش صاير..

علمته زينب بالسالفه...

جاسم مو عارف يميز مشاعره.. هي خوف ؟؟ تأنيب ضمير..؟؟
خاطره منكسر على بيت عمته وحالتهم.. وعلى ولد عمته المرمي في الحبوس ظلم..
من تحت راس حميد السوسه.. ومن تحت راسه الجبان اللي سكت عن الحق..

زفر زفره قويه.. وقام راح غرفته.. وقفل عليه الباب..
زينب : ــ ايييه.. هذا اللي ماخذينه منك..
الا برجعة ابو جاسم ..
تابع>>

[Princess]

رمى روحه وبتعب:
ــ قومي بس سوي لي راس قدو.. راااسي يدْوِي .. احسه بيفقع..
زينب بعفويه : ــ بيفقع من هالقدو..
ابو جاسم بحمق : ــ هااااااا,,, قوووووومي..

راحت زينب تركض .. تسويه لأبوها... شويات ورجعت له .. لقته يمسح دموعه بغترته.. اول مره في حياتها تشوف ابوها كذا.. ماحبت تخليه ينتبه ليها ويكابر و يخفي حزنه..

رجعت المطبخ عنه..وصارت هي الثانيه تصيح.... الا برجعة امها.. دخلت المطبخ وهي مره تعبانه وهواها غايب .. شالت عباتها وصارت تشرب ماي.. انتبهت لزينب انها كانت تصيح... تنهدت:
ــ انا لله.. هونيها وتهون يابتي..
ــ صابره يماه.. بس ابوي
ــ ويش فيه..؟؟
ــ يصيح...
ام جاسم كنها مهي مصدقه حطت ايدها على قلبها:
ــ احلفي... فوين؟؟
ــ في الصاله..
ام جاسم بتروح له مسكتها زينب...
ودموعها تسيل:
ــ خليه.. خليه يطلع حرته ان رحتي له الحين بيوقف..
ام جاسم .. سالت دموعها ..
ــ الله كريم...

جاسم طلع من غرفته يحس روحه مخنووق وان حبس روحه الأفكار بتروح وبتجي .. فخله ويا اهله ويتهزأ ويلعن خيره ولا يتعب قلبه من التفكير..

كانت غرفة جاسم بابها بين باب غرفة زينب وباب صالتهم.. والحوش في النص .. والمطبخ قبال غرفة جاسم..

مامداه بيدخل الصاله انتبه لأبوه .. يمسح في دموعه..
رجع بالخطوات للورا وتسند عالجدار.. حس قلبه مقبووض.. ابووه يصييح!!!

ابو جاسم فرغ كل مشاعره.. تنحنح.. ونادى حد ما عنده:
ــ زيييييييييييينب.. وين القدووو... والله لو لحمة جمل استوت..
زينب بسرعه طلعت القدو من المطبخ للحوش..
قام ابو جاسم وهو يتثاقل الخطوه.. وقعد يشرب فيه..
ام جاسم طلعت من المطبخ.. ومدت عليه فلوس..
ابو جاسم رفع راسه وعيونه كانت حمرا من الصياح وبصوت تعبان:
ــ كم هذيلا؟؟ ومن عند مين؟؟
ــ من عند نسرين المندوبه .. الله يجزاها خير .. ثلاثة الاف وقالت على سعتنا وقت ما نقدر نرجعهم ليها..
ابو جاسم اخذهم.. وتنهد من قلب:
ــ اييه.. الله يعطيني الصحه وطولة العمر و اوفيهم ليها..
زينب : ــ ياارب ياكريم.. بسرع وقت.. يااارب ما نحتاجهم ..
ابو جاسم : ــ انا اليوم رحت اسوم الطراد كم يسوى له.. وصل لـ 15 الف .. والله مو مطاوعني قلبي ابيعه وهو رزق ولد اختي... اييييييه حيره وربي ..
هدووء.. صمت... وملامح الوجه كفيله تشرح الحال..
حتى جاسم اللي كان خايف على عمره يتهزأ ماكلمه ابوه ولا انتبه له اصلا...

الساعه 9 في الليل..
دخلت سوسن بيت ابو مالك...
استقبلتها سميره..
ــ هلااا.. بمرت اخوي .. هلا والله..
سوسن بأبتسامه عريضه: ــ هلا بيش ..
ــ بسم الله ما شالله.. ذوق اخوي وايد حليو..
سوسن بخجل : ــ تسلمي عيونش الحليوه..

ابو مالك يدخل الأشناط... وقعد عالكنبه..
ــ ايييه افففف كبرنا والله.. ثقيلين.. وين مالك ؟؟ خله يصعدهم فوق

سوسن بهداوه تدلك كتوف ابو مالك: ــ لا كبرت ولا شي حياتي .. بعدك في عز شبابك..
سميره رفعت حاجب وحاجب ,, وفي بالها..
ــ هيه.. احترمي وجودي .. عزوبيه اني... هذا اولها ... ياسااتر..
ابو مالك : ــ سميره.. وين مالك؟؟
ــ هلا.. طلع ..
ــ ويييييين رااح بعد,, انا قايل له الليله ابغاه يطلع؟
ــ مادري ياخوي اتصل عليه وشوفه..
ابو مالك يطلع جواله. ــ اف منه هالولد..

ان الهاتف المطلوب لا يمكن.......
ابو مالك : ــ ولعنه.. مقفلنه بعد.. هين يامالكوه..
سميره: ــ يمكن في محل مافي ابراج..
ــ مافي ابراج الطل في عينه.. اراويه اللي يكسر كلامي ولا يطاوع.. ووين علا..؟؟؟

سميره بأبتسامه قلقه: ــ نامت..
ابو مالك: ــ لا بالله خووش.. ولاد.. واحد طاير.. ووحده نامت.. عناد فيني يعني .. لكن ماعليه .. هين.. اوريهم..

سوسن تهدي فيه وتحط ايدها على شعره وتمسح عليه..
ــ هدي غناتي هدي.. الشناط مو ضروري تصعدهم الحين.. بس وحده الخفيفه والباقي لبعدين.. ومالك وعلا .. الأيام جايه ان شالله ما شفتهم الليله اشوفهم بكره... انت بس لا تعصب..
..
سميره تنرفزت ما تحملت الوضع..!!
شلقت بوزها شبرين بابتسامه مصطنعه:
ــ نورتي سوسن... ودي اقعد وياكم بس تعبانه باروح انام.. تصبحو على خير.. واكي تريزا تعاونكم على الشنط اذا تقدر ..
ابو مالك : ــ حتى حنا بنام اصلا.. تصبحي على نور ..
سميره وهي رايحه غرفتها..
ــ صاااقعه مافي مجامله بغى الفكه..
ابو مالك نادى على تريزا., تشيل الأشناط..
تريزا من جت بتشيل وحده منهم.. حست ايدها بتقبع.. صارت تسحبها... سحب لين وصلت للدرج...
سوسن كسرت بخاطرها تريزا.. وصارت تحاول تعاونها...
ابو مالك قام وياهم وصارو ثلاثتهم يصعدو في الأشناط..

ويوم خلصو..
تريزا: ــ ماما يبي اسوي شي؟؟
سوسن بأبتسامه : ــ لا خلاص يعطيش العافيه روحي نامي...
تريزا ابتسمت : ــ الله يعافيك..

وراحت غرفتها وهي تفكر .. من اول لقاء سوت وياها كذا.. عمرها ما احد عاونها على شي ثقيل لو على شغله.. حتى علا اللي هي قريبه منها.. وهي نادرا اذا حركت وياها شي...
صارت تفكر يمكن لأن الأشناط ليها وخايفه على اللي فيها لا ينكسر لو شي ..
مصير الأيام تكشف سوسن وطبايعها....


سميرة على سريرها تضرب فكر..
ــ اييييه يالدنيا.. الأخو شيب وهو ماخذ له هالشباب.. حلاوه ودلع .. وويش وراه.. و وولاده شوي ويتخرج مالك ويتوظف ويعرس.. وعلا كم واحد تقدم ليها.. مافي الا انتين يا سميره عمرش يمضي هدر.. .. بتقابلي تريزا طول حياتش .. هذا اذا ما طفشت تريزا منش.. اييييييييه .. الله كريم يغير الحال..


الفجر.. طلع جاسم على الموعد مع الذيب .. رايح للصندقه... وجلس ينتظره..

تابع>>

[Princess]

علي فتح عيونه فجأه.. قعد من النوم.... ولا يسمع الا عبدالرحمن قريب منه على سريره بس عاطنه ظهره..
صوت انفاسه مو واحد نايم.. واحد كأنه يصيح..
علي مو مستوعب الموضوع..
حاول يركز وياه.. الا فعلا يصيح..
وعلى شان مايزعج الباقي.. قام له على سريره.. وقرب منه..
عبدالرحمن حس عليه ومسح دموعه بسرعه.. وبدون ما يلتفت له.. بصوت هادي:
ــ صحيت؟؟
علي ابتسم : ــ انت اللي ويش فيك ياخوك..؟ مانمت للحين ..!! وويش فيك متضايق..؟؟!!
عبدالرحمن ساكت..
علي حط ايده على ذراع عبدالرحمن..
ــ ياخوي .. انت دايم تصبرني و تقول لي اهونها وتهون.. ورب ضارة نافعه على قولتك.. وكلام وايد هههههههه صراحه ماقدرت احفظه .. من عقليتك الجباره.. والله ما صادفت واحد يخفف عني ويفهمني كثرك.. الحين ويش فيك انت؟؟

عبدالرحمن ابتسم وسالت منه دمعه..وبهدوء شجي:
ــ ولهان على الغاليه.. وعلى بنتي اللي ماشفتها..
علي كسر بخاطره عبدالرحمن .. ووضعه... حس ان بيته ارحم.. خواته حول امه وابوه وكل واحد يواسي الثاني ويتأملو رجعته بفارغ الصبر ,, غير عبدالرحمن اللي ماعنده في هالدنيا الا مرته ومرته ماليها غيره.. وبنتهم اللي ما كحل عيونه بشوفتها..
علي:
ــ بعدين يا اخوي كل شهر فيه زياره ليش ما تخليها تجي ..
عبدالرحمن بقهر :
ــ ومين اللي يجببها.. ابوها اللاهي .. والا اخوانها اللي من ابوها اللي مايدرون عن هوى دارهم.. وانا حرمتي ما ابيها تطلع وتشحطط في هالأماكن لحالها.. ايييييييه خليها على الله بس..
ــ ونعم بالله..

صار يمسح على ذراعه و يقويه ويواسيه لعل وعسى يخفف عليه.. وفي باله..
ــ من شاف مصايب الناس هانت عليه مصيبته..

وصلو الذيب وجاسم وثنين وياهم للديره اللي ناويين على كم مزرعه فيها..

وصارو يحاولو في السيارات يفتحو قفول ابوابها..
انفتحت وحده .. قعد الذيب عالسيت وصار يفك في الراديو .. ومدة هو يفك..
جاسم مكلفينه يراقب .. لا احد يجيهم... وقف قريب السياره اللي الذيب يحوس فيها...
وانتبه لمحفظته طالعه شوي من البنطلون..

صارت عيونه تروح وتجي عليها..
وبحركه سريعه مرتبكه وتخلع.. ضرب الذيب بخفه وخطف المحفظه ..
وبتخويف:
ــ في وااحد اشووفه طالع من الأستراحه..
الذيب انصرع وقام يركض ..
جاسم خش المحفظه عنده.. و تراكضو كلهم ورى الشجر .. الا من حظ جاسم طلع كلامه صحيح.. كم دقيقه ودخلت سياره الأستراحه نزلو منها شباب وصارو يضحكو على راعي السياره المفتوحه.. ويسخرو عليه .. مفكرينه نساها ..
اللي يقول تنفه عن عمرها..
واللي يقول مخلنها تتهوى..
واللي يقول للحشرات والفيران .. فاتح فندق ..
سكروها ودخلو الأستراحه..

جاسم يبغى يغافل اللي وياه:
ــ ابغى حماام.. بروح أي محل ظلمه بخلص وبجي ..
الذيب محمق : ــ وقتك ويا وجهك..
جاسم : ــ وهوووووو على كيفي..
ــ فارق فارق بالسرعه..

بعد عنهم جاسم شوي زين.. وفتح المحفظه صار ينبش فيها.. لين طاح على بطاقة الأحوال تبع الذيب .. حطها في مخباه.. و رجع ليهم...

مهلو نص ساعه يراقبو الوضع.. لما حسو بالأمان رجعو لشغلهم...
جاسم بخفه رمى المحفظه على باب السياره اللي كان يحوس فيها الذيب..
ولما قريب يخلصو انتبه عليها الذيب:
ــ افففف يااساااتر.. محفظتي طاحت.. عمري ماجبتها معاي في طلعات على هالحظ اجيبها اليوم بالغلط وتطيح.. كان ياويلك يالذيب ياسواد ليلك..
شالها وحطها في مخباه..
وجاسم قلبه يطق طق مو طبيعي..
خلصو شغلهم و انحاشو من الزراعه...


ولما طلعو.. جو بيقسمو اتعابهم.. جاسم قال ما يبغى شي الحين.. متنازل .. وهم مهم مصدقينه ويش فيه ودام ما يبغى شي ليش طلع وياهم..
صار يمزح ويقول دافعة بلا عن عمر حميد المريض << خوش دفع بلا..
الذيب عاد ما يحتاج.. ما تبغى باللي مايردك,, توفر..


ورجع جاسم البيت.. قلبه وروحه يحسهم يسبقو خطاويه..
وطول الطريق وهو يتذكر كلام حميد اول ما اخذو ولد عمته وهو يهدد فيه بالذيب وجماعة الذيب وانهم كلهم مجهولين الأسامي والهويه ..
وما احد يعرفهم الا بألقابهم.. واذا واحد منا خانهم يروح بستين داهيه.. يتشهد على روحه..
وصل جاسم البيت دخل وعرقه يصب مع ان الجو كان برد مو طبيعي..
سكر على روحه الباب..
طلع بطاقة الأحوال من مخباه..
وصار يقرأ الأسم .. فلان ولد فلان.. ويقرا بقية المعلومات..
بدا يهستر .. شوي يضحك وشوي يصيح..
سحب كرتونه السري.. وفتح جواز حميد.. وحط البطاقه داخله..
واغمى عليه على سريره من التعب والخلعه..

الى الملتقى..

[**جوان**]

..

...


.. مشكوره خيووه على الجزء الروعـهـ..

.. ونستنى الاجزاء الباقيـهـ ..

.. تـحـياتــيــ..

...

..

[آخر شقآوهـ ..~]

لآتقولي الديب يصير إلى حميد أو جآسم <<<كل شي جآيز
وادا مآيصير ليه فهوه يعرفه معرفه قديمه أو شي مآشيات
يالله نشووف ويش يصير
يعطيك العافيه ع الجزء
يعطيك ربي العافيه
تحياتو

[Hussain.T]

يؤؤؤؤؤ

ان شاء الله ما ينتبه الذيب

×شكله جاسم مابيتحمل الهموم اللي في قلبه وبيعترف للشرطة×

ننتظر الجزء القادم على أحر من الجمر

تحياتي