رفعته.. طلعت علا ..
وبعد السلام والكلام والسؤال عن الحال وكان تمام..
علا: ــ غناتي اخبار مكينة الوالده؟؟
ــ اييه على حطتها من يومها .. حاول فيها امس جسوم ولد خالي مافاد
ــ زين اقدر العصر امر اخذها .. مالك اخووي عنده خبره ويعرف يصلحها ان شالله
ــ صحيح.. مابغى نكلف عليكم..
ــ تكلفي ويه.. اقول لش حوااس يحب هالسوالف عادي شدعوه...
ــ زين .. تسلمي غناتي.. نردها لش يارب
ــ الله يسلمش ولا تردوها ولا شي . ..
سكرت ليلى وهي فرحانه عدل...
راحت علمت امها.. فرحت امها و تأملت خير ..
ابو علي ينادي :
ــ ليلى .. تعالي يبا..
ــ هلا ..
ــ جيبي السماعه واتصلي على جوال المحامي خلني باشوفه ويش سوى لليوم..
ليلى في بالها:
ــ لله صبرك يا يبه.. كعادته..بارد وهبل هالمحامي..
وصار ابو علي يملي ليلى الرقم..
ان الهاتف المطلوب لا يمكن الأتصال به الآن..
ابو علي : ــ داويه.. مقفلنه..
ــ تالي اجل ذكرني ارجع ادقه لك..
ــ عساه خير...
العصر .. علا في السياره تخبر مالك بقصة بيت ابو علي وويش سالفتهم ....
مالك تعاطف وياهم.. و فرحته فكرة اخته .. ووافقها يروحو ياخذو مكينتهم ويودوها المصلح..
وهم في الطريق لبيت ابو علي.. مرو على بيت اشرف .. الا بطلعته..
مالك ضرب له هرن و سلمو على بعض ..
علا .. حست الدم يسري في خدودها بالقوه.. وحاسه قلبها يطق طق..
صارت تحاول تتجاهل هالمشاعر...
مالك : ــ خخخخخ مع اني وياه مو مره.. بس احيانا يعجبني .. ما شالله عليه تصدقي خلص كورساته كلها في امريكا.. انا لو ما هالكورس اللعين اللي اجلته .. شان خلصت وياه واسترحت..
ــ هو ويش دارس..؟؟
ــ تقنيه وادارة معلومات..
ــ تمام.. والله حلو تخصصه...
ــ بس ويش بيسوي فيه .. مايناسب اموال واملاك ابوه..
علا تطالع فيه على جنب:
ــ يعني تبغاه زيك .. ادارة اعمال.. يا اخي يبغى هو شي يحبه مو شي على هوى غيره
ــ ويش قصدش ...!!
ــ ولا شي.. اسكت احسن لي..
ــ ايه خلش ساكته دام النفس عليش راضيه...
ليلى ترجع تحاول تدق على المحامي .. ونفس الحاله مقفل....
الا باب بيتهم يطق..
ليلى : ــ دقيقه يبا.. دي اكيد علا.. جايه حق المكينه..
قامت ليها.. ودخلتها...
علا : ــ اهلين.. ها وينهي ..؟؟
ــ هذا هي في المجلس..
ــ ياعلي مين اللي شالها.. اني قلت باخلي اخوي يدخل يشيلها ليكم..
ــ لا ويش دعوه شلناها اني وامي وصلناها للمجلس اقرب..
ــ زين غناتي .. ادخلي داخل لو البسي شي .. بيدخل اخوي ياخذ المكينه..
ــ زين بدخل.. تسلمو والله ما تقصرو .. عسى عمركم طويل..
ــ شدعووه يللا عن الرسميات...
ليلى بخجل...ــ ان شالله ..
ــ مع السلامه .. واشوفش على خير..
ــ على خير حياش الكريم..
ودخلت ليلى داخل..
ودخل مالك..
ــ يالله يالله..
شال المكينه وطلعو..
ام علي صارت تدعي ليهم .. الله يوفقهم ويبارك فيهم.. وصارت تقول: ــ سبحان الله فرق بينهم وبين ابوهم..
ابو علي : ــ ياما من بذرة السوء يطلع فمر طيب وياما من البذرة الزينه ما يطلع الا شوك و علقم..
ريما : ــ ويشوو علقم بعد...
ابو علي : ــ قومي لدروسش .. تشيه انتين في شي في هالدنيا تعرفيه..!!
ريما : ــ زهق .. ززهق .. ززهقااااااااااااااااااانه..
ابو علي يضرب بالعكازه: ــ ووجع .. قومي .. تعالي ليلى عيدي الرقم باشوف اخرتها ويا هالمحامي..
ونفس الحاله..
ابو علي : ــ اتصلي مكتبه.. لا بارك الله فيه .. انا اول مره اشوف محامي يقفل جواله...
اتصلت ليلى مكتبه...
وعطته ابوها..
رد السكرتير..
ابو علي بعد ما سال عن المحامي..
بذهول واندهاش ..
ــ هااااااااا...؟؟؟ من متى ؟؟؟!!!
والى الملتقى..
اعذرو تقصيري .. ..
رد مع اقتباس
المفضلات