الحلقة الثامنة عشره..


ام مؤيد مختلعه من حركة حجي عباس.. ولا هي عارفه ويش تقول..
مؤيد نفس الحاله:
ــ لا بارك الله فيك.. صحيح قلة ذوق.. امشي اماه بس نرجع بكرامتنا.. لا حيا ولا مستحا..
ام مؤيد: ــ انا لله وانا اليه راجعون.. الله يعينش ياا ام عادل على هالريل..

ورجعو بيتهم...

في المستشفى... حميد اجرو له تحاليل وفحوصات .. وحطو عليه مغذي وعطوه كم ابره .. لين تطلع نتيجة التحاليل...
جاسم قاعد وياه.. و الأفكار توديه وتجيبه ..
ويش سالفة هالأوراق..
ومين امجد؟؟؟
شوي حميد فاق من الغيبوبه و بتعب... قال يبغى ماي
جاسم قام له سنده وصار يشربه ..
سدحه على المخده وهمس له:
ــ امجد..
حميد بلا وعي وعيونه مغمضه :
ــ هااا..
جاسم اختلع.. وحس قلبه بيطفر .. قام يكمل وياه الكلام..
ــ ويش اسم ابوك..؟؟؟
حميد يجاوبه : ــ عبدالكرريم...
جاسم مو عارف ويش يقول له...
ــ خالد آل ..... منهو دا ؟؟
حميد مايرد...
جاسم كرر عليه السؤال مره ومرتين وعشر..
وحميد ابدا لا حياة لمن تنادي..
صار يهزه وهو ابدا ما يتكلم...
خاف جاسم ... لا يكون مات..!!!!!!!!
طلع من الغرفه بسرعه وراح ينادي الدكتور...

علا في غرفتها قاعده في الظلمه.. سرحانه في عالم ثااااني...
تواسي نفسها ..
ــ اشرف.. عمره ما بيكون لي اصلا.. ليش تأثرت من سالفة زينب وياه..
ابتسمت والدموع تنزل بعفويه:
ــ ايييه.. الله يكتب اللي فيه الخير...

باب غرفتها يطق ... طلعت تريزا وماسكه سماعة التلفون..
ــ علا .. نايمه؟؟
علا تمسح دموعها : ــ هلا .. لا قاعده .. ويش صاير؟؟
ــ .. خاله امل تبغاك..
خذت علا السماعه..
ــ الوو << كانت مبحوحه..
ــ اهلين.. ويش فيه جوالش مقفل...؟؟ما رديت من ساعه كنت اسبح سجاد..
علا تحاول تعدل صوتها :
ــ لا البطاريه خلصت ومادري وينهو الشاحن..
ــ وويش فيه صوتش..؟؟
ــ شاربه بارد..
ــ اهاا .. لا تشربي في هالجو .. ما يفيد فيش...
ــ ان شالله.. ايه..كنت متصله باقول لش لقيت لش حنايه
ــ وووووالله.. اني كل من اتصلت بها قالت محجوزه و لا اعرف احد تسلمي غناتي .. منهي ؟؟ وحليو شغلها لو ويش ؟؟
ــ هههههههههههههههه شوي شوي علي .. شغلها مره روعه شفته بعد .. اما منهي .. خمني ..
ــ مييين ؟؟ ويش عرفني اخمن..
ــ ليلى ...
ــ ليلى... بنت ام علي ما غيرها..!!
ــ اييه.. شفت اليوم صور بنت خالهم زينب .. مره حليو شغلها وقلت ليها باخليش تكلميها وتحددي يوم تروحي فيه...
ــ تماام توي ادري بها.... اخبارهم وويش حالها ام علي... مادري احس وضعهم ما يسمح بحنى وحركات وهيك..
ــ الحمدلله تمام هم وام علي ما شفتها يوم اروح...و بالعكس هم اولى من غيرهم..
ــ الله يعينهم... زين تعاون امها شوي على المصاريف ...
ــ يووووووو ذكرتيني نسيييت..
ــ ويشوو؟؟
ــ مكينة ام علي خربانه .. قلت باقول ليهم باخذها نصلحها ونسيت
ــ انـــــاااا لله.. ناقصين هم .. الله يكووون بعونهم والله.. غريبه ويش اللي نساش ..
ــ مادري نسيت دق علي مالك وطلعت ونسيت << اللي ماخذ عقلها نساها..
ــ اصلا مهي حلوه منش تاخذيها تصلحيها مفكرتنهم بيرضو..
ــ اجل ويش اسووي...؟؟
ــ ممممممم كذبه بيضا.. اتصلي فيهم بكره وقولي مالك يعرف يصلح هالحوايج ويحب الحوسه وخذيها وديها المصلح ورجعيها .. اهم شي لا يدرو صلحتيها على حسابش وعند محل.. ما بيرضو ترى..
ــ خووش راي .. خلاص بكره اتصل واشوف.. وانتين اتصلي فيها حق حناش وحددي لش يوم..
ــ على خير ...


الدكاتره في غرفة حميد ...
جاسم خايف :
ــ ويش فيه..؟؟
الدكتور(سوري): ــ اغمى عليه مره تانيه.. من ايمتى ما اكل وشو كان فيه قبل لا تجيبه بالضبط
جاسم : ــ مادري .. مادري من متى ما اكل .. بس هو صار له فتره بطنه كل يعوره وينتفخ و قبل لا اجيبه كان يرجع و يطلع دم مع الترجيع..
الدكتور :ــ توتوتو.. لا حول الله.. النتايج راح تبين النا شو فيه..
ــ يعني من الأعراض ماعرفتو
ــ يا ابني الأعراض هيدي لعدة امراض باطنيه ونحنا شاكين في واحد منوون بس نتايج التحليل راح تبين النا اكتر..
جاسم في باله:
ــ الله يستر.. شكلها حوبة ولد عمتي قويه.. والدور علي .. ويلي ويش اسوووي... وانت ويش سالفتك .. امجد لو حميد لو ويش تطلع ؟؟؟

وطلع جاسم من المستشفى وهو يفكر .. وصل البيت .. دخل وهو سرحان ...لا سلام ولا كلام..
امه كانت تجهز عشاهم .. وابوه كالعاده في الحوش مع القدو..
ابو جاسم :
ــ كح.. كح احححاا .. هذا اللي ماخذينه منك لا سلام ولا كلام.. وين طاير من صباحة الله..
جاسم ما انتبه لأبوه فما رد..
ابو جاسم شال فنجان قهوه كان يشرب فيه .. وبقاياه رشه على جاسم...
جاسم انتبه ...
ــ اححح .. هااا.. ويشو..
ــ هااا.. في عينك... وينك من الصبح..

ما شاف الا جاسم يجي له بسرعه ويقعد جنبه.. وشكله كأنه بيصيح...
ابو جاسم مستغرب :
ــ بسم الله الرحمن.. ووويش صاير.؟؟ ويش فيك....؟؟؟
جاسم مو عارف ويش يقول..
ــ مادري .. حاجه غريبه..
ــ ويش الغريب بعد .. اغرب من حالتك ماميش ...
ــ يبا .. تعرف واحد اسمه عبدالكريم ال....

ابو جاسم انتفض و ترك القدو من ايده..
ــ هااااا... رحمة الله عليه... حق ويه تسأل
ــ تعرررفه مار علي اسمه..... بس مين هوووو؟؟؟؟
ــ حق وييييييه تسأل ؟؟
ــ يباا تكفى اول علمني ويش سالفته..
ــ أي سالفه .. هذا ابو خالد آل .. اللي هو ابو مالك شان تعرفه.
ــ ايييه اللي صارت وياك سالفه وياه من سنين...
ــ لا بارك الله فيه.. رحمة الله على ابوه .. ما خلف الا اللي ما يستاهل يعيش
ــ الله يرحمه ... يعني كان ابو خالد اسمه عبدالكريم
ــ ايه... ولويش تسأل..
ــ زين ماعنده الا خالد وبس..؟؟
ــ لا .. عنده عفر بس امه عراقيه كانت خوش مره طيبه واجوديه.. وتدري بكل شي يسويه ابو خالد رحمة الله عليه.. يعني ارضنا اللي اكلها ابو مالك اللعين .. تدري بها انها حقنا وملكنا ... بس سافرت بولدها من توفى المرحوم

جاسم بفضول : ــ ايه...
ــ ايه... .. كان صغير عمره عفر 7 سنوات لو 10 سنوات ,, ويوم جى ابو مالك يحصر الأرث قالو لأخوه حق فيه حتى لو صغير...بعدين سكتو مادري قالو مات مدري ويه من دي 20 سنه ياولدي ويش يذكرني...

جاسم بهمس وخوف :
ــ اسمه.. امجد...؟؟
ابو جاسم فتح عيونه : ــ هااا... ويش تهربد يا ولد.. ويش دراك بأسمه ولويه تسأل كل هالأسئله ؟؟؟

جاسم طلع شهادة الميلاد من مخباه..
وعطاها ابوه..
ابو جاسم مسك قلم القدو وهو محمق:
ــ اه..!!!. اشلخه على راسك... من متى ابوك يعرف يفتش الخط .. ويش هالورقه
جاسم اخذها .. وصار يقرأ اللي فيها..
ابو جاسم مو مستوعب..
ــ تلعب وياي ويا هالوجه.. ويش تقوول ... ويش دي ؟؟؟
ــ شهادة ميلاااااااااااد...
ــ ويش السالفه .. ؟؟ من وين جايبنها...؟؟؟
ــ من صندقة حميد...
ــ حميد الميد.. ماغيره ؟؟؟
ــ ايه...
ــ خوي ولد عمتك.. !!!
ــ اييييه
ــ مانى مستوعب .. يعني ويه..؟؟!!
جاسم وجهه اصفر .. ولا هو داري ويش صاير:
ــ ولا انا.. مادري ...
ــ لايكون هو امجد .. اخو خالدوه الملعنه..
ــ يجوز......

زينب طلعت من غرفتها ...
ابو جاسم : ــ نادي على امش بسرعه....
جت ام جاسم .. علمها بالسالفه ...
ام جاسم تصروعت..
ــ اخوووووه.. تتوقعو.. لا عاد... ولويه كل هالسنين في الصندقه .. حق ويه ساكت عن حقه...
ابو جاسم : ــ مااادري .. ويش شفت بعد من اوراق عنده...؟؟؟
جاسم: ــ ما نبشت عدل.. بس شهايد مدرسه وشهادة هالميلاد اللي انتبهت ليهم

زينب : ــ اخو ابو مالك.. اني اعرف بتهم..
ابو جاسم طفر : ــ ها ويش عرفش بها بعد..؟؟؟
زينب خافت: ــ لا معرفه سطحيه بس اسمها ليلى بنت عمتي تعرفها عدل .. مالي بها اني..
ــ ايه حسبالي بعد...لا بارك الله فيهم من عايله

ام جاسم : ــ ووينهو حميد الحين؟؟
جاسم : ــ في المستشفى .. وكل في غيبوبه..
ــ الله يعينه ويقومه بالسلامه..



تابع>>