ام علي في غرفتها قاعده همها على مكينتها. بناتها في المجلس ويا علا بعدهم. قامت تبغى تتناسى همها شوي .. راحت المطبخ وصارت تحوس ..
فتحت كبت .. بتاخذ منه شي .. هالكبت فيه طاسه زجاج ملونه حليوه واسعه ومره جميله. ومليانه نقوش وزخارف...
شارتنها وخاشتنها.. ناويه تغسل رجول ولدها ومرته ليلة زفتهم فيها..

شافتها..
شالتها وصارت تتأملها.. وعيونها غرقانه بالدموع.. حست ايدها ترتعش .. جت بترجعها محلها زلقت وطاحت من ايدها وانشلخت..

ام علي صرخت ..
ابو علي في الصاله قام ليها يركض..
ليلى طلعت من المجلس وجت ليها تركض ..
زينب ما عرفت تقوم على حساب علا .. حست عيب يخلوها لحالها..
ابو علي دخل المطبخ..
ــ ام علي.. ام علي .. ويش صاير..
ام علي تصيح وهي الزجاج المنفر:
ــ لا تدخل.. زجاج متكسر ..لا تتصوب..
ابو علي :
ــ انكسر الشر بسم الله على عمرش الرحمن..
ليلى ماهي عارفه ويش تقول .. صارت تلم وياها الزجاج.. وتطالع في وجهها اللي صاير شاحب.. وبهمسات مخنوقه تصيح وهي تدعي:
ــ يفرج الله عنك.. بالغه فيك يا عيني.. عساني ما انحرم منك..
ودموعها تصب ..
ليلى مهي قادره صارت تصيح هي بعد..
الا بطيحة ريمو عليهم المطبخ ..
وتصفق صدرها بالقوه:
ــ افااااااا خسااااااااره .. طاسة الأحلام والأماني..
ليلى خزت ريما ..
ريما : ــ اوهو ما شغلتش الا خز وبس ..
ام علي ماليها خلق ولا كأنها تسمع..
ريما تمزح:
ــ صمغوها تتعدل..
ليلى : ــ ذلفي وعن الظرافه..
ريما بأستياء: ــ زيييييييين ..
وراحت ليهم المجلس..
زينب .. ــ ويش صاير؟؟
ريما : ــ طاسة الأحلام انشلخت..
ــ أي طاسه؟؟؟
ــ طاسه امي شارتنها من زمان على حساب ناويه تغسل رجول علي اخوي ومرته فيها ليلة زفتهم..
زينب بغصه: ــ اهاا.. الله كريم.. انكسر الشر..
علا : ــ الله كريم ..
ريما : ــ هاااااا ويش الحين بتحني ليلوو
علا: ــ ايه ان شالله على خير..
ــ حركااااااات...
رجعت ليلى ليهم الا بقومة علا من بعد ما رن عليها اخوها..
ــ يللا غناتي بمشي مع السلامه.. وبس اعلم خالتي بخليها تتصل عليش وتحدد متى تجيش ..
ليلى : ــ حياش الله غناتي.. على خير ان شالله..


وعلى باب بيت حجي عباس وقفو مؤيد و ام مؤيد وجود و عادل..
مؤيد:
ــ متأكد هذا بيتكم .؟؟
ــ إإإإيييه متتأأأكد..
طق الجرس .. مهلو شوي زين.. فتح حجي عباس الباب.. ووجهه مكشر كدر ونفسه في خشمه..
من شاف عادل:
ــ هاااااا .. عودت لا بارك الله فيك.. دش .. دشت بدنك النوايب والمصايب دش..
ام مؤيد بعفويه:
ــ بسم الله عليه..
حجي عباس انتبه عليهم.. وبدل السلام والترحيب..
ــ خير..؟؟ نعم...؟؟؟
مؤيد تغير لونه واستغرب من هالتصرف :
ــ لا .. خير ان شالله. بس شفنا عادل في فريقنا طقوه صبيان قلنا نرجعه...
قاطعه حجي عباس :
ــ جعله ما رجع.. جعلهم رضرضو ضلوعه ترضرض..
ام مؤيد : ــ هااداويه هالدعاوي على هالفقيررر ..
حجي عباس .. ولا داق لأم مؤيد خبر...:
ــ عادلو.. دش لأمك لا بارك الله فيك ولا فيها..
دخل عادل وهو خايف وانحاش داخل...
حجي عباس بلا احترام وبلا أي اصول .. سكر الباب في وجه مؤيد و امه ...

الى الملتقى...