الحلقة الخامسه عشره...




رفعت ليلى السماعه..
ــ الو ..
وجاها صوت هز كيانها وخلاها بنبره مليانه فرح مخنوق بالعبرات..
ــ هلااا.. هلا غناتي.. الله يبارك فيك........ اخبارك انت....؟؟؟؟؟
نسأل عنك....... مشتاقين لك.. كلنا بخيررر عسااااك بخير ؟؟

كانو يتغدو في المجلس ..راحت ليلى تركض :
ــ امااه.. يبااه.. علي في التلفوون..
ام علي نفضت ايدها وقامت تركض .. والكل قامو وراها..
مسكت ام علي السماعه وهي ترجف و الدموع مغرقه عيونها:
ــ هلا.. هلا امي..
علي بصوت يحاول يداري فيه الألم:
ــ هلا اماه.. عيد عليش مبارك..
ام علي مهي قادره صارت دموعها تصب :
ــ هلا امي.. وعليك يا بعد ابوي.. شحوالك.. زين؟؟ تاكل؟؟ دافي المكان لو بارد؟؟ الناس اللي وياك.. يأذوك لو زينين..؟؟
علي ما تحمل انسلت دمعه من عيونه:
ــ انا زين اماه.. الحمدلله لا تحاتي .. كل شي تمام .. مو ناقصني الا شوفتكم..

ام علي ماقدرت على كلام ولدها... غطت وجهها بمشمرها وصارت تصيح وتصيح.. ابو جاسم ما تحمل حالة اخته وقال لمرته تاخذها المطبخ خلها تغسل وجهها و تشرب ماي وتستهدي بالرحمن.. واخذ هو السماعه ...
ــ هلا .. هلا علي اخبارك يا ولدي..
علي بمرح مصطنع : ــ اهلين هلا بالخال.. الحمدلله اسأل عنكم .. ها متجمعين اليوم وناسه... أأأخخ يا خونه..
ابو جاسم حس عليه يبغى ينفه : ــ ههههههههه عاد زينا خونه ماميش يجري في دمنا و ورفته لولادي ,, الله يفرج عنك يالغالي وترجع بالسلامه

علي حزت في قلبه مزحة خاله.. وفي باله:
ــ ايييه يا خالي لو تدري ان الخيانه فعلا اصل متأصل في ولدك ما قلت هالجمله.. الله يعينك ويخلف عليك...
شوي ريما خطفت السماعه :
ــ هلااا.. خيووو هااا اخبار اللي وياك عسى بس ناس طيبه..
ــ هلا ريمووو الحمدلله خيه .. تعرفت على كم واحد .. تمام طيبين ما صار منهم الا الخير. اخبارش انتين؟؟؟
ــ الحمدلله تماام مشتاقين لك....
ــ تسلمي غناتي.. الا وين ابوي؟؟؟
ريما تطالع المتواجدين في الصاله...وتسألهم:
ــ وين ابوي.؟؟
زينب :
ــ كأنه ماقام ويانا .. ظل في المجلس...؟؟
رجعت ام علي خذت السماعه بتكلم علي ..
ليلى راحت المجلس لأبوها مستغربه منه.. هو يدل كل مكان ولا يرضى احد في البيت ياخذ بأيده .. ليش ماقام وياهم..!!

لقته مسند راسه عالجدار ودموعه تسيل ...
وبصوت هادئ ومكسور الخاطر نادته:
ــ يبا... ما بتكلم علي ؟؟
ابو علي يداري دموعه ويمسحها بكفه ..
ــ لا يابتي .. سلمو عليه..
ــ ليش عاد...
ابو علي يأشر عليها بتعب.. بما معناه ما اقدر...
ورجعت ليلى الصاله .. وقالت ليهم.. انه مايقدر وسلموعليه

ام علي : ــ ابوك اعذره ياولدي .. مايقدر يكلمك ويسلم عليك
علي : ــ ما يقدر.. اماه .. ابوي فيه شي ؟؟ تعبان ؟؟
ــ لالا .. لا تختلع بسم الله على اعماركم والله وهذاني حلفت لك.. مافيه الا الخير بس تعرفه حساس..
ــ ايه... زين سلمو عليه و ان شالله المره الجايه اذا كلمت بلغوه ما بيهرب باصيده ترى
ــ بسم الله عليك يا بعد ابوي ان شالله مافي مره جايه ... وعساك من باجر بيينا ياكريم
ــ الله كريم...يللا اماه مع السلامه..
ــ يووو يـــــاولدي والله ما مدااااك.. ما شبعت منك...
علي بأبتسامه كسيره: ــ اماه انتهى وقتي خلاص .. اهم شي انتون بخير وتطمنت عليكم..
ام علي بصوت مبحوح: ــ لا خلا ولا عدم يا غناتي .. انتبه لعمرك.. واي شي ينقص عليك اذا كلمتنا ...قول ...
ــ ان شالله.. يللا مع السلامه..
ــ امانة الله..

سكرت التلفون.. ما تحملت وصارت تصيح : ــ انتقم الله منكم.. حسبي الله على اللي كان السبب .. جعله ما يربح ولا يتوفق .. بحق كاظم الغيض المسجون يالله تفك اسرك يا ولدي...

الكل صار يصيح وياها .. وزينب ماهي قادره وليلى تحاول تتماسك وتصير قويه وتهدي فيهم..
وشالو غداهم وعفستهم.. مال العيد طعم بدون علي.. عيد .. وعلى أي حال قد عدت يا عيد..




علي رجع لعنبرهم.. دخل وهو شاااحب و سرحان..
وقعد على سريره..
جى قعد جنبه عبدالرحمن.. الصديق اللي تعرف عليه في هالعنبر و ارتاح له.. ومبين عليه خوش رجال آدمي و حاله من حال علي .. ما حطه في هالموقف الا الظلم...

عبدالرحمن شاب سني في الثلاثينات.. متزوج.... يشتغل امين صندوق .. واتهموه ظلم انه مختلس مبلغ وقدره نص مليون.. مضى على محكوميته 11 شهر .. انسان غامض وكتووم.... بس يحاول دايما يكون مبتسم ويسولف مع الكل ... وياخذ ويعطي لكن بحدود..

و ما ارتاح عدل.. الا لعلي.. اللي ما اخذ شهر معاهم.. وكل مره يقول له شي عن حياته.. يحسه مثله.. مظلووم وما بيده حيله...

قعد جنبه . حط ايده على فخذ علي . وصار يواسيه..
ــ ايييه يا اخي .. الله يفرجها عليك وعلينا.. لا تضايق ولا تكدر عمرك..
علي بحزن : ــ آآآه يا عبدالرحمن.. صوت امي المكسور عور بقلبي .. تحاول تداري حزنها والمها ... وابوي اللي ماكلمني اعررفه ما يقدر ...
وغطى علي وجهه بكفه ..
عبدالرحمن صار يمسح على ظهره:
ــ هدي ياخوي هدي...
علي : ــ صعبه فراق الأهل يا عبدالرحمن..
عبدالرحمن تأثر وصار يفضفض:
ــ ايييه صعبه فرقاهم.. و احمد ربك منت بمرتبط مثلي..
علي التفت له مختلع: ــ مرتبط انت؟؟
عبدالرحمن يحاول يكون طبيعي ويبتسم وبعفويه :

ــ ههههههه ايه نعم.. متزوج .. وزوجتي هي امي وابوي ودنيتي ..وحيده ..ابوها انسان كبير السن ومريض و مرت ابوها ماشفت العن منها.. دالحين هي معاهم وربي اقضي ايامي دهور وانا احاتيها... خبرك امي وابوي مرحوم ترابهم من سنين وانا اصغر العيال... الله رفع حظي وتزوجت ماخذت معها 3 شهور الا و تدبست وخذوني..
وبلهجة سخريه يكمل كلامه وهو يضحك:
وابشرك لما خذوني توها حامل في شهرها الثاني .. وولدت.. والحين حنين عمرها 4 شهور..

ابتسم علي :
ــ حليو اسمها.. الله يحفظها..و تتربى في عزكم يارب
ــ تسلم ربي يخليك... امها اللي مسميتها ..
وابتسم وكمل كلامه :
ــ اييييه... الله لا يوريك حالتي لما كلمت بيت اخوي وقالو ولدت وسمت بنتكم حنين... اثر فيني هالأسم بالحيل.. خلاني اول مره ابكي من ابعدوني عنهم..
علي.. :ــ الله يعين .. ويفرجها..
ــ يااارب.. يللا قوم دالحين ما ابي اشوف حزن,, وهونها وتهوون..

علي ابتسم : ــ ان شالله...
وقام مع الجماعه وهو يحس بالراحه والدنيا لسا بخير...
صار يهون على روحه ..و من شاف بلاوي الناس هانت عليه بلوته..




تابع>>