ام جاسم صارت تصيح وياها:
ــ انا لله.. الله يساعدش يااا ام علي .... ودريو اهله؟
ــ لا.. اتصل وقال نقول ليهم.. شكلهم نايمين ما رفعو.. لو ما قدر يكلمهم على طول...
ــ الله يكون بالعون.. وشلون الحين بنوصل ليهم الخبر...


ام علي فتحت عيونها .. وظلت تطلع في السقف.. ولا انتبهت الا ابو علي مو جنبها...
قامت غسلت .. وطلعت لقته قاعد بالصاله ,, ماسك مسباح و يسبح..
ــ صبحك الله بالخير..
ــ هلا.. صبحش الله بالنور..
ــ مافطرت؟؟
ــ لا.. للحين ما فتشينا ريقنا ولا حتى بكاس ماي..
ــ لعن الله يزيد.. غريبه ليلى للحين نايمه ... خير ان شالله,,
راحت المطبخ لقت الهوايه تشتغل ولقت كيس فيه قشور بيض ...
صبت ماي لأبو علي وطلعت له..
ــ شكلها قعدت اشوف المطبخ فيه حوسه...
ــ يجوز قعدت تسوي لأخوها فطور قبل لا يروح يحدق..
ــ يجوز...

ام جاسم وزينب محتارين كيف يقولو ليهم الخبر...
ام جاسم: ــ مو عدله نقول بالتلفون .. يتصروعو تالي.. بلبس عباتي وبروح ليهم.. عالأقل اكون جنب عمتش .. ادري بها بتنهار.. ما الومها والله.. وابوش بعد ابغاه يجي...

زينب .. :
ــ خلاص اني باروح له.. اناديه..
الا بجاسم داخل عليهم..
ــ انا باروح.. روحي ويا امي..
ام جاسم في بالها..
ــ صلوات على محمد وآل محمد ...
لبسو وراحو بيت ابو علي..
وجاسم راح المزرعه لأبوه..

كان بالمزرعه ابو ناصر وحجي عباس ووياهم كم واحد من الجماعه...
الا بجية جاسم...
سلم على الموجودين.. وراح لأبوه..
ــ يبا..
ابو جاسم رفع راسه..
وهو مختلع ومو مستوعب .. جاسم قاعد الصبح وجاي له الزراعه:
ــ هااا... ..!!
ــ امي وزينب راحو بيت عمتي ويبغوك بالسرعه..
ــ ووويش صااير..
ــ الظاهر رجعو خذو علي..
ابو جاسم ينفض روحه ويقوم..
ــ انا لله وانا اليه راجعون..
وراح لأبو ناصر وهو مستحي :
ــ طال عمرك بغوني الأهل....
ــ خير ان شالله ؟؟ عسى ماشر ؟؟؟
ــ لا بس ولد اختي عنده مشكله وباروح اشوفهم
حجي عباس نط بالنص:
ــ ولد اختك.. علي ؟؟
ابو جاسم : ــ ايه..
عباس : ــ عودو خذووه ,,, لو ويش فيه؟؟
ــ شكلهم رجعو خذوه..
ــ الله يعينكم على هالسالفه.. والله يهديه..
ابو جاسم : ــ الله يعيننا.. والله هاديه ما ميش زيه هالرجال.. ماسوى جرم .. الله يشهد انه مظلووووم..
ــ ايه .. عساه خير..
ابو ناصر وباقي الجماعه ضايعين في الطوشه ..
ابو ناصر: ــ ايه.. تيسر حجي امانة الله..
ابو جاسم : ــ تسلم طال عمرك...

وراح ويا جاسم لبيت اخته...

ابو ناصر : ــ ويش سالفة ولد اخته؟؟
حجي عباس علمهم بالسالفه.. مع رش البهارات وتزويد الحكايات... وطلع علي بمنظر المتهم فعلا والجاني .. مو المجني عليه....

شوي الا بجية اشرف ليهم.. وبعد ما سلم .. سأل عن ابو جاسم.. قالو له طلع ...رجع البيت عفر ..
اشرف في باله:
ــ وانا هذا حظي ... اروح له البيت يقولو المزرعه اجي المزرعه يقولو البيت...
راح له البيت طق الباب لين عجز ,, ماحد فتح له...


وفي بيت ابو علي..
ام علي مستغربه وقلبها ناغزنها من جية ام جاسم وزينب هالحزه.. وشكلهم مهم خليين..
ام جاسم..
ــ مادري ويش اقول لش ياخيه..
ام علي : ــ ويش صاير ؟؟ قلبي اكلني من المحاتاه...
ــ علي...<< قالتها بخووف شديد..
من قالت اسم علي.. ام علي حط ايدها على راسها...
ــ ويش فيييه.....
ام جاسم بأسى : ـــ خذووه...

ام علي ضمت وجهها بيدها وصارت تهز رايحه جايه ,,
ــ آآآآه.. حسبي الله عليهم.... قلبي ناغزني وحاااسه.. انتقم الله من الظالم...
ليلى صارت تصيح... كانت خايفه من المكالمه البارحيه .. وطلع خوفها في محله...
ام علي :
ــ نخوه يا ام البنين.. نخيتش .. داخله على الله وعليش ما ترديني.. ترجعي ولدي بحق بنينش .. بحق العباس نظر عينش .. نخيتش لا ترديني..

ابو علي سند راسه عالجدار ومافي الا دموع تصب ..
ووصل ابو جاسم... قعد شوي ويا اخته واساها .. وراح بيتهم بدل ثيابه .. وعلى طول القسم بيحاول يكفله مره ثانيه ,,. ويشوف ويش المطلوب يسووه ....

بالصدفه اتصلت علا تسأل عن اخبارهم...
قامت ليلى ركض للتلفون متلهفه متوقعه خبر عن اخوها...
ــ الوو..
ــ هلا .. قوه ليلى
ــ اهلين الله يقويش .. << قالتها بصوت متكسر وخايبه اماله..
ــ ويش فيش .. صوتش متغير.. خير ان شالله...؟؟
ليلى وفيها غصه..
ــ اخوووي << قالتها وصارت تنحب..
علا اختلعت: ــ ويش فيييه؟؟ خذووه مره ثانيه,...؟؟؟
ــ اييه...
ــ يـــــــــالله حسبي الله عليهم.. هدي بالش غناتي.. وان شالله خير.. متى خذووه؟
ــ ان شالله... تونا من شوي نسمع بالخبر...
ــ ياربي ...عساه خير... وطمنيني ..
ــ ان شالله..
ــ الله كريم.. والصبر زين.. يللا مع السلامه..
ــ حياش غناتي.. الله يسلمش ..
سكرت علا السماعه.. وهي متضايقه وفي بالها.. تهلوس ..
ــ اني شكلي فال نحس عليهم .. من عرفوني وهم من بلوه لبلوه...

صارت تصيح .. راحت المطبخ تغسل وجهها..
تريزا : ــ علا .. ويشو في.؟؟
ــ مافيني شي ...
ــ زعلان ويصيح....؟؟
علا شربت ماي وقعدت..
ــ اخو صديقتي خذوه الشرطه للسجن...
ــ اوووه.. هراام...
تريزا في بالها مستنكره .. اخو صديقتها وهالصياح...
ابتسمت في وجه علا .. و طبطبت على كتفها...

وبعد كم ساعه..
باب بيت ابو علي يطق ...

هالباب اللي لكل طقه من طقاته حكايه..

قامت ليلى ركض .. فتحت الباب
الا هو خالها ابو جاسم.... و..

الى الملتقى...