وفي الصباح.. علي يسبح.. وليلى قعدت من بدري .. وصارت تجهز فطور لأخوها,,
شالت بيضتين في ايد والمقلى في ايد.. وبدون شعور فجأه طاحت بيضه عالأرض..
ليلى : ــ اففففف ويش هالزفاره....
حطت الثانيه على الفرن بس ما حطتها عدل.. .. وصارت تنظف البيضه المنكسره ,, الا بطيحة الثانيه ... ليلى بلا شعور صرخت:
ــ اوهوووووووووو... ياربي ويش هالحاااله....
الا بدخلة علي المطبخ بيشرب ماي..
ــ صباح الخير.. ويش صاااير!!
ليلى قامت وهي تشيل في البيض ..
ــ ووع .. الحمدلله.. صباح النوور.. ويش صاير .!!. خخ اللي تشوفه..
علي يمسح وجهه بالفوطه..
ــ عموما يعطيش العافيه.. لا تعبي عمرش مالي نفس بطلع الحين..
ــ مايصير ما تاكل شي ؟
ــ رجعتي ان شالله...
ــ ان شالله.. يارب...

لبس علي ثوبه.. وجاكيته.. وطلع ...
طلعته كان الجو بارد .. وجاكيته كان فيه قبعه.. غطى بها راسه المبلول...
يحس روحه مقبوضه وانفاسه مكتومه وتنفسه يتسارع.....ماقدر على القبعه .. شالها..
وركب سيارته... وتوجه للقسم...

ووصل القسم.. وظل ساعه وهو متنقع ينتظر التحقيق.. ساعه يحس قلبه فيها ما بين كل دقيقه وثانيه يوقف... وفي باله مقهور..
ــ جاي ليهم برجولي وينقعوني .. لو ما جيت شحطوني من بيتنا حق الفضايح في الفريق...

لين حل الوقت.. و بدو وياه يحققو...
ــ الحي الفلاني .. منزل فلان ال فلان.. والحي الفلاني .. فلان آل فلان..
وعلي يقسم ويحلف ما يعرفهم.. وانه حتى اللي يعرفهم سمع بالبوقات اللي صارت ليهم.. بس ماله شغل..
الضابط : ــ يا اخي قر وريحنا.. اعتررف .. وبعدين لا تخاف كلهم الحق الخاص اسقطوه من حكم حبسك بشرط ترجع اللي سرقته لو تدفع قيمته..
و بس بتاخذ فترة الحق العام..
علي يحس ركبه مهي شايلتنه..
ــ يعني كم ادفع ؟
ــ تدفع..!! ليش تصرفت بالمسروقات كلها ؟؟
علي تنرفز : ــ اقول لك واللي خلقني ما اخذتهم..
ــ اجل تدفع شنو؟
ــ اذا ماقدرت انفي التهمه عني على شان اسقط الحق الخاص كم ادفع؟
ــ والله حول 15 الف اذا مو زود ...
ــ حشا.. ليش .. ذهب ؟؟ بتروول؟؟ مو راديوات و جوالاات..
الضابط يضرب ايده عالطاوله:
ــ هذا الحق ولا تغالطنا فيه.. ووش قصدك..؟؟؟
يا رجال خلك ماش عالمضبوط لا ما يحصل لك خير..


علي يحس ابواب البراءه انصكت في وجهه:
ــ ويش ممكن اسووي حق ما انحبس..
ــ توكل لك محامي يشيل قضيتك.. او ترجع الحقوق للناس..
علي عصب: ــ انا ماااااا اخذت شي ولا احد له حق عندي....
الضابط صرخ عليه : ــ احترم نفسك ولا تعلي صوتك.. مال احد حق عندك,,
هالشي راجع لك..وهذا شغلنا...
ياعسكري ... خذه للحجز...
علي وقف :
ــ ليش ..؟؟؟ انا باجيكم كل ما طلبتوني ....
ــ السالفه مهي بكيفك.. ويللا لا تعطلنا ورانا قضايا غيرك...
ــ والحل.؟؟
ــ لا حووول.. وانا اقعد اعيد وازيد لك.. يا اخي قلنا لك وكل محامي .. والا رجع الحقوق.. ويللا اغراضك .. مفاتيحك وجوالك و محفظتك .. خليهم عندنا...
ــ طيب ممكن اكلم اهلي قبل لا اسلم الجوال..
ــ تفضل ...
علي وايده ترتجف .. اتصل بيتهم.. للأسف ليلى رجعت نامت .. ما نامت طول الليل ... بس قعدت على شان اخوها وفطوره...
لم يتم الرد..
علي مو قادر.. قام اتصل بيت خاله...
رنه ... رنتين.. رفعته زينب..
ــ الو...
ــ هلا.. وين خالي؟؟
زينب عرفته.. وارتبكت.. واستغربت من صوته و سؤاله على طول عن ابوها..
ــ في الزراعه... هنا جاسموه تبغاه؟؟
علي من سمع اسم جاسم :: تنرفز وصرخ عليها بلا وعي:
ــ لأا., مابغاه..
زينب اختلعت.. وسكتت..
علي انتبه على عمره:
ــ اسمحي لي خيه.. واسمعي باقول لش.. حاولي بعدين تكلمي بيتنا وتخبريهم احتاج محامي ضروري .. مع السلامه..
زينب اختلعت وجتها غصه وصارت دموعها تصب .. مامداها بترد عليه الا
طوط طوط...
ظلت ماسكه السماعه ... نزلتها على كتفها.. وعيونها شابحه وغرقانه بالدموع..
دخلت امها وشافتها.. راحت ليها
ــ هادا مين في التلفون...؟؟
ولا انتبهت ليها الا دموع..
ــ زينب .. ويش صااير .. ويش فيش؟؟؟ ومين المتصل ؟؟
زينب رمت السماعه وحضنت امها .. وصارت تشاهق و دموعها تصب ..
وامها مختلعه: ــ زينب .. وقفتي قلبي .. ويش صااااااااير..؟؟!!!
ــ علي..
ــ ياااعلي يا حلال المشاكل.. ويش فيه علي...
ــ رجعو .. خذووه... ومتصل يقول.. لازم محامي...

تابع<<