علا كانت قاعده في زراعتهم اللي في البيت... بلاب توبها...
جتها عمتها سميره...
ــ ويش تسوي؟؟
ــ افرفر في المواقع..
ــ مواقع ويش؟؟
ــ ازياء .. فنون.. ديكور ..
سميرة ببرود وكنها مهي مصدقه:
ــ ازيااااء .. وفنووون..
علا رفعت لاب توبها وفرته عليها..
ــ شوفي...
سميره : ــ زين خلاص.. المهم اتصل ابوش العصر وانتين نايمه .. ويسلم عليكم.. يقول احتمال قبل العيد بكم يوم يرجع..
ــ والله.. تمام.. وحشنا وايد..
ــ متى بتنامي؟؟
ــ اذا نعست...
ــ زين قومي داخل .. بنقفل الباب..
ــ اني باقفله اذا قمت.. حليو الهوا بقعد شوي..
ــ لا ما تقعدي ... قومي الحين يمكن تنسيه..
ــ ما بنساه..
ــ علااا..
قامت علا وهي محمقه وفي بالها::
ــ حكم قرقووووش..
وركبت وهي فيها غصه..
ــ مالكوه لآخر للفجر سهر برى واني كم ساعه في حوشنا مافي...

ليلى كانت تكنس الصاله. بعد العشا... وريما ماسكه كتاب وقلم تشخبط فيه و متملله تذاكر... ماباقي شي على اختبارات الثانويه العامه وهي لا تعب ولا هم يحزنون...

الا تلفونهم يرن ..
طفت ليلى المكنسه.. وردت عليه..
ــ الو..
ــ السلام عليكم ورحمة الله...
ــ عليكم السلام..
ــ هذا بيت علي حسن آل ...
ــ ايه..
ــ وين علي الله يسلمك؟؟
ــ لحظه...

ليلى اول مره يمر عليها هالصوت وهاللهجه..
نادت علي كان منسدح في المجلس يقرأ كتاب...

ــ علي..
ــ نعم..
ــ واحد يبغاك في التلفون..
ــ مين ؟؟
ــ مادري !!

رد علي على المكالمه..
ــ مرحبا
ــ ياهلا ,, الأخ علي؟؟
ــ ايه نعم انا علي
ــ لو سمحت بكره الصباح تشرفنا القسم طالبينك ضروري ...
علي بنبرة متكسره...
ــ ان شالله.. خير ان شالله


سكر التلفون.. ليلى لاحظت على اخوها التعب...
ــ مين.؟؟؟ وويش صاير؟؟؟
علي يهمس ليها..: ــ لا يسمعو امي وابوي... هذيلا القسم يبغوني بكره..
ليلى ضربت صدرها:
ــ ويش يبغووو فيك.؟؟
ــ اشششش,, لا تخافي ولا تسمع امي ولا تنام الليله وتصير تصيح.. بس بيكملو تحقيق .. كم سؤال وبطلع ان شالله..
ــ ان شالله.. عساه خير
ــ يللا باروح انام .. تصبحي على خير
ــ وانت من اهله..

ريما :
ــ وِت وِت وِت وِت.. كل يوتوتو.. ويتهامسو .. اسرااار
ليلى : ــ اسرار وجهش..
ــ يبااا شفت ما كنهم خواني كل عندهم اسرار وسوالف واني برى ..
ابو علي فيه النوم:
ــ ما توبي انتين لو بتوبي ...
ويتثاوب حد ما عنده ... وهو يكمل كلامه..
ــ تبتي... اقوم انام.. تصبحو على خير
ريما : ــ خخخخخ ذكور هالبيت زي الدجاج ينامو من بدري..
ليلى : ــ الساعه 10 الحين .. زين وقت النومه.. دجاج ولا بومه...
ــ ويش قصدش هاا .. ويش قصدش..؟؟
ــ اهووو سكتي....
ــ اقوم غرفتنا احسن لي..
ــ ايه قومي لمسجلش الصنم احسن لش...
وكفخت ريما الباب..
وشالت ليلى المكنسه .. وراحت تقعد ويا امها شوي وهي تخيط
ام علي : ــ نام ابوش..؟؟
ــ ايه .. وعلي بعد...
ــ زين..

ليلى انسدحت على جنب ...
ام علي طلعت من الكبت قطعه حمرا..
ــ ويش رايش بها ..؟؟
ــ الله حليو لونها... وخامها بعد..
ــ من عند جارتنا جايبه امتار وايد لبناتها التوأم تبغاني افصل ليهم فساتين عرس ,, عندهم عرس قبل عيد الأضحى.. فصلتهم وبقى 3 امتار قالت لي اخذهم... ويش رايش اسوي لش قميص بهم.. للعيد ؟؟
ليلى ابتسمت : ــ كل شي منش حليو ربي لا يحرمني منش ..
ــ يا بعد ابوي ولا يحرمني منش ..
ــ بس ريموه.. ما بتعترض ؟؟
ــ ريموه ما يعجبها العجب .. خلها تاخذ اللي تاخذه للعيد .. ربش يفرجها بس..
ليلى : ــ يارب...

وبين ما ام علي تخيط...
انكسرت ابراة المكينه...

الى الملتقى...