الساعه 9 الليل .. اتصلت علا بيت ابو جاسم.. علي قعد من النوم نام له بس 3 ساعات وقعد يصلي المغرب و ياكل شي تالي بيرجع ينام....

اتصلت علا ...
ورفعه علي..:
ــ مرحبا..
علا ارتبكت.. معقوله هذا ابو علي..؟؟؟مافي البيت رجال غيره..
وبعفويه.. ــ هلا عمي... اخباركم..
علي مستغرب.. عمي !! واخبارنا.. شكلها غلط...:
ــ الحمدلله خيه.. بغيتي مين؟؟؟
علا شكت بالموضوع:
ــ مو هذا بيت حسن علي آل ....؟؟؟
ــ ايه .. عدل خيه..
ــ وين ليلى؟؟
ــ لحظه...

ونادى على ليلى... ليلى تأشر له مين.. حرك كتوفه مادري وقال:
ــ خخخ وحده اول مره شكلها تتصل وتسمع صوتي .. سمتني عمي ...
ليلى ضحكت :
ــ ههههههههه هذي اكيد علا..
علي في باله وبأستنكار..
ــ علا؟؟ أي علا؟؟
رفعت ليلى السماعه..
ــ هلا..
علا : ــ اهلييين..
ــ هههههههههه توقعتش انتين....
ــ هههههههههه اخباركم... ويش مسووين ها بشري...
ــ فديتش بخيير والبشاره كلمتش..
ــ كلمتني؟؟
ــ هههههههه علي اخوي اللي رد عليش
علا استحت: ــ هههههههه يوو .. الحمدلله على سلامته.. واني سميته عمي .. فكرت ابوش ..
ــ ههههههههه الله يسلمش قال لي هو وعلى طول عرفتش.. اخبارش انتين
ــ الحمدلله ... نسأل عنش ..
صارو يسولفو شوي ... ريما كانت قاعده ,,,
علي صار يسألها..
ــ منهي دي علا...؟؟
ـــ اووووه .. هذي بنيه حركتات... اكشنات... بنت عايله فوق فووق..
ــ ياساتر عليش .. بت مين..؟؟
ــ بنت خالد ال.... .,,, ابو مالك
علي خفس وجهه:
ــ بل .. وويش عرف اختش بها..؟؟
ــ لا تخاف مهي زي ابوها.. تحفه البنيه .. وطيبه مره...
ــ ولو ,,, هالناس ينخاف منهم...
ــ ما شفنا منها الا الخير...
ــ مممم عساه خير...


وفي نص الليل ... طلع جاسم وراح لصندقة حميد.. فتح الباب لقاه قاعد يدخن وحاط ايده على خده..
جاسم: ــ هلا .. جيتك الظهر وشفت عادلو قال في سوق السمك...
حميد ببرود وتعب: ــ رحت اترزق .. خير ويش تبغى؟؟

ــ علي ولد عمتي طلعوووه..
حميد فتح عيونه:
ــ كح.. كح.. متىىىى؟؟ وشلوووون.....؟؟؟؟
جاسم علم حميد باللي صار..
حميد يطفي الزجاير يدوسها بعصبيه...
ــ اوووووووووه... هذا اللي بيودينا بداهيه.. قضينا يااجسووم قضينااا....
ــ ياربي .. تتوقعه ويش بيسوي..؟؟؟
ــ مادري... بس مافي أي شي ضدنا .. الله يستر...
ــ الله يستر .. انا خايف..
ــ فارقني ومن متى ما خفت انت؟؟

قعدو شوي زين.. لين نعس جاسم...
ــ بانام..
حميد بقهر: ــ نام.. اخمد.. خمدت عليك طوفه.. ما غربلنا الا شوفة ولد عمتك لك عندي..

ونام جاسم...
وظل حميد سهران يقلب افكاره.. ويش ممكن يسوي علي .. وكيف راح يمشي الوضع بعد ما طلعوه...

وبعد يومين...

الى الملتقى...