ضعنا يا صبرنا...

[Princess]

العصر.. الساعه 3 تقريبا.. باب بيت ابو علي يطق...
لبست ليلى مشمرها..

ــ مين؟؟

ــ اني ...

ــ مين انتين ..؟؟

ــ علا..

ليلى كشرت حواجبها.. واستغربت...
فتحت ليها الباب .. دخلت وهي حامله كيس ..
سلمت على ليلى .. وباستها...
ليلى مستغربه مره .. ومهي عارفه كيف تتصرف ..
دخلتها المجلس على طول ...
كان منام علي مفروش مارتبه لأنه طلع على طول..
صارت ليلى تطويه وتشيله وهي تعتذر من علا ان هالمكان نومة اخوها وعفسه وتسمح ليها.,,
علا مبتسمه :

ــ مسامحه شدعوه خذي راحتش...

عطت ليلى الكيس ..
ليلى :ــ ويشو دا؟

علاوهي فرحانه : ــ افتحي الكيس وشوفي...

فتحت ليلى الكيس .. شافت صحن فيه كيك...
كشرت و بنبرة تساؤل : ــ وليش يعني .... ويش قصدش ؟؟

علا ارتبكت و حست بأحراج: ــ لا .. والله ما اقصد شي بس .. حبيت اكفر عن تصرفي هذيك المره.. اسمحي لي ما كان قصدي خيه ..

ليلى تغيرت نبرة صوتها : ــ تكفري عن غلطش كذا..!!! يكفيني اعتذار

علا مهي عارفه ويش تقول تحس نفسها غلطت مره ثانيه...
الا تلفون البيت يرن...
استأذنت منها ليلى و ردت عليه... وشوي
تغيرت الوانها.. وصارت تصرخ.. و عيونها غرقت دموع...

ــ علي .. ويش فيك؟؟ وليش اخذوووك؟؟؟ ويش صاير !!

علي بغصه ويحاول قد ما يقدر يكون طبيعي:

ــ خيه انتبهي لروحش ولأمي و ابوي .. ان شالله مايصير الا كل خير.. بس شوفو لي احد

يكفلني حزة التحقيق لين اقدر انفي التهمه

سكرت ليلى التلفون .. وصارت تصيح و مهي عارفه ويش تسوي
وبعفويه صارت تشتكي لعلا :

ــ اخوي في قسم الشرطه .. تاهمينه سرقه .. قسم بالله اخوي مو كذا مو كذااا

وصارت تلطم خدودها
علا تاثرت وياها وصارت تصيح قامت ليها حضنتها وصارت تهديها
ام علي سمعت الصريخ راحت المجلس تركض .. فكرت علا تشابقت ويا ليلى

: ــ ويش تبغي هالمره وويش ناويه بعد

<<قالتها لعلا بلهجة غضب

علا ما تحملت زادت صياح .. و صارت تمسح على ظهر ليلى
ام علي حست انها فاهمه السالفه غلط..

ــ امل ؟؟ فيها شي خالتش؟؟ ويش فيكم.؟..

علا هزت راسها بمعنى لا..
ام علي صارت تصرخ عليهم :

ــ اجل ويش فيكم ؟؟؟؟؟؟؟؟؟

ليلى وكلامها متقطع..

ــ علي ... علي اتصل

ام علي من سمعت طاري ولدها وهي من الصبح متهوسه وحالتها حاله وكل على بالها..
ضربت صدرها ..

ــ ويش فييييييييييييه؟؟؟؟؟؟؟

ــ يقول

... الشرطه حجزوه........ ويبغى احد....... يكفله...

ام علي دار راسها .. وطاحت غشيانه...
ليلى انصرعت وصارت تصرخ.. اماااااااااه .. اماااااااااااه

ابو علي سمع الصريخ و صرخ.

ــ ويش صااااااااااااير ؟؟

لا مجيب ولا احد يرد عليه..
ريما في سابع نومه ولا تدري ويش صاير...
قام ابو علي يتحسس الجدران متوجه للمجلس..
وصل له ..
علا كانت حاطه ايدها ورى راس ام علي ... ومسندتنها على صدر ليلى..
ليلى تضرب في خدود امها كان تصحى..



الا بدخلة ابو علي وقف على باب المجلس :

ــ ويش فيكم.؟..

علا اختلعت وقامت بتتغطى .. تذكرت انه ما يشوف .. رجعت قعدت وصارت تعاون ليلى على امها...
ابو علي يحس الحاله قايمه وفيه مصيبه صايره بس مهو فاهم شي ..
صار يصرخ فيهم ويش صاير .. ولا احد يرد..

ليلى ماعادت تسمع من صدمتها بأخوها وحالة امها
ابو علي صار يمشي داخل المجلس وهو يتعثر وصوته يتقطع ::

ــ ماتقولو لي ويش فيكم...

علا عور قلبها ابو علي :

ــ عمي .. ولدك في قسم الشرطه ويبغى احد يكفله..

ابو علي قعد مختلع:

ــ هااا...

ليلى انتبهت لأبوها..

ــ يباا.. ويش فيك..

وصارت علا تسال :ــ ويش فيك عمي قعدت..؟؟؟

ابو علي بصوت تعبان و بالكاد ينسمع وهو ياشر بيده:

ــ مافيني .. مافيني شي .. شوفي امش .. امش..

طلعت علا من شنطتها عطر .. وصارت ترش في وجه ام علي..

لين اوتعت... حضنتها ليلى.. وصارت تصيح..

علا ما تحملت المنظر .. اثر فيها وايد. .. خصوصا انها يتيمة ام من لما كانت صغيره ..
و شكل هالعايله مره مترابطه في الشده والرخاء...
حست نفسها تعيش وياهم هاللحظه بتفاصيلها وكأنها تعرفهم عدل...
الا برنة جوالها...

للعليم امرنا.. يعظم لأجرنا.. ضعنـــــــــا يــــــاصبرنــــــــــــــا.. من لينا !!

نغمة للشيخ حسين الأكرف حفظه الله

والى الملتقى...