ضعنا يا صبرنا...

[Hussain.T]

مشكووووووووووورة اميرة

كعادتك مبدعة في كل شي

-----
ننتظر البقية على احر من الجمر

تحياتي

[مياس]

بسم الله الرحمن الرحيم
مرحبا ,,
الله يعطيكِ العافيه خيتووو, قرأت الأجزاء الـ3 وراء
بعض إبداااع صراحةً
شوقتيني لأيام المطر والبرد
والأحداث حلووووه يسلمووو إيديكِ وننتظر الجزء الجديد
(..أتوقع جسوووم إللي في صندقة حميد ..)

[دمعة على السطور]

أهلين خيتو أميرة
يعطيك العافية يالغالية على هذي الرواية الروعة
بصراحة مو قادرة اتوقع ويش يكون في صندقة حميد بس اتوقع أنه مو شخص يعني مو انسان ...
وبصراحة مرررررررررررره عاجبتني شخصية ليلى تجنننننننننننننننننننننننننننننننن
تأثرت وياها وياعلي..

أما اللي ضحكوني اليوم هم أبو جاسم وام جاسم..
عدل حركات
ههههههههههههههههههههههه

أخيتي أميرة المرح...
لك خالص دعواتي الصادقة بكل توفيق وسداد وقضاء الحوائج للدنيا والآخرة..
..دمتي بعين المولى الجليل..

[فرح]

اللهم صلي على محمد وآله الطاهرين
القصه واحدااااثها اكتييييييييير حمااااس وروووعه
يسلموووو امووووورتنا الغاااليه
بجد جااايه متأخره
بس الموووهييييييييييييم اني وصلت ههههه
ننتظر القااادم بشوووق

[*زهرة البنفسج*]

يسلمو امورة روعة

ولا عاد القدو أتخيل الوضع والريحة

ولا علي ظريف بعد

ننتظرر باقي القصة ومن الي عند حميد

موفقه

[واحد فاضي]

تسلم الأيادي

وعسى راسش سالم ياااااااااارب

ذكرتيني بشباب جمب مزرعتنا يقعدوا

وطول الليل ما فيه الا رقص وطرب

الا ذيك الليله .............شلحوا سبع سيايير من عندهم

ما فيه شي بقى الا البدي

الكفرات ...الروايدو.....كل شي

وشالوا لوحات السيارات وصفوهم على الطريق ....

...كل شوي يشوفوا لوحه ههههههههههه


يعطيش الف عافيه

فمان الله

[fatemah]

تسلمييي امورة ع الجزء الحلو

لاعدمنا الجديد وبأنتظارهـ

..}{..تحيـــــــــــــــاتيـ..}{..

[آخر شقآوهـ ..~]

ههههههههههههههههآآي
شريف أبو ضلوع .. يذكرني بشيء بس مآبقوول هع
يستآهل مآلكوه أبو الكفرآت كآن يصير عآقل مثل أخته <<<هع مستحيل لا أتوقع ذالك
هههه أبو جسوم ونآسه يشرب قدو خووش ..
أبو علي مسكين حفظ بنته الدلووعه ريموه وحركآتها ..
تسلمين حيآتو ع الجزء
ننتظر الجديد..

[Hussain.T]

والله مشتاق اعرف التكملة كل دقيقة ادخل اشوف نزلت الحلقة4.

ويش بيصير الحين؟؟؟؟؟

يلا انتظر البقية.

[الأمل البعيد]

رآآسي يعوورني >> من النعس هع هع
روووعة الجزء ولاعااد البووقه أكلووهآآ الشبآب >> يصير خير هههه
أجل علا تحب شريف :) >> يحبهــا للفضايح
وسالفه ابو جاسم ومرته جخهـ واللهــ >> سوآلف عسل
يسلمووو أمورتنآآ على الجزء
في الإنتظار

[أمل الظهور]

روووعه



ياويلي على هالحرامي قفل عليهم الباب وطفى الكهرب


شكله حرامي محترف على مستوى



مسكين بو جاسم مع قدوه وسحاراته تلعوز فيهم



ولا .. ماعور قلبي الا ليول على عمري هي وكيكتها خاطرها فيها نست الطحين



يلا بيجيب لها علاوي مابيقصر وبيجوا لها علا وامل وزنوب وبيستانسوا عندها



على فكره تعيلف ام جاسم وابو جاسم ذكروني في ام حيدر وابوه

بقصتك (ماعرفتوني كثر ماعرفني )



وويش في صندقة حميد اميروه



الله يستر



الى الملتقى مرمرش

[Princess]

مرحبا
يعطيكم الف عافيه
ولا عدمت هالتعليقات الحلوه.. والمواقف الأحلى اللي ذكرتكم قصتي بها.. تسلمو لي والله من كل مكروه.
تواجدكم يبرد القلب ويشرح الخاطر... الله يبرد قلوبكم ويحقق امانيكم ياااارب

تفضلو الجديد..

[Princess]

الحلقه الرابعه ..

وصل علي لصندقة حميد.. طق الباب .. ودخل لقى حميد قاعد ياكل حلوى وخبز ..
ــ قوووه
حميد : ــ هلا الله يقويك .. اقعد افطر وياي..
ــ لا فيه العافيه.. باروح اجهز طرادي و قشور ربياني وعفستي ..
وانتبه علي لشي مو غريب عليه في صندقة حميد....
طالع فيه عدل ..
ــ حميدووه ... ويش يسوووي هذااا عندك..؟؟؟؟؟

حميد يحط صبعه على خشمه :
ــ شششششش .. خله نايم...
وطلع وياه برى....
علي مستغرب : ــ لا صدق ولد خالي ويش جيبه وياك هنا؟؟
ــ شدعوه ماعرفه تدري بي اعرفه !!
ــ ايه ادري بك .. بس ينام؟؟؟ غريبه ويش صاير!!
ــ هو خالك متشابق وياه ؟؟؟ هو الشله اللي يسهر وياهم..؟؟ والله مادري ... جاني آخر الليل كنت قاعد عالبحر قعد وياي شوي .. اكلنا ,, سولفنا..و شكله متضايق من شي .. طلب مني يبات وياي اذا مافيها ثقله,, قلت له حياك.. شدعوه بعد صندقه واطرده منها..
علي مستنكر .. ــ هاا.. ايه زين... خير ان شالله...

وبين ماهم يجهزو عفستهم للصيد ,,, الا بجية عادل يركض ليهم والغبره وراه...
حميد تلقاه :
ــ ويش فيييييييك؟؟
عادل : ــ وووووويلللي ههههههههههههههه... كتيت على عببباااسسسوه الحليبه ,, ححااااررره ههههههههه ققققام عصصب علللي وقققال والله لأكت بدنك بدسسست..
ولوووت غترته وصار يشلووووطني .. قمممت قلللبت تبسي الجدوووع عليه و هررربت..

وينفض عادل ايده و يطلع صوت قرطعه قويه بأصابعه..
ويكمل كلامه : ــ شششاااان يقوووم ويلحقني .. انننا حتتتى نعاااالي ما لبببسته جيت لك علللى طوول...
حميد : ــ ههههههههههههه الله يهديك.. وكل هالمشوار والطق و خبزتك بعدها في ايدك..
علي ماقدر قام يضحك..
عادل طلع ايده اليمين : ــ يؤ نسسسسيييتها اصصصلا...
وقعد ياكل فيها.. مدها على حميد:
ــ هااا .. حييياك اكككل ويييايي
ــ ههههههههههه تسلم فيه العافيه تووي ماكل
مدها على علي :
ــ هااااا تففضضضل...
علي ابتسم : ــ انا بعد توي ماكل .. عليك بالعافيه..
عادل : ــ بببااااارروح وييياكم

حميد : ــ وينا ياخوووك..
ــ الحححداااق.. ..بااانيم السمش اللي تصيدووه باااغني له لا ينحاااااش
ــ هههههههههه لا الله يخليك استريح عالساحل من بتغنى بينحاش حتى اللي في البحر.. استريح وخلنا نخلص شغلنا..
عادل : ــ زززين...
وركبو طرادهم.. كان مشترك بينهم.. ودخلو البحر .. وكل واحد قعد في جهه .. ورمى شباكه.. والرزق على الله...


امل تفتح عيونها بصعوبه مع صوت المنبه وتقوم :
ــ حسين.. ياحسين..
حسين بتعب ما نام الا متأخر رجعته من العمل : ــ مممممم
ــ يللا غناتي قوم ورانا موعد لسجاد في المستشفى..
حسين يفرك وجهه: ــ ان شالله يللا قايم..

راحت امل لسجاد.. لقته قاعد ومنسدح في سريره..
ــ صباح الخير غناتي ,, من متى قاعد؟؟
ــ صباح النور .. توني من شوي..
امل تحمله .. وتلعب في شعره..
ــ يللا مشينا الحمام ,, تسبح وتفطر وتجهز .. اليوم بنروح للدكتور مصطفى..
سجاد مد برطمه
امل حست عليه.. وصارت تضرب برطمه بسبابتها على خفيف:
ــ هااا ويش فيه الحلو زعلان..؟؟؟
ــ مابغى دكتور مصطفى..
ــ لوويه ...
ــ ما احبه..
ــ افااا ليش عاد... هو يحبك وكل يعطيك حلويات..
ــ بس كل مره يقول ان شالله امشي .. كل مره كل مره .. ولا يستوي كلامه..
امل عور بقلبها ولدها .. ضمته بالقوه لصدرها ..
ــ امي هالشي مو على كيف دكتور مصطفى.. هو يعطيك دواء ويسوي لك علاج بس الله سبحانه وتعالى هو اللي يخليك تمشي ..
ــ وليش الله ما يخليني امشي ؟؟
ــ الله كذا خلقك .. الله يبغاك ما تمشي.. يمكن اذا مشيت يصير فيك شي مو زين...
وانت كذا احسن لك يمكن.. ما تدري ..الله كل شي يسويه بحكمته و عدله بالوضع اللي يناسبه..
سجاد ابتسم ورفع راسه لأمه : ــ اييييه.. زي هاذاك الكرتون العصفور يبغى يطير وامه قالت له اذا كبرت بتطير.. الله خلاك ما تطيير لأنك بعدك صغير,,, تالي ياكلك الثعلب .. قام ما سمع كلام امه ولما راحت تجيب له دود ,, قام نط من عشه يبغى يطير وطاح واكله الثعلب .. مسكييين
امل ضحكت : ــ فديتك.. شفت ..
ــ الله ,, يعني اذا كبرت بامشي
امل بأبتسامه : ــ إن شالله..


ليلى تحوس ويا امها في المطبخ.. الساعه صارت 10 الصباح...
ام علي : ــ من زمان ما شفنا ام فلاح
ليلى : ــ وييييي ويش تبغي فيها هالهداره
ام علي : ــ هههههههههه وحشتنا اخبار الفريق
ــ ههههههههههههه نصها خرطي وتزيد من عندها...
ــ صدقتي .. بس تسلي
ــ خخخ الا تكسبنا ذنوب يا مجير..
ــ و نحسو فجعو نسرينو .. من متى فوبها طايحة الحظ ناقصنه قماش كلما اتصل عليها ما الاقيها وتالي تجي وتتليسن ما خلصتيه..
ــ اييه يا امي ..مشاغل البيزنيس ما تخلص ويا نسرين كان اخذتي رقم جوالها..
ــ راح عن بالي جوالها يبغى لي ,,,لا بنزيس ولا طزنيس, , اصباغ وجه وعطورات سويتيها بنزيش
ــ ههههههههههههه بزنيس بزنيس .. ايه ياا امي المهم تتحرك وتشوف ليها شغله ..
<< قالتها بطريقه كنها تضرب ضربات
ــ اهوو ويش عرفني بهالسوالف.. وفكينا من هالشغله قلنا لش من زمان ما تنفع لينا..
ــ ايه .. زين .. خلاص
نسرين ,, بنت من الفريق تشتغل مندوبة مبيعات.. تبيع عطورات ومكياجات لشركه فرنسيه..
اللي خلى اهل ليلى يرفضو هالشي . لأن نسرين احيانا تتعامل ويا محلات واصحاب المحلات رجال .. تصير تتفاوض وياهم على البضاعه و تبيعهم وياها..
علي من درى بهالشي قال .. ما عندنا بنات تكلم رجال وتطلع من بيت لبيت اصلا.. محلش ....
فصرفت النظر عن هالشغله..
ام علي تتنهد :
ــ ايه يابتي .. الله يرجع ولد عمتش صالح بالسلامه ونفرح فيكم يارب
ليلى تلون وجهها وابتسمت ..

تابع>>

[Princess]

صالح .. ولد اخت ابو علي وفي عمر ولده علي تماما فرق بينهم شهور .. اخته من سنين ماتت وابو صالح تزوج وحده ثانيه بس ما قصر على صالح.. كان من عايله مستواها فوق المتوسط.. تعلم صالح و شد حيله .. كان جدا ذكي .. جاب نسبه عاليه.. فرسلوه بعثه يدرس برى .. خيروه بين امريكا و استراليا.. فأختار استراليا .. ومن لما عمره 19 سنه راح هناك يدرس .. اخذ الماجستير .. و كمل دراسات عليا والسنه كانت آخر سنه له .. وياخذ الدكتواره..

من صغرهم هو وليلى .. مسميين لبعض .. وهو كل يجي ويقعد وياهم... ومن صغرهم وهو يهتم فيها وهي كذلك.. ما شاف غيرها بنت في حياته وهي ما تعودت على ولد غيره هو ويا اخوها في حياتها..

كبرو و بلغو .. وتغطت عنه.. وهو صار يحترم هالشي ,, ويحصر علاقته فيها بالسلام والسؤال عن الحال...

كان صديق علي بالمره.. وكل وياه.. على الرغم من كون علي ما كمل دراسته الثانويه.. و صالح العكس تماما لين تخرج و بعثوه ..

كان يوم جدا صعب على علي لما تركه صالح وسافر عنه.. يذكره على طول ..

وسافر صالح.. وسافر وياه قلب ليلى.. وسافرت وياه ذكريات علي .. و ظل بينهم المراسيل .. تجي احيانا واحيانا تنقطع... وهذي الدنيا ارزاق والرزاق رب السما...


ابو علي مشغل اخبار العربيه .. والصوت مرفع حده
وكل ما جت موسيقى العربيه الفاصله بين الأخبار .. نقز :
ــ لابوكم لابو مزيقتكم...
صار يتحسس في الأرض جنبه.. يتذكر علي قبل لا يقوم غير القناه وحط العربيه..
.. ظل يتحسس حواليه... لين مسك الريموت...
صار يحوس في الحبات.. يمين وشمال يبغى يقصر عليه.. بالغلط رفع عليه زياده ...
ــ انا لله .. ليلى.. يااااااااااا ليلى...
ما تسمعه في المطبخ ومسكرين عليهم الباب ويسولفو غير ان صوت التلفزيون حده ... صار يحوس .. يمين .. شمال .. لين قدر يقصر عليه.. وتقصر على الصوت..و حط جنبه الريموت ..
و شوي جابو برنامج فيه السيد حسن نصر الله .. الله يحفظه..
ابو علي من سمع صوت سيد حسن :
ــ هلا .. هلا وغلا بالرجال ولد الرجال.. رجال والرجاجيل بهالزمن.. ماميش..
عاد ابو علي يموت في تراب السيد حسن.. يبغى الحين يرفع الصووت حده زي ذاك الحين و يتحمس ويا كلامه وحواره..

اخذ الريموت مره ثانيه.. بس هالمره صار بالمقلوب.. وقعد يحاول يرفع الصوت مره ثانيه .. بس مو عارف يحس ما يتغير شي ..

والسيد حسن يتكلم .. وابو علي داقتنه الحومه.. وفيه حره..
قام يحبي وقرب اذونه من التلفزيون...

الا بطلعة ليلى بتشيل تبسي فطورهم... وشافته وهو ايده ثنتيهم على الأرض وركبه.. كأنه بيحبي.. وقاعد يتصوخ..
ـــ يووو يبه .. قصرت عالصوت وايد..!!
ابو علي : ــ ايه .. ايه يابتي .. عدليه عاد يجزاش خير .. تعبت وانا قاعد هاللون..
مسكت ليلى ابوها وقعدته وسندت وراه مخده.. ورفعت عالصوت
ــ كذا زين..؟؟؟
ابتسم ابو علي : ــ لا ارفع.. ابغى صوته يرن بطيفان الصاله
ليلى ابتسمت وصارت تزيد : ــ هااا كذا
ــ ايوووه... يللا سكتو ولا اسمع منكم حس
ليلى ضحكت وشالت التبسي وراحت المطبخ..
ربع ساعه الا باب غرفة ليلى وريما انفتح
وريما تنادي بتعب : ــ يبااااا... يبااااااااا
ابو علي ولا عنده فيها ... مندمج..
وتروح ريما تشيل الريموت و تقصر عليه..
ابو علي انتبه: ــ مين.. مين نزل عالصووت..!!
ريما : ــ اني .. انفقع راسنا.. نبغى ننام..
ــ نامت عليش طوفه بلى .. نامت عليش طوفه.. تقصري حس السيد حسن.. ارفعي عليه لا بهالعكازه الحين
<< ابو علي يعصب وابدا ما يتفاهم اذا تصرف واحد من عائلته أي تصرف ضد رغباته الشخصيه...
ريما رفعت عليه : ــ اوووه الواحد في هالبيت ما ينام ولا يرتاح..
ابو علي : ــ اهوو.. جيبي الريموت عندي .. ويللا فارقي..

عطته اياه وراحت الغرفه وصفقت الباب..
ابو علي : ــ صفق راسش بليس.. يالحنانه..

وما مداه 10 دقايق بالكثير انتهى البرنامج.. ويللا ويا موسيقى العربيه اللي تشلخ الراس .. ويصير ابو علي يعصص بالحبات.. الا التلفزيون انخرس...
ابو علي فكر طفاه..
شويات طلعت ريما خلاص طارت النومه.. وروحتها للحمام انتبهت للتلفزيون
وراحت تركض : ــ هااداااويه.. يبااا ويش سويت..؟؟؟؟
ابو علي منسدح على المخده وحاط ذراعه على جبهته.. ..
ــ ويش سويت بعد يالهداره
ــ برمجته.. ماني ماني .. انحذفت كم قناه واعتفست الدنيا..
طفته تركض ورجعت شغلته..
ابو علي :
ــ فورتين طارت
ريما تقلب في القنوات : ــ لأ
ــ العربيه طارت ..؟؟
ــ لأااا ..
ــ الأنوار طارت ؟؟
ــ لأ لأ
ــ اجل ويش اللي طار ؟؟
ــ طاااااااارت ام بي سي وشلتها 2 و 3 و 4 و الأكشن وكم وحده من القنوات اللي ورى .. القنوات اللي قدام ماطارو.. يبااااا ويش عصيت << اللي ورى كانو قنوات روتانا ابو علي مايدري بهم
ــ هههههههه باللي مايردهم..
ــ تهي تهي ماني .. ويش عليك انت قنواتك طالعين..
ــ الله عاد .. ذلفي وعن قلالة الحيا.. اذا جى اخوش علي يعدله..
ــ تهي .. ما بيرضى اصلا بيستانس ..
ــ الويه؟؟
ــ و لا شي..
ابو علي ما يدري ان علي شفر كل قنوات الأغاني والقنوات الأجنبيه.. وريما خلت ولد خالها جاسموه يطلعهم ليها مقابل 10 ريال .. وقالت له يخليهم اخر القنوات.. لأن علي اذا جى تعبان .. حده بس يشغل العربيه وهي في البدايه. يشوف الأخبار وينام
ريما راحت الحمام وهي تتحمق :
ــ افففففف الحين من وين اجيب 10 ريال لجاسموه .. ياااااربييييييي...

تابع>>

[Princess]

وفي المزرعه .. ابو جاسم يشتغل .. الا بجية ابو ناصر ومعاه حجي عباس..
ابو ناصر :
ــ قواك الله حجي ابو جاسم..
ابو جاسم قام واقف ومسح ايده في وزاره ..
ــ هلا هلا .. الله يقويك عمي ..
ــ ما يفيد فيك .. كم مره قايل لك لا تقول لي عمي .. انا ابو ناصر..
ابو جاسم بحرج: ــ ولو يا عمي العين ما تعلى عالحاجب..
ــ عساك سالم.. هاا اخبار الشغل اليوم ..
ــ الحمدلله في احسن احواله..
ويكمل كلامه بأستنكار من حجي عباس اللي ما سلم ولا نطق:
ــ قواك الله حجي عباس .. كيف اصبحت..؟؟
حجي عباس : ــ هلا.. يقويك.. زين زين..
ابو جاسم فيه ضحكه.. بس مداريها.. يدري بحجي عباس اذا نفسه في خشمه اكيد عادلوه مسوي فيه شي ..
وفي باله :
ــ تستاهل ياعساه يخوبلك ,,
الا بحجي عباس:
ــ ها ابو جسوم.. صدق ما دفعت اللي عليك..؟؟ متى ان شالله
ابو جاسم تلون وجهه وحس بأحراج.. :
ــ ايه.. هاا.. ان شالله الله يطول عمرك .. يوصل حسابك...
ــ ايه .. لا تتأخر .. قريب يخلص السبوع و ما دفعت ...
ابو ناصر تدخل:
ــ ليش كم عليه...؟؟
حجي عباس يحسب :
ــ مااخذ يونية عيش صغيره... و 3 قواطي حليب ابو علم.. و غرشة زيت
ابو ناصر عصب من حركة حجي عباس .. قاعد يحسب يعدد ويش اخذ ويش ما اخذ..
ــ ياااحجي قلنا لك كم عليه مو ويش اخذ ..
ــ هو دفع فمن قواطي الحليب وغرشة الزيت.. باقي يونية العيش ما دفعها قال السبوع الجاي ..
ابو جاسم مو عارف ويش يقول :
ــ ياحجي .. بعده السبوع ما خلص .. قلت لك باوفيك فلوسك .. واللي خلقني ما باكلهم عليك..
كان آخر الشهر.. باقي اسبوع و يعطي ابو ناصر حجي عبدالرحيم اجره..
ابو ناصر :
ــ ياحجي عباااس.. خاف ربك.. واقف له على 40 مدري 50 ريال ..
حجي عباس : ــ فمانييييييييين.. فمانين يابو ناصر..
ابو ناصر : ــ جعله ميه.. الله موسع عليك و راهي عليك ومتفضل عليك بخيره ونعمه.. تجي تحط بالك بال اللي على باب الله حق ويه..؟؟ خلاص فلوسك بتوصلك ولا عليك..
ابو جاسم انحرج ومو عارف ويش يقول :
ــ لاا .. تالي بعطيهم وياه.. عسى عمرك طويل .. عساك سالم... لا تكلف ..
ابو ناصر يبتسم : ــ ماعليك ..
ابو جاسم : ــ الله يعطيك الصحه والعافيه..اخصمهم علي من اجري ..
ابو ناصر طالع في ابو جاسم : ــ ويش تقول .. باسوي روحي ماسمعت..
ابو جاسم : ــ لا والله ما يصير يابو ناصر .. خيرك مغطينا الله يزيدك من فضله..
ابو ناصر يعرف ابو جاسم نفسه عزيزه وبيسوي سالفه على هالفلوس ولا بيرضى :
ــ خلاص يا بو جاسم.. اعتبرهم من اجرك ..
ابو جاسم ابتسم : ــ الله يبغلك في ذكرك .. الله يوسع لك في دنياك وآخرتك.. الله يطول عمرك ويعطيك الصحه والعافيه.. الله يخليك
ابو ناصر : ــ تسلم بركة دعاك الصالح.. يعطيك العافيه
ــ الله يعافيك..
ومشى ابو ناصر ويا حجي عباس .. وابو جاسم رجع لشغله..
حجي عباس : ــ حق ويه .. ها.. حق ويه.. الحين تعوده على هالحركه.. ولويه ما تخليه يسميك عمي.. تقويه عليك
ابو ناصر طالع في حجي عباس:
ــ افففف الله يهديك..
ــ لا اا.. قالو لك مينون.. قول مينون...
ــ لاااا حاشاك ..
ــ ايه.. حسبالي .. بس والله انك يابو ناصر تعطيهم وجه زياده و..
ابو ناصر يقاطعه:
ــ ياااحجي .. فلوسك وصلتك لو لا ؟؟
ــ ايه..
ــ خلاص اجل .. ماعليك مني عطيتهم وجه ما عطيتهم ..شي راجع لي..
ــ زين ويش فيك حمقت..!!
ــ ما حمقت.. ماعلينا.. ايه .. نشوف شغلنا..


الدكتور مصطفى.. يشوف نتايج الأشعه..
حسين و أمل قاعدين ومتأملين أي خبر يبشرهم يعطيهم الأمل من ورى هالعلاجات..
ابتسم الدكتور.. وطلع من الدرج حلاوه..
من طلع الحلاوه.. عرفت امل .. نفس حركته كل مره.. وتذكرت كلامها ويا ولدها قبل لا يروحو المستشفى..
دكتور مصطفى : ــ خود بأى يا شااااااطر المصاصه دي ..
حسين بنظرات تأمل .. حط كوعه على مكتب الدكتور و سند خده على كفه..
ــ الله كريم..
الدكتور : ــ الله كريم يا باش مهندس .. انا هغير له العلاق هالمره دي .. وان شاء الله مع العلاق القديد يبأى في نتيقه..
حسين : ــ ان شاء الله..
ــ بالسلامه يارب
ــ الله يسلمك..
حمل حسين ولده.. اللي ترك المصاصه على مكتب الدكتور..
يحس ماليها طعم.. ولا حلاه.. ولا عاد يبغاها.. لأنه زهق منها.. ولا عادت تعني له أي شي..

الساعه 11 ونص الظهر ..
علا كانت في الحمام ,, طلعت شافت جوالها رساله من خالتها امل رسلتها ليها الصباح..
ــ صباح الخير غناتي.. المهم اذكرش اليوم بنروح للخياطه.. تجهزي و كلمت مالك ووافق يودينا السوق بس يقول اول شي بيجيب سيارته من الورشه يعني العصر ان شالله نلتقي.. اشوفش على خير..

ابتسمت علا :
ــ على خير.. ممممم ولا اني جايه اتذكر هالليلى...
طلعت لقت عمتها سميره في الصاله قاعده..
ــ صباح الخير..
ــ أي صباح.. قولي مساء الخير..
ــ خخخخ ما نمت الا بعد صلاة الفجر..
ــ وويش مسهرنش .. ؟؟؟
ــ لا بس ما جاني نوم..
ــ ايه اللي ماخذ عقلش..
علا ببرود : ــ ماحد..
ــ ايه .. يتهنى به..
علا سوت روحها ما سمعت.. متعوده هالضربات من عمتها .. دايما تحط دوبها دوب البنات..
من تسمع وحده رفضت واحد متقدم ليها.. قالت اكيد تحب واحد و في بالها واحد.. من تشوف علا ما نامت لو سرحت .. قالت ليها تفكري في مين..؟؟؟

دايما تحسس علا ان كل بنات هالزمن مهم خاليين من هالحركات..
لدرجة انها كل سنه تحسب لعلا كم وصل عمرها...!!!
واذا جى ليها خطيب ورفضه ابوها بدل لا توقف ضده وتقول له شوف حالتي وليش الرفض .. بالعكس تشجعه على تصرفه وانه مهو من ثوبهم ولا يناسبهم...

علا تسكت عنها.. وفي بالها .. ــ مالومش .. من حالتش اللي وصلتي ليها.. وياخوفي الحقش ...

دخلت المطبخ .. لقت تريزا تحوس بس حوستها مو زي العاده.. كانت تفرك المواعين ببطئ وسرحانه وسرحانها يغطيه الحزن..
علا تعمدت تسوي صوت وهي داخله لا تخلعها..
تريزا عفويا اختلعت و رمت الكاس وانكسر ..
سميره برى تصرخ :
ــ ويش كسرررررررتي بعد..
تريزا بخوف :
ــ سوري ماما.. سوري ..
وصارت تلم الزجاج من المجلى وترميه.. ووجهها مكتوم وكأنها بتصيح..
علا تعتذر من تريزا على الخلعه وتكلم عمتها : ــ ويش فيش عمه.. دافعة بلى الكاس .. حصل خير..
ــ ليش مفكره هذا اول واحد,, من قعدت وهي تكافخ بالمواعين.. كم شي كسرت ومن شوي كسرت غرشة مخلل خيستنا..خرفت الظاهر وما عادت تقدر تشتغل .. يبغى لي اقول لأبوش يجيب لينا وحده غيرها..
تريزا ما تحملت..
انسلت دمعه من عيونها..
علا ماقدرت على الموقف .. وراحت ليها..
ــ ويش فيش تريزا..؟؟؟
تريزا ساكته مهي عارفه ويش تقول..
علا حطت ايدها على كتف تريزا.. وقعدتها على الكرسي .. وصارت تواسيها:
ــ ويش فيش .. على ويش تصيحي..؟؟
تريزا بألم وصوت متقطع:
ــ بنت مال اني ..واجد مريض..
علا :
ــ هاا..مين قال لش ..؟؟
ــ زوج مال هو ليل يتصل ويقول .. مريض واجد ونده بيبي صغير..
علا مهي عارفه ويش تقول :
ــ انا لله.. ويش فيها؟؟
ــ مايدري .. انا في خوف
ــ لا ان شالله خير .. اذا تبغي تروحي اندونيسيا روحي اسبوع شوفي بنت وتعالي..
ــ مايقدر يروح.. عقد مافي يخلص وماما سميرا وبابا ابو مالك مافي يرضى..

علا حست انها ماتقدر تقول أي شي .. دام بابا ابو مالك ما يرضى.. ماليها كلام..
مسحت على ظهر تريزا:
ــ لا ان شالله بنت يقوم ويصير اوكي.. لا تيصيحي خلاص..
ابتسمت تريزا: ــ ان شالله..


وفي وسط البحر .. حميد وقف بيشيل الشبك امتلى سمك..
وهو واقف دار راسه وصار يترنح..
علي انتبه عليه:
ــ ويش فيك ؟؟
ــ ها لا بس ما نمت عدل..
ــ ليش عاد.. اشوفك دي كم يوم نومك مو لهناك.؟؟
ــ لا ويش دعوه كل يوم انام عدل .. بس البارحه ولد خالك ما قصر يشاخر
ــ هههههههههههه حق لا تنومه وياك مره ثانيه
ــ خخخخخ ولا يهمك المره الجايه اطرده...

علي التفت الى شبكه لقاه امتلى .. وقف بيسحبه..
حميد كان واقف ..
ولا يسمع علي الا صوت شي طاح في البحر
التفت بسرعه لقى حميد.. مو على الطراد..

الى الملتقى...