زينب راحت لأمها كانت تطبخ الغدا وناقعه ساقو في صفريه:
ــ اماااه اليوم باروح بيت خالي ..
ــ حق ويه..؟؟
ــ وحشتني ليلووه..
ــ متى بتروحي ..؟؟
ــ العصر ان شالله..
ــ ايه .. زين طلعتش ودي وياش هالساقو خالش وولد خالش يحبوه..
ــ ان شالله..


علي في المطبخ ,, ووراه امه وليلى.. واقفين قريب البراد.. قعد على ركبه .. وحط اذونه عليه يتصوخ في صوت لو لا ..
علي : ــ ياخوفي ارفع هالبراد ويطفر علينا..
ليلى : ــ وي وي اجل باوخر ...
ام علي : ــ لمتى نخليه يعني ..؟؟ اخاف مات وبكره تطلع ريحته علينا.. والله حاله...!!
علي صار يطق البراد بالقوه .. كان اذا الفار عايش يتحرك من الصوت..
لقاه مافيه حس..
ــ عفر مات..
ام علي .. باجيب كيس زباله كبير .. وشيله و ارميه..
علي :ــ والله لو اشتهي اخذته طعم للسمش .. عدل كبير يجيب لي خوش صيده..
ليلى : ــ وووويييي يماااه .. وييييع..
ــ هههههههههههه شدعوه ويش تاكل السمك.. كل شي لحم قدامها .. حنا نحط حراسين احيانا واحيانا قباقب لو قشور ربيان .. وعلى الله..
ام علي : ــ ويلي لا تلوع شبدي ها.. ان شالله بتقطعه بعد..؟؟
ــ هههههههههههه لا ويش رايكم اوديه الجزار
ام علي تضرب راس ولدها على خفيف من ورى :
ــ يعوه عليك .. الله يلوع شبدك..
ــ هههههههههههه انا داري .. مانى مشتهي اشيله الحين مو اقطعه بعد..
ويرفع البراد .. ويلاقيه فاطس ومنسدح...
ليلى برعب : ــ ماااات!!
علي يسخر : ــ لأ... الكاميرا الخفيه..
الا بقعدة ابو علي .. وجاي ليهم المطبخ..
ــ صبحكم الله بالخير .. ويش فيكم متجمعين.. ومين الكاميرا الخفيه..
ام علي : ــ هلا .. صبحك الله بالنور.. تشيه انت تدري بشي .. نمت البارحه نومة دجاج.. فار يا طويل العمر فار..
ــ هاا.. فار .. فار .. من وينا طالع..؟؟
ام علي بأستياء : ــ من ارض الله الواسعه من وينا بعد..؟؟
ــ عسى ما قروضكم..؟؟
ليلى : ــ هههههههههه لا لقيناه في المخزن,, اشوى ما قرض شي ..
ام علي بنبره هاديه ومتكسره: ــ اييييه ماقرض شي بس المطر ما قصر ..
ابو علي مو فاهم شي .. طلع من المطبخ : ــ ليلى جيبي لي الجدوع..
ــ ان شالله يبه..

علي يلبس الكيس في ايده ويشيل الفار ويقلب الكيس عليه ويربطه...
ويدور لأمه : ــ اف .. تمت العمليه. الفاتحه على روحه....
ليلى : ــ ههههههههه استغفر الله...
علي : ــ الا المطر ماقصر ؟؟ في ويش ؟؟؟!!
ام علي : ــ لا .. ولا شي ياولدي ... << خافت تقول لولدها من الصبح وتكدره مهو ناقص..
وراحت تحوس في غداهم..
قام علي وفتح درام مطبخهم بيرمي فيه الفار ...
وشاف اكياس الطحين على بعضها واصله لثلاث ارباع الدرام .. ومره طين صايرين من الماي...
علي وقف منذهل ..
ــ اماااه.. هادااويه !!!
ام علي شافته وهو فاتح الدرام .. سكتت شوي تالي قالت:
ــ الله كريم.. من ماي المطر ياولدي خر عليهم..
علي تنهد من قلب :
ــ ايه.. الله كريم..
رمى الفار في كيس الدرام الكبير .. ربطه وشاله بيطلعه برى الشارع.. الا بقعدة ريمو..
وتتثاوب حد ماعندها .. وتدخل المطبخ تلاقي البراد منقلب على ظهره..
ــ مااات؟؟؟
ام علي : ــ ايه الله لا يرده..
ريمو راحت تشرب ماي ..
ليلى : ــ خير اللهم اجعله خير .. الا قاعده من الصبح..
ريما تطالعها على جنب :ــ اففف توقعت منش هالكلام.... بشرب ماي ناشف حلقي.. مو قاعده برجع انام,,لا تختلعي ..
ليلى تحط الشاي في الماي المغلي ..
ــ ايه .. لا تعليق ..
ــ احسسسن..
ام علي : ــ ريما تعالي دام انش قعدتي نقي لي هالعدس .. شيلي منه الحصى و السوس..
ريما بملل وهي تحك راسها : ــ ماقعدت اني .. ماقعدت بعدني نايمه..
ام علي بقهر : ــ روحي . مامنش فايده.. فارقي ... عساني ما احلم بش ..
ليلى : ــ مره ثانيه باذكرش تحطي لش كاس ماي عند راسش على شان لا تطلعي..
ريما عطت ليلى نظره و راحت الغرفه.. وكفخت الباب..
ابو علي في الصاله ويا علي .. طفر من صفقة الباب ..
ــ هااادااويه اكيد ريموو..
علي : ــ ومين غيرها..!!
ــ الله يهديها..
ــ الا يبغى ليها تكسير راس شان تعقل ..
ــ هالله الله في اختك ياولدي .. باللين والكلام الطيب..
ــ يا يبه ما ينفع وياها دي لا لين ولا شده..
ليلى جابت الفطور ..
تفضلو...
علي : ــ مافي جبن؟؟
ليلى: ــ لأ...
ــ ولا بنات بتر ..!!
ليلى ابتسمت وفي عيونها حزن: ــ لأ...
ــ يعنوو .. وانا اشوفش امس واليوم حليب وصمول .. زين ..والدجاجتين وين بيضهم..؟؟؟
ليلى ابتسمت : ــ باسوي اليوم كيكه .. امس باضو بيضتين .. واليوم ثنتين...
علي ابتسم وقص الصموله وغمسها في الحلييب :
ــ كيكة ويه ياخيه ومافي طحين..
ليلى كتم وجهها و كشرت حواجبها وبأسى :
ــ صح.. نسيت...
ابتسم علي : ــ الله كريم.. ماعليش .. رجعتي اليوم اجيب كيس طحين وغرشة جبن.. وانتظر كيكتش على احر من الجمر..
ليلى ابتسمت: ــ تسلم ياخوي وعساك عالقوه..
وراحت تعاون امها في المطبخ
ابو علي : ــ لويه مافي طحين؟؟؟
علمه علي بالسالفه..
ابو علي : ــ الله يكون في عونك ياولدي ..
وحط الصموله من ايده.. وتغيرت نبرة صوته..
ــ إييييه.. ما ورثتكم غير الهم والفقر .. ويش بيدي وحالتي كسيفه لا عيون ولا...
علي يقاطعه .. عارف ابوه و اسطوانة المأساه والشعور بتأنيب الضمير على هالحال :
ــ عساك سالم يا يبه.. وايد عليك انت من صغرنا راعيتنا وكبرتنا وداريتنا لدرجة انك فقدت عيونك من هالشغل .. دورنا يا يبه نعين ونعاون..
ــ عساني ما انحرم منك ياولدي .. الله يبلغني فيك.. ويحفظ شبابك ياكريم..
ابتسم علي .. كمل فطوره.. وطلع لرحلة الصيد الشاقه..

وصل لصندقة حميد.. طق الباب .. ودخل لقى حميد قاعد ياكل حلوى وخبز ..
ــ قوووه
حميد : ــ هلا الله يقويك .. اقعد افطر وياي..
ــ لا فيه العافيه.. باروح اجهز طرادي و قشور ربياني وعفستي ..
وانتبه علي لشي مو غريب عليه في صندقة حميد....
طالع فيه عدل ..
ــ حميدووه ... ويش يسوووي هذااا عندك..؟؟؟؟؟

والى الملتقى..