ضعنا يا صبرنا...

[واحد فاضي]

رووووووووووووعه أقل ما توصف به

ترابط أطراف الرواية أو القصة

بداية موفقه وبالتأكيد ترابط ممتع يجذب القارئ

وتنقل الاحداث بين أطراف الرواية جداً رائع

أسأل الله العلي العظيم أن يوفقك وينولك مرادك

بحق محمد وآل محمد الطيبين الطاهرين

فمان الله

[*زهرة البنفسج*]

بسمه تعالي

أمورة حبيبتي وحشتينا كفاري

وحشتنا قصصش الحلوة والي تخلي الواحد يتفاعل يوم وراء يوم معاها

بس ها امورة اكيد لازم اصيحينا شوي شوي علينا

وضحكتني دي غرشة بيبسي معرق هلمصطلح القداحه اقولوه الضاهر يامورة حتي انتوو اتقولوها

بداية روعه ودوم انشاء الله

ننتظر الجزء القادم


بالتوفيق

[عوامية صفوانية]

تسلمي اميرة على الرواية
بداية رااااائعة وموفقه والله يعطيك العافية وما قصرتي

اني من المتابعين للرواية وتفاعلت معاها

( هذي ماتقرأ لا قصص ولا روايات في المنتديات قامت تندمج مع رواياتش خخخ)

مع اني ما قرأت من قبل رواياتش الاولية

عجبتني عيلة ابو علي منها ليلى الله يساعدها ريمووووووووه هههه
وعُلا الناعمة الحساسة رسامة بعد هااااااااااا

يا اله خيتو لا طولي علينا نحن في الانتظار

[Princess]

مرحبا

يسلم لي ربي هالطله الحلوه..عسى ربي يحلي دنياكم..
يسلم لي هالتعليقات الخفيفه اللي فرحتني عسى ايامكم بالفرح عامره,,
يسلم لي ربي هالنور عساني ما انحرم منه..
ياهلا بالمتابعين القديمين وحشتوني .. ولا عدمت هالتواصل حبايبي ..
وياهلا بالجديدين منورين,, ودوم الوصل ان شالله..

وتفضلو الجزء الجديد...

[Princess]

الحلقة 2..

ــ مين ؟؟ مين عند الباب
ماحد يجاوب والطق يزيد شوي ويشلخ الباب
.. ويفتح علي الباب
ويطيح عليهم عادل وهو يصارخ ويصيح... وكعادته من التأتأه الكلام مهو مفهوم بالمره..
ــ عبببااااسسووه.. ضرررب ضرربني .. برى .. آآآآه...
علي متصروع من حالته وخايف يجيه منه شي لأنه مجنون.. تباعد عنه ..
قام حميد له ومسكه من كتوفه وصار يهدي فيه..
ــ خلاص .. خلاص عادل .. خلاص... حجي عباس مو هنا.. خلاص ..
عادل يصيح وصياحه يخوف ويعور القلب ..
ــ طقنييي .. مابغاه ما احبه.. حميد خليني وياك.. مابغاااه..
حميد يضحك :
ــ ياخوك وين اخليك وياي انا يالله عايش .. هدي حبيبي هدي خلاص .. لويه طقك...؟؟؟ وبووويش طقك؟؟؟ ووين مانى شايف شي!!
عادل : ــ فففتحححت صندددقة الدجاج و طلعععو يتراااكضووو و فنتين طلعووو الشارع وضاعووو .. طققني باالعققااال ششوووف هنننا..
وفصخ عادل ثوبه ,, وكان ظهره متورم تووريم مو طبيعي ...
عادل .. : وطقققني بعد فييي ........... << طوووط محل افهموه عاد
تبغى اراوييييك؟؟؟
ومسك سير سرواله بيفصخ..
حميد : ــ لااااااااااا خلاص بسم الله عليك
عادل قام يصيح : ــ يعوووور هننناك مااقدررر اقعددد..
علي جته غصه وهو بس قاعد يتفرج عليهم
حميد ماقدر على دموع عادل .. صاير كبير رجال .. بس الله يخلف عليه..
لبسه ثوبه .. وحضنه وصار يخفف عنه..
عادل قام يضحك وفك الحضن عن حميد..
و ظل يضحك و يضحك... ويضرب برجوله عالأرض ..
علي خاف من الوضع صياح تالي ضحك .. وعادل رجال كبير في العشرينيات مو بعيده يسوي أي حركه تأذيهم والخلف على عقله..
حميد يضحك وياه : ــ على ويه الضحك هااا.. على ويه ؟؟؟
عادل يمسك خشمه : ــ أأضضحك عللى رررريحتك هههههههه زززفففر
حميد نقز : ــ أه هههههههههههههه صدق ملعون خامس جزاتي بعد حاضننك ..
ورفع بلوزته يشمها : ــ هههههههه اف ويلي ... يبغى لي تسبوح .. تالي في البحر الحين المطر غزير اخاف اغرق .. يلعن شكلك عادلوه ..
علي : ــ ههههههههههههههه ياربي حتى الميانين بيتعيلفو في ريحتنا ...
عادل هدأ من الضحك وصار يطالع في علي وقام يصارخ:
ــ أأنااا مووو ميينووون .. انت المييينووون .. انت زي عبباااسسوووه كل يقول لييي ميينننووون
حميد طالع في علي .. اللي كان مستغرب ..
قعد عادل وقام حميد زود ضوا الفنر (( الفانوس )) اللي بصندقته شوي و طلع قوطية حلوى بحرينيه وعطاه قطعه.. ..
حميد : ــ ايه ياعادلوه هالحلوى من نصيبك تذوقها.. عاد تدري بي ما احلي الا بها.. هاك بالعافيه..
عادل اخذ القطعه وصار ياكل ...
علي : ــ بل عليك مكحين للحين وياك ما طلعتها والحين طلعتها...
حميد : ــ ههههههههه مايفوتك شي .. نسيتها من شفت عادلوه ذكرتها لأنه يحبها.. هاك القوطيه كلها تفداك..
ـــ هههههههههه تسلم ما لي خلق اكل اصلا..
ــ مالت عليك ,, صدق نحيس ..
ــ هههههههههههه مو انحس منك..
عادل دخل بالعرض ..
ــ ريمووو اختتتك انحس مممنك..
علي فتح عواينه قد الفنجان.. وصار يطلع في عادل وحميد..
عادل ياكل بقايا الحلوى ويمص اصابيعه :
ــ أأأنااا ما احبببها كل من تشششوفني في الطريق تهههرب مننني كني شللب .. وااذااا رححت ببيييتكم ويا أأأمي وقعععدت عالباب وهي بتطلع كل تقققول لي وخخخر ياالللخبل...
علي ساكت و يبغى هالمجنون يسكت مو راضي ..
عادل يكمل : ــ حتتتى ما تتغطى مني هههههههههههه شفتها وهي طالعه .. إحححليييوه عدددل بسسس نحيييسسسه مااا احبببها...
علي دمه وصل لراسه.. شوي ويوصفها هالمجنون لحميد .. بس مو عارف ويش يسوي له... حميد حس عليه و حس انه لو عادل كمل هدره بيروح فيها من علي ..
حميد : ــ ههههه خلاص عادلوه استح,, عيب ..
عادل يضحك : ــ ههههههههه عطيني قطعه فانيه طشونه عاطني .. ما احبها ريموو..انا احببب ليلللى .. اطيييب وحددده في بيتكم علووه هي ويييااا ابوووك ..

علي خلاص عصب .. دار لليلى الحين ويقوم له.. ويمسكه من صدر ثوبه ويسحبه..
ــ وتاليتها وياك انت هااا !!! و الآخيرر؟؟
عادل : ــ وووويش سوويت انااا
حميد يفك علي عنه .. ويساسره
ــ علي الله يهديك مهو صاحي هذا ما عليه حرج لا تضربه حرام عليك ..
علي بعصبيه : ــ ماعليه حرج ماعليه .. قاعد يوصف حريمي ماعليه حرج!!! ...
عادل خاف من ردة فعل علي ..
حميد : ــ عادل خوش رجال ما يقصد .. عادل حبيبي ما يتكلمو عن النسوان ..
عادل : ــ انننا مااققلت شي .. و ليلى كككل امي تقووول انها بنيييه مررره اححلليييوه وطيييبه ماافففي زيييهااا,, وكككان زين الله يهدييييني وووييغييير حالللي و تخللليها مرررتي ..

علي خلاص طارت طيوره.. وهجووم على عادل .. ويتلقاه حميد ويمسكه ويصير يحاول يوخره.. طبعا علي حجمه اعرض من حميد.. حميد الميد .. اسم على مسمى .. من هالميد اللي يصيده ومن شكله ضعيف وطويل زيه تماما.. بالمقابل علي كأنه هاموره طويل وعريض ..
حميد خلاص صار لونه احمر كنه سحارة طماط..و شوي بيفطس .. وعلي يرفس وطفر نعاله يمين وشمال. عادل خاف وبيهرب برى ..
حميد يصرررخ : ــ خلالالالالالاااااااااااص ... علوووه خلاااااص .. اخزو بليس صندقتي ما تتحمل بتهدوها علييييييي
علي هدأ .. وقعد..
عادل فتح الباب بيهرب .. ويمسكه حميد ويهدي فيه هو الآخر ..
ــ ياربي .. عليك انت وياه.. خلاص عادل انت خوش رجال وقلنا لك عيب ما يتكلمو عن الحريم .. يللا روح تأسف من علي و حبه على راسه ولا تعيدها..
علي: ــ لا يحبني ولا يقربني فكوني ها...
عادل : ــ هااا شششفففته .. مااايحححبني ..
حميد طلع في علي وعطاه نظرات ترجي,, وصار يمسح على لحيته .. فوتها له هالمره..
علي ابتسم : ــ اففف انا لله خلاص مسامح..
عادل راح يركض لعلي .. علي اختلع من هالهجوم.. وقعد على ركبه ..
ويمسك عادل خدود علي بين ايده وكانت فيها اثر الحلوى برطوبه من اكله ويبووس جبهة علي ..
ــ ااسسسسمح للييي ما بعيييدها
علي فيه الضحكه وشبده لاعت .. صار يمسح اللفد اللي على وجهه...
حميد يضحك ويضحك ما سكت..
وصار يسخر عليه: ــ ههههههههههههههه لا تبطح الحين لا ياكل النمل خدودك ههههههههههههههه...
وعلي يطالعه على جنب بنظرات سخريه وقهر.. وعادل يصفق ويضحك...

وفي بيت حجي عباس ..
ام عادل وهي تصيح :: ــ ياحجي حرام عليك ,, خليت ولدي يهج في هالبرد .. وين بيرووح الحين
حجي عباس : ــ وينا بيروح يعني .. خله يهايت في الطرقات ياعساه خناقه..
ــ ويلي على ولدي ماني اني ماقدر اقعد باقوم ادوره
ــ ان طلعتي لا تعودي .. لا بغى اشوف لا رقعتش ولا رقعته.... من اخذتش وانا مبتلش في حياتي ...

تابع >>

[Princess]

ام عادل مغلوبه على عمرها.. ماليها اهل الا خوال واعمام .. وكلهم لاهيين مع اهلهم .. وما بغو من الله يعرس عليها حجي عباس ويفكهم منها ومن خبال ولدها..
تعبت في دنياها وايد .. زوجها ابو عادل كان يشتغل سواق تاكسي .. وصابه حادث ومات وهي حامل بعادل.. ويوم جابت ولدها الكل قال انه مو طبيعي ولا احد تكفل برعايته وياها .. ما كان ليها الا امها وعاشت وياها فتره طويله على الله ومعاش الشؤون.. لين الله اخذ امانتها وظلت وحيده..
خوالها وعمومها خايفين كلام الناس اللي اكل وجههم وين ما يطلعو هدرو عليهم مخليين ارمله لحالها في بيت ويا ولدها المجنون...

صارت تتنقل من واحد لواحد .. وكل واحد حصلت منه ومن مرته وولاده عذاب شكل.. لين الله جاب حجي عباس ليها.. ومع انها كانت متأكده انها بتتعذب وياه بعد من بخله وجلافته .. بس قالت يستر عليها احسن ليها من هالمذله بين اهلها...



سالت الدمعه على خد ام عادل وبصوت مبحوح:
ــ ياحجي .. انت تخاف ربك ومصلي وصايم. و زاير بيت الله.... داخله عليك باللهومحمد وعلي خليني اشوف ضناي وينا راح حرام اخليه في هالبرد والمطر..
حجي عباس حزت في نفسه كلمة ضناي .. وتذكر حالته الميئوس منها ,, وبكبرياء ..
ــ ذلفي دوريه لا بارك الله لا فيش ولا فيه..
ولبست ام عادل عباتها وخذت كيس كبير غطت فيه راسها وطلعت..

واول محاطت التدوير كانت بيت ابو علي .. تدري به هو يحب ابو علي وليلى اكيد راح ليهم.. وصلت عند باب بيت ابو علي وهي مستحيه .. الساعه قريب توصل 1 الفجر .. والفريق صخه هدوووء ولا حس .. انتبهت للنافذه لقتها مضويه.. تشجعت وقالت قاعدين عفر .. وطقت باب الحديد...

صوت باب الحديد وهو ينطق شلع قلب ام علي شلاع .. قامت تركض وقامت وراها ليلى..
كانت تفكر هذا ولدها علي ..
ــ مييين...
ــ قواش الله ام علي ..
ام علي عرفتها من صوتها .. وخابت امالها .. بنفس الوقت اختلعت.. وفتحت الباب ليها..
ـــ الله يقويش ام عادل .. حياش ..تفضلي
ام عادل مستحيه:
ــ زاد فضلش وحياش ربي .. لا .. خيتي مره فانيه مستعجله الحين .. ادور عادل.. ما جى ليكم..؟؟؟
ام علي مستغربه: ــ لأ ولا شفناه.. خير ان شالله
ام عادل ودموعها تصب : ــ انحاش من البيت ولا ادري وينا راح قلت عفر جى ليكم.. اسمحي لي عاد .. ازعجتكم... باروح ادوره في مكان فاني .. مع السلامه..
ــ الله يكون بعونش.. ومسامحه غناتي حنا قاعدين عادي.. حياش الله..
وسكرت الباب.. وهي تدعي ليها بطولة البال والهدايه لولدها...

ام عادل صارت تكمل تدوير .. راحت جهة البقاله اللي كل يروح ليها..
راحت الميدان (( براحه كبيره يلعبو فيها الصبيان ))
ما حصلته.. اخيرا خطر على بالها صندقة حميد.. وصارت تمشي ليها..


سجاد قعد من نومه .. مختلع وصار يصيح.. نزل من سريره وصار يزحف عطشان يبغى ماي...
ابوه دوامه آخر ليل.. وامه كانت قاعده على كرسي جنب النافذه,, وتقرأ قرآن..
سمعته وهو يصيح.. وقامت والتفت وراها .. وراحت له تركض ..
ــ امي بسم الله عليك..
ــ اماه ,,انا خايف ..
ــ لا تخاف امي اني وياك...
ــ حلمت حلمه تخوف ...
صارت امل تمسح على راس ولدها وتصلي على محمد وآل محمد..
ــ اعوذ بالله من بليس .. بسم الله على عمرك..
وعلى طول دفعت دافعة بلا..
متعوده على سجاد ,, اغلب الأوقات يفزع من نومه .. يحلم احلام غريبه ويقعد مختلع وكل ينساها..
حملته .. وشربته ماي بترجعه سريره ما رضى ..
ــ اماه مافيني نوم.. بنتظر ابوي يرجع من العمل..
ــ امي نام الحين وبكره الصبح اذا قعدت بتشوفه..
ــ مااافيني اماااه. .. عااد,, بقعد وياش جنب النافذه,, باشوف المطرر..
خذته وقعدته في حضنها.. وصارت تقرأ في القرآن.. وشوي صارت برقه قويه وتبعتها رعده اقوى ..
وصرخ سجاد مختلع..
امل : ــ بسم الله على عمرك الرحمن الرحيم..
سجاد ينخش في حضن امه :
ــ يخووف امااه.. متى يوقف المطرر مابغاااه..
ــ هههههههه لا تخاف امي.. ولويه تبغاه يوقف .. المطر خير من الله .. ويجيب الخير..
ــ وااايد يطيح ..
ــ ايه ياولدي الحمدلله.. تعال باعلمك.. تبغى الله يحبك ويصير عندك اعمال زينه وااايد و تدخلك الجنه ان شالله..
سجاد فتح عيونه و ابتسم بحماس : ــ ايييه
امل : ــ ياغناتي هالولد.. اذا طاح المطر .. اقرأ سورة الطارق تصير لك حسنات بعدد ماي المطر ..
ــ مااعرف سورة الطارق..
ــ يللا بقراها وياك.. بسم الله الرحمن الرحيم....
وصارت امل تقرأ سورة الطارق وسجاد يردد وراها..


علا تتقلب على سريرها تحاول تنام.. النوم مجافيها.. تحس بملل شديد مهي عارفه ويش تسوي.. رنت رنه على خالتها امل..
سجاد سمع النغمه..
ــ هاااذي خالتي علااا << يسميها خالتي بحكم انها كل ويا امه..
امل : ــ ههههههه فديتك عرفتها من النغمه..
واتصلت فيها..
علا : ــ اهلين .. عسى مو نايمه..؟؟
ــ لا قاعدين في هالمطر .. نقرأ سورة الطارق..
ــ صح ذكرتيني اقراها.. جزاش الله خير..
ــ ويجزاش ان شالله.. ممم.. لويه مانمتي للحين..
ــ ضايق بالي ..
ــ من ويه؟؟ خير ان شالله؟؟
علا وشوي تصيح:
ــ من مالكوه..
ــ ياعلي وهذا بالش ما يضيق الا منه.. ويش مسوي هالمره..
ــ تخيلي يبغى 2000 ريال
ــ لويه يبغاهم..؟؟؟ وويش فيها لو طلبهم..!!
ــ يبغاهم حق عشا لأربعة انفار .. ويشو ويش فيها .. راتب واحد على قد حاله يكرف ليل ونهار يجي هذا يصرفه في عشا.. وهو مقضي فلوسه سرف وسهر في هالمزارع على شلة هالخمه اللي وياه.. ما يحس بالنعمه ولا يقدر ..
امل ابتسمت : ــ اللي يعجبني فيش ياغناتي تفكيرش الناضج. رحمة الله عليش يا اختي خلفتي وما متي .. امش الخالق الناطق قلبا وقالبا,,. الله يهدي اخوش ويغير حاله ويصبرش .. طنشي فديتش منتين مستفيده شي من حرقة هالأعصاب ,, ابوش وبيعطيه معروفه.. وسميروه ما بتقصر لا بتنصحه ولا شي .. ويش لش بحرقة القلب..
ــ بيخترب كذا..
ــ وويش بيدش تسوي .. الله يعين اللي بتاخذه ويا بخت اللي بياخذش
ــ ههههههههه عكستي .. يابخت اللي بياخذها .. والله يعين اللي بياخذني ,,
ــ ياعلي لويه هالقول..
ــ سوي روحش ما تدري ..
ــ ياعلي عليش .. داريه فديتش .. داريه ابوش رفض 3 متقدمين لش للحين والحجه مو على مستواكم المادي.. واخوش داريه نص بنات الديره يتحلمو به.. بس الله اللي يكتب النصيب ويقدره ويش راح يكون.. اخزي بليس ونامي بس .. وخلش من مالكوه وسوالف مالكوه..
ــ ان شالله..
ــ ايه باقول لش.. باقي اسبوع على عرس حماتي جمانه .. شكلي باكلم مالكوه بكره يطلعنا السوق بخلص كم حاجه.. و بنمر للخياطه ام علي باشوف ثوبي خلص لو لا..
ــ منهي دي ام علي..؟؟
ــ ما تعرفيهم؟؟ في الفريق الشمالي قريب البحر بيت حسن الـ ..
ــ ممممم مادري كأنه مر علي هاللقب..
ــ بكره اروح وياش .. تصدقي عندها بنات في عمرش الكبيره قدش وزي العسل اخلاق . اسمها ليلى,, نروح بكره اشوف ثوبي وشوفيهم..
ــ هههههههههههه
ــ على ويه تضحكي..!!
ــ حشا بنروح نخطب مو نشوف ثوب ..
ــ ههههههههههههه غربل الله شرش ..
ــ ماني استحي ..
ــ لا تستحي ولا شي ,, غيري جو عن هالكتمه اللي عايشتنها..
ــ زين .. تسلمي غناتي من اكلمش يتغير حالي الله لا يحرمني منش ..
ــ ولا يحرمني منش ,, يللا استهدي بالله وصلي على محمد ونامي..
ــ ان شالله ,, مع السلامه
ــ الله يسلمش..

حطت جوالها عالطاوله وتلحفت بغطاها .. وصارت تحاول تتذكر هالأسم ..
ليلى حسن الـ....
تحسه مر عليها ايام ابتدائي او متوسط بس مهي ذاكره...
ونامت وهي تحاول تتذكر..

تابع>>

[Princess]

وصلت ام عادل صندقة حميد.. وطقت بابها..
حميد هالمره ما انصرع توقع ان اللي جاي ام عادل .. قام وفتح ليها الباب..
ــ قواك الله ياخوي .. عادل هنا..
ــ ايه هنا.. عادل تعال هذي امك..
طلع ليها عادل ..
ــ مااانى رررااجع وووياااش .. عببباااسسسوه يطققنني..
ــ نام الحين ياولدي .. من زمان نام ما بيطقك.. امش نعود البيت..
ــ نننااام .. ان زين.. مع السلااامه حميد
ابتسم حميد: ــ الله يسلمك...
ام عادل : ــ عطاك الله العافيه ياخوي ماقصرت تسلم..
حميد : ــ حاضرين ويش دعوه ماسوينا شي..
المطر خف عن قبل ...
علي : ــ خيه ام عادل انتظري اوصلكم برجع البيت..
ــ لا ماله داعي لانكلف عليك..
ــ ويش دعوه بنفس الطريق تعبتي انتين مشوار وانتين تمشي .. .. حياكم..
ركبو وياه السياره.. ركب عادل قدام .. وصار يحوس .. امه عصبت فيه وقالت له يركب وياها ورى لا يأذي علي و يشتته وهو يسوق..
ووصلهم ورجع البيت...
ولما فتح الباب... قامت ام علي تركض :
ــ ويلي يااااولدي ..
وصياح...
علي : ــ ويش فيش اماه..؟؟
ليلى : ــ ويش فيها بعد ... تحاتيك..
علي يبوس راس امه..
ــ اماه ماعلي الا العافيه.. المطر زي ما انتين شايفتنه قوي وخفت اطلع بالسياره و تخترب وانا امشي شوي شوي .. انتظرته يخف حق اسرع اكثر في هالنقعات اللي صارت بهالطرقات لا تطفي علي السياره..
ليلى : ــ قايلين لش على حساب السياره والمطر الا تحاتي وتتعبي عمرش ..
ريم طلعت من الغرفه : ــ هاااااااا .. رجعت عليو..
علي : ــ عليو في عينش اصغر ولادش انا عليو.. وبعدين يا قليلة الأدب والمستحى .. تطلعي قدام عادلوه المينون بلا غطى لويه..
ريم وهي ترول في شعرها بصبعها : ــ والله قلتها مينون حق ويه اتغطى ماعليه حرج..
علي عصب : ــ ماعليه حرج.. شوي ويوصفش بالكامل قدام حميد...
ريما بمسخره : ــ ههههههههه ويع مادور الا قدام حميد يوصفني..
علي فتح عيونه .. وليلى صارت تطلع في ريما..
ام علي : ــ قلالة حيا ..
علي : ــ لا انا اللي باراويها دي.. هدوني عليها...
ريما : ــ ييييييمااااااااااه...
وتهرب الغرفه وتقفل عليها الباب...
وراحت ليلى تحط لأخوها عشى..
علي : ــ مابغى عشى تعبان ابغى انام... باروح اسبح وبنخمد..
وراح المطبخ بيشرب ماي ... وشاف براد السمك منقلب ..
ــ حق ويه دا مقلوب ..؟؟؟
ام علي وليلى في نفس الوقت :
ــ لااااااااااااا
علي انصرع : ــ ووووويش صااااااااير؟؟؟
وعلموه بالسالفه..
علي : ــ أه أه أه أه فاااااااار في برااادي .. ويش خانته هالبرااااد انا لله .... هذا الخوفه الحين ما تفيد فيه ولا غرشة كلوركس كامله.. اخاف احط فيه السمش تالي ,,, ويتسممو العالم.. انا لله ... ومن متى وهالمنتحس منحبس ؟؟
ليلى : ــ هههههههه من دي ساعه تقريبا ..
علي يصفق كفوفه ويا بعض : ــ ايه بكره الصبح بتطلع روحه.. بيختنق .. حزتها ترحمو عليه واقرو له الفاتحه ..

ودخل الحمام يسبح... وهو يفرك جسمه مع ريحة الصابون تذكر حميد وحركة عادل وياه على ريحته .. وصار يضحك...

بالمقابل حميد لما حس المطر يخف ,,, حمل وزاره وفوطته و شامبوه وصابونته وطلع الساحل ونزل البحر يطامس فيه... هو يتفرك وهو يضرب فكر على روحه ويضحك:
ــ انا ويش خانتي ملولح من ماي هالبحر .. مادري منهي طايحة الحظ,, اللي تبغاني .. هههههههههه ربك كريم يا حميدوووه ربك كررريم... اخلص بس وراك شغل...

الدنيا كلها هدوووء.. الكل نام واستقر له البال.. الا مالك.. هايت برى البيت.. سميرة انتظرته لين تعبت .. وقامت نامت ومقرره يوم ثاني تهزأه.. بس كالعاده هي تهزأ وهو يستظرف ويضحك ويتعذر بأعذار ما تخلص .. لين يضحكها غصب ويخليها تنسى...

وفي جلسه مع الصبيان... في مزرعه من المزارع .. وبداخل الأستراحه.. طق العود قايم والرقص والتصفيق .. شلة شباب صايعين وبينهم مالك.. طبعا مخليين مالك رئيسهم لأن اكثر واحد غني فيهم... لاعبين عليه ... مسؤول عن اكلهم وشربهم ووناستهم .. يحس روحه بهالطريقه مسيطر عليهم.. وهو العكس خسران وهم المستفيدين..
وبين ما اللعب قايم عندهم على اصول ...
طفت كهربة الأستراحه...

الى الملتقى..

[للدموع إحساس]

صبـــــــــــــــــــــــــــــــــــاح الخير ..
أمور يا الـ غلا ..
كل يوم تحمسينا وتوقفي حرام <شكلي بصيح خخخخخ
يعطيكـ العافيهـ غناتي ..
روعهـ عن جد .. تحممممممس ..
ما فيني صبر .. ويش بيصير في المزرعهـ < الله يستر السالفهـ فيها كهرباء ..
اللهـ يحفظنا و ياكم من الشر والبلا ..
بـ الأنتظار على أحر من الجمر ..
لكن ،، < الوصيهـ المعتاده ..
رحم الله و الدينا والديش .. لا تطولي خيهـ ..
و عساكـ عاالقوة ..
ســــــــــــــــــــــــلاااام ..
للدموع إحساس ..

[المستحييل]

خطيييييييييييييييييييييييييييييييييييييييييييييييي يييييييييييييييييييييييييييره روعه يعطيك الف عافيه..

[الأمل البعيد]

ههههههههه اما عادل ده داهية مو مينوون ..
سوالفه تمووت ضحك ولاعااد بيوصف ريمووه الدبه >>> عايشة الأجواء معاهم
علووه انقهر وكفخــه >> خووش
ياربي لين بكره مافي امل اصبر
بس هالمرة الجزء طوييل وحلوووو ..
كل مرة كذا زين
في الإنتظار
تحياتي

[Hussain.T]

WoOoW

جدا جدا رائعة واكثر من رائعة

انتظر البقية

[دمعة على السطور]

ياعلي أمورة مرررررررررررررررره حليوة مررررررررررررررررره
الأحداث زادت حماس
أني توقعت إن ليلى درست ويا علا في الجامعة..
بس يمكن ليلى ماكملت دراسة..
عشان كذا قالت علا إنها كأنها تذكرها في ابتدائي أو متوسط..

ياالله متى تروح وتشوفها...اتوقع يصيروا صديقات يمكن؟؟؟



بصراحة أميرة ابدعتي ماشاء الله عليك
اللهم صلي وسلم على محمد وآل محمد وعجل فرجهم وفرجنا بهم ياكريم..



ياعلي ولاعاد عادل موتني من الضحك. ههههههههههههههههههههههههههه
الله يعقله
ترى صدقت وعشت وياهم..

ههههههههه
ياالله ننتظر البارت الجديد بكل حمااااااااااااااااااااااااااااااااااااس
نلتقي على خير إن شاء الله..

موفقة إن شاء الله تعالى..
..دمتي بعين المولى الجليل..

[آخر شقآوهـ ..~]

ههههههههههههههههههههههههههههه..
تخيلت عآدل وعلي وهم يتشابقوو <<<زي شباقي اني واخويي هع
وريمووه ام لسانين ماتستحييي
..
..
أحم.. اني اتوقع<<عدنا مع التوقعات..
لما إنطفت الكهرباء كل واحد قام يصارخ ويصاقعو في بعض وشووووووووي يسمعو صوت ....<<بس مابقول صوت ويش
تسلمين حياتو ع الجزء
جااري الانتظار

[أميرة باحساسي]

ولك يسلمووووووووو اموووووووووورة ...
احدااااااااث عن جـــــــد رووووووووووووعه .. الواااحد يعيشها لحظة بلحظــة .
تسلمي خيتووو ...... ننتظر البقيــة بفااااااااارغ الصبر .. يعني لا تطووولي علينا .
تحياااااااتي .

[*زهرة البنفسج*]

بسمه تعالي

قصة روعة والأحداث ولا اروع

والله ليلي وعلا شكلهمم بصيرو صديقات

ننتظر الأحداث الجديدة