ضعنا يا صبرنا...

[المتحير]

يلا اميرة

[المتحير]

اميرة بسرعة لاني كل دقيقة اطيح على الكيبورد نعسان لكن ما بانام لاني صااااااااااايم

[Princess]

مرحبا

ياااسااااتر.. عجيب الأنتظار.. بس هذي ظروفي .. وتمام الحين بدري ..
لول تمر ايام احيانا ما انزل الجزء الا الصباح الساعه 7 او الظهر..
تسلمو لي على المتابعه والتفاعل..
واللي نعسان ينام المرات الجايه.. ما بيطير الجزء موجود :)

تفضلو الجديد

[المتحير]

المهم تحطي الجزء الحين لانه انا وباقي الاعضاء اذا حطيتي الجزء وعلى طول قريناه كانه مباش لكن بعدين كانه اعادة

[Princess]

الحلقة 26

طارق محمد ال....
حسين عبدالله ال..
عبدالرحمن سعود ال....
عبدالرحمن صرخ حد ماعنده وحضن علي..
ــ عقبااالك يالغالي..
وطلع عبدالرحمن من باب السجن اخيرا.. صدر عليه العفو...

وبعد كم اسم..
خلص العسكري .. وسكر الباب..
الا بصرخة واحد من المساجين :
ــ ايييييه يادنيااا العفو ما شملناااا...
واحد ثاني :
ــ الله كريم يشملنا الجاي ..
ثالث :
ــ اخاف اخذ محكوميتي كلها .. ويلغو العفو..

علي متيبس ومهو قادر ...
جر الخطوات لعند باب السجن.. وقف ومسك قضبانه..
سند جبهته عليهم واطلق من عميق الروح والقلب زفره..
يحس بغصه.. تذبحه.. بس الدمعه عيت تنزل...

ظل علي واقف على هالحال.. متأمل كف حانيه تمسح على ظهره وتواسيه وتقول له..
ــ اصبر ويجيك الفرج ..
بس عبدالرحمن انيس الوحده .. الله فرج عنه..

بتعب استدار وتسند على ذاك الجدار.. وقعد .. قعدة المكسور المخذول.. سند راسه للورا.. و رحل في دنيا همومه..

دقايق وجى العسكري معاه عبدالرحمن..

علي بعفوية التفكير .. بدون قصد الشر .. فرح لرجعة عبدالرحمن.. الود وده يطلع وياه جميع..
فتح العسكري الباب دخل عبدالرحمن وملامح وجهه ما تنقرأ .. صعبه تعرف تميز هل الفرح اللي رسمها .؟؟ لو الحزن,,

اول مادخل .. حضن علي حضنه قويه.. حس علي كأن روحه انتزعت من جسده واندمجت مع روح عبدالرحمن..

عبدالرحمن بصوت مبحوح:
ــ في امان الله يالغالي..

علي شابح بعيونه.. وبعفويه سالت الدمعه اللي عذبت عيونه... وبعفويه اكثر فرد ذراعينه من حول عبدالرحمن..
عبدالرحمن لسا حاضننه..
ــ يالغالي.. بتوحشني ما طاوعني قلبي اترك المكان قبل لا ارجع واسلم عليك.. انتبه لنفسك..ولصحتك,, العفو شمل بس اللي مضى على محكوميتهم سنه.. وانا مضت سنه... انت بعدك ..الله يعينك ويصبرك ويفرجها عليك..
يالغالي ما بنساك .. ومع كل زياره بتلاقيني عندك.. و عهد علي كل اللي تعلمته منك راح اطبقهو عهد علي راح استمر على هالمذهب اللي اخذته منك.. و عهد علي ما راح اتنازل عن أيمعتقد غرسته في وجداني..

وترك عبدالرحمن علي .. مسح دموعه وابتسم له..
ــ مع السلامه..
ما مداه بيطلع من السجن .. الا علي يمسكه وينحب نحيب .. رجع عبدالرحمن وحضنه وصار يصيح وياه.. هالموقف فطر قلب الجماعه اللي بالسجن.. وصارو يهدو فيهم .. والله بيفرجها عالجميع ان شالله..
لين العسكري خلاص .. طلب من عبدالرحمن ينهي هالسالفه وطلعه..
علي من خلف القضبان :
ــ انتبه لنفسك يابو حنين .. وروح القطيف .. اسأل عن حي ال... بيت حسين آل.... هذا بيت اهلي
زورهم وطمنهم علي .. انا خايف عليهم مرت زيارتين لي ولا احد جى .. توقعت عالأقل خالييمرني بس مادري ويش فيهم وويش ظروفهم.. ان شالله تلاقيهم اهل لك ولزوجتك..
عبدالرحمن حط ايده على ايد علي اللي كانت شاده على القضبان..
ــ ولا يهمك يالغالي.. راح ازورهم بأذن الله.. مع السلامه..
ــ في امان الكريم<< قالها بهدوء .. هدوء كاتم العبره والآهات في صدره..

وطلع عبدالرحمن للدنيا..طلع والشوق يسبق الخطوه,,, و على طول راح لزوجته.. اللي كانت مثل الورده الذبلانه ,, من شوفته ردت ليها الروح..

حمل حنين بين ذراعينه.. وضمها لصدره وما تحمل على طول سالت دمعته.. و امها بفرحه عامره تقول ليها .. هذا البابا...

وحنين كلما رددت ببراءه هالكلمه.. عبدالرحمن ما يمسك نفسه.. ابتسامه يطغى عليها الدمع..
قعد ويا مرته وكل شوق .. يسألها عن اخبارها وويش مسويه .. والحمدلله اللي بس سنه ابعده عنها .. وحكى ليها سالفة علي .. والمذهب الجديد..

رزان متخوفه : ــ عبدالرحمن.. مدري .. تحس هالشي رح يكون سهل علينا..
عبدالرحمن يطمنها : ــ ايه .. لا تخافين .. انا معك.. والله ما بيتركنا دام حنا عالحق .. وراح اعرفك على عايلة خويي علي .. ماعنده الا خوات .. بيصيرون خواتك ان شالله و امهم خالتك.. ابشري ..
رزان ابتسمت : ــ ان شالله يارب..معك انا يالغالي في كل شي

في بيت ابو علي ...
ابو علي : ــ ايييه .. قضى اليوم.. وانتهى العفو.. وما شمل ولدنا..
ام علي حاطه ايدها على خدها ودموعها تصب .. : ــ الله كريم..
ليلى .. هدوووء ولا كلمه...
شوي يرن تلفونهم وكانت زينب .. تخبر ليلى انها بتمر عليها الليله بيروحو الحسينيه..
ولما سكرته ليلى وخبرت امها مين المتصل ..
ريما قفلت الكتاب :
ــ افففففففف الناس تطلع و اني حبسه اذاكر والله ماني مذاكره الليله..
ام علي ببرود : ــ منتين مجبوره .. عقلش في راسش من متى اجازه كنتي شان الحين قضيتي هالماده..
ريما تفتح الكتاب..
ــ اف اف اف اااااااااااااااه
وتمسك صفحه من صفحاته وتكفس فيها تلعن خيرها تكفيس..
ليلى : ــ انا لله .. دقت الحاله..
ريما تعدل الصفحه :
ــ سكتي عني هااا...

حميد ... خفت حالته... وقرر الدكتور يطلعه من المستشفى...
حميد يحاتي وين بيروح.. ؟؟
وويش بيسوي وصحته مو ذاك الزود.. يبغى له ملاحظه.. و أي مضاعفات لازم يرجع المستشفى..
مو معقوله المستشفى بيصير له فندق وحالته صارت احسن...

طلع من المستشفى .. وراح صندقته...
دخلها وحالتها حاله.. وعفستها قايمه... لاحظ الغطا اللي مغطي فيه اوراقه متزحزح عن محله..
رمى روحه على منامه وتلحف بغطاه وفي باله..
ــ سويتها يا جسوم.. سويتها فيني ... يالله تاخذني وتريحني...

جاسم استلم الشغل.. وصار يداوم في السوبر ماركت.. ويحاول قد ما يقدر يلهي روحه في الدوام دخيل الله ينسى همومه شوي...
فصاير مره نشيط وعاجب ابو اشرف .. وفرحان به.. ودايما يشكر فيه عند حجي عبدالرحيم..
ابو جاسم متشقق وطاير من الفرحه.. اخيرا صار ولده رجال و ينذكر بالخير..

ابو مالك قاعد في زراعة بيتهم الخارجيه... يكلم جوال.. بس خلص المكالمه.. جى بيقوم ناوي يطلع.. الا بجية سميرة له..
ــ قوه ياخوي..
ــ هلا.. الله يقويش..
ــ عساك بخير ..
ــ الحمدلله...
ــ بتطلع؟
ــ ايه شوي .. خير .. تبغي شي ؟؟
سميره متردده:
ــ عساه خير.. مادري ياخوي ويش اقول ومن وين ابدي..
ــ خير ان شالله ويش صاير؟؟
ــ سوسن..
ابو مالك تغيرت ملامحه: ــ ويش فيها؟؟
سميره مرتبكه : ــ مادري ... ماني عارفه ويش اقول..
ــ سميره تكلمي .. خوفتيني..
ــ مادري مادري .. بس كذا مره شفتها تكلم جوال..
ــ ايه !!
ــ مادري شكلها .. شكلها تكلم واحد..
ــ هشام اكيد..
ــ أي هشام..
ــ اخوها..
ــ مادري .. تكلمه بطريقه مو طبيعيه.. تقول له غناتي .. وحبيبي مدري ويه..
ــ ايه هي مع هشام كذا.. اخوها و اهلها بالنسبه ليها..
ابو مالك يقوم عن سميره:
ــ فكرت عندش سالفه..
سميره : ــ ويش دراني ياخوي اني شكيت .. وخفت وترددت اقول لك ..
ــ حرام عليش .. طيب بطلع الحين تبغي شي..
ــ سلامتك ...
وفي بالها :
ــ من متى تعرف الحلال والحرام انت.. ايه.. ماعلينا .. يمكن الله هداك على ايد سوسن ..

تابع<<

[Princess]

علا في غرفتها قاعده عالكمبيوتر .. الا بابها يطق ..
عرفت على طول انها سوسن.. مستحيل سميرة ما سوتها... ولا ابوها.. ومالك مسافر..
ــ تفضلي..
دخلت سوسن حامله كوبين كابتشينو..
ــ دفي رووحش ..
ابتسمت علا:
ــ مشكوووره..
ــ العفووو...

سوسن :
ــ تطلعي وياي الليله..؟؟
ــ وين؟؟
ــ وين يعني .. اكييييد..نروح حسينيه..
ــ تصدقي .. من زمااااان مارحت صايره دي كم سنه اكتفي بالتلفزيون.. واحس بالحسره فيقلبي..
ــ ليش عاد..!! اني في الغربه ونروح حسينيه هناك,, تجهزي الليله بيمر علي هشام اخوي وبنروححسينيه اني وياش..
علا تشققت من الفرحه : ــ ياسلااااام.. بس ...
وسكتت .. وتغير لونها..
سوسن : ــ بس ويش ؟؟
علا بهداوه: ــ استحي ..
ــ ههههههههههههه فديت الخجل واهله.. عادي اخوي هشام حباب وطيب .. واني وياش ..خيرتش تتعودي عليه..
ابتسمت علا..
الا جوال سوسن يرن..
سوسن : ــ عمرره طوويل ..
وردت على الجوال : ــ هلا غناتي.. تونا نحش فيك..
هشام : ــ اهلين .. ههههههههههه تحشو.. ماتجوزي انتين ورجلش..
ــ ههههههههههههه لااااا مو رجلي.. مع بناوتي..
ــ حركات بركات.. علا..؟؟؟!!
ــ ايه علا..
علا تلون وجهها احمر من رد سوسن.. قولتها ايه علا.. يعني السؤال كان فيه علا.. يعني يعرف اسمها..

هشام : ــ عن الحش وتأدبو عني زين..
ــ ههههههههه محنا متأدبين.. توي بتصل فيك بذكرك تمر علينا الليله لروحة الحسينيه..
ــ يا محاسن الصدف انا داق بقول لش بمر عليش الساعه 8 ونص..
ــ هههههههههه اوووكي 8 ونص بنطلع لك..
ــ بتطلعو لي .. بتجي وياش يعني..
ــ اييه..
ــ زين حياها الله.. وتمام حق تدلينا لو ضعنا..
ــ ههههههههههه لا تفشلنا ما نندل ترى..
ــ بل .. افلست منكم.. يللا الله يخلي السؤال .. ما تاه من سال.. اشوفش الساعه 8 ونص علىخير..
ــ على خير..

سكرت سوسن ولفتت نظرها ستاندر الرسم في غرفة علا.. والتفت للوحه معلقه ..
ــ ما شالله تبارك الله.. ترسمي علا..؟؟ هذي رسمتش؟؟
علا بخجل : ــ ايه..
ــ تجنن.. فن.. اللهم صل على محمد وآل محمد..
ــ تسلمي من ذوقش غناتي..
ــ الله يسلمش .. ماجربتي ترسمي لمحرم..؟؟
علا ابتسمت : ــ الا رسمت.. موضوعها لأبو الفضل العباس عليه السلام
ــ سلام الله عليه.. وينهي ؟؟
ــ في المعرض تبع الجمعيه الخيريه..
ــ ما شالله.. يعني ورانا رحله للمعرض بعدين..
ــ ايه ان شالله من 15 الى 25 محرم..
ــ وناااسه..

وشوي التفتت لمسجل علا .. شغلته .. وصدفه شريط اولياء .. ويا مسجون وغايب عن كل الحباايب..
علا بهتت.. وذبلت الأبتسامه على شفايفها.. وقعدت على السرير..
سوسن تردد مع الشيخ.. انتبهت لعلا.. وحالتها اللي تغيرت.. قصرت على الصوت وبهمس:
ــ تجنن القصيده .. ومؤثره... سلام الله على قاضي الحاجات..
علا بهمس متقطع : ــ سلام الله عليه.. تذكرني بناس.. عزيزين..
سوسن : ــ ناس !!
علا دموعها طغت في عينها : ــ ايه..
سوسن : ــ ويش فيش غناتي.. ومين هالناس...؟؟
علا بدت دموعها تسيل .. وصارت تقص لسوسن سالفتها مع بيت ابو علي من البدايه اول التعارف...

مؤيد كان مسؤول عن موكب الأطفال الحسيني من اطفال الفريق اللي يدرسهم في المدرسه .. يرتبهم ويحفظهم القصيده.. ويشرف عليهم...
كان موكبه من اروع المواكب الطفوليه واكثرها اتقان وابداع.. والكل يعرف موكب البراعم الحسينيه بأشراف الأستاذ مؤيد..

ام مؤيد ,, ملايه تقرأ مأتم الحسين عليه السلام كل سنه.. وبناتها ناديه وساره .. من اروع الأصوات الحسينيه الولائيه.. يعاونوها على القراءه وخدمة اهل البيت..
في محرم بالذات.. هالبيت معروف في الفريق ... ومن هالمأتم تنزل الرحمه على روح ابو مؤيد..

في بيت ام مؤيد غرفه فيها العاب جود وعفايش لكرار و منتظر...
كانت ام مؤيد في الغرفه اللي يقرو فيها المأتم.. ماسكه كتاب نعى وتقرا فيه.. وساره منبطحه.. وناديه تخيط بلوزة منتظر السودا تشابق ويا اخوه و شقها اله..
ما يسمعو الا صرخة جود وصياحها..
ساره فزت على طولها :
ــ غربال يغربلكم يالثنائي المجرم .. مايندرى ويش سوو في فقيرة الله
ناديه بالغلط شكت الأبره في صبعها:
ــ آآه وخناقه. غرباله تغربل منتظروه... لا تدعي على ولادي ....
ام مؤيد :
ــ ههههههههه استغفر الله ياربي .. عساكم السعاده.. انتين تدعي وهي لا تدعي..
ناديه: ــ ايه اني امه ..
ام مؤيد :
ــ هههههههههه الله يبلغش فيهم ان شالله..
ساره رجعت وجود وراها تصيح..
ناديه تطالع في ايد ساره ويش حامله.. وفتحت عواينها :
ــ دااويه..
ساره ماسكه دبدوب جود المفضل .. راسه في ايد وبقايا جسمه في ايد.. وترميهم على الأرض جنب ناديه وبحمق:
ــ خيطي..
ناديه وهي تقص الخيط خلصت البلوزه..:
ــ قالو لش فاتحه خيااط اني..
ــ فعايل ولادش.. لعن الله يزيد.. مادري بويش متأثرين.. قصو راس دبدوبها ما قصرو..
ناديه :
ــ ويلييييييي بيذبحوووني...
ام مؤيد : ــ بسم الله على عمرش .. ساره عاوني اختش عليهم..
ساره : ــ اهوو ليش مين يقدر عليهم هذيلا..
ناديه خذت الدب : ــ روحي جيبي لي خيط ابيض خلني الحم راسه ..
ساره : ــ ههههههههههه زين..
ناديه : ــ ونادي على الملاعين الأثنين.. كراروه بالذات خله يجي يلبس بلوزته لا يموت من البرد ماني ناقصه صخونه..

شوي جو ثنينهم .. وفي اياديهم العاب .. الا طايح راس باربي حقت جود..
جود فتحت عواينها وشالته وخلاص مهي قادره بتدحن..
ــ راااااااااس بتي ...!!!!!!!!!! قطعوووووووووه
ساره صفقت صدرها : ــ ياداااافع البلا ههههههههههههه جيبيه.. وين بقايا جسمها..
جود تصيح : ــ مادري..
ناديه تخيط في الدب : ــ اما يا جودي انش صيوحه.. غناتي الدب هذاني باخيطه.. وراس باربيتش يتركب .. مو مشكله..
ساره راحت غرفة الألعاب ورجعت.. وهي ميته ضحك والوانها متغيره..
ام مؤيد سكرت الكتاب:
ــ استغفر الله بتخسفو بنا انتون غربال يغربلكم..

ساره ترفع جسم الباربيه فصخوها من ثيابها و كسرو رجولها وايدها قبعوها .. صايره مفككه تفكيك..
جود من شافتها كذا يللا عاد مين يسكتها..

ناديه : ــ ياعلي ياساروه عليش خباله بشكل .. كان ركبتيها هناك.. جايبتنها قدامها.. يللا سكتيها الحين...
ساره : ــ ههههههه استغفر الله ماني قادره.. ولادش مجرمين من الصغر ماقصرو فيها

ام مؤيد تتأمل اللعبه وهي بلا ثياب واياديها مقصصه وراسها مقطوع.. وساره تركب فيها ,,
ماشافوها الا رفعت شيلتها وصارت تصيح..
ــ سلام الله على الحسين.. سلام الله على ابو فاااضل...
ساره تأثرت وصارت تركب في اللعبه بهدوء..
ناديه تكلم ولادها بهداوه :
ــ شفتو ماما ام مؤيد تصيح على الأمام الحسين عليه السلام.. اللي قلت ليكم قصته.. شفتو يزيدويش سوا بالأمام.. لويش تسوو بلعبة جود كذا .. حرام تاخذو شي مو اليكم و تخربوه.. الله مايحبكم بعدين..

ابو مالك في مكتبه.. طلب فواتير لرقم سوسن.. وقاعد يراجع الأرقام اللي فيه.. لقاهم كلهم لهشام.. تطمن .. وارتاح باله ...

وفي الليل .. الساعه 8 ونص .. مر هشام عليهم,, وطلعو..
ركبت سوسن.. وعلا لفت جهة كرسي سوسن فتحت الباب وبهمس بالكاد ينسمع سلمت..
سكرت الباب ما تسكر.. رجعت فتحته وسكرته ما تسكر .. حست بأحراج.. رجعت فتحته وشدخت به.. وتسكر.. خلاص وجهها صار احمر من شدختها للباب..
وطول الطريق سوسن وهشام سوالف وتعيلف .. و علا ما شغلتها الا تتصوخ وتبتسم..
وعلى بالها اخوها مالك.. وحشها وايد..
وهم ماشيين في الطريق الى الحسينيه .. الا الناس متجمعه وزحمه وعالم..
هشام : ــ ما يندرى ويش صاير..الله يستر .. شكله حادث...
سوسن : ــ الله يستر...

الى الملتقى...
اسمحو لي الجزأ قصير بس هذي ظروفي ما تسمح لي حاليا الا بهالكثر :)

[عوامية صفوانية]

يسلمو اموره على البارت الروووعة لكن قصير

كل اللي باقوله الاعضاء قاالوووه ما قصروا
وقلت ماني معلقه على شئ بس ما قدرت
والله لا يحرمني منكم ولا يحرمني من هالمنتدى المبارك


تعليقاتي
عادلوه اللي موتني من الضحك عااااااااد ما سوااا اسوايه في المجلس الحسيني ههههه
فشل اشرف مسكين هع هع

(( الله جبتي اجوااء محرم ))

وسوسن تهمتهاااا مسكينة افتكرتها تلعب على علا بس ان شاء الله تصدق عند كلامها وقسمها لعلا بالقرآن ..

ايه عبد الرحمن طلع عفو والله يفرجها على علي
( اني قايله لش أميرة المرح من اول ما انسجن علي الله يفرجها عليه يا الله طلعيه اميرة خخخ )


اما جاسم الصراحة غريب الاطوااار ماني فاهمه سكوته (( يلا يا اخي اعترف لأهلك مو غريبين عنك قول ليهم الحقيقة ))

والله يعطيش العافية ما اتقصري

[المتحير]

اووووووووووووووووووووف قصير انا احارس عادلوه غربال هه

بأنتظار بكرة بس لا تتأخري

[للدموع إحساس]

صبـــــــــــــــــــــــــاح الخيراااات ،،
خيهـ ،،
و الأخير و يا الصياح ،، عفر بيخلصو دموعي ،،
و اللهـ موقف علي و عبد الرحمن ،،
يقطع القلب ،،
يارب أفرجها يا كريم ،،
إلا وين عادل اليوم ما بين ،، هع هع و حشني عفر ،،
هاااا نحن دااااا نسير ،، على درووووووبنا .... ما ادري وشو ،،
و عوض غيابهـ ،،
كرار و أختهـ ،،
أستغفر اللهـ أني بس أتخيلت اللعبهـ ،،
ما قدرت ،، عن جد اليهال شغلهـ حلوووه ،،
و سواياهم أحلى ،، أسألوني ،،
ما هم مخلين عليي حاجهـ ،،
حتى ثيابي يركبو الغرفهـ و يلبسوهم و يااللهـ عرض أزياء ،،
و هاالحادث اللهـ يدفع البلا عنا و عنكم و عن المؤمنين ،،
المهم ما يخص بيت أبو علي ،،
كافيهم إلا فيهم ،،
مو مشكلهـ خيوووه ،،
المهم راحتكـ و صحتكـ فوووق كل شي ،،
و أحنا ننتظر ،،
يعطيكـ ربي العااااافيهـ ،،
و عساااااكـ دووووم عاالقوة ،،
خاااالص التحااايااا ،،
للددموع إحساس ،،

[دمعة الاحزان]

الله يغربل شرك ياميروة
صيحتينا بالبادايه قلنا نعوض عن بعدين في الجهه الثانيه من الغرفه بس بعدين ضحكتينا بالتوأم السونامي
ذكرتيني بالاء وولاء بنات اخوي ومع العابهم والعاب فاطمه
كل ماقريت عن جود ذكرت خواتي امس جوني يقولوا
قومي لبنات اخوك فتحوا محل جواتي
وحاطين منه رجل ومنه رجل ولبس نعال مع صندل
بس خسارة ماقدرت اقوم واشوفهم
وهشام بيعجب بعلا بتعرضها اخته ام السوس عليه
بيرفض في البدايه بس اكيد بتصير طلعات وصولات من 15 محرم الى 25
معاهم وبيشوف ادبها واحترامها وبتعجبه
بس هي مابتكون غير لعلي طبعا ابوها بيقوم حرب داحس والغبراء بس ممكن تساعدها سوسن
ومسكين علي ماشمله العفو بس كنت متوقعه هالشي
وجاسم اله يصبرة ويعينه على النار اللي بداخله
تسلمي حبابه وموفقه

[عوامية صفوانية]

يسلمو خيتو

ما انتبهت للجزء 26 الا بعد ما رديت على 25 والسموحة

اتوقعت انه علي ما بيطلع من السجن والله يفرجها ( طبعاً صيحتيني هئ هئ هئ )

وسميرة صارت شكاكه على اقل حركة من سوسن ( من القهر )
وسوسن ويا علا صاروااا حركااات صديقات ان شاء الله على طول والله لا يغير عليهم

وغربال يغربل ابليس الثنائي المجرم هههههه منتظر وكرار اولاد نادية ما خلوااا لجود ألعاب كسروهم عفر ههه

وهشام ويش شايف في الشارع ان شاء الله مو حادث ( الله يستر )
باا فتي اشوي يمكن تمثيليه لمحرم عشان كدااا التجمع ( لا تفتي واااايد خخخخ)

الله يستر اني خايفه من التجمع اللي في الشارع بسرعة ابي اعرف .....

لا اطولي علينا

والله يساعدش غناتي

[جنة الحسين]

أميرة المرح الله يعطيش العافيه

موقف علي و عبد الرحمن يقطع القلب حزيين مره لكن الجزء رهييييب

تسلم الايادي

بنتظار الجزء القادم

[الــــنـــاري]

الله يعطيك العافية امورة
مشكورة وماقصرتي
الجزء روعة بس ناقص
بصراحة الجزء الي بدون عادل ماليه طعم
هوه الي محلي القصة
<< شكلي كل يوم كذا بجي متاخر وشاهد الاعادة وخلاص ^_^

يعطيك العافية خيتو
تمنياتي لك بالتوفيق

[زهور الريف]

بسم الله الرحمن الرحيم

اللهم صل على محمد وآل محمد

وعجل فرجهم

كل شيء من الحلو حلو

تسلم الايادي يالغلا

بالانتظار

[دمعة على السطور]

البارت حزين جداً..
خصوصاً إن فيه ذكر لسيد الشهداء صلوات الله وسلامه عليه..

ياعلي...العفو ماشمل علي مافي
من متى ننتظر يطلع..

وعلا وسوسن زين صارو صديقاااات عدل..
قلت أني سوسن طيووووووووبة ..
>> بدأت الفلسفة..

يعطيك العافية حبيبتي أمورة..
عساك ع القوة إن شاء الله..
موفقة لكل خير إن شاء الله تعالى..
..دمتي بعين المولى الجليل..