ضعنا يا صبرنا...

[Princess]

مرحبا
فيه ان شالله
بس مادري متى بينزل اي وقت..
.
.
.

[عوامية صفوانية]

جاري الانتظار


خيتو


والله يعطيش العافية


ولا عدمنا جهودش

[الــــنـــاري]

المفورض البنات ينامو عشان يقعدو يسوو فطور
بس اميرة تقد تكمل القصة هههه
بالانتظار

[Hussain.T]

انا توني واصل قريت الجزء اللي راح وقلت يا سلام الحين بقرأ ورى بعض بس

الجزء لساته في الفرن بس يستوي نادوني علشان أكل وياكم ههههه

تحياتي

[الــــنـــاري]

اخوي شبل
اميرة هنا
يعني اشوي وبيستوي الفطور ههه
يلا بالنتظار


يعني لازم اروح وجي بعدين
يلا خيتو عجل اشوي
مابي ارجع بعدين ابغا جيتي انام على طول عشان اقعد للفطور

[نبــراس]

ونحن من المنتظريــــــــــن

[Princess]

مرحبا
تسلمو ويعطيكم الف عافيه...
ههههههههه والله ماحد بيسهر وبيقعد تالي وبينكرف لين يرجع ويرجع يسهر الا اني..
خوبال..
هالمره اني زعلانه..
صحيح فيه كم تخمين صحيح..
بس اللي ماتوقعته منكم ابدا ابدا ابدا..
هالخربطه اللي صارت في سير متابعتكم..
مع انها كانت واضحه وضوح الشمس..

شوفو .. اقتباس من اجزاء قديمه..

مؤيد..ارمل .. عمره 35 سنه.. عايش معامه ( ام مؤيد ) مره طيبه وحبابه وحنونه... عنده ثلاث خوات.. اكبرمنه ناديه.. ووحدهاصغرمنه ساره.. تدرس في الرياض... وبينهم وحده كانت متزوجه بستوفت ولاجابت الابنيه ابوها تزوج ويشتغل برى .. فظلت البنت ويا بيت اهل امها....

جود5 سنـوات متعلقه في خالها وهو متعلق فيهاويحسبهامثل بنته اللي فقدهامع امهافي حادث سياره.. صارغصبن عنه ,,.. وسبحان الله هوالوحيداللي نجاومن يومهاوهومنطوي على روحه ,, ويحمل نفسه ذنب اللي صار ...

هاا.. ويش رايكم ؟؟
عرفتو ويش يصير مؤيد لجود..
صراحه جبتو لي حالة احباط بردودكم..
مافي الا ثنتين كبرياء .. ووحده من صديقاتي سالتهم ويش يصير مؤيد لجود وجاوبوني اجابه صحيحه.. قلت اشوى يعني تسلسل الروايه مضبوط وواضح..
يللا كثرة المشاغل تخلي الواحد مايركز
الله يكون بعونكم وعوووووووووووني
تفضلو الجديد..

[نبــراس]

شدعوه أمور

كان سألتيني باجوب صح

~ : )

[Princess]

الحلقة 33



وفي نص مشوار رجعتهم...
رن جوال مؤيد,, وكانت المتصله ساره..
رفعه مؤيد..
ــ هلا خيه..
ساره تصيح ولا ينفهم شي من كلامها..
ــ الحق ياخوي..
ــ خير ويش صااااير؟؟ ويش فيش..!!!
ام مؤيد حطت ايدها على قلبها:
ــ يالله ستررك..
ساره :
ــ جود... جود...
مؤيد:
ــ ساره شوي شوي .. مانى فاهم.. ويش فيكم.. ويش فيها جود...
ساره:
ــ جود خذهاااا ابوها.. رجع من السفر و جى و اخذها..

مؤيد ضرب بريك ووقف على جنب:
ــ ساره.. ويش تقولي .. متى جى.. وليش اخذها على طول..!!!
ــ مادري .. جى و اني لحالي ويا جود في البيت.. دخلته قعد شوي.. تالي قال بياخذ جود.. ولما سالته لويش.. قال فترة حضانتها عندنا انتهت وهو بيسافر بعد كم يوم ولازم ياخذها وياه..
مؤيد بعصبيه:
ــ ويش فيه خبل مو صاحي.. ما ياخذها..
و صار يضرب على الدركسون:
ــ لا .. لا .. لا..
ساره :
ــ خلاص ياخوي.. تعال الحين بسرعه..
سكر مؤيد الجوال ورماه.. وصار يسرع..
ام مؤيد فهمت الموضوع وصارت تصيح..:
ــ يالله تلطف بنا.. يالله تدفع عنا البلا.. يالله لا تفجعنا بفقد غالي..
وصلو البيت..
دخل مؤيد وهو معصب.. لقى ساره قاعده حاضنه مخده وتصيح..
مؤيد : ــ من متى جى..؟؟
ساره : ــ تقريبا من ساعه...
ــ ابن اللذين..
ام مؤيد : ــ ياولدي صل على محمد.. هو ابوها .. ولي امرها.. وهو الأحق بها..
ــ بس مو كذاا.. لا احم ولا دستور ياخذها..
ويمسك جواله بيتصل فيه..
ام مؤيد:
ــ ياولدي بالهداوه.. لا تشابق الرجال زين.. من ماتت اختك المرحومه وهو ما اذانا بشي..
ــ ايه غير انه تزوج اجنبيه وسافر وترك بنته ,, والحين جاي ياخذها..
ــ ياولدي الحضانه صارت من نصيبنا اهل امها والا هو من اول يبغاها ماتركها.... بالهداوه تفاهم وياه زين..
ــ زين..

شوي عصب مؤيد ,, ورمى جواله..
ــ مقفلللللللنه والله يستر يمكن قديم هذا وغيره..
ام مؤيد:
ــ هدي بالك ياولدي..
مؤيد قعد وصار بكفينه يمسح على راسه وهو متوتر..
ــ اهدي ويه يماااه.. اهدي ويه.. جى واخذها.. ولا ترك لينا شي نتواصل به.. لا رقم لا عنوان لا نايبه.. خذها اماه.. تعرفي يعني ويه اخذها.. جود هذي حياتي .. احسها قطعه مني..
ساره ماتحملت كلام اخوها وصارت تصيح..
ام مؤيد حاولت قد ماتقدر تتماسك بس ماقدرت وصارت تصيح وياهم...


في السياره..
منير : ــ ويش تبغي تاكلي جودي..؟؟
جود ساكته..
منير:
ــ يابتي ويش فيش من طلعنا ما سمعت حسش..
جود ببراءه وعفويه:
ــ اني ماني بتك..
منير :
ــ اجل ويش؟؟
ــ اني بنت خالي..
ــ ههههههههههه بابا ويش اسمش انتين..
ــ جود..
ــ جود ويش ؟؟
ــ جود منير آل ...
ــ زين و انا منير آل .. يعني انا ابوش..
ــ لا.. لا انت مو ابوي .. خالي مؤيد ابوي..
ــ انا لله.. زين خالش مؤيييييد ابووش.. الحين قولي لي ويش تبغي تاكلي..
ــ مابغى شي..
ــ مايصير ..
ــ مابغى.. ابغى بيتنا..
ــ كم يوم غناتي وبنروح بيتنا..
ــ ابغى خالتي ساره..
ــ يابتي .. خلاص بتسافري وياي ان شالله.. وبتعيشي في كندا.. وبتتعلمي هناك وبتصيريدكتوره قد الدنيا.
جود بدت تصيح..
ــ مابغى شي .. مابغى شي .. رجعني بيتنا..
منير تعب منها .. كان ماخذنها على شان يصورها بيسوي ليها جواز خلال كم يوم على شان بيرجع كندا وبياخذها وياه.. انتهت فترة حضانتها عند اهل امها وهو الحين الملزوم بها..

ماكان يبغى يخليها تظل عندهم اصلا.. بس حكم القضاء كان لصالحهم.. بما انها كانت طفله رضيعه و امها متوفيه والأب في سفر للعمل .. اهل الأم اذا عندهم القدره ليهم احقية حضانتها..

لين تبلغ 6 سنوات .. بعدها الأب يقدر ياخذها او يخليها معاهم براحته..

بس منير .. كان يبغاها من زمان.. فمستحيل الحين يتنازل وحكم القضاء لصالحه..
تابع>>

[Princess]

ظلت تحن.. وتزن وهو مطنشنها..
شوي وهو يمشي بالسياره فتحت الباب..
منير اختلع .. ضرب بريك .. وسحبها.. ووقف ومد ايده ..
سكر الباب.. وبعصبيه... بدون وعي.. من خلعته..
صرخ عليها صرخه..
جود زادت في الصياح..
منير يتنفس بعمق .. ماقصرت فيه هالحركه.. قفل بيبان السياره.. وكمل طريقه..

ام عادل قاعده تخيط مخابي ثياب عادل..
وهي تتحمق:
ــ مايبغى يلبس الا فوب.. طالع لي فيها رجال.. وحالتهم حاله.. بس اموت واعرف كلهم مخابيهممشققه لويه..
وتصرخ حد ماعندها..
ــ عادلوووووووووووووه..
عادل جاها وحالته حاله ثيابه مليانه غبار... وشكله معفن..
ام عادل فتحت عيونها..
ــ ووويش مسوووي.. لويه هالجرفله.. وين كنت.؟؟؟
ــ فففييي الببببيييت ما طلللعت..
ــ اجل ويشوو دا.. ويش هالحال من صاقعه..
ــ من الفيللله..
ــ أي فيله بعــــــــــــــــد !!!!!!
ــ المكككنسسسه.. سحبببتها بالللققووه وانفتحت.. تنفررر اللي فيها حاولت اركككبها ما قدررت..قمت تشااابقت وياها راقققعت بها مراااقع..
ــ رقعو بك بلا رقعووو بك يالخناقه .. ياربي .. والله كان المرحوم الحجي مفيد في هالبيت..
ــ منههووو داا بعد حجججي مفيييد.. لااايكككون واااحد فاااني بتشتررريه..
ــ حسبي الله على شرك من صبي.. وقول لي ويش سالفة هالمخابي المشققه كلها.. ولا فوب عندكعدل كلهم مخابيهم..ماكلتنهم الفاره..
ــ لاااا هههههههه فااارة ويه.. انا اشقققهم
ــ لويـــــــــــــــــــه !!
ــ اذا خلصصصت الفللوووس .. احاااول ادخل ايييدي اكتررر يمكن اشوووف شي داااخل .. فينشترررو..
ــ ياعلي.. ياعلي .. مو صبع.. الله يساعدني عليك..
ــ الحين ويشش اسسسووي في الفيييله..
ــ روح.. روح الحمام غسل هالجلخ اللي عليك.. وخلها اني باقوم ليها..
ــ ززييين.. باررروح الحماام اللي في غررفتكم..
ــ لويه يعني..
ــ بااغيررر جو..
ــ ايه مسوا بتروح لندن.. روح اللي تروحه..ا خلص..
ــ وينا دي بعد لندددن..؟؟
ــ في مخباك المنشق ..
ــ ههههههههههههههههه يعننني باااررروح مخباااي..
ام عادل تلفت اعصابها.. وهي تخيط شكت الأبره في صبعها:
ــ آآآآآه اذلللللف..يالعله
ــ اه.. تبقررر رووحها.. وتسبني ... عساااش تنسسسمي..
ــ هههههههههه غربال يغربلك.. شان زين.. فارق يللا بس واخلص.. تسبح عدل ولا تلعب في الصابون وتكت الشامبو لا اكت بدنك..
ــ تشششيه البدن ينكككت؟؟
ــ والآآآآآآآآآآخيررررررررر
ــ خلاصصص خلااااص..

دخل الحمام.. وصار يطالع في المرايا.. وفي الحوايج المصفوفين على رف المغسله..
لفت نظره موس الحلاقه.. و كان فيه شنب خفيف..

مسك الموس وشال نص شنبه.. ويوم شاف النتيجه اختلع .. وخلى الباقي..
تسبح ولبس .. وبسرعه طلع من غرفة امه..
ــ مع السلامه بطلع..
ام عادل تخيط ماليها بالته..
ــ لا تتأخر وانتبه لروحك..

طلع عادل .. ولسانه فوق شفته يلعب محل اللي مافيه شنب.. وكل شوي يضحك ..
الا بطلعة اشرف ....
ــ عادلوه.. ههههههههههههههههه ويش هالحلقه ..؟؟
عادل يضحك: ــ جدددييييده ويش عررررفك..
ــ احلف عاد ههههههههههههه .. ويش اسمها...؟؟
ــ اسسسمممهااا عبااسوو..
ــ هههههههههههههههههههه الله يرحمه .. لويه يعني اسمها كذا؟؟
ــ هههههههههههههههه لأننننه اعوووج في كللل شي يسسسووويه..
ــ انا لله وانا اليه لراجعون.. هههههههههههه صاير شكلك يضحك غربال يغربل شرك.. بستصدق لو تقول موضه قلدوك كلهم..
ــ بوظه.. ابغغغغغى بووووظظظه..
ــ هههههههههههههههه من جاب طاري البوظه.. حسبي الله على بليسك.. زين ولا يهمك نشتريلك الحين بوظه..

وهم يسولفو.. الا زينب ماره عليهم بتروح بيت عمتها..
الا عادل يريوس بسرعه على ورى ..
ــ حححححححححححح من زمان ما شفناش..
زينب اختلعت وسكتت ولا ردت عليه مستحيه من اشرف..
اشرف عرفها. وصار قلبه يدق... وفي باله صار يضحك..
ــ عرفتها.. مالوم عادلو.. لما استغرب منه كيفا يعرفهم..
عادل:
ــ ويش رررراااايش في حلللقتي.. تبغغغي احلللق كذااا ليلللة عرررسي
زينب فتحت عيونها:
ــ واني ويش علي منك ليلة عرسك.. وخر بعبر..
ــ ماانى موووخررر.. بتررروحي بيت عمي ابوو علي باااررروح وياش..
زينب بهمس ومقهوره:
ــ راحت روحي زين.. رااحت روحي..
اشرف سمعها وفي باله:
ــ بسم الله عليش.. عدوينش ان شالله..
وصرخ على عادل:
ــ عادلوه.. تعال وعن قلة الحيا. ما يفيد فيك.. تعال بشتري لك بوظه..
ــ زززين .. لي وحده .. ولزينبي وحددده..
زينب وهي تمشي سمعته وهو يقول زينبي .. فتحت عيونها.. وصارت في قلبها.. تسب في عادلوه من القهر ..
الا تسمع اشرف يرد عليه..
ــ زينبي في عينك ..انا لله الهبلان يفهمو ويش خلو للعقل..
زينب ابتسمت.. وصار قلبها يدق بالسرعه..
وصارت تركض تتباعد عنهم..
اشرف انتبه لعمره.. وفي باله..
ــ ياربي ويش فيني ؟؟ ما اهبل غيري.... الحين بتاخذ عني فكره اني مغازلجي .. يارب ما تاخذ عني فكره شينه..

وصلت بيت عمتها.. وقعدت ويا ليلى وصارت تقص ليها السالفه..
وهي كل مره يصير موقف ليهامع اشرف تقصه لليلى..
ليلى ابتسمت:
ــ ويش رايش فيه انتين؟؟
ــ حلوه دي ويش رايي فيه.. ما في راي..
ليلى تغمز ليها وتتعيلف:
ــ متأكده..؟؟
زينب تلون وجهها احمر وطغت دموع في عيونها..
ــ ليلوه ويش تقولي..
ــ ولا شي امزح وياش غناتي ويش فيش اعتفس حالش..
زينب بصوت متقطع:
ــ الله يفرج عن علي .. وبلا هالسوالف
ليلى ضاق بالها على اخوها من جهه.. وعلى بنت خالها اللي رابطه روحها فيه من جهه ثانيه..
حطت ايدها على كتف زينب وبهداوه:
ــ غناتي .. اللي ابغاش تفهميه الحين.. وتحطيه في بالش زين مازين.. انش ما تربطي روحش ومستقبلش بعلي اخوي.. هالكلام صار من سنين.. ومجرد سوالف .. والله يعلم وين نصيبش وويش نصيبه.. يمكن تكونو لبعض .. ويمكن لا.. اللي ابغاه منش اذا الله جاب لش ولد الحلال اللي يسعدش .. اخذيه ولا تفكري لا في علي .. ولا فينا..
زينب سالت دموعها بعفويه:
ــ الله يفرج عنه.. ليش تقولي هالكلام... هو قال لش ما يبغاني...
ليلى سكتت..
زينب :
ــ قولي لي الصراحه ليلى.. هو ما يبغاني واهلنا رسمو في بالنا هالخيال ان حنا لبعض..
ليلى بهمس متكسر:
ــ الله كريم.. الله يفرج..
زينب تمسح دموعها وتبتسم..
ــ ماعلينا.. من زمان ما سولفت وياش..
ــ أي والله وحشتني سوالفش..
سكتو شوي ..
ليلى جى على بالها سؤال..
ــ الا صحيح.. مره من فتره .. قلتي شي جاب لي فضوول.. اتصلتي لي وقلتي لي عنه وتالي اجلتي التفاصيل وجت ظرووف وما عرفت ويش السالفه بالضبط..
زينب مستغربه..
ــ سالفة ويه؟؟
ــ تخص حميد ..
ــ ايييييييييه.. صح صح.. اسمعي .. آآخررررررررر خبرررررر عرفناه...

وصارت تحكي لليلى الأشياء اللي عرفوها من جاسم.. انه ولد عبدالكريم آل .. و ابو مالك اخوه .. و ان امه عراقيه.. يعني تفاصيل النسب..
ليلى ..
ــ احلللفي..
ــ والله هذا اللي عرفناه من جاسم.. جت له فتره مو طبيعي.. الحين اعتدل من اشتغل وينشووين.. بس تصدقي البارحه مارجع البيت ما يندرى وين ذالف .. الله يستر شان ما عود لصايعتهوبطالته..
ليلى تضرب فكر ومستغربه..
ــ الله يستر.. بس .. يعني معقول.. عم علا يصير.. لااااااا.. ما تدخل مخي ابدا..
ــ والله ولااا اني.. بس مادري هذا اللي توصلنا له..
ــ ايه.. بكره اذا في شي مستخبي بيطلع..

تابع>>

[Princess]

المغرب .. رجع ابو مالك البيت معاه سوسن..
دخل وصار ينادي..
ــ علا .. سميره.. تعااالو..
جو ثنتيهم..
سميره:
ــ خير ياخوي .. ويش صاير؟؟
ــ اولا .. اتصل مالك ويسلم عليكم..
علا ابتسمت حدها:
ــ الله يسلمك.. اخباره .. زين .. وحششني..
ابو مالك:
ــ عال العال والحمدلله.. وحشش . حق ويه مقفله جوالش.. متصل هو فيش قبل لا يتصل فيني ولارديتي يقول مقفل..
ــ يووووو نسيت ما شحنته من امس خلصت بطاريته..
ــ عفيا عليش.. ماعلينا.. خبرر ثاني .. وبنسوي على شانه حفله..
سميره:
ــ خبر .. وعلى شانه حفله.. خير اللهم اجعله خير,,
ابو مالك وهو فرحان حده..ويطالع في سوسن..
ــ الغاليه.. حامل..
سوسن توردت خدودها خجل..
سميره جاها الخبر زي الصاعقه..
علا ابتسمت وحضنت سوسن.. وباستها..
ــ الف الف مبروك غناتي.. الله يسهل عليش ان شالله..
سوسن بخجل : ــ الله يبارك فيش .. تسلمي غناتي..
سميره بأرتباك.. ــ مبروك..
وتركتهم وراحت غرفتها.. وهي رايحه كانت تريزا عابره حامله تبسي فيه عصير طلبته..
تريزا :
ــ هذا عصير ماما..
سميره:
ــ روحي زين مابغاه..

ابو مالك يهمس بسخريه:
ــ هالأخت.. خوش تبريك.. كنها مرتي الثانيه مو اختي..
هاا علا .. وانا ما استاهل تباركي لي..
ــ ههههههههه افا عليك.. الف مبروك يبا..
وباست راس ابوها..
ابو مالك..
ــ جيبي العصير تريزا..
اخذه من عندها وعطاه سوسن..
ــ اشربيه وتغذي عدل..
علا :
ــ كم شهر صار لش..
ابو مالك...ــ هذا الثاني تخيلي .. وهي ابدا ولا هي طاقه خبر ولا حاسه..
سوسن ذابت من الحيا..
علا :
ــ ههههههههههه خلاص يبا.. ذابت..
ــ هههههههههههههه زين خلاص.. يللا قومي ارتاحي .. و أي شي تبغيه تريزا موجوده..
سوسن: ــ ان شالله..

في قسم الشرطه...
جاسم يسجل اقواله.. وحميد وياه...
والضابط فاتح ملف قضية علي .. ويقلب اوراقها..

ــ يعني تعترفون بجنايتكم...!!
جاسم :
ــ ايه.. ومستعد ابلغ بعد عن واحد ممكن يوصلكم لبقيه العصابه..
ــ صج ..؟؟ منهو؟؟
طلع جاسم بطاقة احوال الذيب..
الضابط..
ــ اووه والله منت هين.. سرقتها منه؟؟
ــ ايه..
ــ والله ما يعرف للحرامي الا اللي مثله.. طابخها زين..طيب بما انكم سلمتم نفسكم.. ارجعو بيوتكم الحين وتركو ارقامكم.. و عناوينكم.. راح نفتح القضيه و نسجل اقوالكم.. ونقبض على بقية العصابه.. ونتخذ معكم الأجرائات القانونيه.. تقدرون تتفضلون الحين..
جاسم..
ــ مشكور.. مع السلامه..

وطلع وهو ماسك حميد.. اللي كان متيبس .. ويحس نفسه لا حول له ولا قوه.. ماتكلم ولا كلمه طول فتره التحقيق حده اسمه.. ويجاوب بإيه او لا..

جاسم يحس بالراحه اخيرا.. ابتسم ابتسامة رضا.. فرح .. اخيرا صحّا ضميره من بعد سبات عميق..

حميد الذبول طاغي عليه.. ويتمنى الله ياخذ عمره اليوم قبل بكره.. بس قبل هالأمنيه.. يتمنى يتواجه مع علي.. ويطلب منه العفو والسماح..

امل مع حسين في الصاله يسولفو.. سجاد راسم عصافير تطير .. و شجر .. شمس وغيوم.. ومتفنن.. وفرحان بالرسمه..وجاي بيراويها امه و ابوه.. وقف وهم مايدرو به وصار يسمعهم..
حسين:
ــ مابقى مستشفى صدقيني.. هنا مافي امل.. اعصاب سجاد مره ضعيفه ولا تتحمل تشيله..
امل بنبره حزينه:
ــ اسأل ودور اكثر .. لو ادفع عمري بس يسوو له أي شي .. أي حل .. تعب ولدي من حالته وتعبت وياه .. احس كل يوم اعطيه امل والأمل يوم عن يوم يموت..
حسين يحط ايده على خده..
ــ اآآآخ .. انا لله.. والله كلهم قالو لي حالته ميأوس منها.. ويش بيدي.. الحين اعرف واحد في العمل عنده اقارب في امريكا بيسألهم عن المستشفيات المتخصصه بهالحاله هناك وتكاليف علاجهم.. وان شالله خير..
ــ يارب خير..

سجاد.. فهم كلامهم كله .. تحجرت دمعه في عيونه,,
كفس الرسمه واستدار بكرسيه لغرفته..

المغرب..
رجع منير جود بيت امها..
من شافه مؤيد.. جن جنونه وصار يصارخ فيه..
منير:
ـ هيه .. هيه.. خوش استقبال.. ويش فيك علي؟؟ بنتي وطلعت وياها خير ان شالله..

ــ وين وديتها.. وليش تاخذها بدون ما ندري..انت ويش فيك؟؟ منت صاحي ..؟؟

ــ اخزي بليس يا مؤيد ولا تسوي حرايب .. خلاص الحين جود من حقي اخذها انا ولي امرها.. وعلى فكره انا خذتها حق اصورها للجواز والحين جبتها ليكم كم يوم لين يطلع .. تقعد وياكم وترتبو اغراضها و امورها حق باذخها كندا..

ــ ولااااااا حتى تحلم..

ــ اللهم طولش ياروح.. الكلام وياك عقيم.. امشي احسن لي..
طلع منير .. مؤيد بعفويه.. حضن جود.. وصار يهمس ليها..
ــ صدقيني مابخليه ياخذش وبيننا المحاكم..
الى الملتقى

[Princess]

ههههههههه
خلاص خيه نبراس..
المرات الجايه اسوي استجواب..
يللا اقرو بس وروحو نامو..<< تقطع رزق بقايا المواضيع والأقسام

ايه الصبيان وراهم قعده للفطور والبنات للكرف..
الله يساعد ويعين..لكن خل واحد منهم يتكلم ويقول مالح لو مو عدل لو كان حطيتي كذا
الا يبغى له فلعه معتبره.. لا وآخر شي يقحصو الصحون.. << بتتوقف عضويتش بالأخير
احم

تمسو على خير..
ولا تختلعو اذا مابينت اليوم
عندي حوسات.. قولو يارب اخلصها بدري وابين..
اسالكم الدعاء
دمتم بخير
وبحفظ الرحمن

[Hussain.T]

يم يم

فطووووور لذيذ جدا

واحلى شي فيه ان علي بيطلع بالسلامة بكره او اللي بعده

واما عادلوه خلاني اشرق من الضحك غربال يغربله

واما امييرة المرح خلتني افرح لاني قريت الجزء قبل النوم

مشكوووووووووووووووورة اميرة ع البارت الابداعي

والله يعطيش الصحة والعافية

وبنتظار البارت القادم

تحياتووو

[الــــنـــاري]

خلصت
يعطيك ربي الف عافية
خية مافي تعاليق
بقوم اخلص بروح الاحوال ههه
بنتظار البارت الجديد

[آخر شقآوهـ ..~]

يـــآعلي أميروه زعلتي ..
وقسم بالله مآدري ويش فيه مخي مآيجمع عدل
وكلآ أنسى لآتزعلي مني مآ أقدر على زعلش أني أنتينآ عزيزه وغآليه
وجود ويش تصير إلى مؤيد للحين أذكر مآنسيت قسم بالله
تكفين عآد لآتزعلي
<--- ضآق خلقي مآبعلق
تسلمين ع البآرت غنآتي
وربي يسهل عليش ونشوفش إن شآء الله
تحيآتي