وفي غرفة الخياطه.. جلسو الحريم.. ام علي و ام جاسم وليلى وريما و زينب ورزان وبنتها حنين..
رزان:
ــ ماتخيلت وربي هالشي كله صار للأمام الحسين.. يستاهل هالحب من قلوبكم وهالولاءوالتمسك..
زينب : ــ افا عليش .. المسأله مو يستاهل لو ما يستاهل.... حب اهل البيت انولدنا به وتربينا وكبرنا عليه.. مو مسأله شفقه او احقيه.. هالشي فطره فينا
رزان : ــ عليكم الف عافيه.. وربي يوفقني اعرف اكثر عن المذهب و اكون محبه مثلكم..
ليلى : ــ قلبش ويش يقول لش الحين خيه..
رزان : ــ ما ابالغ اذا قلت لك اني مافي حياتي حسيت بهالأحاسيس .. مافي حياتي بكيت هالكثر وبصدق وربي يشهد.. صدق مصيبتهم تبكي العدو قبل الصديق .. سلام الله عليهم..
ام علي : ــ الله يفتحها في وجهش يابتي,, وينور عليش..
رزان : ــ يارب ياكريم..
ام جاسم: ــ وكلما بغيتي شي يابتي لا تستحي كلنا اهلش وما بنردش ان شالله..
رزان: ـ تسلمون ربي لا يخليني منكم ومن طيبكم..

ريما : ــ اووووووه وتاليتها ويا بتش..!!
رزان مستغربه:
ــ شفيها..؟؟
ريما :
ــ ههههههههههه تعبت ترجي فيها تعالي تعالي ايدي انكسرت واني مادتنها.. عيوني حولت من التغمز.. بوزي طاح من الأبتسامات.. استررررررر عالثقل مهي عاطتني وجه..
الكل قام يضحك على ريموه وخبالتها..
رزان: ــ ههههههههه شسوي لها وهي تعوف .. حنين ماما روحي للخاله ريما..
حنين متمسكه في امها..
ريما تطلع لسانها:
ــ مابغاااااااش هونت
حنين تقلد على ريما وتطلع لسانها..
ريما : ــ ههههههههههههههه تجنن النحيسه ولا هي راضيه تجيني..
ام علي : ــ الله يخليها لش ويبلغش فيها..
رزان : ــ يارب ويخليك ياخالتي ويبلغك في بناتك..

جاسم طلع لحميد... وصل لعنده.. ودخل عليه الصندقه.. لا احم ولا دستور..
ولا سلام ولا كلام.. لقاه متلحف من البرد .. وماسك كاس شاي..
حميد: ــ بسم الله الرحمن.. ويش فيك وهذي حالتك انت!!!!
جاسم حالته حاله وبس ينافخ ويطالع فيه نظرات .. شرانيه..

حميد :
ــ اشوف طال وياك بالي .. صاير تقلل ادبك علي وانا ساكت عنك.. هيه .. ويش فاكر نفسك انت.. اعقل لا العن ابو جدانك..
ــ فكني زيييييييين.. مرضك يعدي.؟؟؟
حميد ببرود يشرب الشاي .. ويبتسم بسخريه:
ــ ايه.. ليش تبغى اعديك؟؟
جاسم بطنه عوره:
ــ يافااااشل .. تعديني .. ياربي .. والله ماخليك يا حميدوه.. مين انت.. تكلم.. ويش قصتك..
ــ لا تطووول لسانك علي واطلع برى..
ــ وربي ما بخليك ترتاح في عيشتك..
ــ ليش.. بقى في العمر شي على شان ارتاح.. ايامي صاير اعدها.. واتمنى اليوم قبل بكرهانطفي..
ــ انطفى حسك .. جعلك جهنم ..
ــ وياك يا بابا.. وين بتروح يعني انت.. ؟!!
ــ ماعليه.. الأيام بيننا..
ــ وانت هذي سالفتك.. تدخل لي زي البعير المسعور بين فتره وفتره.. تزبد وترعد وتهدد وبعدينتذلف.. روح زييييين.. واعلى مافي خيلك اركبه..
ــ مسعور في عينك .. وبعير اللي يرفسك.. وهين ان ما ركبت على راسك .. اصبر بس..
ــ اذلف زين اذلف

ويكب بقايا كاس الشاي ناحية جاسم.. اللي طلع وهو مقهور .. ولا سكر الباب وراه..

حميد دموع تجمعت في عيونه.. حاول يداريها.. بس ماقدر .. وصار زي الطفل الصغير .. يصيح ويون.. وفي قلبه قهر وحسره..


عادل .. صار يتمشى في الطريق .. لين وصل فريق بيت ام مؤيد..
ــ يوعااااان.. بررروح بيت مؤؤؤؤيد يييمممكن يعططووني اكككل..

لقى باب بيت ام مؤيد مردود.. فتحه شوي شوي... و دخل ..
اول غرفه على طول لقاها وكانت المجلس ,, وكان المكيف يشتغل..
والميكرفون للقرايه والكتب مرتبين استعداد للمأتم..

صار يداور فيه..
الا بدخلة ساره حامله تبسي فيه شاي وماي ..
ما انتبهت له كان في جهه بعيده عن الباب ومكان روحتها ...
حطت التبسي .. ودارت للباب..
شافت عادلوه واقف قدامها .. ومبتسم شبرين ونص
صرخت حد ما عندها..
ــ آآآآآآآآآآآآآآآآآآآآآآآآآآآآآآآآآآآه

الى الملتقى..