قريب يأذن اذان الفجر باقي عليه ربع ساعه.. وعلا ماغمض ليها جفن.. طلعت برى تشوف الوضع .. وتشوف اخوها رجع لو لا .. الا بدخلته البيت..
علا من فوق الدرج : ــ هاااا وصلت !!
مالك انصرع ورفع راسه : ــ بسم الله على عمري .. جنيه ... ما تعرفي تكحي؟؟ تسوي صوت وانتين تمشي خلعتيييييني ...
علا ببرود : ــ ايه زين.. لويه مختلع كنك حرامي..؟؟؟
مالك : ــ حرامي .. حرامي ..,, اهوو بس مادريتي ..؟؟
علا تتثاوب : ــ لا ويش دراني..
ــ باقو سيارتي
علا فتحت عيونها.. ونزلت تركض ..
ــ يابرودك.. ويش باقو؟؟
ــ على حساب بيبوقو الراديو والدي في دي و الأم بي ثري بس مامداهم..
اووف وجوازي بعد في صندوق السياره ههههههههههه ما مداهم لكن..
علا منصرعه : ــ ويش تهلوووس وويش ما مداهم...
علمها مالك بالسالفه :
ــ وآخر شي يتفلسف لي اللي ما يتسمى ويسوي روحه خبير تقولي هو الحرامي..
علا بأستنكار : ــ مين ؟؟
ــ شريفوو..
علا .. تميل لشريف .. تذكره من ايام طفولتهم.. هو وحيد امه وابوه..
كان ابوها شريك ابوه في مشاريع.. وكل ويا بعض .. وياما سافرو وطلعو وراحو وجو..
من ايام الطفوله ومالك يلعب ويا شريف واذا ضرب مالك علا .. شريف كان يدافع عنها.. ويشتري ليها حلويات و العاب... كان حب الطفوله البريء ..
كبرت علا .. وكبر شريف . وتغطت علا عنه...
وبدت المشاكل بين ابو شريف و ابو مالك....مشاكل ماليه في الشركه ابو مالك حمّل ابو شريف مسؤوليتها.. في الخساره لأنه السبب في الأقتراح.. وطالبه بنصيبه فيها وفض الشراكه...
غير ان ابو شريف تحرى عن مصادر بعض الفلوس اللي يساهم فيها ابو مالك وياه.. ولقى بعضهم فعلا من الحرام .. اراضي اغتصبها من اصحابها .. ومن غش في بعض المعاملات ..
فلما جت من ابو مالك طلب فض الشراكه على طول وافقه...
كان متيقن هالخساره من اكل مال الناس بالباطل .. فما يبغى يعيش وياه في الحرام ويختلط حلاله بحرام شريكه ..ولما جت منه .. تقاسمو الشركه ..
وفوق هذا كله.. ابو مالك بغى يسوي مشاكل تودي ابو شريف للمحاكم .. يطالبه بحقه مع انه عطاه حقه بالكامل .. !!
هالشي دفع ابو شريف لأعطاء ابو مالك زياده ولو كان فيها اضرار وخساره من جيبه...
وحسافه .. اكتشف ابو شريف ان هالصحبه كانت ماديات ومصالح....
رجع يشتغل بالقوه في نصيبه.. ومع كل ربح وربح ما ينسى حق الله في ماله..
الله بارك فيه ورزقه .. ووسع عليه و اعطاه من نعيمه كل خير..
كذلك ابو مالك.. تجاراته كانت اغلبها خارج البلد... لدرجة ناس بدت تتكلم عليه وتقول انه اكيد متزوج له وحده من برى ... وعايش اغلب اوقاته وياها..
علا سرحت مع طاري شريف وما عادت تسمع مالك ويش يقول...
مالك يمد كف ايده قدامها ويلوح يمين وشمال:
ــ هيه هيه.. قومي بس اذن .. اللي ماخذ عقلش..
علا صارت تداري : ــ سرحت افكر بسيارتك ويش خانتها الحين بدون كفرات .؟؟؟ ويش بتسوي الحين..؟؟؟
مالك رفع حاجب وحاجب : ــ في سيارتي !! اتوقع قلت لش ويش باسوي بكره فيها !! بس صدق اللي ماخذ عقلش !!
علا سكتت عنه وقامت تمسحت وراحت غرفتها .. صلت ونامت....
ومن صباحة الله خير...حجي عبدالرحيم ( ابو جاسم ) في حوش بيتهم ...ما ينسمع الا صوت القدو.. كرررررر .. كررررر...
ــ كحح كح كح .. آآه .. كححححح كححح كححح .....
ام جاسم طلعت من المطبخ بتشيل تبسي فطور حجي عبدالرحيم ويدور عليها وينفخ الدخان .. ويصير يكح..
ام جاسم : ــ ايييييهيييي .. اف وع وع... وصااااقعه..
ابو جاسم : ــ تصقعش .. هذا بدل لا تقولي لي صحه وعافيه ...
>>> دايم يتعيلفو في بعض ما يعيشو الا كذا .. بس ويش حلاوتهم .. تعيلف مزح ..
ام جاسم : ــ .. صحه !!! عافيه..!!!.,, أي صحه واي عافيه...
ويلي منك .. من هالقدو... قايله لك وايد عليك .. تشرب فيه وانت شايب منت قادر تتنفس وتالي كرف في هالزراعه .. وينا الله يجيب الصحه هااا؟؟؟ من وينااا ؟؟ وانت من هالصبح بعد فطورك تحلي به !!
ابو جاسم يشيل قلم القدو ويدف به ام جاسم وهو يضحك:
ــ اهوو عني يا ضبيعه سكتي بس قالت شايب قالت...
ويعدل غترته ويطالعها على جنب:
ــ ماتدري وانا رايح الزراعه... يتحدفو علي البنات .,,
ويحرك حواجبه : ــ بس ما اعطيهم وجه..
ام جاسم غطت وجهها بمشمرها وصارت تضحك وتسخر : ــ يعووه .. ههههههه,,, ويش يبغو فيك ياحسره..!!
ابو جاسم : ــ ههههههههههه حسبي الله عليش من مره.. الا وين جاسموه ولدش ابغاه يعاوني يشيل وياي السحاحير ينفعونا بالزراعه...
ام جاسم بخوف: ــ مادري به .. من البارحه ماشفت رقعته.. وللحين سريره على حطته..
ابو جاسم يضرب فخذه بقهر : ــ حسبي الله عليك من ولد .. انا ما بيدبحني هالقدو .. بيجلطني ملعون هالوالدين جاسموه.. وين ذالف .. وينا يطس وينااام.. جعله حريقه...
ام جاسم خافت : ــ هدي بالك .. وان شالله مافي الا الخير ..
ــ أي خير ويا ولدش .. صايع .. ضايع.. عطالي بطالي .. انا سهرته اخر الليل ويا هالشله ما تعجبني .. بدل لا يدور له شغله ينفع عمره بها.. اف من هالصبيان ومن دا زمن...
شوي الا بقعدة زينب .. اخت جاسم الكبيره .. قد ليلى وكل وياها ...
ــ صباح الخير ..
ام جاسم : ــ صباح النور .. هلا امي ..
زينب تسأل امها بصمت ..؟؟؟ ويش صاير وويش فيه ابوي ؟؟؟
ابوها ياخذ اخر مزة قدو .. حس عليها ..
ــ كححح كح ويش فيني بعد غير اخوش نحسوه جاسموه اللي بيدبحني ..
زينب سكتت وراحت المطبخ..
ام جاسم مهي داريه ويش تقول .. شالت التبسي ووراها..
ابو جاسم محمق : ــ ايه هذا اللي اخذه منكم.. صمٌ بكمٌ .. اقوم بس ..
قام ولايم اللي يقدر عليه من السحاحير .. وهو طالع طاحت وحده على رجوله..
ورمى اللي في ايده من العوار :
ــ آآآه وخنااااااااقه تخنق جاسموووووووه...
جت زينب تركض لأبوها.. لقت ابهام رجوله متورم ... جابت خلقه وثلجه ..
ــ ما يحتاج باضغط عليه وخلاص .. شيلي شيلي .. كان تعرفي تحطي فلج في قلبي تبردي عليه عن حرته حطي ..
زينب ساكته .. ومهي داريه ويش تقول ..
وصارت تلم السحارات لأبوها وجابت حبل وربطتهم به وعطتهم اياه..
ابو جاسم ابتسم : ــ استر الله عليش .. عساني افرح فيش يابتي .. اااخ من هالزمن اللي البت فيه تعين وتعاون والولد ما لينا به عازه...
وطلع من البيت..
تابع>>
رد مع اقتباس
المفضلات