وفي المزرعه .. ابو جاسم يشتغل .. الا بجية ابو ناصر ومعاه حجي عباس..
ابو ناصر :
ــ قواك الله حجي ابو جاسم..
ابو جاسم قام واقف ومسح ايده في وزاره ..
ــ هلا هلا .. الله يقويك عمي ..
ــ ما يفيد فيك .. كم مره قايل لك لا تقول لي عمي .. انا ابو ناصر..
ابو جاسم بحرج: ــ ولو يا عمي العين ما تعلى عالحاجب..
ــ عساك سالم.. هاا اخبار الشغل اليوم ..
ــ الحمدلله في احسن احواله..
ويكمل كلامه بأستنكار من حجي عباس اللي ما سلم ولا نطق:
ــ قواك الله حجي عباس .. كيف اصبحت..؟؟
حجي عباس : ــ هلا.. يقويك.. زين زين..
ابو جاسم فيه ضحكه.. بس مداريها.. يدري بحجي عباس اذا نفسه في خشمه اكيد عادلوه مسوي فيه شي ..
وفي باله :
ــ تستاهل ياعساه يخوبلك ,,
الا بحجي عباس:
ــ ها ابو جسوم.. صدق ما دفعت اللي عليك..؟؟ متى ان شالله
ابو جاسم تلون وجهه وحس بأحراج.. :
ــ ايه.. هاا.. ان شالله الله يطول عمرك .. يوصل حسابك...
ــ ايه .. لا تتأخر .. قريب يخلص السبوع و ما دفعت ...
ابو ناصر تدخل:
ــ ليش كم عليه...؟؟
حجي عباس يحسب :
ــ مااخذ يونية عيش صغيره... و 3 قواطي حليب ابو علم.. و غرشة زيت
ابو ناصر عصب من حركة حجي عباس .. قاعد يحسب يعدد ويش اخذ ويش ما اخذ..
ــ ياااحجي قلنا لك كم عليه مو ويش اخذ ..
ــ هو دفع فمن قواطي الحليب وغرشة الزيت.. باقي يونية العيش ما دفعها قال السبوع الجاي ..
ابو جاسم مو عارف ويش يقول :
ــ ياحجي .. بعده السبوع ما خلص .. قلت لك باوفيك فلوسك .. واللي خلقني ما باكلهم عليك..
كان آخر الشهر.. باقي اسبوع و يعطي ابو ناصر حجي عبدالرحيم اجره..
ابو ناصر :
ــ ياحجي عباااس.. خاف ربك.. واقف له على 40 مدري 50 ريال ..
حجي عباس : ــ فمانييييييييين.. فمانين يابو ناصر..
ابو ناصر : ــ جعله ميه.. الله موسع عليك و راهي عليك ومتفضل عليك بخيره ونعمه.. تجي تحط بالك بال اللي على باب الله حق ويه..؟؟ خلاص فلوسك بتوصلك ولا عليك..
ابو جاسم انحرج ومو عارف ويش يقول :
ــ لاا .. تالي بعطيهم وياه.. عسى عمرك طويل .. عساك سالم... لا تكلف ..
ابو ناصر يبتسم : ــ ماعليك ..
ابو جاسم : ــ الله يعطيك الصحه والعافيه..اخصمهم علي من اجري ..
ابو ناصر طالع في ابو جاسم : ــ ويش تقول .. باسوي روحي ماسمعت..
ابو جاسم : ــ لا والله ما يصير يابو ناصر .. خيرك مغطينا الله يزيدك من فضله..
ابو ناصر يعرف ابو جاسم نفسه عزيزه وبيسوي سالفه على هالفلوس ولا بيرضى :
ــ خلاص يا بو جاسم.. اعتبرهم من اجرك ..
ابو جاسم ابتسم : ــ الله يبغلك في ذكرك .. الله يوسع لك في دنياك وآخرتك.. الله يطول عمرك ويعطيك الصحه والعافيه.. الله يخليك
ابو ناصر : ــ تسلم بركة دعاك الصالح.. يعطيك العافيه
ــ الله يعافيك..
ومشى ابو ناصر ويا حجي عباس .. وابو جاسم رجع لشغله..
حجي عباس : ــ حق ويه .. ها.. حق ويه.. الحين تعوده على هالحركه.. ولويه ما تخليه يسميك عمي.. تقويه عليك
ابو ناصر طالع في حجي عباس:
ــ افففف الله يهديك..
ــ لا اا.. قالو لك مينون.. قول مينون...
ــ لاااا حاشاك ..
ــ ايه.. حسبالي .. بس والله انك يابو ناصر تعطيهم وجه زياده و..
ابو ناصر يقاطعه:
ــ ياااحجي .. فلوسك وصلتك لو لا ؟؟
ــ ايه..
ــ خلاص اجل .. ماعليك مني عطيتهم وجه ما عطيتهم ..شي راجع لي..
ــ زين ويش فيك حمقت..!!
ــ ما حمقت.. ماعلينا.. ايه .. نشوف شغلنا..


الدكتور مصطفى.. يشوف نتايج الأشعه..
حسين و أمل قاعدين ومتأملين أي خبر يبشرهم يعطيهم الأمل من ورى هالعلاجات..
ابتسم الدكتور.. وطلع من الدرج حلاوه..
من طلع الحلاوه.. عرفت امل .. نفس حركته كل مره.. وتذكرت كلامها ويا ولدها قبل لا يروحو المستشفى..
دكتور مصطفى : ــ خود بأى يا شااااااطر المصاصه دي ..
حسين بنظرات تأمل .. حط كوعه على مكتب الدكتور و سند خده على كفه..
ــ الله كريم..
الدكتور : ــ الله كريم يا باش مهندس .. انا هغير له العلاق هالمره دي .. وان شاء الله مع العلاق القديد يبأى في نتيقه..
حسين : ــ ان شاء الله..
ــ بالسلامه يارب
ــ الله يسلمك..
حمل حسين ولده.. اللي ترك المصاصه على مكتب الدكتور..
يحس ماليها طعم.. ولا حلاه.. ولا عاد يبغاها.. لأنه زهق منها.. ولا عادت تعني له أي شي..

الساعه 11 ونص الظهر ..
علا كانت في الحمام ,, طلعت شافت جوالها رساله من خالتها امل رسلتها ليها الصباح..
ــ صباح الخير غناتي.. المهم اذكرش اليوم بنروح للخياطه.. تجهزي و كلمت مالك ووافق يودينا السوق بس يقول اول شي بيجيب سيارته من الورشه يعني العصر ان شالله نلتقي.. اشوفش على خير..

ابتسمت علا :
ــ على خير.. ممممم ولا اني جايه اتذكر هالليلى...
طلعت لقت عمتها سميره في الصاله قاعده..
ــ صباح الخير..
ــ أي صباح.. قولي مساء الخير..
ــ خخخخ ما نمت الا بعد صلاة الفجر..
ــ وويش مسهرنش .. ؟؟؟
ــ لا بس ما جاني نوم..
ــ ايه اللي ماخذ عقلش..
علا ببرود : ــ ماحد..
ــ ايه .. يتهنى به..
علا سوت روحها ما سمعت.. متعوده هالضربات من عمتها .. دايما تحط دوبها دوب البنات..
من تسمع وحده رفضت واحد متقدم ليها.. قالت اكيد تحب واحد و في بالها واحد.. من تشوف علا ما نامت لو سرحت .. قالت ليها تفكري في مين..؟؟؟

دايما تحسس علا ان كل بنات هالزمن مهم خاليين من هالحركات..
لدرجة انها كل سنه تحسب لعلا كم وصل عمرها...!!!
واذا جى ليها خطيب ورفضه ابوها بدل لا توقف ضده وتقول له شوف حالتي وليش الرفض .. بالعكس تشجعه على تصرفه وانه مهو من ثوبهم ولا يناسبهم...

علا تسكت عنها.. وفي بالها .. ــ مالومش .. من حالتش اللي وصلتي ليها.. وياخوفي الحقش ...

دخلت المطبخ .. لقت تريزا تحوس بس حوستها مو زي العاده.. كانت تفرك المواعين ببطئ وسرحانه وسرحانها يغطيه الحزن..
علا تعمدت تسوي صوت وهي داخله لا تخلعها..
تريزا عفويا اختلعت و رمت الكاس وانكسر ..
سميره برى تصرخ :
ــ ويش كسرررررررتي بعد..
تريزا بخوف :
ــ سوري ماما.. سوري ..
وصارت تلم الزجاج من المجلى وترميه.. ووجهها مكتوم وكأنها بتصيح..
علا تعتذر من تريزا على الخلعه وتكلم عمتها : ــ ويش فيش عمه.. دافعة بلى الكاس .. حصل خير..
ــ ليش مفكره هذا اول واحد,, من قعدت وهي تكافخ بالمواعين.. كم شي كسرت ومن شوي كسرت غرشة مخلل خيستنا..خرفت الظاهر وما عادت تقدر تشتغل .. يبغى لي اقول لأبوش يجيب لينا وحده غيرها..
تريزا ما تحملت..
انسلت دمعه من عيونها..
علا ماقدرت على الموقف .. وراحت ليها..
ــ ويش فيش تريزا..؟؟؟
تريزا ساكته مهي عارفه ويش تقول..
علا حطت ايدها على كتف تريزا.. وقعدتها على الكرسي .. وصارت تواسيها:
ــ ويش فيش .. على ويش تصيحي..؟؟
تريزا بألم وصوت متقطع:
ــ بنت مال اني ..واجد مريض..
علا :
ــ هاا..مين قال لش ..؟؟
ــ زوج مال هو ليل يتصل ويقول .. مريض واجد ونده بيبي صغير..
علا مهي عارفه ويش تقول :
ــ انا لله.. ويش فيها؟؟
ــ مايدري .. انا في خوف
ــ لا ان شالله خير .. اذا تبغي تروحي اندونيسيا روحي اسبوع شوفي بنت وتعالي..
ــ مايقدر يروح.. عقد مافي يخلص وماما سميرا وبابا ابو مالك مافي يرضى..

علا حست انها ماتقدر تقول أي شي .. دام بابا ابو مالك ما يرضى.. ماليها كلام..
مسحت على ظهر تريزا:
ــ لا ان شالله بنت يقوم ويصير اوكي.. لا تيصيحي خلاص..
ابتسمت تريزا: ــ ان شالله..


وفي وسط البحر .. حميد وقف بيشيل الشبك امتلى سمك..
وهو واقف دار راسه وصار يترنح..
علي انتبه عليه:
ــ ويش فيك ؟؟
ــ ها لا بس ما نمت عدل..
ــ ليش عاد.. اشوفك دي كم يوم نومك مو لهناك.؟؟
ــ لا ويش دعوه كل يوم انام عدل .. بس البارحه ولد خالك ما قصر يشاخر
ــ هههههههههههه حق لا تنومه وياك مره ثانيه
ــ خخخخخ ولا يهمك المره الجايه اطرده...

علي التفت الى شبكه لقاه امتلى .. وقف بيسحبه..
حميد كان واقف ..
ولا يسمع علي الا صوت شي طاح في البحر
التفت بسرعه لقى حميد.. مو على الطراد..

الى الملتقى...