ضعنا يا صبرنا...

[الــــنـــاري]

يعطيك العافية خية
اذا العصر عجل اقوم انام الحين ولعصر مادري الليل يصير خير
تمـ،،،ـون على خير

[عوامية صفوانية]

واخيراً حميييدووووه بيتأسف لعلي وبيعترف لأنه قربت منيته له


ههههههههههه
ويلي ما ني قادره على عاااادللللووووووه ويا اسواته هههه ما سواا اسوايه قص الشرشف واذكر ابو اشريف هههه

وان شاء الله مؤيد يأخذ ليلى والله لاقيين على بعض والله يتممها على خير خخخ عشت الجو اهنا بعد ههه
ترااااااااا باجبب ليهم من الحين يوووو استغفر الله بعده عندهم شهر صفر

وصرت الحين ما اشتهي سميررررووووه لانها كلااا شكاكه في علا
والله يعافي سوسن ويثبت حملهاا هع هع وابو مالك يرجع حقوق غيره الى اصحابها اييه من قلتهم عاااد
واول مره ابو مالك يحضن بنته هييي انت تراا هذي بنتك مو غريبه اييه من العواايد
هع هع
ولاااا تروووز ( تريزا هههه) اطلع عليهم شايفه فلم هندي عفر هههه

وعلي ويش عنده جااااي ركيض لأهله ورافع صوته ويا اهل البيت مفاجآه بسررعه ويش عندك فرحناا وياكم
( اسمعته اني بعد ايه هين ) ويا ابو علي خير ان شاء الله خير ما داام وياكم علي اكيد فيه خير لا تحاتي

يا جايب خبر بيعة الطرااد لو مشتري الميكرووو
لو يمكن ايقول ليهم عن سالفته ويا حميد يوم ايروح اليه المستشفى وتأسف حميدووه اليه عشان كدااا فرحاان امم جايز (يمكن هالمره تخميني يصيب هع لا تصيري واثقه وااايد)

يسلمو خيتو امووووووووور على الابدااااع
والله يعطيش العافية وما قصرتي
والله يحفظش من كل سوء بإذن الله
تقبلي تحياتي

[أحبك ياغلا عمري]

مشكووووووورةه خيتو
ننتظر البارت الجديد

[دمعة الاحزان]

ويلي اخيرا خلصت
دار راسي ويبست عيوني وعطشت بس مافي مجال للشرب خلاص
من قبل الوفاة ماقريتها واليوم انهيتها
بس اجزاء روعه كذا اخذ الشي بسهاله اخمن والقى الجواب يستناني في الصفحات الجايه
واما عدول وربي اول بارت في قصته مع هالسنور المسكين
في قمة زعلي وتعبي اني ضحكت من قلب وحتى عيني دمعت
ومسكين هالشراشف وهالزنانيب على الفضحيه اللي سواها لهم
بس هو غبي او يستغبي يعني عليه حركات نص كم وايام يفكر بعقل الله يهدي كل من زيه
واما بوحميد كاسر بخاطري المسكين وحاسه فيه يحس حاله وحيد
فريد بهالدنيا وهالاحساس مر وامر من تعب الدنيا نفسها
واما مؤيد توقعت بيكون الى ليلى وعلا لعلي وزينب خلاص واضحه
ليلى بتفهمها الوضع وهي بتفم وبترضى باشرف
خاصه انها بتحس بشويه ميل اله
وسوسن مسكينه ماتستاهل
وسمور كان ودي يكخفخها ابو مالك ويحط حرة الاحلام فيها
يسلموا بالغاليه على الابداع الرائع
والله يوفقك دنيا واخر ويحقق كل اللي ببالي<<قعدت على باب المسجد ونست حالها
تحياتي...
دمعة

[أميرة الشوق]

بالإنتظــــــــــــــــــــــــــــــار**

[المتحير]

ياهووووووووووو جزء روعة رحت انا البحرين يومين قلت باجي وشوف جزئين لكن يلا اليوم راح ينزل

الثاني
بالانتظار تحياآآآآآآآآآآتي

\المتحير\

[Princess]

مرحبا

يعطيكم العافيه وخوش تخمينات.. بعضكم اصاب الهدف..
بنزل الجزء اسود .. بدون الوان..
النت عندي زفت الزفت.. من المغرب مافي شبكه وتوها جايه اخاف ترجع تفصل وافلس واقعد لبكره ..

تفضلوو الجديد..

[Princess]

الحلقة 44

علي رجع بيتهم فرحان ومستااانس...

نادى باعلى صوت::

ــ ياااااااا اهل بيتنااااااا تعاااااااالو مفاااجأه

طلعو كلهم وابو علي كان مسندح في الصاله قعد قعود..

ــ خير اللهم اجعله خير....

قامو كلهم... عند الباب..

علي دخل المجلس طفى اللمبات وفتح النافذه :

ــ طالعو من ورى الستاره شوفو الحليو اللي برى..

ام علي مهي فاهمه..

ريما ركض اول وحده...

ليلى بفرحه فهمت السالفه.. صفقت صفقه قويه:

ــ شرريت الميكرووو

علي يضحك:

ــ إيــــــــــــه

ام علي رفعت ايدها::

ــ ياالله تعطيك خيره وتكافيك شرره يااارب

ريما من ورى الستاره..

ــ كشششششششخه.. يبغى له تظليل وستاااير.. ويش بتسميه ياخوي... ؟؟؟

ــ ويش باسميه... خخخخخ تعرفيني مو تبع تسميات.. اكيد على اسمي ميكرو علي آل .. للتوصيل المدرسي والمشاوير الخاصه..

ليلى : ــ الله يرزقك ان شالله ويعطيك على قد نيتك..

ابو علي وصل ليهم.. والأبتسامه مرسومه.. وسؤال عفوي ....

ــ ويش نوعه...؟؟

ــ نيسان..

ابتسم ابو علي ..

ــ زين تماام.. كفت فلوس الطراد لو ويش..

علي بهدوء.

ــ ماكفت كامله للجديد ,, بعت سيارتي و كملت ثمنه وبقايا فلوس السياره سددت فيها فاتورة التلفون وحطيتهم في البنك..

ابو علي بفرح:

ــ عساك سالم .. عساك ذخر .. يعطيك العافيه...

علي : ــ الله يعافيك يبه ويخليك.. ماسويت شي .. قليل عليكم والله

ابو علي بهداوه وسؤال عفوي ثاني:

ــ الا ويش لونه...؟؟

ريما : ــ فضضضي..

ابو علي : ــ يالله ترزقك ان شالله وتعمي عنك عيون الحاسدين وكيد ولاد الحرام..

ليلى.. تطالع في ابوها واسألته العفويه.. تحس في قلبها غصه... ويش نوعه.. ويش لونه.. والدعاء اللي كان من قلب.... تنهدت في قلبها..

ــ الله لا يحرمنا من بصيرة قلبك يالغالي...

ريما :

ــ ماااابتااخذني فيه مشوار

ام علي:

ــ داويه هالمصفعه دي .. وين ياخذش به.. دون السياره يعني؟؟

ــ ياااعلي الواحد ما يقول شي الا شابقتوه. داويه..

علي : ــ ههههههههههه وين تبغي اوديش به؟؟

ــ مـــــــادري !! اذا جت على بالي طلعه على طول باقول لك...

الفرحه مهي سايعه بيت ابو مؤيد... وناديه من درت بالسالفه صارت تتطفر وتهدد وتتوعد فيهم ان جى ربيع وراحو بدونها لبيت ابو علي .. ينتظروها في ربيع عند زوجها اجازه اسبوع..

ليلى تحوس في درج من دروجها.. تطلع الكتب الزايده والعفسه.. وبين ماهي تحوس طاحت صوره .. شالتها الا هي صورة صالح مع علي ...

ظلت ماسكتنها تتأملها... تحس نفسها مهي في الدنيا... ايدها ترتعش ..

وانفاسها تتلاحق .. قلبت الصوره على التسريحه وصارت دموعها تتناثر لا اراديا...

ريما كانت تسبح... ولما طلعت ما انتبهت لليلى اللي تركت الغرفه وفي ايدها الصوره..

وصلت المجلس وكان علي يبدل ثيابه بينام.. ماشاف من تحت الباب الا صوره تدخل..

شالها وقلبها...

وصار يتأملها بألم.. عرف انها ليلى اللي دخلتها.. تنهد..

ــ رحمة الله عليك يالغالي..

قرأ على روحه الفاتحه.. و ما طلع لأخته .. عارف انها بهالحركه اللي سوتها ما تبغى تواجهه ولا تسمع أي كلام..

وفعلا .. رجعت ليلى غرفتهم.. على طول للسرير انيس الوحشه وكاتم الهم والأسرار..

تغطت.. وهالمره .. نامت وفي قلبها غصه والدموع مجافيه عيونها...

بعد كم يوم... اتصلو المعرض في علا ... ومعاهم خبر يسر... واحد راعي حسينيه شاف لوحتها وعجبته ويبغى يشتريها...

علا مهي عارفه تتصرف .. وابوها كان في الدوام واذا رجع تعبان وماهو فاضي هالأيام..

علمت سوسن بالسالفه..

سوسن بفرح:

ــ افااا عليش وين رحنا اني و اخووي..

علا سكتت وتحس روحها مستحيه..

سوسن:

ــ تبغي تحرمي اخوي من شوفتها ..!! متحمس يشوفها والحين بتنباع..

علا ماترد ووجهها والخجل اللي معتليه يغني عن الكلام..

سوسن ابتسمت:

ــ خلاص اكلم هشام ونروح نخلص امرها..

ــ تسلمي غناتي..

ــ الله يسلمش ولوو..

سوسن كلمت هشام قدام علا..

ــ هلا ياخوي .. اخبارك

هشام: ــ تماام اخبارش انتين عساش بخير

ــ الحمدلله بخير .. اقول ويش عندك الليله؟

ــ ولا شي .. آمري..

ــ تسلم غناتي لا بس بنروح اني وعلا المعرض للوحه

هشام طار من الحماس:

ــ والله... ليش فيه عرض الليله لو كيف؟

ــ لاااا.. بارك لعلا لوحتها يبغى يشتريها واحد

هشام ماعجبه الكلام:

ــ هاا.. ليش .. معروضين للبيع؟؟؟

سوسن انتبهت لنبرة هشام انه مو عاجبنه الوضع..

ــ ايه .. اذا رضى الرسام يبيع ليش لا....

ــ ولوووووووويش ماقلتو لي هالمعلوومه انا فكرت عرض وبس...!!

ــ بسم الله ولو قلنا لك يعني ويش بتسوي.؟؟

ــ بشتريها..

ــ هههههههههههههههههههههههههههههه

ــ على ويه تضحكي؟؟

ــ عليك.. ليش شفتها انت؟؟

علا اختلعت.. ويش فيهم .. على ويه تضحك وويش اللي شافها..

سوسن بعفويه تكلم علا والسماعه على اذونها..

ــ يبغى يشتريها يقول

علا ارتبكت و ابتسمت..

سوسن: ــ ظرريف ابو الهشم.. لحسينيه اللي حجزها يبغاها..

ــ اهاا.. اجل خلاص غيرت كلامي حلال عليه دام لحسينيه..

ــ ماني قادره عليك متحمس مره..

ــ ايه .. ابغى اشوف ...

ــ ويش تشووف؟؟ << تتعيلف فيه

ــ هاا.. اللوحه..

ــ هههههههههههههههه الليله على خير الليله..

ــ ظرررريفه.. بلا ضحك..

ــ هههههههههههه زين خلاص الساعه 8 ونص موعدنا على خير

ــ على خير..

عادل ماسك ورقه وقلم ويشخبط..

ام عادل:

ــ اكتب اسمك..

عادل بزهق:

ــ ماعررررف...

ــ يوو هذاني معلمتنك كم يوم نسيته؟؟

ــ اييه ولا ابغغغغغغى اتعلم خلاصصص

ــ ويش فيك؟؟

ــ ماففييييني شييي .. باااقووووم اطططلع...

ــ زين انتبه لروحك...

طلع والزهق واصل حده.. مو عارف وين يروح وويش يسوي ..

الا يشوف في وجهه اشرف وهالمره مو لحاله وياه ابوه.. ركبو السياره ..

عادل صار يتمشى.. وطول ماهو يتمشى سيارة اشرف وراه.. شوي طافته...

كان اشرف رايح مع ابوه لبيت ابو جاسم.. اشرف حايل في ابوه يروح وياه على شان ابو جاسم و انه ولده كان يشتغل من قبل في السوبر ماركت وحقه عن شهر ما اخذه .. وعلى شان يواسيه جيران و ساكنين في فريق واحد..

تابع>>

[Princess]

وصلو بيت ابو جاسم.. وطقو الباب

ابو جاسم كان منبطح و غافيه عيونه..

زينب وقفت عالباب..

ــ مين.؟؟

اشرف من سمع صوتها طاح قلبه...

ابو اشرف:

ــ قواكم الله..

زينب: ــ هلا الله يقويك..

ــ ابو جاسم موجود..

ــ ايه دقيقه..

راحت لأبوها...

ــ يبه .. يباااه

ابو جاسم راحت عليه النومه..

وتصرخ زينب :

ــ يباااااااااااه

ويطفر ابو جاسم وبحمق:

ــ وخناااقه.. ويش بش يالمزعجه يالأذيه...

ــ واحد يبغاك عالباب

ــ تستهبلي ماتعرفي تقولي له نايم.. مو هنا... ما تعرفي تقولي له منهو هو وتالي اشوفه...

ــ استحيت..

ــ انا لله...الاقيها من نكد امش لو من خبالتش

زينب في بالها..

ــ ويش سووويت اني.. ياربي ...

قام وهو مو قادر متكسر تكسير..

فتح الباب ..

ــ هلاااا هلا بأبو شريف هلا وسهلا...

ــ هلا فيك ابو جاسم شحوالك..

ــ حياك الكريم هلا ولدي شريف تفضلو تفضلو..

ابو اشرف:

ــ يالله يالله..

زينب راحت المطبخ تجهز ضيافه...

ابو جاسم قعد وياهم شوي صارو يسولفو عن احوال الفريق واخر اخبارهم.. استأذن ابو جاسم وراح المطبخ بياخذ الضيافه.. الا زينب ناطه:

ــ مين هذيلا؟؟

ابو جاسم بياخذ التبسي..

ــ ويش عليش انتين ويش اللي يهمش..؟؟

ــ بل .. بس كذا اسال..

ــ جيبي بش جيبي.. ابو شريف وولده..

زينب قلبها رقع..

ــ هااا..

ــ ويش فيش مفهيه... اهووووو جيبي فناجين غير هذيلا يفشلووو

ــ ويش فيهم..

ابو جاسم يرفع واحد منهم..

ــ عوبه انتين ما تشوفيه... شوفي ها.. منفلم.. تبغي تشقي برطم الرجال..

ــ يووووو ما انتبهت له..

ــ تشيه تنتبهي لويه انتين ,, الله يعين بس .. اخلصي ..

حطت زينب غيرهم... وراح ابو جاسم المجلس..

زينب قعدت وصارت تضرب افكار..

ــ ويش صاير ولويه جاي ويا ابوه...

ممممم .. لا يكون... لا يكون بيخطبني...

لااااا ويش اهلوس اني... احد يخطب في صفر ؟؟!!

ممممممم ياربي ويش فيهم.. لويه يعني ثنينهم...

ابو جاسم والأسى مبين على وجهه..

ــ ويش اسوي ياخوك.. هو اللي جنى على روحه..

ابو اشرف: ــ بس لازم تزوره وتشوف اخباره.. ونتابع وياه.. يمكن نقدر نساعده وتخف مدة الحكم,,

ابو جاسم: ــ ياخوك ويش بيدي عليه .. ويش اسوي .. مابيدي حيله..

ابو اشرف: ــ الله كريم .. انا باشوف لي يوم وبروح السجن المركزي وان شالله خير

ــ خير ان شالله....

عادل وصل بيت ابو جاسم وشاف سيارة اشرف على الباب وانصرع..

ركض ليها..

ــ دي ويش جاااااااااابها هنناااااااااااا

صار يشوتها منقهر

ويكفخ فيها.. الا بطلعة اشرف ويا ابوه

ابو جاسم شافه..

ــ هيه عادلووه ويش تسووي

عادل يشيل حجر وطرااخ يكفخ فيه السياره..

ــ ويش جاااابه عنددددددددددددددكم

اشرف صخن.. لا فضيحه عالميه عيني عينك..

ابو اشرف حمق فيه:

ــ اعقل يا صبي .. كسرت السياره..

اشرف ساااكت ماله بالة السياره اللي قايم فيها الشدخ.. له بالة الفضيحه مو كفايه ناصر الحين ابوه وابوها..

ويسمع دقات قلبه في اذونه من شدة التوتر..

ابو اشرف طفح كيله وطلع جواله يسوي روحه يتصل حق يخوف عادل..

ــ دقيقه دقيقه ان ما اتصلت للشرطه الحين... الووو الشرطه

عادل ماتشوفو الا غبرته.. هرب..

اشرف صار ينفض الحجر والرمل اللي على كبوت السياره .. ركبو و هو متوتر ومذهول ويحمد ربه عادل ماقال شي .. وفي باله:

ــ لاااازم في اقرب فرصه احط حد لتصرفاتك ياعادلوه..

عادل وهو يركض مانتبه وصقع في سيكل ياهل .. طاح الياهل من سيكله وصار يصيح ويصارخ..

عادل مو عارف ويش يسوي له... الا بجية اخوه الأكبر منه..

ــ ويش سووويت في اخووي ياخبل

عادل محمق فيه اللي مكفيه:

ــ مانننننننننى خبل وماااسسسسوويييت شييي انا ارررركض وصقعتتت فيه

ــ الا خبل وماتشوف ..

ــ اوووووووه

ومشى عادل..لكن الصبي لسا يتعيلف فيه...

شوي بدت شبقه وتجمعو صبيان الفريق عادل كان اكبرهم طاح فيهم شدخ اللي انفلع واللي تورمت عيونه واللي دمه صار يشخل .. مره عادل حزتها طايره طيوره ومستميت...

طلع رجال من اهل الفريق وطلب النجده وصارو يفككو عادل عن الصبيان ماقصر فيهم.. واحد منهم اتصل للشرطه اللي كانت بالصدفه عندها دوريه قريبه من سوء حظ عادل .. جو وشالوه ويا الصبيان اللي كفخهم لقسم الشرطه..

وانباعت لوحة علا بسعر حليو.. طبعا بعد ماصورها هشام .. وتدحن على حلاوتها وماسكت من قول

ما شالله فن وابدااااع...

علا بالفلوس اللي استلمتهم من الرجال حطتهم دافعة بلا عن عمرها وعمر اخوها صدقه في الجمعيه الخيريه اللي ترعى المعرض ..

هشام زاد اعجابه في علا اكثر واكثر.. ويوم عن يوم تكبر في عيونه.. ومهو عارف مشاعره شلون يترجمها وشلون ينهيها...

وفي آخر اسبوع من صفر..

ابو اشرف في السجن المركزي طلب فتح قضية جاسم وحميد اللي بعده في المستشفى تحت الملاحظه...

الضابط وضح له انه لو تم دفع تعويض للمسروقين راح تخف مدة الحكم الى سنتين ياخذو الحكم العام فقط..

ابو اشرف على حساب ولده والحاحه وعلى شان حجي عبدالرحيم يستاهل.. متابع الموضوع وناوي يدفع التعويض عن جاسم بدون علم ابوه.. لأن حجي عبدالرحيم ان درى بتقوم الدنيا ولا بتقعد..

فما يبغى يحرجه او يجرحه... وبيقدم الخير لوجه الله

عادل في قسم الشرطه .. الصبيان كلهم ضده,, وكذا رجال من الفريق وقف ويا عادل بحجة انه مو صاحي.. هالأمر ادى بالشرطه الى تحويله للجمعيه الخيريه عندهم قسم خاص لحالته.. يظل عندهم دام اهله تاركينه مأذي الفريق و يغربل احوالهم...

الكل حاول يطلعه .. ووقفو ويا ام عادل واولهم ابو اشرف .. واشرف ..

بس للأسف واحد من اباء الصبيان اللي كسرهم مو متنازل .. لأن ضربة عادل جت قويه لولده ورمت عينه ... ومايبغى حق الا ان عادل يظل هناك احسن له وليهم عن الشوارع والأذيه والتكفخ في خلق الله...

ام عادل مهي عارفه ويش تسوي .. ام علي وام جاسم كل يوم يزوروها وهي دنياها مهي دنيا بدون ولدها .. وهالشهر تخلص عدتها وهي وحيده وخايفه من خوالها واعمامها يجوها وترجع لحالتها..

وضعها كان يفطر القلب تفطير .. بس ويش بيد اهل الفريق واللي قدرو عليه سووه..!!

ودع الدنيا هلال شهر صفر الحرام.. وهل ربيع بأفراحه..

ولأول مره من سنين ام مؤيد تشوف الفرحه في وجه ولدها وتسمع منه الألحاح على سالفة خطبته.. تحس روحها بهالسنه اسعد انسانه... حددت ام مؤيد نهاية الأسبوع موعد الروحه...

ابو مالك .. لازال الكابوس يرافقه.. وكلما شافه قعد مختلع يقرأ الأدعيه والسور ويرجع ينام.. بس يحس مو فايدنه شي .. لأن نيته اساسا مهي صافيه.. والحق بعده في ذمته خانقنه لين يرجعه لأصحابه...

ابو مالك ظل يتقلب على فراشه ويتذكر المظالم اللي مسجله عليه...

تنهد..

ــ لازم اضيقش ياذمتي الوسيعه....

الى الملتقى

عذرا قصير بس لأن خلاص قريب تخلص القصه واودعكم...

:) بكره احتمال اتأخر اكثر في تنزيل الجزء سنعود للدوام..

من العصر الى 9 ونص.. نسألكم الدعاء..

[للدموع إحساس]

مســــــــــــــــــاء الخيراااات ،،
و يلي قصييييييييييييييير و حمااااااس ،،
و عاااااشووو و أخيراً حددت أم مؤيد الموعد ،،
و طحت يا مؤيد و ما أحد سمى عليكـ ،،
ياعلي خيهـ عادلوهـ ،، كسر خاطري
لا تخليهم يحجزوهـ عندهم حرااااام ،،
و حينب بدت تتحلحل سالفتها ،،
و أبو شريف واقف ليهم وقفهـ ،،
يلعن الحب و سواياهـ ،،
مو مخلي أحد ،، و هشام هع هع ،،
عجبني لما صور اللوحهـ ،،
و يعطيكـ ربي ألف ألف عاااافيهـ ،،
و سلمت يمينكـ ،،
و ربي يوفقكـ يا أمور و يسر أمركـ ،،
و يعينكـ ،، ياكريم ،،
و بـ إنتظار الجديد ،،
خااالص التحاااياااا ،،
للدموع إحساس ،،

[سفيرة الاحلام]

جزء روعه

لاتحرمينه من الابداع

ومانبي القصه تخلص بسرعه

ونتظر الجزء الجديد

[دمعة على السطور]

صحيح قصير البارت..
بس حلو وفيه تطورات واجد..
حاسة إن عادل مو بس مسألة نضحك على حركاته وينكت..
بصراحة صحيح لو نفكر فيها مأذي خلق الله كل يوم له شبقة >هوشة
فعلاً جبتي من الواقع..
في كذا ..
يعطيك العافية خيتي ..
موفقة دوم يارب..
دمتي بعين المولى الجليل..

(إذا انتهت القصة بنفتقدها مرررررررررررررررره )

موفقة يارب.

[المتحير]

صح صح صح صح صح

ما نبي القصة تخلص لالالالالالا

لازم تكون طويلة

[دمعة الاحزان]

اليوم قلت مو موفته الاجزاء زي اللي راحت
عندي شغله وبغيب عنها فترة طووويله
بس كان قصير بس حلو منك هالابداع
ومسكين عدول لا تخليهم يحجزوا عليه امه بعدين بتمرمط<<كأن كذا يكتبوها ولا كيف يلا مو مهم
بعدين خوال واعمام العازة مابيخلوها بحالها
واما زينب اصابت الهدف وماحست بحالها ولا جابت طاري ولد عمتها
وشراشف لاجل عين تكرم مدينه
وهو اكرم مدن بحالها لاجل عين زنوب وخلى ابوة يوقف وقفه

القصه بتنتهي بس متى ان شاء الله تنتهي قبل مايصير اللي ببالي عشان ماتوهق بعدين في قرايتها زي البارح
وامور انتي هنا ها عندك شي مخبيته ولا خلاص مامر هالوادي وافر بالوديان الثانيه
لان اذا عندك قولي بجي امرة قبل مانام
الله يوفقك غناتي ويعطيك العافيه ويسلاعدك ع الدوام
وانتم السابقون ونحن اللاحقون

[أحبك ياغلا عمري]

جزء قصير وروعه
مشكوره خيتو
بإنتظــــــــــار الجزء الجديد