ضعنا يا صبرنا...

[دمعة على السطور]

جاري الانتظار..
وكلنا شوق ..

موفقة يارب..

[Princess]

مرحبا
ماعليه تأخرت..
كل تأخيره فيها خيره..
ويش فيكم مسويين مظاهرات على صالح
يمكن مو هو؟؟
ولو هو؟؟
ليش اول خاين بالدنيا..

اليكم اليديد..

[Princess]

الحلقة 47 ..

بعد اسبوع..
ابو عدنان :ــ ها يا ابو مالك .. كن مضى اسبوع كل هذا تفكير .. ويش ياخوك اذا ماليها رغبه فيني يسهل الله علي وعليكم .. ولو اني طامع بقربكم مابحصل احد احسن منكم..
ابو مالك منحرج من اخته اللي مصختها.. وهو ماقصر سأل عن ابو عدنان في كل مكان.. غير انه صاحبه من قبل ..ويعرفه حق المعرفه..
ــ ياخوك خير ان شالله اشوفها وما يصير خاطرك الا طيب ..
ــ عساه خير .. ولا تستحو اذا صار نصيب .. اذا تبغى حفله والا أي شي .. مايردكم الا لسانكم..
ــ عساك سالم .. وان شالله خير..

بالصدفه رساله جت لابو مالك.. فتحها الا هي اخته سميره
ضحك ابو مالك:
ــ ما شالله عليك ,, من الطاري .. اكي رسلت .. تقول موافقه.. على بركة الله
ابو عدنان بطير من الفرحه..
ــ الف مبرووك علي وعليكم لو ادري من زمان جيت
ــ هههههههههههههه الله يبارك فيك .. غربلك الله ولا اول مره..
ــ تعبت ياخوك من الشحططه والوحده ذبحتني..
ــ عساه خير والله يسعدكم..
ــ يارب..

سميره.. ولأول مره.. تروح جهة غرفة سوسن.. وكانت معاها علا..
طقت الباب..
علا بعفويه..
ــ ادخلي تريزااا...
سميره دخلت وبهدوء :
ــ مو تريزا
سوسن كانت منسدحه .. قعدت مذهوله اول مره سميرة تركب ليها غرفتها من جت ليهم...
علا اعظم منها ذهول ... سميره جايه ليهم فوق؟؟
علا: ــ اسمحي لي فكرتش تريزا
سميره تسحب كرسي التسريحه وتقعد وهي مرتبكه..
ــ لا .. عادي..
علا مليون الف استفهام وتعجب فوق راسها.. ويش صااااير؟؟
هدووء ..
سميره: ــ الظاهر بخرب عليكم قعدتكم..
سوسن :ــ لا ويش دعوه.,,
سميره : ــ من دخلت وانتون ساكتين..
علا : ــ هاا.. لا بس اني كنت احوس وسوسن منسدحه.. ساكتين من قبل..
سميره :: ــ ايه.. زين..
سكتت شوي..
بعدين بتوتر صارت تحوس في بلوزتها.
ــ لا بس .. بقول ليكم.. اني وافقت على ابو عدنان..
سوسن بعفويه ..
ــ كلووووووش الف الف مبروك
علا منذهله.. وبابتسامه.. :
ــ وااااااااااااااو الف مبروووك عمتي ..
سميره مستحيه ومرتبكه.. وتصطنع اللا مبالاه..
ــ الله يبارك فيكم..
علا بفرح:
ــ الله من زمان مادخل بيتنا عرس .. افادي بعرس .. عمه سوي حفله تكفي..
سميره مرتبكه..
ــ تتوقعو..
سوسن : ــ اييييييه ليش لا ويش ناقصنش عن البنات..
سميره بنبره متكسره:
ــ البنات!!
سوسن بهداوه:
ــ ايه البنات.. انتين بنيه .. والله جاب لش نصيبش .. لزوم تستانسي ونستانس وياش..
سميره بأبتسامه صفرا:
ــ اللي يسمعش تقولي هالكلام يفكرني بت العشرين مو بت الأربعين..
علا وسوسن سكتو,,, مو عارفين ويش يردو..
سميره :
ــ ايه الحمدلله على كل حال ,, المهم الله عوض صبرنا وان شالله يكون ابو عدنان خير لي ..
سوسن بابتسامه:
ــ ايه .. كل تأخيره فيها خيره,.. ويارب كل خير...
علا :
ــ عمه لا تقللي من قدرش.. والله انش غاليه وعزيزه .. ولافي كلام ثاني .. حفله بنسوي يعني بنسوي..
سميره تلونت:
ــ ماليها داعي,,
علا راحت جهتها ومسكت ايدها..
ــ نبغى نفرررح.. وبرسل لمالك الخبر اذا يقدر ينزل البلد يومين على شانش ..
سميره:
ــ لا تأذيه خليه مقابل دراسته..
ــ عمه.. منتين اذيه..
وصارت علا ترسل لمالك..
سميره قلبها بطق بسرعه...
وصلت الرساله لمالك .. عشر دقايق واتصل
علا بفرح:
ــ قاااااااااااعد.. فكرته نايم..
وردت:
ــ الوو يالقاااطع.. لويه سهرااان لهالحزه
مالك ميت ضحك:
ــ الهوليدي اليوم .. اليوم سبت ويش فيش
ــ يوووو ههههههههه صح نسيت..
مالك:
ــ ويش هالخبريات الحليوات اللي وصلتني ,, ياخونه خلصتو كل شي
ــ ههههههههههه لا لسا باقي التحليل .. تقدم وهي وافقت
مالك : ــ كلووووووش...
ــ ههههههههههههههه حشا مليكه مو مالك
ــ وجهش بعد ماقلتي ملاك... وين هي .. قريبه منش ؟؟
ــ منهي .. ملاك لو مليكه...
ــ هههههههههه علوه عن اللعانه وين عمتي ..
ــ هههههههههههه هذي هي..
ومدت الجوال عليها
سميره صار وجهها احمررر’’ وعقدت حواجبها:
ــ مابكلم.. سلمي عليه
علا رجعت السماعه..
ــ تسلم عليك ماتبغى تكلم,,
ــ افااااااا لوييييييه ماوحشتهااا
علا تنقل ليها الكلام
سميره ابتسمت:
ــ وحشني هو ونحاسته.. بس مابغى اكلم,,
مالك صرخ:
ــ اهوووووو قولي ليها بلا دلع بنات.. وبسرعه جيبيها...
علا تنقل ليها الكلام..
سوسن ماتت ضحك,,
سميره تلونت.. خذت الجوال:
ــ الو..
ــ هلااااااااااااا هلا بالرقه هلااااااااااا هلا بالعروووس
ــ هههههههههه مالكوه استحي على وجهك عييييب
ــ ههههههههههههههه بعدش على هالعيب ..
وصار يتعيلف فيها:
ــ بكره ويا ابو عدنان مافي شي عيب
سميره فتحت عيونها:
ــ مالكوه.. قلة حيا.. استح على وجهك..
ــ ههههههههههههههههه فديت الحياويه.. الف مبرووك يالغاليه .. منه المال ومنش العيااال >> نسى انه مايجيب ولاد..
سميره بأبتسامه بارده:
ــ ايه.. تسلم...
ــ عطيني علوه..
خذت علا السماعه تكلم اخوها اللي سالها عن ابوه وسوسن اخبارها واخبار الحمل وياها وويش مسووين ...
وطلب منها بس كل شي يضبط واوكي يعطوه خبر حق يحاول يرتب جدوله وينزل البلد كم يوم على شان خالته...
ولما خلصت علا المكالمه.. صارت تصفق وتغني.. وسوسن وياها:
ــ ولااله الا الله .. على العروس ماشالله هلا هلا
سميره مهي متحمله الموقف .. لأول مره تحس روحها موجوده بالحياه وليها قيمه.. وان في احد يفرح وياها ويشاركها ..
بعفويه طغت الدموع في عيونها ..
سحبت نشافه و ومسحتهم بالسرعه
سوسن وعلا لاحظوها بس طنشو لا يحرجوها..
يعرفوها عزيزة نفس وقويه وماتحب تبين لأحد أي مشاعر ولا أي عاطفه...

ريما مع امها وابوها في الصاله...
ام علي :
ــ وين اختش ليلى ..؟؟
ــ وينا بعد في الغرفه فترة الحداد ماخلصت
ابو علي حمق فيها :
ــ استحي على وجهش يابنيه..
ريما عصبت : ــ خلها هي تستحي عايشه على ذكرى واحد ميت وجاينها نصيبها وترفسه وتتدلع..
ام علي : ــ ااااخ منش ومن هدرتش اللي ماتخلص ..
ريما : ــ واني الصادقه حاصل ليها رجال مثل مؤيد في هالزمن.. ولو انه كان متزوج.. خسااره بس ما يبغاني
ابو علي يشدخ بالعكازه :
ــ اهو.. اهو اهو.. دلوني وينهي خلني الاعب بدنها بهالعصاه... استحي يا بنيه..
ام علي : ــ ايه.. وين يستحو هالجيل .. لول حنا طاري العرس يخلينا مره ندوب دوبه وهديلا مصفعين ياكافي الشر من هالزمن..
ابو علي : ــ وفاني شي كبير عليش وايد..
ــ ويشو فرق 12 سنه .. عادي..
ابو علي يرمي عصاته بجهة الصوت..
ريما تتفاداها:
ــ ياااااااااعلي صعايده مو اهل .. كل شدخ ومشادخ..
ابو علي بيقوم :
ــ هدوني عليها قليلة هالحيا دي .. هدوني..
ريما هربت الغرفه وسكرت عليها الباب.. وهي تنافخ وميته ضحك.. والتفتت لليلى اللي كانت تقلب بقايا اوراق وذكريات..
ريما بحمق :
ــ باموت.. قهررر .. طلع من خشمي دخااان..
ليلى ببرود وهداوه:
ــ ثور ؟
ريما بسخريه: ــ هي هي هي .. تعرفي تستظرفي حضرتش..
ليلى ما ردت عليها و رجعت تقرى في الدفتر..
ريما تتعيلف :
ــ اقري .. اقري ذكريات روميو الحبيب .. الله لا يبلانا.. والا وحده يحصل ليها رجال خوش فله ... وتقعد تنحب على واحد خلاص ما بيرجع..
ليلى جتها غبنه:
ــ الخوش فله اخذيه لش..
ريما صفقت صفقه قويه وفردت ايدها بقهر وهي تشبر:
ــ موووووو ماااااااايبغاااني لو يبغاااني انحلت المسأله..
ليلى ببرود:
ــ بايخه..
ريما تطالع في المرايا:
ــ ويش ناقصني .. والموضه الحين ياخذو الصغيره ويخلو الكبيره..
ليلى تنهدت وسكرت الدفتر..
ــ لوعتي شبدي..
انسدحت وتغطت..
ريما :
ــ نامي .. يا خيشة النوم والنكد.. ما يلوع الشبد غيرش ... اصدق ما جفت عيونش من الصياح..
ليلى حاقرتنها وماترد...
ريما : ــ تزهقوووووو .. والله لو ادري لحقت علووه في الميكرو احرسه من النسوان احسن لي ماااااااالت...
قعدت على سريرها وحطت السماعات.. وانسدحت..

تابع>>

[Princess]

ليلى تحت البطانيه.. حاطه ايدها تحت خدها و عيونها غرقانه دموع...
ورحلت للذكريات..
علي : ــ وفففففففف ... وفففففففففف
صالح : ــ طار الورق شوي شوي..
علي : ــ هلكتني دي كل دقيقه اسحب فنتين .. اسحب اربع
صالح : ــ ماتعرف تلعب اونو حق ويه قاعد
علي حمق : ــ مسوا يبغى ليها ذكااء .. الا حظي معفن ..
ويحط ورقه .. وببرود:
ــ حطي يا حظي
ليلى فيها ضحكه .. وترجع تحط له ..ورقة السحب 4
علي فتح عيونه:
ــ داااااااااااااويه خلصووو كلهم عندي ويش مانى لاعب
صالح يدحن ضحك ..
علي ينفر الورق .. وبحمق :
ــ زيا ليهال هاا.. ان شالله اشقهم بعد..
صالح : ــ ههههههههههه ماااااااااالت عليك .. صبر بنغير اللعبه بنلعب بطريقه ثانيه..
ــ مانى لاعب .. بطلت..
ــ ايه انت الصيده وتخب عليك..
ــ هين اراويك .. مفكر بسكت عنك..
ــ هههههه يمه يمه خفت.. ويشب تسوي..
ــ هين..
ويلم علي ورق الأونو ويروح يرميها درام.. >> كانت لصالح
صالح مات ضحك:
ــ ههههههههههههه قسم بالله زي اليهال .. ظررررررريف حدددك...
ليلى طلعت من تحتها وحده بالغلط مرميه وكانت مقلوبه .. عدلتها .. وكان لونها احمر..
ــ ظلت هذي..
علي : ــ اهو جيبيها برميها ويا اهلها....
صالح : ــ يصقعك.. ماعليش جيبيها..
ليلى بين نارين.. :
ــ اهوو عني انت وياه .. برميها واللي يصيدها له..
وترميها ويتراكضو عليها ويتدحنو.. بالأخير انشقت والجزء الأكبر عند صالح..
صالح ميت من الضحك:
ــ هو هو هيييه.. ههاااي ربحنا..
علي : ــ غربال .. دست فبطني عساك ويش اقول..مادري ويش بتسوي فيها عاد..!!
صالح بابتسامه وهو يحرك حواجبه:
ــ مممممممم ويش باسوي فيها.. دقيقه..
ويروح يجيب قلم .. ويكتب عليها..
سأعود يوما.. وكل شوق ..اذكريني .. ولا تنسيني ..
صالح حطها بالمقلوب جهة ليلى..
ليلى شالتها قلبتها وقرت اللي عليها ,, استحت ..
علي فتح عيونه:
ــ ويش كاتب فيها من صاقعه..
صالح : ــ احم ويش لك من شغل .. كاتب لمرتي
ــ هههههههههههههه احلى يا مرتي.. هيه.. تراكم مخطوبين بس.. ولا معقود عليكم.. انتبه هاا.. وخلك سيدا لا يمين ولا يسار
ــ هااا.. تشه ويش باسوي؟؟؟
ــ تلعب وياها اونو .. تلعب وياها الخشه.. طراقين اعدلك..
ليلى استحت وقامت عنهم..
صالح : ــ ههههههههههههههه قلل الله حياك.. صحيح متعيلف .. انشب لا انتفك واستح على وجهك زين..
ــ احم.. على امرك عمي..
ــ ايه.. مخاوي بليس ..
ــ هههههههههههه خاواك جني مو انا مخاوي بليس..
علي يرجع للسالفه:
ــ اقوول لا تغيرها .. مامن مفر .. جيبي باشوف ويش كاتب..
ليلى عطته الورقه...
قراها..وصار يدحن ضحك:
ــ ايوا ايوا... يصقع الأونووووووو... يصقع الرومنسيه
صالح : ــ كح كح ويش على بالك ؟؟
علي : ــ ايه .. فشلتنا.. الناس يكتبو على ورق على ورود على حركات وانت على ورقة اونو منشقه
صالح : ــ لا تغلط .. حمرااااااااااااا ,, وهذا يكفي للرومنسيه
علي : ــ برميها..
ليلى بعفويه صرخت:
ــ لااااااا
علي نقز: ــ ههههههههه بسم الله.. خذيهاااا
صالح استحى:
ــ ايه مفكر الناس زيك جلفين..
علي : ــ الله يعيني عليكم يالرومنسيين.. قوم بس نطلع
ــ وين بنروح..
ــ أي مكان..
ــ زهقااان..
ــ الا لصقة ريح ولا تشبع .. لاااااااااااحق على المقااابل قووم نطلع ضايق بالي
ليلى استحت ودخلت غرفتهم.
صالح فلص علي:
ــ يا متعيلفووه يا نحيسووه... اللي يسمع مانا وياكم 24 ساعه.. اراويك لكن.. امش بس ..

انتبهت ليلى من سرحانها المعتاد على صوت بابهم يطق شوي شوي..
الا هو علي..:
ــ نايمه؟؟
ريما تتحمق :
ــ لا قاعده تندب الحال
علي تنهد .. وقرب منها كانت مغطيه جسمها كله بالبطانيه.. قرب منها وكشف راسها لقاها ضامه المخده وخاشه وجهها فيها..
صار يمسح على كتفها وشعرها..
ــ خيه مهي حاله دي .. مايصير تدفني روحش بالحيا.. اللي مات الله يرحمه والحي ابقى من الميت..
ريما :
ــ تعبت منها.. لساني تقطع من الهدره مايفيد..
قعد على جنبها.. وانتبه للدفتر
شاله وهو محمق:
ــ انا هذا اللي برميه درام
ليلى قامت بلا وعي وصرخت:
ــ لااااااااا.. جيبه
خطفته من ايد اخوها وصارت تصيح,, علي عصب عليها:
ــ لا والله دي مهي حاله.. انا الحين جاي بسألش عن رايش .. وويش فكرتي للحين..
ريما : ــ خخخ خخخخخخخخ أي راي .. المكتوب مبين من عنوانه
علي بقهر:
ــ مين كلمش انتين؟
ريما : ــ وففففف وانتون كل تسكتوني وكل تشابقوني ماكني اختكم مالت عليكم
وقامت طلعت عنهم..

علي بهداوه:
ــ ياخيه مؤيد مافي منه.. رجال والنعم فيه.. مدرس و شقته موجوده في بيت اهله وحالته مستوره والأهم ملتزم واخلاق ..
ليلى سكووت ..
علي : ــ ردي علينا زين .. ايه لو لا.. حرام نخلي الرجال معلق كذا .. مايدري تبغيه لو ماتبغيه.. والله شفته اليوم حسيته يدور الرضا لأرضى.. مو عارف ويش يسوي لي .. كل دا على شانش..
ليلى ابدا ماكن علي موجود في عالم اخر..
علي بعصبيه..
ــ وبعدين .. كني اكلم روحي .. والآخير..
ليلى بهدوء متقطع:
ــ مابغاه..
علي بذهول: ــ ليش عااد.. ويش فيه من عيب حق ترفضيه؟؟
ليلى وانفاسها مخنوقه:
ــ مابغاه ولا ابغى غيره..
ــ حرام هاللي يصير حرااااااااام .. بتموتي روحش بالحيا .. خلاص عاد عيشي حياتش ..
الا جوال علي يرن .. وكان عبدالرحمن..
ــ هلاااا حمنّوووه اخبارك .. ايه... زين ربع ساعه وانا عندك.. حياك..

سكر الجوال والتفت لأخته..
ــ فكري اكثر .. ولا تستعجلي .. بطلع الحين ويا عبدالرحمن ..

طلع عنها... وطلعته من البيت صادف اشرف ..
وبعد السلام والسؤال عن الأخبار..
اشرف بعفويه:
ــ الا ويش اخبار بيت خالك .. من تركهم جاسم ماليهم حس
علي : ــ الحمدلله على كل حال الله يعينهم ويصبرهم..
ــ رحم الله ايام عادلوه بعد والتعيلف ..
علي : ــ وين هو صحيح؟؟
ــ خذوه الجمعيه .. اشتكو عليه ناس اذى العالم ضرب وتشدخ وماخلى سياره الا شلخها بحجر..
ـــ الله يعين امه ويساعدها..
ــ الا متى زيارة جاسم؟؟
علي مستغرب:
ــ اللي ادري به كل شهر مره والحين باقي اسبوع تقريبا و يمر عليه شهر .. لويه..؟؟ بتزوره؟؟
اشرف يحك راسه:
ــ مممممم افكر اخذ حجي عبدالرحيم واروح وياه
علي ابتسم ابتسامه عريضه..
ــ يعطيك العافيه انا متفق ويا خالي اول زياره باروح وياه...
اشرف واماله خابت..
ــ ايه.. عساه خير .. المهم ياليت لو تعطيني خبر قبل لا تروحو حق اروح وياكم
علي : ــ خير ان شالله.. كم رقم جوالك..
وخذو ارقام بعض .. ومشى علي عن اشرف..
اللي كان بليس يلعب في راسه..
ــ ووووووففففف ولد عمتها .. و ما يعيبه شي .. وثنينهم على قد حالهم.. ياربي .. لا يكون ابو جاسموه من اللي يتبعو المثل .. دهنا في مكبتنا.. لا بالله بينكت دهني لو طرتي مني يازينب..

تابع<<

[Princess]

علي مع عبدالرحمن في مطعم...
عبدالرحمن بسعاده بالغه:
ــ الحمدلله عرفت التكاليف واحكام التقليد و بديت اقرأ في المسائل المنتخبه لعل وعسى اتثقف اكثر واكثر..
علي بسعاده: ــ الله يكملك بعقلك ويعطيك على قد نيتك.. ياخوك شباب منا ما يعرفو شي من التكاليف ولا احكام التقليد حدهم مين تقلد وبس ..
عبدالرحمن منذهل :
ــ والله !!
علي بأسى : ــ أي والله.. ويجيك بعضهم يجيب الهم والمرض حتى اسم المرجع اللي يقلده مايعرفه...
ــ ياساااترررر...ليش كذا؟؟
ــ والله ياخوك .. شي راجع ليهم هم اللي بيتحاسبو.. طمني عن اخبارك ويا الدنيا واخبار شغلك..
ــ الحمدلله خبرك اني شاطر في التصميم والحمدلله ماشيه اموري في المطبعه من الصباح الى العصر وبعدها اروح اداوم كاشير في سوبر ماركت ابو شريف ماقصر الرجال ..
علي : ــ ايه.. ابو شريف خيره سابق على الكل ومن عرفك وشاف حماسك و التزامك وهو منعجب فيك..
عبدالرحمن ارتبك وخجل..
ــ ههههههههه اف .. والله من ذوقه ومن طيب اصلكم يوم عرفتوه علي ..
علي : ــ اخوي وعزيز وغالي افا عليك .. منا وفينا الحين انت..
ــ الله لا يحرمني منكم..
ــ ولا منك يارب..
عبدالرحمن بفضول:
ــ ولو اني احس فيك شي ومخبيه علي .. منت على بعضك و متلخبط
علي تنهد:
ــ مالوم روحي اذا عزيتك وحبيتك.. وانت تحس فيني..
ــ ايواا يعني صدق احساسي.. ياخوي فضفض ماحد واخذ منها شي..
ــ اختي يا خوك.. اختي..
ــ خير ..شفيها...؟؟

وصار علي يقص على عبدالرحمن مأساة ليلى عل وعسى اذا ماجاب له حل يكون طلع همه وفضفضه..


كان في الجمعيه ممرض فلبيني .. عادل كل يحط دوبه دوب هالممرض..
الممرض يمهل بين كل كم يوم يجي يسألهم مايبغو شي لو مايعورهم شي .. وعادل متعيلف يوم بطنه يوم راسه يوم ظهره..
وهالمره قام يتعيلف في الممرض:
ــ طششششششششووونه انت من وييييناااااااااا جااايبينك شوووف انااا اطوول منك
الفلبيني صار يضحك عليه..
شوي :
ــ هاادااويه وجهك ششششششخطين نقققطتين شخخخخخط << قالها وهو يأشر على وجهه شخطين العيون نقطتين الخنافر و شخط البوز..
الفلبيني عصب فيه..
ــ خلاااس عاادل ..
ــ ويشووو خلااااس بعد ههههههههههههههه.. لا صحيح شيفااا تشووف وعيووونك كككدااا ؟؟
ويشحط عيونه يسويها زيه:
ــ مااششششوووف اننااااا ,, بلللل عليك كيفااا تشوووف..
الفلبيني حاقرنه.. ويشوف شغله مع البقيه..
عادل:
ــ هيييييييه ماتحقر انت لا سطططااار..
الفلبيني مستمر في الحقران..
عادل يتعيلف..
ــ احححلى مافيك شعررك.. بس تدررري حتى هوو ويييع.. يذكررررني بأشرررفووو
ويحوس في شعره..
ــ هههههههههه الله يخلللي الفلالالالافففل لييي.. اققققوول صددديق قققول ليهم عععااادل افففاااده بفلاااافل..
الفلبيني يوزع ابتسامات.. وطلع عنهم..
عادل زهقان ولا هو عارف ويش يسوي... طلع برى الحديقه.. وصار يتمشى.. شاف خنفسانه سوده كبيره بعض الشيء .. صار يلاحقها ولما صادها اخذ غرشة ماي فاضيه وحطها فيه.. وصار يخرش بها .. لاعبها تليعب وكلمن مر عليه خرش جنب اذونه..
ــ اسسسسسسسمع..
وهو يخرشها واحد من اللي وياه جته نفضه انتفض ..
عادل صرخ فيه:
ــ بسسسسسسم الله الررررحمن عزرررااائيل نفضك شااافك بعدك ماااجى حييييييييينك وخلاك.. << متأثر بسوالف امه..
شوي الا الخنفسانه ماتت ..
عادل صرخ:
ــ وووووووووو يش هالنااااااااايبه خذها عزرررراااااااااائيل مو لو ماااااااااخخخخخذذنك احسسسسسن .. تهي تهي .. خنفساااااانتي..

جمع له كم واحد وراح وياهم الحديقه..
ــ يللاااا بندفنهاا الله يررررحمهاااا
دفنها وحط فوق قبرها عود ريحان..
ورجع يلعب ويا الصبيان..

بعد كم يوم طلعت نتيجة تحليل سميره.. توافق... وفرحو بيت ابو مالك ومعزمين يسوو حفله الأسبوع الجاي.
وصارت علا تتصل على العالم تعزمهم..
اتصلت على بيت ام علي ..
ردت عليها ريما..
ولما قالت ليها الخبر و سألتها عن ليلى..
ريما ماصدقت على الله وبطت السالفه لعلا .. وقالت ليها انها مقهوره عليها بتطير الخطيب ..
ام علي جت ليها:
ــ يلعن الفضايح تكلمي مين ماصااار شي..
وخذت السماعه..
علا :/
ــ هلا خاله اخبارش ..
ــ هلا بتي هذا انتين.. هلا غناتي ويش مسويه..
ــ الحمدلله.. ماعليه الليله باجيكم ابغى ليلى..
ــ يابتي ياليت والله تقعدي وياها وتهديها وتنسيها همها.. نبغى نفرح تعبنا هموم..
ــ ان شالله خاله.. مايصير خاطرش الا طيب
سكرت علا.. والفكر شاغلنها..
ويش بتسوي.. وشلون توصل المعلومه لليلى بطريقه ما تفجعها بها..
وفرضا مو صالح ولد عمتها واحد ثاني وتشابه اسماء..
بس مستحيل.. دمه ملامحه شكله.. مر عليها وتذكر شافته.. مو غريب..


في بيت ابو جاسم..
ابو جاسم في الحمام يسبح .. ومروق وقاعد يغني:
ــ سيسبان الحلو
يا سيسبان الحلو قلبي حنون عليه
واتسحجت من عصر وارمت ابروحها عليه
واتعجفت من عصر وارمت ابروحها عليه

ام جاسم تبغى الحمام.. مستعجله.. وتسمع ابو جاسم يغني كذا.. وتشادخ في الباب..
ــ اخلللص بلا سيسبان بلا بطيخه.. وهون عن هالأغاني لول على النيات نهربد ولا ندري ويش نقول الحين ما تصلح..

ابو جاسم بغاها من الله تفك نكدها ووتعيلف..
ويكمل الأغنيه وهو يصفق:
ــ واتلبست من عصر وارمت ابروحها عليه
واتخضبت من عصر وارمت ابروحها عليه

زينب فاتحه عواينها برى..
ــ ووووويش يقوول ابووووووي
ام جاسم تشادخ في الباب:
ــ حررررررررررريقه.. خلااااص
ابو جاسم:
ــ تغاري من سيسبااانوو..
ــ غاارت عليها دبااابه.. يللا اطلع..
ـــ ولا مافي الا هالحماام روحي الفاني..
ــ مابغاه ابغى اسبح اني..
ــ وانا افكرش طوارئ ومستعجله.. صبري اخلص تسبوحتي تالي دورش..
ويكمل اغانيه:
ــ يا سيسبان الحلو قلبي حنون عليه
ياليتني اميمته امشي واسمي عليه
ياليتني اخويته امشي ابارك و عليه
ياليتني امريته امشي واهمز عليه

ام جاسم وصلت حدها..
وطرااخ تشوت الباب..
ابو جاسم طلع من الحمام:
ــ ههههههههههه من الغيره ياحلو.. ماغيرش سيسبانوو
ام جاسم مستحيه وفيها الضحكه بس تسوي روحها وتكابر..
ــ اهووو عني...
ودخلت الحمام ..
زينب تضحك على ابوها...
ابو جاسم:
ــ يؤ .. برى تتصوخي هااا..
تلونت زينب..
ابو جاسم : ــ الله يسعدش ويبلغنا فيش..
زينب في بالها: ــ ويدوم عليك هالروقان يارب..
شوي الا بصرخة ابو جاسم:
ــ وخناااااااقه قايل ما اطلع من الحمام الا مبكره القدووو
ام جاسم تصرخ داخل:
ـ متسبح ويبغى يتعطررر
ابو جاسم:
ــ سكتي فضحتينا .. اهوو بس اطلع احسن لي.. بتروحي وياي..؟؟
زينب : ــ ويناا؟؟
ــ وينا.. يعني ويناا انا اخذش عادة..
زينب : ــ ايه .. ايه باروح من زمان مارحت..
ابو جاسم :
ــ ام جسوم نتانيش لو لا
ام جاسم:
ــ لا روحو.. نعسانه اني بانام..
ــ نايبه الا خيشة نوم..
وطلع بيروح بيت اخته..

اشرف كان يطالع في النافذه.. من الزهق في الرايح والجاي.. وبس شاف ابو جسوم يتمشى ويا زينب من بعيد ..
نزل بلا وعي يررركض من غرفته .. ويطلع من باب البيت ولا ينتبه للدرج عدل .. نسى درجه
وطرررم طرااااخ على وجهه

الى الملتقى..

[جـــــوان]

خخخخخخخخخخخخخخخخ

ويلي ويلي

وا فشيلتاه على أشرف لا يكون طاح قدام حينب ؟


وإن شاء الله علا تفهم ليلى عن هالعلة صالح

وسميرة طلعت تستحي وخوش بنية

[آخر شقآوهـ ..~]

ههههههههههههههههههههههههههههههههآآآي
أكشن في أكشن ودخل في النص نكد
عدووول حركتآآت لآزم يتعيلف <~~سر سعآدته هع هع
أتوقع شرشفوهـ<~~بل
المهم خشمه بينكسر مسكيييييييييين كل هذآ حب أويلي

حركآت أني أول وحده قريتهآ هآآع
تسلمي يالغلآ ع الجزء الفلته
ربي يعطيك ألف عآفيه
تحيآتون
ضحكوهـ البطه

[للدموع إحساس]

صبـــــــــــــــاح الخيرآآآآآت ،،
و يا سيسبان الحلو قلبي حنون عليهـ ،،
مرة جخهـ أغنية أبو جاسم ،،
جعبتني عفر << عجبتني نعنو ،،
إلا ما جبتي طاري صالحوه نحسوهـ << أستغفر اللهـ سخطت عليهـ ،،
أدري في البارت الجاي ،،
لكن و اللهـ صدقت أم علوي على بنات هاالأيام ،،
و سمورهـ عاشووو بـ تعرس و أن شاء اللهـ الله بيرزقها ولد ،،
و شراشف ،، هع هع
أحلى شدخهـ بس واللهـ أشتهيت أشوفهـ و هو طايح ،، هع هع
و يا سييبان الحلو قلبي حنون عليهـ ،،
بـ الأنتظــــــــــــــــــار خيتي ،،
يعطيكـ ربي ألف الف عااافيهـ ،،
و سلمت يمينكـ ،،
خااالص التحاااياااا ،،
للدموع إحساس ،،

[الــــنـــاري]

يسلمو خيتو على الطرح الروووعة
بس لحين ماقلتي لينا ويش سالفة صالح؟؟
روحي تاكيد هذا اي صالح وتعالي قولي لينا زين
بنتظار البارت اليديد
يعطيك ربي الف عافية
ولاعدمناك يارب
دمتي بفظ الباري

[دمعة على السطور]

ههههههههههههه
ههههههههههههههههههههه
بصراحة ضحك ووناسة عدل..

بس ليلى الله يهديها..

حزنها حزن عجم..على قولتهم..

وهذي علا شكلها بتخوره عدل..
بقول كل شي..

حتى لو بتتراجع بتزيد البنية..

يعطيك العافية أمور..
موفقة يارب..
انتظر علا تقابل ليلى..
وفي ايدي العصاية أن فتحت بوزها..
ناقصين احنا بعد..>>اوه مجرمة البنت ..

هههههههههه
بطلع بلاهدرة زايدة

موفقة يارب..

[سفيرة الاحلام]

حلو الجزء

والحمدلله سميرة وافقت وتطلع اتحليل عدل

وليلى ان شاء الله توافق

واشرف مسكين ان شاء الله مايصيبه شي


وتسلمي على الجزء


بالانتظاررر

لا تطولي

[فاطمة المعصومة]

شكرا ع الجزء الروعة
انشاء الله صالح مو حي
وانشاء الله ليلى توافق على
مؤيد الصراحة خوش واحد
واتوقع اشرف بتنكسر ارجوله
واخيراسميرة بتعرس ونااااااااااسه
وانشاء الله بعد ليلى
وتقبلي مروري
تحياتي
فاطمة المعصومة

[Princess]

مرحبا

على فكره... على شان لا احد ياخذ اي فكره
اغنية ابو جسوم وهو في الحمام يسبح
من اغاني اهل لول القديمه..
ومن المتعارف عليه اغانيهم ( وصخه) وفيها ما يخدش الحياء..
زي ماوضحت ردة فعل ام جسوم وقهرها من رجلها وهو يقولها بأنها لا تناسب الوقت الحالي لجهلهم مسبقا بها..
يعني لا احد تعجبه و تصير على لسانه واصير اني السبب في نقلها ليكم..
وهذاني بلغت

لفت نظري رد الغاليه للدموع احساس وحبيت انوه عن هالنقطه

تسلمو عالتواصل حتى التقيكم مع الجديد
لكم مني خالص الشكر
دمتم بخير
وبحفظ الرحمن

[زهور الريف]

بسم الله الرحمن الرحيم

اللهم صل على محمد وآل محمد

وعجل فرجهم

جزء رااااااااائع

تسلم الايادي

موفقة

[المتحير]

شيلو صالح