ضعنا يا صبرنا...

[المتحير]

الجزء روعة بس ما فيه عادلوه!

[المتحير]

والاجزاء اللي ورى روعة واااااااااااااجد

[الــــنـــاري]

اخيراً وصلت اميرة
انشاء الله تكون جايبة البارت وياها

[المتحير]

وبالانتظاااااااار

[الــــنـــاري]

ونا هنا بالاعتصام
تضامناً مع اخي المتحري
وبعد الوفاة انشاء الله في مظاهرات
<< لم يتم تحديد الوقت الى الان
يلا خيتووووووووووووووووووووه
عجلي اشوي لا....>> مو كف !!
كاس ليمون عشان تروقي ونتين تكتبي ^_^
تمنياتي لك بالتوفيق

[المتحير]

يلا اميرة نزليه مدام انتي هون

[المتحير]

يلا لاني واقف عل قلبي

[Princess]

مرحبا
يعطيكم الف عافيه
ومأجورين
وتسلمو لي عالتفاعل الجميل
واسمحو لي .. عالتأخير

على فكره. خيه نبراس. اشرف هو شريف هو شرف.. تدليع يعني مع الأندماج ادلع في الأسم واني رايحه.. بس اغلب شي اشرف..
لا خلا ولا عدم من هالتواجد..

وياخوك يا سيدنا ( الناري ) اي كاس لومي و اني ما افضى للكاتبه الا بعد صلاة الفجر
تسلمو لي جميعا نفر نفر ونفره نفره.. واالله لوعندي وقت رديت عليكم واحد واحد
لاحرمني ربي منكم ..
تفضلو الجديد

[Princess]

الحلقة 36

علي من الخلعه صرخ صرخه.. اختلع ابو علي سمع صوت التفحيط..


ــ علي .. علي..


علي ينافخ من الخوف..


ــ هلا يبا..


ــ ماصار فيك شي ياولدي..!!!!!!


ــ لالا.. تطمن يبا.. ماصار شي..


ــ يابوك متأكد .. انتبه لعمرك..


ــ ههههه ماصار شي يبا .. والله هذاني احلف لك..


ــ حصل خير.. ننتظرك يالغالي.. امانة الله..


ــ مشوار الطريق..

نزل صاحب السياره وهو مذهول..


ــ علي..!!!!!


علي انتبه له .. وابتسم ابتسامه عريضه..


ــ هلاااا.. مؤيد....


مؤيد راح له وحضنه..


ــ هلاا ياخوك.. الحمدلله عالسلامه.. ويش هالصدفه اللي خلتنا نشوفك... سبحان الله..


ــ ياهلا فيك يالقاطع.. اما صدفه حلوه. توهم مفرجين عني الا بجيتك..


ــ تفضل اوصلك..


ــ لا ياخوك لا اكلف عليك شكلك وراك مشاوير ..


ــ لا وراي ولا شي .. واحشني ابغى اسولف وياك واشوف علومك..


ــ تسلم يالغالي..


ــ تفضل..

ركبو السياره..


علي : ــ متاكد ما وراك شي ولا اعطلك..


مؤيد : ــ عن اللعانه علي قلت لك ماوراي شي.. خلصت اموري .. كنت راجع من المطار للبيت مريت الا احلى صدفه خلتني اشوفك.. بسم الله على عمرك اسمح لي بغيت اكسرك..


ــ ههههههه مسموح مسموح.. انا اللي بلا وعي بعد بعبر الشارع مالي بالة شي حواليي..


ــ ايه ويش اخبارك ويش مسوي.. تصدق من فتره مع عبدالرحمن كنت ناويين نزورك بس تصير زياره.. الحمدلله يوم الله فرج عنك..


علي تهلل وجهه وابتسم فرحان حده:


ــ عبدالرحمن.. تعرفت عليه..


ــ إيـــــــــه والله وخوش رجال يرفع الراس ..


ــ فديته.. متمسك باللي عرفه وناوي يعني عن حق وحقيقه.. يارب توفقه وتحميه وتكثر من امثاله..


ــ يارب ياكريم..


ــ ويش عندك في المطار راجع من سفر لو موصل الأهل..


مؤيد بنبره حزينه:


ــ ايه.. مودع ..


ــ بسم الله عليك.. ويشو مودع.. مين مسافر عندك؟؟


ــ بنت اختي الصغيره.. اخذها ابوها..


ــ اهاا.. خلاص يعني انتهت فترة الحضانه..


ــ ايه.. وسافرت ويا ابوها..


علي يحط ايده على فخذ مؤيد وبهداوه:


ــ الله يكون بعونك ويعوض عليك..


ــ جميعا ان شالله..

في بيت ابو علي .. الكل له حاله...


ابو علي قام يتمسح بيصلي ركعتين شكر..


ام علي بعدها مهي مستوعبه لين تشوف ولدها وتحضنه تالي بتعبر عن فرحها..


ريما تناقز و تصافر و وتصفق تتعيلف فيهم..


ليلى لامه امها وقاعده تدعي في قلبها يوصل بالسلامه..

بيت ابو جاسم.. الحاله حاله..


ام جاسم سكرت عليها باب غرفتهم وقفلته.. وصارت تصيح على ولدها..


ابو جاسم قاعد في الحوش مسند راسه على الطوفه.. والفكر ماكل عقله


زينب قاعده على باب الصاله مقابله الحوش .. حاطه ايدها على خدها والدموع تسيل..


ابو جاسم بهداوه:


ــ جنى على روحه.. و اكلها علقه.. لو هو آدمي ما صار اللي صار..


زينب ولا نفس هدوء..


ابو جاسم:


ــ لو هو رجال ويخاف ربه ما رمى ولد عمته في الحبوس هالفتره..


زينب : ــ بس اعترف ..


ــ اعترف.. .. بعد ويه..


ــ المهم اعترف غيره لا بيسكت للأخير.. وهو متغير لاحظناه كلنا .. معتفس وحاله مهو حال...


ــ الله يفرج ... انا عندي ينحبس ويتعلم ويتأدب ويحس بمعنى الحريه اللي اهدر وقتها على خراط.. يحس بقيمتنا في حياته .. شان ينصلح حاله.. احسن له..


ــ ايه.. الله كريم..


ــ قومي شوفي امش .. خلها تبطل الباب.. واسيها خلها تطلع من هالغرفه..


ــ ان شالله..


ــ انا باروح بيت عمتش .. بتحمد ليهم بالسلامه وباشوف علي..

طلع ابو جاسم.. من سكر الباب ..بعفويه حط راسه على ذراعه المتسنده على باب الحديد.. وصار يصيح.. ينحب مثل الطفل .. ماطول.. بس طلع حرته..


مسح بغترته دموعه..


واتجه لبيت اخته..

تابع>>

[الــــنـــاري]

طلع المتحري زيي يراقب اميرة هههه
والله انا رحت اشوف قلت اذا ماشبكة لحين
بقوم انام بس زين اني تاخرت اشوي عشان
اصيدهاااااااااااااا>>
<< شكلها من كثر مانغثها ونعجلها بتوهن ماتكمل القصة ~_~

[Princess]

عادل في الطريق .. يدور وين النقعه في الشارع و يراكض فيها...

والحريم كلما مرت وحده صارت تتباعد عنه لا يوصخها..

مرت وحده ضبعه.. وهو يراكض ويفحط..

طفر عليها ماي..

صرخت حد ماعندها:

ــ نااااااااااااااااااااااايبه... دااويه..!!!!!!!

عادل اختلع من صرختها...وبعفويه صار يضحك..

الضبعه : ــ ضحكت من سرك.. فوق شينك قواة عينك.. على ويه الضحك ؟؟؟؟؟

ــ ههههههههه ععععلللى صرررختتتتش..

ــ صرختي تضحك.. حسبي الله عليك من صبي خبل مغربلنا ..

ــ ايييه كككنننش الساااحححررره الشررريررره

ــ عادلوه.. عادلوه يووووز عني هااا.. ماقول الا الله يساعد امك عليك..

رفعت عباتها وهي متنرفزه:

ــ ويييع ويش هالكسافه ويش هالقطين .. توي متمسحه جعلك ويش اقول..

ــ حققق ويه متمسحه.. بتصلللي صلالااااة ووويه؟؟ ونزلللي عبااااتش عيييب

ــ اني ان وقفت وياك وايد ما بنخلص من الهدره .. هههههه عيب ويه ويا وجهك ويش طلع مني خوب فوبي وملولح حاله حال هالعباه...امشي احسن لي..

ــ فتنه .. فتتتتتنه حررررام..

ــ مخاوي مين انت هههههههههههههه ياالله ترحمنا.. عساك غربال .. عادلوه روح بيتكم احسن لك.. قال حرام.. وفتنه.. يفتتنو فيني بويه ياحسره..

ــ بالجممماااال

الضبعه استحت:

ــ يؤ.. جعلك ويش اقول.. أي جمال.. قضينا وضبعنا.. هاداك لول جمال .. اييه امشي بس بلا هدره..

ومشت عنه..

وشوي وهو يراكض في الماي ... لفت نظره قطو يتمشى ببرود وهداوه.. ويا ارض انهدي ماحدا قدي.. قرر يتعيلف فيه..

ويشوت برجوله ويطفر ماي على القطو المسكين.. ويطفر القطو..

بيهرب مامداه لحقه عادل ومسكه.. وهو يحاول يهرب منه ويحاول يشمخه بس عبث.. !!

بالصاقعه صاد عادل شمخ ..

ــ آآآآآآآه اررراااووويك

ويمسكه من ذنبه ويلوح فيه لفه لفتين ثلاث والقطو يصارخ..

ميوووو

ويووووووووو

نيوووووو

مابقت صرخه قطيويه الا قالها

>> كثري منها..

ويرميه .. وبالصدفه اشرف طالع بيرمي خمام بيتهم الايشوف حاجه طافره وطرااخ في الدرام.. ويرمي اشرف فوقه الكيس

اشرف : ــ داااااااويه.. ويش صاااير؟؟؟

اشرف ما انتبه للي انشدخ في الدرام..

عادل ميت ضحك::

ــ لاععععبت به..

ــ هااا.. ويشو اللي لاعبت به..

ــ قطو كبيررر..

ــ صاقعه.. انت لو يطلع لك نمر لاعبت به ولا عندك فيها مو قطو بعد !! لا تقول اللي طفر في الدرام مكحين هذا هو..

ــ هههههههههه ايييه.. افتررر مخه فررر

ــ يالله يفر مخك ويهديك ..

ــ ومخخخك ياااارررب

ــ ههههههههههههههه لا انا اذا افتر مخي على الدنيا السلام.. انت لا يمكن يعتدل..

ــ تتوقعععع !!

ــ ايه يجوز..

ــ اججججججل تعاااااااال فررر مخي..

ــ كيفا افره؟؟؟

ــ هههههههههه زي عبااسسسو يقووول يفررر مخي بكف ..

ــ هههههه رحمة الله عليه ولا بنخلص من طاريه !!

ــ تصصصصدق وحشتني طراقااااته

ــ عجيـــــــــــــــــــــــــــــب !!

ــ هههههههههه والله احس بدددني يحرررني ..

ــ تعال الاعب بك..

ــ لالا.. ههههههههه خخخلالالاااااااص..

ــ هذا اللي ماخذينه منك .. خلاص وخلاص..

عادل بهدوء وابتسامة حيا:

ــ اشرف.. شريف .. شرششووووفه..

ــ اه.. ويش صاير مابقت تدليعه.. خير ..!!؟؟

ــ شرررشفي..

ــ هاااااااا.. شرشفك.. عاد لهنا مصختها.. انشب <<يهزأ وهو فيه الضحكه..

ــ احبببببببككككككك

ــ هههههههههههههههههههه وربي انك منت صاحي .. حبتك الزهرا.. حتى انا احبك..

ــ لا مااابغى زهررا ابغى زييينب

اشرف فتح عيونه:

ــ استغفر الله ياربي .. عادلووووه تأدب وريــــــــح...

ــ زين .. بسسسسسس ترررا احبك انننااا..

ــ تسلم وانا احبك بعد...

ــ ماااسألللتني لووويه احبببك؟؟

ــ هههههه غربال يعني فيه سبب مصلحه..!!

ــ مصلحة ويه... منهييي دي .. تشيه فيه مَرَه تصلح؟؟

ــ خخخخخخ خلف الله عليك .. وعلي اللي اجاريك.. حق ويه تحبني..

ــ احبك.. لأنك كل تسسسووولف وياي و ترررد علي اذااا سألتك ولا تعصصصب عليي وكل تشتررري لي حوااايج ولا عمرررك هزأأتني لو قلللت لي كلاااام يعوور قلبي

ــ هههههههههههههههه فديتك...

شوي الا القطو طلع من الدرام ويترنح..

ما شاف اشرف الا عادل فاطس من الضحك..

ــ طللع .. من الدرررام

ويفصخ عادل طبقه من نعاله..

ــ والله مااا اخلييييييييك

ويلوح القطو بها.. ويرجع يطفر القطو ويركض بلا وعي..

اشرف :

ــ ههههههههههههههه حرام عليك يا نحيس... بتروح النااااااااااار..

ــ باصير مششششااااوي..

اشرف فتح عيونه:

ــ اه هههههههه دا اللي بيخسف بنا.. ما تتأدب انت..

ــ هههههههههههه شدراني عباااسسسوه كل يقققول جعلك حررريقه تنضيييك تخليك مشاااوي..

ــ يـــــــــــاعلي.. اقول ابو العدل..

ــ منهووو دا العددددل..؟؟؟

ــ انت..

ــ لا انا ابوو شررررريف

ــ ههههههههههههههه مااااقدر..

ــ ايه مو قلت لك احبككككككك بااسسسمي ولدي وولد زينب على اسسسمك...

ــ استغفر الله.. انا لله.. وتاليتها انت وزينب .. استحي عادل انت رجال عيب هالكلام..

ــ احبببهههههاااااااا

ــ ههههههههههههههههههههههههههههههههههه

عادل مستغرب من اشرف اول مره يشوفه يضحك كذا..

بهدوء رجع عاد الكلمه..

ــ احبهااا..

ــ هههههههههههههههههههههههههههههههه ..

عادل استانس .. صار يصفق ويصارخ..

ــ احبهااااااا.. زينب احببببببببهااااااااااا..

اشرف حمق:

ــ هيييييييه.. لا والله كدينا خيررر ويااااااااااك..

ــ هاااا.. يعني ويييييييه..!!!!!

اشرف انتبه لعمره..

ــ هاا.. ولا شي...

ــ شرررريف.. تحب زييينب انت بعددد؟؟؟

ــ هااا.. عيب عادلوه استحي على وجهك.. << قالها ووجهه تلون ..

ــ ايواااااا ايوااااااا اعترررف

ــ عادلوه وجع..

ــ هههههههههههههههههههههههههههههههه اشرررررررف يحب زينب ياهوووووووو

اشرف يمسك عادل يفغصه ويسكر بوزه بأيده:

ــ صك حلقك فضحتنااااااااااااااااااااا

ــ كحححححح كححححححح زنطتني .. فططسسسسسسست..

ــ اسسسسسسكت لا والله ما اشتري لك شي ولا تحلم..

ــ خلاص خلاااااااص..

ــ خلصو على بليسك.. من نحيس..

عادل بيهرب.. صار يفحط:

ــ حححححححححح باروح بيت زينب..

تابع>>

[Princess]

اشرف وده يمسك عادل ويساطر به..بنفس الوقت فيه الضحكه ويحس جسمه كله حااار..

شوي انتبه لعمره..

ــ ويش فيني انا.. معقوله حبيتها... الله يستر ....!!

عادل وهو يراكض مر على ابو جاسم .. وصار يلحقه..

ابو جاسم مر على اشرف وكان رايح لبيت اخته..

ــ هلا عمي قواك الله..

ابو جاسم سرحان ومبين عليه التعب..

اشرف ..
ــ ويش فيه ابو جاسم الله يستر..

ورجع عود عليه التحيه:

ــ عمي ابو جاااسم.. قوااك الله..

ــ ها.. هلا .. هلا ياولدي الله يقويك شحوالك..

ــ الحمدلله.. عساك بخير انت..

ــ الحمدلله .. الله كريم..

ومشى ابو جاسم .. واشرف مستغرب منه .. مو عوايده هذي..

اشرف :

ــ الا عمي.. وين جاسم دي كم يوم مو مبين.. لازم ينتظم على شغله ياعمي لا يخسره..

ابو جاسم وقف .. ودار براسه لأشرف وبأبتسامه كسيره:

ــ ايه.. الله كريم.. ياولدي شوفو ليكم غيره .. وربي يسهل عليكم..

اشرف ماحاول يستفسر من ابو جاسم عن السبب .. مبين عليه تعبان وضايق باله.. فما حب يغثه...

الا سياره تمر .. اشرف فتح عيونه مو مستوعب اللي فيها كنه شاف علي.. وقف كان بيركب سيارته هون.. صار يتقرب يبغى يتأكد..

ما شاف الا عادل يصرخ بفرح..

ــ علي .. علي رررررررجع.. علي طلعوووووووه ...

مؤيد مر جنب ابو جاسم اللي وقف منصرع من صريخ عادل ومو مستوعب السالفه..

.. وضرب له هرن..

علي نزل من السياره وفرد ذراعينه..

ــ خاااااااااااالي

ابو جاسم تهلل وجهه واستبشر فرد ذراعينه وراح حضن ولد اخته.. وصار يصيح صياح..

علي يمسح على ظهر خاله..

ــ هونها ياخالي وتهون.. ربي يفرجها ان شالله..

ابو جاسم فرحان يصيح و بصوت متكسر ..

ــ الحمدلله عالسلامه ياولدي..

مؤيد:

ــ قرت الأعين عمي..

ــ بشوفة نبيك ياولدي هلا فيك ..

اشرف تقرب منهم..

ــ السلام عليكم..

وبفرحه عامره سلم على علي :

ــ الف الف الحمدلله عالسلامه ياجار.. ويش اخبارك عساك بخير..

ــ الحمدلله عال العال... ويش اخباركم وويش اخبار الفريق ..

عادل مات من الضحك وخش عرض بينهم..

ــ عباااااااسوووووو ماااااااااااات

علي فتح عيونه وبوزه:

ــ هاا.. رحمة الله عليه..

اشرف:

ــ ياربي .. ماتجوز يا عادلو هااا.. ماتجوز...

عادل بيكمل نشرة الأخبار..

ــ و اشررررف يحححب ..ززز

اشرف مسك عادل على طول وسحبه وياه.. وبأحراج..

ــ الحمدلله عالسلامه وقرت الأعيان .. اشوفكم على خير..

وهو يسحب في عادل ويفلص فيه..

ــ امشي .. بسرعه قدامي..

ولما وخرو عنهم.. صرخ عليه..

ــ ويش فيك انت.. بتوديني بداهيه وبتوديها.. بتشهر بها المسكينه.. خبل انت خبل... لا بعد قدام ابوها وولد خالها.. تبغوهم يقصبونا .. يفرمونا.. والله ياعادلوه ان سمعتك تتكلم كذا دفنتك ولا باحبك ترى..

ــ لالا خلاااااصصص

ــ هذي حالتك.. الله يعيني عليك..

مؤيد:

ــ يللا اخليكم.. اشوفكم على خير..

علي :

ــ تسلم يالغالي .. يعطيك العافيه ولا تقطعنا..

ــ لا ان شالله بييننا اتصال دايم..

ــ على خير .. حياك الكريم..

ابو جاسم بيطق الباب.. علي ابتسم.. وطلع مفاتيحه..

ــ بفاجأهم..

ــ اخاف من الفرحه يصير بهم شي .. خلني ياولدي امهد ليهم احسن..

ــ هههههههه لا تخاف ياخالي يدرو بي كلمتهم..

ــ يعني.. اجل زين .. نستعد للمفاجأه..

دخل علي المفتاح في الباب..

فتحه..

صوت صرير الباب..

فضحه..

قامت ريما تركض..

طلت وصرخت..

ــ علـــــــــــــــــــــــــــــــــــــي..

قامت ام علي تركض له..

ابو علي متدوده مو عارف ويش يسوي وكيف يقوم.. تسند على الجدار ..

ليلى بتلحقهم .. رجعت ومسكت ابوها اول مره يسمح لأحد يمسكه من لهفته على ولده..

تجمعو حول الباب .. اول وحده سلمت عليه ريما.. ووخرت بسرعه لأمها اللي ارتمت على ولدها وحضنته وصارت تصيح..

ــ عسى عيوني ما تبكيك يا نظر عيني.. عساني ما انحرم منك.. حسبي الله على اللي يعاديك.. جعله اللي كان السبب ما يتوفق ..

علي متأثر ويحاول يهديها ما يبغاها تدعي اكثر قدام خاله.. وهي ماتدري ان ولده السبب..

خاله مهو متحمل المنظر صار يصيح ويمسح دموعه بالسرعه..

وصلت ليلى ابوها..

علي راح لأبوه باس راسه.. وحضنه..

ابو علي صار يصيح.. ويضم ولده بالقوه..

ــ لا خلا ولا عدم منك.. ياسندي يا ظهري اللي انكسر بفرقاك.. جعل عدوينك ما يتوفقو...

ليلى وصلت لعند اخوها...

اخوها بقايا الأمان والحنان اللي تبقى ليها..

موضع سرها و صندوق همها وشكواها..

وبعيون كلها لهفه وشوق

وبهمس متكسر ومخنوق..

ــ الحمدلله عالسلامه يالغالي..

حضنته وصارت تصيح..

علي يحاول يتماسك.. بس موقفهم واحد واحد اجبره ينهار وياهم ويصيح...

ابو جاسم:

ــ قرت الأعين خيه.. قرت الأعين ابو علي .. قرت الأعين يابنات..

ام علي:

ــ سلمك ربي يا غناتي..

ابو جاسم:

ــ يللا بمشي انا وباجيكم في وقت فاني..

ابو علي :

ــ استريح ياخوي

ــ اراحك الله من كل هم.. نوبه فانيه ان شالله خذو راحتكم ويا غايبكم ولاحقين بنغفكم غف تالي كل يوم

ام علي:

ــ ههههههههه حياك الله ياخوي عالعين والراس

ــ يسلم عينش ويرفع راسش.. يللا امانة الله..

ابو علي:

ــ حياك الكريم..

وقعدو في الصاله.. وصار يسألهم عن الأخبار وويش صار في الفريق فترة غيابه..

ام علي وابو علي .. طلبو منه يأجل هالهدره.. وفي بالهم.. مافي شي يسر على شان ينقال ...

تابع>>

[Princess]

ليلى راحت جابت الساقو لأخوها


فرح به..


ــ الــــــــــــلـــــــــــه ياسلااااااااام.. من متى افادي بها..


ام علي تذكرت يوم اخذوه كان عندهم صحن من بيت خاله وما ضاق منه شي..


و بفرح رفعت شيلتها غطت وجهها وصارت تصيح..


ــ وي ياغناتي .. لا خلا ولا عدم..


علي :


ــ يللا عاد اماه لا تصيحي لا ماباكل..


ــ لا خلاص .. ما بنصيح .. تعبنا صياح .. الحمدلله يوم ربي سلمك ورجعك بيننا...

في صالة بيت ابو مالك..


ابو مالك...


ــ ويش فيش سوسن لويش تطالعيني كذا..


سوسن وملامح وجهها متغيره و شكلها معصبه فيه..


ابو مالك..


ــ لا تطالعيني كذا...


سوسن تصفع في وجهها و تنحب نحيب يخوف.. وتصرخ..


ــ حراااام...


وشوي صارت ترجع دم


ابو مالك..بخوف مو عارف كيف يتصرف..صار يصارخ..


سوسن انهارت ...


ابو مالك صار ينادي على مالك وعلا يجو يساعدوه ..


ما احد يجاوبه..


توجه للدرج بيركب غرف ولاده.. كلما ركب درجه يحس الدرج يزيد ..


وهو يسرع اكثر بس مافيه فايده..!!

شوي بين آخر كم درجه ومكان وقفته.. حفره كبيره وفيها حيات وعقارب..


صار يطالع تحت.. لقى روحه مرمي والعقارب تنهش فيه والحيات ملتفه عليه..


قعد مذهول وصار يصارخ..


ــ علااااا.. مااالك..


الا ينتبه لمالك.. في الطرف الثاني.. قعد على ركبه يطالع في الحفره واللي فيها ويصيح..


ابو مالك يصارخ:


ــ مالك انا هنا.. ماااااااالك قدامك عبرني لك... لو تعال لي ,,الحق علي..


مالك ماكنه يسمعه .. وقاعد يصيح..


شوي جت علا حامله في ايدها كبد لآدمي .. شكلها يثير الرعب في النفس


حاملتنها وهي تضحك ودموعها تسيل..


ورمتها في الحفره..


وصارت تهدي في مالك و تهمس له..


وانقلبت حالة مالك من صياح الى ضحك..


وتركو المكان و ابو مالك يصارخ فيهم وهم ابدا لا حياة لمن تنادي


قام بيرجع لسوسن .. استدار الا الدرج صار بس درجتين..


نزل لقى محل سوسن رماد.. وورد يابس..


قعد وصار يلمه وهو يصيح..


شوي الا يسمع صوت...

الى الملتقى..

[Princess]

هههههههه عساكم السعاده جميع
الناري + المتحير
عليكم حركات عجيبه
الله يحفظكم ويسلمكم
يبغى ليكم دروس في الصبر

يللا مأجورين جميعا
دمتم بخير
وبحفظ الرحمن

[Princess]

<< بالأقساط ترد..
ضحكوه فديتش ياغناتي لا تخافي صحيح اخترب وعطاني عمره
بس اميروه ذكيه كل المعلومات المهمه في هارد دسك خارجي <<
يعني مافي خساارات والحمدلله

هاا برد قلبكم الحين ما مات الغالي علي
والله يستر من الجاي ...!!

وبعض الناس صار حميدهم ها وياء نسب .. لا بجيهم كف عن حق وحقيقه
ومااا شالله عليكم
هههههههه بغيتوها فرصه حق تنهالون عليا بالكفوف ايها الأعضاء والمشرفون
هين اراويكم مافي جزء لمدة مقدارها تحسب عن كل كف ذكر في كل رد..
<<< امززح

يللا خلاص باروح لحوستي
اراكم على خير..