ضعنا يا صبرنا...

**Princess** · 08-31-2008, 04:45 AM

الحلقة 27

وطول الطريق سوسن وهشام سوالف وتعيلف .. و علا ما شغلتها الا تتصوخ وتبتسم..
وعلى بالها اخوها مالك.. وحشها وايد..
وهم ماشيين في الطريق الى الحسينيه .. الا الناس متجمعه وزحمه وعالم..
هشام : ــ ما يندرى ويش صاير..الله يستر .. شكله حادث...
سوسن : ــ الله يستر...

وقف هشام على جنب ونزل يشوف السالفه.. لقاه فعلا حادث بس جدا بسيط.. بين واحد شباب و رجال كبير في العمر بعض الشيء... سيارة الشباب مرسيدس وتشمخت شمخ بسيط.. والغلط على الرجال الكبير.. وواقف له الا يجيب المرور..

الناس تقنع فيه يتحرك بيدفع له الرجال تعويض .. ومو وقت المرور في هالأوضاع العاشوريه.. دام هم غافلين عنهم ليش يجيبوهم .. لكن الصبي ابدا مو مقتنع وعلى قولته .. ويش فايدة الضمااان .. لازم اجيب المرور..

العالم مزحومه وتبغى توصل الحسينيه.. مافي الا هالشارع ومسكر من هالصبي اللي مو راضي يتنازل..

هشام تدخل:
ــ يا خوي تنازل .. مو لازم المرور.. لجل هالليالي واصحاب المصاب..
الصبي يطالع في هشام نظرات قهر:
ــ قلت انا المرور يعني المرور..
هشام : ــ ياخوي وين كنت رايح؟؟
ــ شدخلك انت؟؟
ــ طيب هالطريق يروح للحسينيات و المآتم.. يعني رايح تحظر مأتم الحسين سلام الله عليه..
ــ ايه ..و اختصر لك الكلام.. تنازل ما بتنازل...
ــ عجيب امركم.. مع اهل البيت في مصايبهم.. وتلطمو .. واحسين واحسين.. والتسامح ممسوح منكم.. و الأخلاق الزينه معدومه .. مأجورين بس .. مأجورين..
الصبي سكت..
هشام : ــ اذا ان حسناتك زايده.. لا تخلي الناس تكسب ذنوب من وراك.. وتدعي عليك في هالليالي .. ووخر سيارتك .. وهالأجودي ماهو مقصر بيعطيك حق تغطية هالشمخ وزياده.. ياخوك لا تكبرها وهي صغيره.. وتيسر الله ييسر عليك..

الصبي بعده ساكت ومو راضي يقتنع..
هشام رفع كتوفه :
ــ ايه.. اجل نخلي الأمر لصاحب الأمر.. وهالعالم كلها اللي متعطله .. آثامها كلها لك وحسناتككلها ليهم.. خلك .. انتظر المرور ..

ومشى هشام عنه.. ركب السياره.. مامداه يتحرك الا الناس قامت تتحرك... ضحك:
ــ الله يهديك.. عنيد ويكابر..
سوسن : ــ منهو.؟؟ ويش صاير؟...
وعلم هشام سوسن السالفه.. الا بوصولهم الحسينيه..

نزلو .. واتفقو بينهم اتصال بس يخلص الشيخ من المحاضره..

ودخلت علا الحسينيه وقلبها صار يصافق.. من زمااان عن هالأجواء.. من زمااان ما عاشتها... كانت نادرا اذا راحت مع خالتها امل.. بس لأن سوسن شجعتها وخذت بيدها...

وعمتها سميره ما تروح ابدا..
خذت نفس عميق .. واختلجت الدمعه.. وبدى الشيخ محاضره..

والله ان قطعتم يميني
اني احامي ابدا عن ديني
وعن امام صادق اليقينِ
سبطالنبي الطاهر الامينِ

كانت ليلة السابع من محرم.. ليلة العباس...
معشوق علا .. وباب حوائجها و ملجأها في شدايدها... ابو فاضل سلام الله عليه..

في طرف آخر من الحسينيه نفسها.. ليلى و زينب و ام علي..
ام علي ما هدأت من النخوه لأبو فاضل .. تعبها فرقى ولدها.. وكلما حمى العزاء في النهايه وزادت ام علي في الرجاء والألحاح.. زينب وليلى يزيدو صياح..

انتهى المجلس... وطلعو العالم.. كل راح في حال سبيله.. علا ما انتبهت ليهم ولا هم انتبهو ليها... اتصلت سوسن لأخوها ,, وركبو السياره.. وصارو يسولفو عن المحاضره و ويش استفادو منها..
وعلا بس تسمع.. هشام كان عقليه جباره.. ما شالله عليه ,, وكأنه بيعيد محاضرة الشيخ بالشرح والتفصيل.. علا بلا شعور ابتسامه مرسومه على وجهها.. وفي بالها تصلي على محمد وآل محمد...

ليلى وزينب يمشو في الطريق .. ام علي سبقتهم وهي تقول:
ــ كن اني الشباب وانتون الضبعان.. همّو .. اسرعو الوقت ليل ..
وهم يتمشو على برود..

الا بطفرة عادلوه.. من زرنوق
ليلى وزينب شهقو شهقه ..
زينب ضربت صدرها :
ــ بسم الله على عمري وتاليتها وياك...
عادلوه فرحااااااااااااان وميت ضحك ويصفق ..
ليلى : ــ استغفر الله ربي واتوب اليه.. لا شرهه..

حاولو يتفادوه بس ماقدرو..وراهم يعني وراهم...
صارو يركضو لين وصلو لأم علي..
ام علي : ــ تشيه ويش صاير الا وصلتو لي بهالسرعه,,
ليلى تنافخ من التعب : ــ من عادلوه.. ماقصر .. صفاق و ضحك وورانا..
ام علي : ــ انا لله ,, الله يعين امه عليه..
ووصل ليهم عادل :
ــ خاااااااااااااااااااااااالتي .. ام عللللي
ام علي : ــ خناقه .. شيفا عرفني !!
زينب : ــ بفففففف هههههههههههه يعرفني اني مو بعد انتين
ليلى : ــ بقى وحده في الفريق ما يعرفها بنشغله خطابه..
ام علي : ــ هلا عادل .. هلا امي .. ويش احوالك..
ــ ححححيييااااششش الله.. عببباااسسسوه هههههههههههههههه مررررررررررريض..
ام علي : ــ يؤيؤ انا لله.. ويش فيه؟؟
ــ ضرررربه سهههههم في قلللبه
زينب : ــ ههههههه خخخخخخخ من الحب..
ليلى فيها ضحكه حاولت تداريها.. فلصت زينب : ــ انشبي
ام علي تساير عادل : ــ علي ياعلي ..سهم ويه؟؟؟
عادل : ــ مممااادررري ماشفففناااه وهههووو عند التلفزييون الا يقققول احممررر احمررر قلبببي يلعنكم يالأسسسهم وانسسسدح..
ليلى مهي قادره تحاول تداري : ــ استغفر الله ياربي ,, حرااام ياعلي الليله مصاب وهذا يضحك فينا..
ام علي صارت تضحك : ــ استغفر الله ياربي .. سلام الله على ابو فاضل .. عاد اني من متى ما ضحكت ..غربال يغربلك يا عادلوه.. ويش مسلطنك علينا الليله... قال ويه .. سهام ..وويش الحين ودوه الدختور؟
ــ اييييه في سيارة اس كريم .. كبيررررررره فيها لمببباااات حمررران يولعو ويطفو...
وتسوي صوت هاللون... وي وي وي وي.. ششااالللوه فيها تشششنه نمله مضروبه بنعااااااال.. لالا مو نمله .. خنفسا..

حزتها زينب دورو عليها .. من الضحك ما بتلاقوها..
ليلى تقدمت : ــ لو بتسمع سوالف عادلوه طار ثواب المجلس غربال..

عادل : ــ رررراااححت امي وييااااه قلللت ببباااروح .. مااا رررضيت.. افادي اركب سيارة الأس كررريم..
ام علي : ــ أي اس كريم أي بطيخه.. انا لله.. وانت مو لابس عدل والجو بارد..
ــ امسسس لبست فووووبي الأسسسود وطااااقيتي فااااتش كشششخه... زييينب فاااااتش امسسسوالا شششان قلتي لي إمْشْ عرسسس علي
زينب فتحت عيونها ...
ــ ليلو صبري لي لا تركضي ..
ووراها ما تشوفو الا الغبار,,
عادل برطم..
ــ تشااا... لووويه ما تحبببني زززينب
ام علي ابتسمت: ــ انا لله.. زينب تحب الكل ياولدي.. بس انت الله يهديك تأدب عيب ما يقولو كذا..
ــ زززين...
ــ وروح البس عدل برد الحين..
ــ ززززين... يوعاااان..
ام علي عور بقلبها .. :
ــ وعلى قلبي .. امش وياي بيتنا بس.. الله يعين امك على بلواها..

تابع>>>>>>

**Princess** · 08-31-2008, 04:53 AM

وصلت البيت .. زينب قعدت ويا ليلى شوي تريح قبل لا يمر عليها ابوها اللي راح مع ابو علي الحسينيه.. ويكمل وياها بقايا الطريق... الا بدخلة ام علي وياها عادل..

زينب كانت في الصاله قاعده...و بسرعه لفت بوشيتها وتغطت.. :
ــ داااااوييييييييه ويش جيبه ؟؟؟

عادل : ــ آآآآآآآه شفتي ما تحبببببببني ولا تبغااااااااااني...
ام علي : ــ هدي بالش على الصبي ويش مسوي فيش..
زينب منقهره : ــ غير مخوبلني ومجنني ..
ام علي : ــ وين ليلى..؟؟
ــ في الحمام.. قولي ليها هي وريموه عادلوه هنا لا يتصروعو..
عادل : ــ .. قالللوو لشش خبااااابوووه اصصصررروع
زينب : ــ انااا لله..

شوي الا بجية ابو علي مع ابو جاسم..

ابو جاسم : ــ هلاااا عااادل قووه شحوووالك..
عادل طاير من الفرحه :
ــ هلالاااا عمممي..الحمممدللله زييين
ـــ عساك دايم زين....
ــ عممممممي تحبببني؟؟
ــ ههههههههه افا عليك ولويه ماحبك؟؟
ــ شفففتي يحببببببببني ابببووووشش مو زيييييييش..
ــ تأدب ياولد.. وقومي انتين دار بنات عمتش...

زينب قامت..
ابو علي : ــ ويش احوال حجي عباس...؟؟
ــ ششششااااللللللللوه في سسسياااارة اس كرررريم
ابو جاسم :
ــ ويه؟؟ سيارة اس كريم..؟؟
ابو علي : ــ ويش مدريني عن عادلوه وهربدته..
ام علي جابت خبزه فيها جبن لعادل و عصير ..
ــ من الأسهم.. طايحه والله يستر يقول انسدح .. عفر اغمى عليه ..
ابو جاسم : ــ ايه مال البخيل.. شان ما انجلط..
ابو علي : ــ يادافع البلا .. انا لله...

اشرف قاعد مع ناصر .. يتدربو لتمثلية الشبيه لليوم العاشر ... مع بقايا الشباب .. وكان اللي يمثل دور الشمر ( لعنه الله ) مو معاهم متأخر..
اشرف : ــ ما يندرى وينهو مصطفوه للحين ماجى نبغى نبدي..
ناصر : ــ ههههههههههه فاتك..
ــ ويش فاتني؟؟
ــ نسيت ماقلت لك... شكلها امه شدخت بدنه لو قفلت عليه الباب..
ــ اف .. حق ويه؟؟
ــ ههههههههه من كم يوم شفته.. ويش علومك وويش مسوي قال اسكت يابو الشباب امي مسودهوجهي وطالع بسبه وداخل بسبه.. على ويه ياخوك؟؟ الا هو يقول.. تخيل علي ويه؟؟؟
اشرف ــ على ويه؟؟
ــ ههههههههه يقول راح ليها يبشرها.. اول ما وزعنا الأدوار.. اماه.. اماه.. عطوني دور هالسنهفي الشبيه... ما شافها الا هللت واستبشرت .. ويش ياااااااولدي ويش عطوووك دور مين؟؟
ــ الله يستر هههه.. ايه..
ــ شان يقول ليها الشمر.. الا مدافع السبايب قايمه زين ما شلخت راسه بدبة القدو..
ــ ههههههههههههههههه ترى ضبعه كبيره هي ..
ــ ايه ولا في تفاهم من درت الشمر.. سود الله وجهك..×× وين اودي وجهي ؟؟ .. ويش بيقولو نسوان الفريق ..!!! ام الشمر.. ×× ويلي على روحي ومدري ويه..و و و
ــ ههههههههههههههه استغفر الله مسكين مصطفوه...

ــ ويش فيه مصطفووه..
ناصر : ــ بسم الله,, طريناه قال مياااو..
مصطفى : ــ هههههههههه مياو في عينك.. تحشو فيني وفي الحجيه ها..
اشرف : ــ الله يعينك ياخوك.. ويش حالها اليوم..
ــ اسكت بس .. ما تكلمني دي كم يوم مخاصمتني..
ناصر : ــ ههههههههههههه ويلي ما تسوى عليك هالدور..
ــ ويش اسوي المشكله مهي راضيه تقتنع انه تمثيل وان لي اجر حالي حال اللي مثل دور الحسينسلام الله عليه..
ناصر : ــ كح احم..
مصطفى : ــ لا افلعك سو روحك بس ...
ناصر: ــ خخخخ.. ماعلينا .. تأخرنا وايد اليوم.. يللا مشينا نتدرب..

الساعه 1 الفجر.. حميد متلحف ببطانيته يتنافض من البرد والتعب .. الا بدخلة جاسم ..
كل واحد فيهم شهق شهقه مختلع من الثاني..
جاسم : ــ متى طلعوك؟؟
حميد : ــ ويش جيبك هنا؟؟
جاسم بنفس خايسه : ــ انا كل يوم اجي .. سؤالي متى طلعوك..!!
ــ الله.. شوي شوي لا يطيح خشمك.. من امس طلعت.. وبعدين لويه كل يوم تجي هنا؟؟
ــ كيفي .. اروح المكان اللي اروحه..
ــ لااااااا.. عدل عدل.. والله وطلع لك لسان يا جويسم.. هيه.. لا تنسى عمرك بس .. ترى اوديكورا الشمس..
ــ هه ههه هههه هههههههههههههههههههههههههههه
حميد عصب : ــ على ويه هالضحك.. بايخ..
ــ هههههههههههههههههههههههههههه.. هذاك لول اخاف منك ومن اشكالك.. الحين اذا انتبتوديني ورا الشمس انا بوديك وراها بعدين بحذفك اسفل سافلين..
ــ آآه يالسفله.. اراويك..
ــ امجد .. هدي هدي.. ريلاكس .. توك طالع من المستشفى .. وما يسوى عليك الزعل..
ــ آآآآآآآآه لا تقول امجد.. واطلع برررررررى..
ــ انا بطلع.. بس بجي اليوم اللي بتقول لي فيه سالفتك.. لا قسما باللي خلقني ما بيحصل لك خير..

طلع وصفق باب الصندقه صفقه خلاها تهتز ومن الله يوم ما انشلخ الباب..
حميد صار يرتجف ويون يحس روحه بتطلع.. تلوت بالبطانيه وانسدح وظل يون لين نام...

تابع>>

**Princess** · 08-31-2008, 04:54 AM

امل خلصت معجزة المشلول و ابو الفضل العباس...متعوده تغب فتره وتقص على ولدها قصه او معجزه عن اهل البيت عليهم السلام وبناء على طلب ولدها تكون المعجزه على ابو فاضل لأنه صاحب الليله .. ماجت على بالها الا هالقصه..
اخر شي ..
ــ سلام الله على ابو فاضل .. ما نعست ياولدي ..؟؟
وتثاوبت حد ماعندها ..
ــ خلاص. تعبت اني دمعت عيوني.. بقوم انام. وحاول تنام انت بعد..
سجاد : ــ زين.. اماه..
وقبل لا تطفي امل الليت وتطلع سجاد يسألها..
ــ اماه.. تتوقعي تصير معجزه من العباس عليه السلام و امشي ؟؟
امل متوقعه هالسؤال من ولدها.. ابتسمت:
ــ الله كريم .. ماخاب من دعاه وتوسل بأهل البيت... ادعي الله ياغناتي ونام و ان شالله يتحققدعاك..
ابتسم سجاد:
ــ يااارب

زفو الجـــــــاسم وعجنـــــو حنته.. وفرشي الخيمه يا زينب عمته..

وارتفع االنياح مع ارتفاع صحون الشموع.. ام علي انهارت.. صارت تبكي بحرقه..:
ــ ساعد الله قلبش يارمله.. يا ام الشباب.. واولداااااااااااه...
يتفاعل الجميع في هالليله.. لجل الشباب ومصابهم...

وبس انتهى المجلس.. ليلى متعوده تاخذ ليها كل سنه شمعه من زفة القاسم.... لفتت نظرها وحده عجبتها مدت ايدها عليها ومسكتها في نفس الوقت وحده ثانيه مسكتها..
ليلى انحرجت.. كانت منزله العباه على وجهها بس يبين شوي .. والبنت الثانيه متغطيه كامل..
التفت ليها ليلى.. وبخجل وهدوء:
ــ تفضلي .. خذيها..
ــ ليلى .. !! اهلييين
انتبهت ليلى للصوت:
ــ علااا.. هلا وغلا.. مأجوره
علا شالت الشمعه:
ــ اجرنا و اجرش...لا والله ماحد ياخذها غيرش .. اخبارش غناتي واحشتني..
ــ تسلمي.. الحمدلله تمام نسال عنش .. اخبارش انتين..
ــ الحمدلله ماشي الحال..
الا بجية سوسن : ــ يللا علا..
علا : ــ يللا .. سوسن .. هذا هي ليلى صديقتي..
سوسن : ــ هلا ..
علا : ــ ليلى هذي سوسن.. مرت ابوي.. و.. اختي الكبيره..
سوسن ابتسمت ..
ليلى : ــ هلا وغلا..

وقفو شوي يسولفو.. الا جوال علا يرن والرقم غريب..
علا : ــ ماعرفه..
سوسن : ــ باشوف.... يوووو هذا هشام..
علا فتحت عيونها .. ــ هاااا.. !!!
ليلى : ــ ويش صاير أي هشام؟؟
سوسن ردت عليه: ــ طالعين غناتي.. جوالي صامت دعسته في الشنطه.. يللا الحين بنجي..
علا مبهوته: ــ اخو سوسن..
سوسن : ــ يللا علا .. هشام ينتظرنا..من زمان واقف..
علا بعدها مفهيه.. ــ مع السلامه ليلى نشوفش على خير .. سلمي على امش وريما وزينب .. باي..
ــ الله يسلمش يوصل..
وطلعتهم.. رايحين للسياره:
ــ لويه رقمي عنده..؟؟
ــ اسمحي لي غناتي عطيته اياه حق يتصل فيش اذا صار ظرف طارئ زي الحين ما سمعتجوالي .. يعني لا يتوهق..
ــ ايه زين.. عساه خير..
ــ علا.. اخوي محترم ترى.. لا تخافي.. مو من النوع اللي في بالش..
ــ لااا مو قصدي..
ــ خلاص .. بس لا تحطي في بالش زين غناتي..
ــ زين..

وصلو وركبو السياره..
هشام : ــ الله يهديش بتتأخري دقي و علميني
ــ اسفين ياخوي خذتنا السوالف اسمح لينا..
ــ حريم ياحبكم للقرقر...

ويوم تاسع .. قريب المغرب..
باب بيت ابو علي يطق..
لبست ليلى عباتها..
ــ مين..؟؟
ــ هذا بيت حسين آل ...
ــ ايه وصلت.. خير ياخوي...؟؟

الى الملتقى..

**المتحير** · 08-31-2008, 05:03 AM

ههههههههههه غربال الله عادلوه هههههههههههههههههه يعطيك العافية اميرة

**للدموع إحساس** · 08-31-2008, 05:07 AM

صبــــــــــــــــــاح الخيرااات ،،
و اللهـ خيوووه عيشتينا أجواء محرم ،،
و عادلووووهـ ،، خخخخخخخخخخخ ،،
و لا يتوب ،، مسكين ويش بيصير فيهـ إذا عرست زينب ،، هع هع اللهـ يعينهـ ،،
مسكييييييييييييين حميدوووهـ النحيييييييييس < تناقض بحت ،، هع هع
عور قلبي بصراحهـ ،، لكن بعدني محترقهـ على علي ،،
سلام اللهـ عليكـ يا أبا الحسن ،،
ومن إلي دق الباب ؟؟؟؟؟؟؟!!
أمممم يكون أحد من طرف المرحوم صالح ،،
جايب وصيهـ أو شي ،، كل شي جاااايز ،،
بـ إنتظااااااركـ غلاتي ،،
لو المرض حدددددددددددددهـ متابعهـ ،،
يعطيكـ ربي العاااافيهـ ،،
وسلمت يمينكـ ،،
خااالص التحااايااا ،،
للدموع إحساس ،،

**آخر شقآوهـ ..~** · 08-31-2008, 05:45 AM

وحشتني أجوآء محرم..
علآ مثلي تمآمآ..
عآدلوه خبيلوه مآني قآدره عليه يموووت ضحك
كلهآ كوم وسيآرة الآيسكريم كوم ويليي عليه
أحم أني أدري منهو اللي طق البآب هذآ أكيد عبد الرحمآن صديق علآوي<<أصغر عيآلش علآوي هع
يعطيك ربي العآفيه ع الجزء<<هلمره صآر طويل شوي<<طمع
تسلمين حبوبتي
ربي يعطيك العآفيه
تحيآتي..ضحكوه البطه

**عوامية صفوانية** · 08-31-2008, 06:10 AM

يووووو

توني يا قول

غلبتني ضحوكه البطة هع هع

هذا اللي طق الباب شكله عبد الرحمن جاي ليهم لانه وصاه علي يروح لأهله ويتعرف عليهم ومرته تتعرف على بنات ابو علي

وعبد الرحمن ان شاء الله يكمل تشيعه على ابو علي ومرته تقتنع بكلام ليلى (( خوش تفاعل / كملت عنش القصة خخخخ ))

وعدوله ههههههه ما قصر خوش تعيلف عدل خخخخ

وحركات علا شافت ليلى في الحسينية

عاااااااااااااد اميــــــــرة قولي لليلى تعطيني الشمعة ابى انذر فيها

ويارب تتحقق امينياتي وامنيات القارئين يارب بحق ابا الفضل العباس

الصراحة جو محرم غير

و الحين جو شهر الله شهر رمضان بعد وااايد غير

يسلمو خيتو كثرت عليش من الهدره
والله يساعش علينا هع هع