. نورتينا والله تسلمي .. ماعندش صبر هناك هااا.
. متأخره شوي هناك لأني نزلتها هنا قبل .. ياهلا فيش والله..
رد مع اقتباسالحلقة 24
وفي السجن...
ــ عبدالرحمن ياخوي.. قوم الله يجازيك خير .. اذن الفجر..
عبدالرحمن مايرد..
علي راح يتمسح ورجع له:
ــ عبدالرحمن قوم حبيبي خلنا نصلي سوا واعلمك الجديد عليك في الصلاه..
عبدالرحمن ابدا سكون..
علي يهز عبدالرحمن :
ــ عبدالرحمن .. عبدالرحمن..
سكوووون....ولا حركه..
علي خلاص اختلع ,, شان يرفع ايده ويصلخ خدود عبدالرحمن كف معتبر خلاه ينتبه من نومه العميق بصرخه ... خلعت كل اللي بالسجن..
عبدالرحمن قعد قعود بالسرعه وبلا وعي رد السطار لعلي ..
علي منصرع حط ايده على خده وصار يضحك ضحكه متقطعه..
ــ يلللللللعن شكككككلك
عبدالرحمن انتبه لعمره :
ــ شصاير ؟؟ شفيني .. شسويت..؟؟ ليش ضاربني فزعتني من نومتي يقطع شيطانك...
علي حمق فيه : ــ يصصصقعك على دي نومه خلتعني ماترد ,, ماقومتك الا هالسطره..
عبدالرحمن يتثاوب : ــ يخرب عقلك بلاك كل يوم تصحى و انا صاحي.. ماتدري بنومتي الثقيله....
ــ وويش فيك اليوم ماقعدت؟؟
ــ نايم متأخر يمكن ماصار لي ساعه الا بسطرتك تفزعني..
ــ ههههههههههه يللا زين.. نقوم نصلي
الظهر .. ابو جاسم منسدح على ظهره تعبان ,, تلفونهم يرن..ماحد حوله يرفعه .. صار يتحمق:
ــ يلعن جدانك من ظهر اغبر.. آآه.. ويلي ..
قعد ونادى : ــ خناااقه.. ماتسمعوو التلفوووووووون يصررخ..
جت زينب تركض :
ــ ما سمعناه اني في غرفتي وامي مادري وينهي..
زينب رفعت التلفون..
ابو جاسم رجع انبطح وهو يسخر :
ــ ماتدري وين هي .. عبت الدبه وناامت ,, آآه .. ويلي ويلي ويلي...
زينب متفاعله ويا المتصل وشوي قامت تصيح :
ــ متى ..؟؟ انا لله... وليلى ويش اخبارها.. ياربي .. شويات وبحاول اجيكم... مع السلامه..
ابو جاسم : ــ خير اللهم اجعله خير..
زينب : ــ صالح صابه حادث وتوفى..
ابو جاسم رجع قعد بالسرعه :
ــ آآآآه.. هااااااا... متى ومين الحين اللي قال لش..
ــ مادري متى .. توهم امس يدرو .. هذي ريما.. بمهل شوي تخف الشمس وبروح ليهم ..
ــ لااااااا شمس ويه ما شمس.. باقوم انا باروح ..
ــ اجل بلبس عباتي..
وقبل لا يطلع ابو جاسم مر على غرفتهم بيشوف ام جاسم:
ــ انااا قااايل عبت الدبه ونامت.. ام جاااسموووه.. يااامره..قومي قومي..
ام جاسم فتحت عيونها بتعب:
ــ هاااا..
ابو جاسم بحمق : ــ و صمّه.. في وحده تقول لرجلها هااا.. قومي صالح توفى..
ام جاسم فققت عواينها وشهقت.. وشرقت شرقه قويه..
الا بجية زينب..
ابو جاسم : ــ اناا لله.. روحي جيبي ليها ماي لا تموت..
زينب بسرعه جابت الماي خذته ام جاسم شربت وحطت ايدها على قلبها :
ــ آآآه.. اجل احد في الدنيا يقعد احد من النوم كدا.. يقول له قوم اكو واحد متوفي .!!!. دبحتني..
ــ انا لله ويش اسوي لش انا بعد.. قومي تحركي بنروح..
ــ زين باقوم.... الله يساعدهم ويصبرهم .. ويفرج عنهم..
وطلعو من بيتهم والوقت ظهر.. اشرف راجع من البقاله جايب لأمه اغراض.. من شافهم في الشمس .. وقف ..
ــ قواك الله عمي ..
ابو جاسم : ــ هلا ولدي هلا الله يقووويك ..
ــ وين طالع في هالشمس ويا الأهل ؟؟ صبر اوصلكم بس انزل الأغراض ..
ابو جاسم : ــ لااااا ياولدي لا تكلف ..
اشرف يفتح السياره ويشيل الأغراض :
ــ لا والله ما اطفيها وتركبو.. حلفت عليكم..
ام جاسم تفلص في ابو جاسم وتهمس : ــ حر بنموت ويش وراك انت ارحم بعباياتنا .. خله يجزاه خير يوصلنا..
ابو جاسم يطالعها على جنب ويخز فيها..
زينب قلبها بلا شعور يطق طق وموقف الصوره ويا اشرف في بالها ..
اشرف شال الأكياس وهو يقسم ويحلف .. لين قبل ابو جاسم وركبو..
ركبت ام جاسم من الباب اللي مو جهة السواق لأنه اقرب ليها ..
وزينب لفت للباب اللي جهة السواق وكان مفتوح اشرف شايل الأغراض..
بقى كيس وقفت تنتظر اشرف يشيله جى بالسرعه شاله..
ركبت وانتبهت لغرشة عصير زجاج على الأرض طاحت من الأكياس ...
عفويه مره هالبنت .. شالتها وقالت :
ــ طاحت الغرشه..
اشرف بيسكر باب السياره انتبه ليها .. مد ايده بياخذ الغرشه وبالغلط تلامست ايده ويا ايدها هي اختلعت وهو اختلع وشالو ايدهم ثنينهم وطاحت الغرشه في الطريق وانشلخت..
زينب شهقت شهقه,, ابو جاسم التفت ورى :
ــ ويش صاير ..؟؟
ام جاسم فلصت بتها فلصه ..
اشرف منحرج : ــ انكسر الشر .. خير ان شالله.. عادي خيه .. ماعليه .. حصل خير..
وسكر الباب ودخل بالكيس بيتهم...
ابو جاسم : ــ غربلكم غرباله .. ويش صاير ..
ام جاسم تضرب رجول بتها على خفيف وبحمق :
ــ هالخبله .. فشلتنا.. شان خليتيها مرميه ولا تنكسر .. حق ويه رميتيها ..
زينب مهي عارفه ويش تقول ..
ــ آآآه ,, ويش دراااني..
ام جاسم : ــ تشيه تدري عن شي انتين..
ابو جاسم : ــ بس بس . ياراعيات الفشايل ... صخو اكو جى الرجال ..
ركب اشرف السياره : ــ ها عمي .. ماقلت لي وين بتروحو؟؟
ــ وين بعد ياولدي .. بيت اختي
ــ ان شالله من عيووني ..حاضرين..
ــ تسلم ياولدي وربي يبلغ اهلك فيك ويخليك..
ــ الله يسلمك عمي.. ويحفظك..
وصلو ونزلو ..
ــ مشكور ياولدي ما قصرت,, رحم الله والديك ..
اشرف ابتسم ..:
ــ ووالديك...
زينب نزلت وكفخت الباب .. اشرف نقز من قوة الكفخه.. ابو جاسم سكر الباب وهو يصرخ فيها :
ــ شوووي شوووي كسرتي سيارة الرجاااال...
اشرف يبتسم وفي باله .. ــ تفداها............... اه.. ويش فيني انا..!! .. الله يستر..
زينب على طول راحت لليلى.. دخلت عليها لقتها قاعده وحاضنه المخده..
ووجهها شاااحب وعيونها شابحه وحمرا..
من شافتها على هالحال.. راحت ليها وحضنت راسها وصارت تمسح عليه وهي تصيح :
ــ هدي بالش غناتي.. الله يرحمه ويغفر له ..
ريما صارت تصيح وبصوت مبحوح:
ــ هذي حالتها من امس حدها تقوم تصلي وترجع .. لا اكلت ولا شربت..
زينب : ــ ما يصير غناتي كذا.. انتبهي لروحش .. قومي وياي برى هالغرفه .. قومي..
ليلى مهي راضيه تقووم.. ولا تكلمت ولا كلمه...
زينب : ــ قومي ريما جيبي لي ماي..
ــ ان شالله..
تابع>>
المشاركة الأصلية كتبت بواسطة اميرة المرح
اول مرة احس ان حميد مظلوم 
المفضلات