ضعنا يا صبرنا...

[نبــراس]

متباركــة بالمولد أمور

ينعاد عليكـ بصحة وسلامة

وبانتظار ناصفتكـ ~ : )

[Princess]

مرحبا
ربي يخليكم
ويبارك ليكم..
نورتوني .. يعطيكم الف عافيه..

لكل ضيقه.. تحين من الله ساعة الفرج..
ومن كل عسر .. يرسم الأمل وصدق الدعاء الف مخرج..

تفضلو الجديد..

[Princess]

الحلقة 34

اويـلاه.. ياكربلا شسويتي..
اويلاه .. طفيتي شمعة بيتي..
اويلاه شبان ماخليتي..
اويلاه ياكربلا اويلاه..
يام المصايب والبلا...

في بيت ام مؤيد.. 15 محرم.. احياء العشره الوسطيه لمصاب الحسين عليه السلام..
رزان.. في قلبها تعمق المصاب.. ومن مدرسة ابي عبدالله تعلمت اول دروس التشيع..
كانت تلطم وفي بالها تعتب على نفسها.. لو انها فقط قرت واقعة كربلاء بالتفصيل .. لكانت كفيله انها تخليها تتشيع..
فدمه ودم الشهداء.. هم اصل تجديدنا لعهد والولاء...

انتهى العزا..
ساره تصب الشاي للحريم.. وتضيفهم.. مرت على ليلى وابتسمت ابتسامه عريضه..
ــ هلااا خيه.. نورتينا
ليلى قامت وسلمت عليها..
ــ النور نورش .. عظم الله اجرش ويعطيش العافيه.. تسلمي على هالصوت..
ساره بخجل:
ــ الله يسلمش غناتي.. لا خلا ولا عدم.. حياش الله..
ــ الله يحييش..

قعدت ليلى.. ابتسمت ام علي وبهداوه صارت تساسر ليلى وكانت وراهم زينب :
ــ قدش بت ام مؤيد مو..؟؟
ــ ايه قدي..
ــ حلاوتها على هالحس .. تفجع اللي مايحس... الله يسعدها
ــ يالله ياكريم
زينب سمعتهم.. وبلا شعور حست بغيره...
وصارت في بالها:
ــ ويش فيني .. لويه انقهرت من سؤال عمتي عن البنيه.. .. اطنش احسن لي..

ام مؤيد :
ــ هلا ام علي هلا خيه وينش امس ماشفناش..
ــ هلا فيش غناتي.. لا بس ما لقينا مواصلات... والدنيا تمطر شوي امس.. اليوم اهون يقدر الواحد يمشي ..
ــ مأجوري..
ــ اجرنا و اجرش.. هذي مرت اخوي .. وهذي بتها..
ام مؤيد :
ــ ياهلا فيكم شرفتونا .. اليوم وكل يوم
ام جاسم : ــ تسلمي ويعز مقدارش..
ــ ربي يسلمش..
وبأبتسامه: ويش اسمش يابتي << تقصد زينب..
زينب تلونت : ــ زينب..
ريما صارت تتعيلف في زينب وتفلص فيها:
ــ يؤيؤ بتخطبش..
زينب طالعت ريما على جنب بنظرات ثاقبه ..
ريما :
ــ يمه .. عساني ماحلم بش..

شوي خلصت ساره تضييف الحريم وقعدت جنب ليلى.. وصارو يسولفو
رزان كانت في عالم ثاااني..
زينب تبغى تدخل بالعرض بين ليلى وساره بس مهي عارفه..ومنقهره..
ريما ماخذه حنين تلعب فيها.. ورزان سرحانه في عالم آخر..
زينب في بالها: ــ اهوو مالي الا رزان ..
وصارت تتعيلف:
ــ احم.. وصلنا المدينه.. نزلو يللا .. الحمدلله عالسلامه..
رزان انتبهت:
ــ هاا.. وشو..!!
ــ ههههههههه سلام الله عالرسول... انتين اللي ويشو .. وين وصلتي.....؟؟
رزان بهداوه:
ــ افكر باللي يصير دالحين و كيف تغير حالنا.. يالتني عرفتكم من زمان..
ابتسمت زينب:
ــ وياليتنا عرفناش.. الله يفرج عن سبب هالمعرفه..
ــ يارب بحق صاحب هالمناسبه..
ــ يااارب..


عادل على باب بيتهم جنب الزراعه الخارجيه.. قاعد يصيح..
طلع اشرف و انتبه له :
ــ ويش فيك؟؟ عادلوه على ويه تصيح؟؟
ــ ححححمممماااامتتتي ماااتتت..
ابتسم اشرف :
ــ الله يرحمها.. ويش تسوي .. البقاء لله.. الله يعوض عليك..
ــ ححححممممااامممتي ماتمووت بس عبااسسسو يموووت..
ــ يارجال عباس خلاص .. ماتجوز عليه الا الرحمه.. خله في حاله..
ــ ابغى حمماااامتي مو شغغغلي..
ــ ويش حمامتك انت بعد ناقصين فلونزا الطيور..
ــ ويششششوو بعد فللللنننزززنزززا
ــ يعني اتشوووووو
ــ ايه يرررحمك الله
ــ ههههههههههههههه غربال .. وين حمامتك الحين .؟؟
ــ اقققووول لك ماااتت
ــ ايه زين وين وديتها؟؟
عادل يأشر عالزراعه الخارجيه .. على مكان مرتفع شوي الرمل ومغروس فيه عود ريحان..
ــ اهههنننااا دفنتتهااا .. تهي .. تهي ..
اشرف فيه ضحكه بس يحاول يداريها وفي باله:
ــ ويقولو مينون.. الله يتمم عليك بعقلك..

اشرف:
ــ ايه .. ماعلينا.. الله يعوض عليك.. وبلا صياح..
ومشى عنه..
عادل:
ــ وييينااا بتتتررروح؟؟
ــ مشوار..
ــ لزييينب !!
اشرف بيفتح باب السياره وقف يطالع في عادل..
ــ زينب !! حق ويه يعني ؟؟
ــ مفكككككككررررني مااادرررري بككككك..
اشرف انصرع .. ويحس قلبه بيطفر من كلام عادل.. ضحك بأرتياب:
ــ ويش تقول؟؟ تدري بويش؟؟
ــ مفكررر مادرررري بك.. بتررروح تشتتتتررري ليييهااا بووووظظظه.. ذاااك الليييووم شررريت ليي وماااشررريت ليييهااا.. اييييييه اليوم بتشتررري ليها..

اشرف حس وده يروح لعادلوه ويدوس فبطنه دوس على هالخلعه..
فرد له بوزه شبرين ابتسامة قهر..
ركب السياره.. شغلها.. وصار يفكر مدة تحمى ..
ــ ويش فيني اختلعت من كلام عادلوه.. معقوله صحيح.. معقوله احبها.. ويش فيني.. من وينلوين.. كم موقف صار وياها.. وتعلقت كذا.. بلا خباله..

صار يلهي عمره.. وشوي ابتسم..
ــ بس والله شكلها خفيفة دم .. واجوديه.. وفوق هذا حليوه
غمض عيونه:
ــ استغفر الله ياربي .. ويش فيني اخربط

الا طرررررااااااااخ
عادلوه هجم عليه صفق نافذته بكفينه ولصق وجهه فيها..
اشرف نقز وصرخ حده ما عنده:
ــ آآآآآآآآآه...
وفتح النافذه وصرخ على عادل:
ــ ياااااااااااخبل خلعتني..
عادل ماقدر صار يدحن من الضحك..
اشرف بقهر:
ــ خبلوه.. مالت عليك..
ــ هههههههههههههههههه فوووووووووووويششش تفككككككككر.. اككككيد فييي زييييييينب
ــ وتاليتها وياك ها.. استح عيب...
ــ فكررررر في خطططططه كيفااا تووودي ليها البوووظه
اشرف حط كفه على راسه..
ــ انا لله.. راسي باموت منك.. ماتسوى علينا هالبوظه اللي شريناها لك..
ــ حققققق مرررره تاااانيه تشتررري ليييها..
ــ لويه يعني اشتري ليها..؟؟
ــ مرررررتي .. لااازم زيي..
اشرف حمق وعطى عادل خزره قويه:
ــ ويه..ويش قلت..؟؟
عادل يضحك ويعيد الجمله:
ــ مرررتي وابغاها زيي..
ــ اقوول.. روح لأمك لا انزل لك واكسر راسك..
ــ حققققق ويييييييييييه..
ــ روووووووووووووووووووح..
ــ زين زين.. تهي تهي.. حممممممااااااامتي
اشرف بقهر:
ــ و حما.. تحم بليس.. فارق..
مشى اشرف وهو ماشي قابلته سياره فيها 3 رجال..وشكلهم غريبين عن الفريق .. صار يراقبها من المرايه الجانبيه ... لقاها وقفت السياره على باب بيت ام عادل .. ونزل واحد يكلم عادل وعادل شكله مو مشتهنه و مايبغى يكلمه..
اشرف في باله:
ــ اهوو دع الخلق للخالق..


عادل يشابق:
ــ ررروووحو ما نبغغاااكم حححق ويه جاااين..
ــ كلامنا مو وياك يالخبل ويا امك.. وخر..
ــ مانى موخررررررر والخبل انتتتتتت..
ــ وخر لا افلع راااسك..
ــ مااااانى مووووخر..
ويشيل عادل رمل من الزراعه وينفره في وجه الرجال..
ــ عيوني جعلك صاقعه يالمينون..
ــ تصصصصصصقعك.. مابتدددخل بيتتتنا لا انت ولا هااالخبلاااااااااااان اللي وياااك..


فتح باب السياره رجال كان اكبرهم..
ــ عبدالرزاق... خله يولي عنك .. اشوف انا لو هو..
ونزل الثاني ..
وحاوطوه..
عادل يحس روحه قد النمله في وسطتهم.. وشوي بيصيح:
ــ ويش تبغووو
ــ امك داخل؟؟
ــ اييييه..
ــ وخررر زين..

ودخلو البيت..


تابع<<

[Princess]

ــ يــــــــالله.. يا زهرا.. يا ام عادل .. وينش..
زهرا من سمعت صوت عمها.. انصرعت..
طلعت من الغرفه.. وقفت على بابها
ــ هلا.. هلا اعمامي << قالتها والشحوب والخلعه مبينين عليها..
ــ عظم الله اجرش..
ــ اجرنا واجركم..
ــ ايه ويش اخبارش..
ام عادل بهداوه ووببرود:
ــ الحمدلله.. عايشه..
ــ الحمدلله.. هاا ويش بتسوي الحين..؟؟
ــ ويش باسوي على ويه؟؟
ــ في وضعش.. لا سند ولا رجال ..
ــ وياي ولدي...
ــ وولدش تسميه رجال..؟؟

مايسمع وراه الا عادل بحمق:
ــ رجااااااااااال غصصصصصصصبن عنننك...
ــ عاشو والله.. وطلع لك لسان يا عادلو..
ــ ايييييه .. وكسررر راااسك بعد..
ــ بسسسسسسسس ولا كلمه .. مصختها يا قليل الحيا..
وقامو عليه الخوال الأثنين..
عادل خلاص عيونه طغت فيها الدموع:
ــ خلاص خلاصصصص..

ــ ايه يا ام عادل .. حنا نقول لش الحين ماعندنا حريم يقعدو لحالهم و...
ابتسمت ام عادل ببرود وقاطعته:
ــ وماعندهم والي ويش بيقولو عنا الناس لازم الحين تسكني ويا واحد منا وتحاولي بين فترهوفتره تسكني ويا الثاني والثالث ..
سكتت ودموع في عيونها..
ــ آسفه.. طلعه من بيتي مابطلع..
ــ بس ..
ــ مابغير رايي..
ــ غصصبن عليش.. الحين بنخليش فترة الحداد.. وبس تخلصي.. لينا كلام وياش..
مشينا..
وطلعو.. عادل ماخلى سبه من وراهم.. من جميع الأنواع..
ام عادل قعدت على باب الغرفه .. وصارت تصيح..
عادل قرب ليها وصار يصيح.. ويمسح على راسها..
ــ لا تصيحي اماه.. بسسسم الله عللليششش.. مااابخلللليييهم ياااخذووونا من بييييتتتنا.. خلااااص خلالااااص..
ام عادل ماهي متحمله.. حضنت ولدها وصارت تنحب..
ــ تذكروني ياولدي.. جابتهم الفلوس.. عاين من الله خير.. ويجو الخوال بعد.. مالي الا الصبر...

بعد يومين..
تلفون بيت ابو جاسم يرن..
ردت زينب..
ــ الو..
ــ السلام عليكم.. منزل جاسم عبدالرحيم آل ..
زينب مستغربه .. اول مره يتصل صبي لجاسم ويسال هالسؤال بالعاده على طول وين جاسموه!!
ــ ايه .. لحظه اناديه..

راحت لجاسم وكان نايم..
ــ قوم.. قوم يبغوك..
ــ ماااااااانى..
ــ قووم شكله الصوت غريب اول مره اسمعه..
ــ فكيني رادار اصوات.. اطلعي وصكي الباب .. قولي له جاسموه مات..
ــ يافقالة دمك يالغفيف.. جعلك زين.. لا تقول ماقلت لك.. ترى سال عن اسمك بالكامل.. كنه اولمره يتصل..
جاسم فتح عيونه:
ــ هااا.. صدق ؟؟
ــ لا امزح..
ــ دانا باقوم باااااااقوووووم..

رفع السماعه وزينب فوق راسه ضاربنها الفضول..
ــ هلا..
ــ ياهلا ,, الأخ جاسم؟؟
ــ ايه.. خير..
ــ خير ان شالله.. معاك قسم شرطة الـ .. ياليت تتفضل وتبلغ خويك امجد يتفضل ..
ــ خير ان شالله..
سكر التلفون.. ببطئ..
اخذ نفس عميق.. اطلق زفره حس ان روحه طلعت وياها..
التفت لزينب اللي كانت مستغربه حدها منه .. وبهدوء:
ــ مين هذا؟؟ وويش صاير؟؟
ــ وين امي .. و .. ابوي...
ــ في الغرفه..
ــ ناديهم وتعالو.. باقول حاجه..
ــ الله يستر..زين..

راحت ليهم طقت الباب.. وكان مردود.. فتحته الا ابو جاسم منسدح ومغطي وجهه بالغتره.. و ام جاسم قاعده تطوي ثياب..
ــ يبااه.. امااه.. جاسم يبغاكم..
ابو جاسم يطلع عيون وحده من تحت الغتره ويطالع على جنب:
ــ هلا والله.. ويش قلتي .. جاسم يبغانا.. بيهزأنا .. لو بيعطينا المصرووف..
ــ ما امزح مادري ويش صاير يقول يبغاكم.. ويبغاني بعد..
ــ تبغبغ بوزه.. كحححححح كح ويلي يا صدري انا حاس يوم بينفقع..
ام جاسم ببرود:
ــ اني اللي بفقع هالقدو ونستريح..
ــ افقعيه ان ما فقعت راسش .. سويها وشوفي..
ــ علي ياااعلييييييييييييي منك رجال.. شخاط..
ــ ايه شخاط.. سكتي لا اقب عليش..
زينب : ــ والحين ويش..
ابو جاسم:
ــ ويلي رجولي داقه عليي.. ما تجي تمرخيهم لي زنبوه..
ــ يبا.. اقول لك جاسم مادري مين متصل عليه تالي قال يبغانا..
ــ انا هذي اللي بقوم ليها باسطرها.. روحي ناديه هو.. مين اللي يبغى الثاني .. اللي يبغى الثانييجي له.. فاني شي حنا الأكبر وامه وابوه.. يستحي على وجهه.. مصخها.. اما قلالة حيا..
ــ بل.. زين !!


وراحت لجاسم.. لقته قاعد و ضام كفوفه وسرحان في عالم ثاني..
ــ جاسم.. جاسم..
ــ ها.. ..
ــ قوم يقول لك ابوي انت روح ليهم..
ــ زين..



ليلى :
ــ الحين متى صدق نتيجتش؟؟
ريما: ــ مادري يقولو بعد فتره تنزل في النت بعدين نروح نستلمهم..
ــ عساه خير..
ام علي :
ــ استغفر الله في كذا فستان لازم اخلصهم قبل ربيع وكلهم على بداية ربيع.. ماني مشتهيه اشغلالمكينه .. اكره ماعلي شغل محرم..
ريما : ــ.. ويش تسوي بعد يا امي.. رزق ..
ليلى : ــ سلام الله على الحسين ..

تابع>>

[Princess]

ام جاسم صارت تصفع خدودها..
ــ ويلي.. ويلي.. ويش هالمصيبه..
زينب قعدت من الذهول...
ابو جاسم .. مبهوت.. و بهدوء:
ــ روح.. قوم اطلع برى.. روح.. سلم روحك.. زين .. فيك ضمير... بقى فيك انسانيه.. روح .. الله يفرجها على من ظلمتوه..
وشوي صار يصارخ..
ــ ياسودان الوجه.. يا قليلين الذمه والوجدان .. يا يا..
ام جاسم تصيح..
جاسم ما تحمل صار يصيح..
قام..
ــ مع السلامه..
وطلع.. و ام جاسم لحقته بصياحها...


طلعت نتيجة القضيه.. اللي رفعها مؤيد يحاول بأي طريقه يرجع جود لحضانتهم..
طلعت.. وكانت النتيجه لصالح ابوها.. فهو ولي امرها والمسؤول عنها ..
منير يطالع في مؤيد اللي مبين في عيونه القهر.. بس مستحيل يتنازل عن بنته.. وخلاص بيرجع كندا وسفره بيطول..
طلع مؤيد.. بالخيبه.. والألم...
طلع وهو عارف ان منير كان واثق من كسب القضيه ومرتب اموره و بكره بيسافر ..
طلع وحس روحه طلعت وياه.. خلاص.. مابيده حيله.. هذا القانون.. وما يقدر يغيره ...

جاسم يمشي في طريقه للصندقه.. يجر الخطوات.. ومع كل خطوه ياخذ نفس..
هذي آخر ايام لك ياجاسم و انت حر.. الله العالم أي كثر بتصير محكوميتك..

وصل الصندقه.. لقى حميد قاعد عالبحر .. ويدخن..
جاسم قعد جنبه..
ــ اييه.. ماتعبت من التدخين ولا بتتعب.. جهز عمرك بس .. انتهى وقت الحرية
حميد ينفث الدخان.. ويتنهد من قلب..
ــ مشينا...


يتعب صبرنا و للصبر يالغالي حدود ..
و لو هو قلب كل البشر من نسج داوود ..
لو يرحل شننطي الصبر من حيله و يعود ..

طفت علا المسجل... والتفتت لسوسن اللي كانت قاعده عالسرير....بأبتسامه..
ــ بالعكسسس...ما تتصوري قد ويش فرحانه .. لويش هالكلام..
ــ متأكده؟؟
ــ صدقيني.. ماني متضايقه.. هذا حقش تكوني ام.. ومتأكده انش بتصيري احلى ام.. شي يفرحنييكون لي اخو لو اخت اصغر مني .. شلون بعد وانتين امه..
ماشافت علا الا سوسن رافعه كفوفها غطت وجهها وصارت تصيح:
ــ ربي مايحرمني منش ومن طيبش وحنانش..
ــ ياعلي سوسن ويش فيش ؟؟ على ويه تصيحي..؟؟!!
سوسن وهي بعدها تصيح:
ــ كنت ماكله هم التقرب منكم.. كنت خايفه اخرب حياتكم وتفهموني غلط.. ويوم حسيت ان حنا صرنا زينين.. و حسيت انش اقرب لي من أي احد في الدنيا.. جى هالموقف ورجع الخوف ياكل قلبي.. علا لا تخلوني اني احبكم واحتاج ليكم..

علا .. عورت بقلبها سوسن.. حضنت راسها وصارت تمسح عليه..
وتفكر .. قد ويش هي بنعمه.. مع انها فاقده امها.. بس عمرها ما صاحت زي سوسن الحين وعمرها ما حست بالحاجه مثل حالتها في هاللحظه..



فتحو ملف قضية علي...
وتسجلت اقوال جاسم وحميد.. مع استرداد بقية المسروقات.. و القبض على الذيب ..
اللي تحت التعذيب اعترف وعلم على البقيه.. ولحماية جاسم تم ابلاغ الذيب انهم حصلو بطاقة الأحوال تبعه في الزراعه اللي سرقو منها بعد عمل تغطيه لموقع السرقه...

وطلع الحكم..
يتم سجن المتهمين مدة 5 سنوات.. مع الغرامه الماليه كحق مردود .. لمن اكلو حقوقهم...

جاسم ابتسم وصارت دموعه تصب.. تنهد من قلب... اخيرا ارتاح ضميره..
حميد .. يتنافض .. قعد على الكرسي ..
ــ حضرة الضابط لو سمحت..
ــ تفضل..
ــ ممكن اطلب طلب قبل لا تودونا السجن..
ــ تفضل.. بس على فكره لكم يوم تشوفون اهلكم وترتبون اموركم ..مع فرض الرقابه عليكم..و ان شالله بكره راح يتم الحجز واتخاذ الأجرائات القانونيه كامله..
ــ طيب ممكن..........
الى الملتقى...

[Hussain.T]

اميرة كان كملتي وخليتنا نقرأ مولد اليوم

جزء رووووووووعة وبانتظار الفرج

تحياتي

[عازفت الاوتار]

هااااااااااايـ

مشكوووور خيتوو ع الاجزء الي اروع من الروعهـ

انا اتوقع

انهـ بيرووح الى اخووهـ

وراح يمووت قبل لالا يخلص الكم << ان شاء اللهـ

تحياتوـو

عازفة الاوتار

[اسير الهوى]

تسلم الايادي اميرة

هذي الاحداث والا بلاش

كذا تماااااام


كل واحد ياخذ نصيبة

شوووووووووكررررررررن

[fatemah]

اكيد حميد يبي يشووف علي ^_^
تسلميي اميرة ع الجزء الرائع
وبنتظار الجديد

تقبلي مروري
fatemah

[سفيرة الاحلام]

هلا اميره

متباركه بالمولد

ابدااااااع

واخيررررر بيطلع علي

تسلمي

لا تتاخري في الجزء الجديد

[أميرة الشوق]

جــــــزء رووعه

وأتوقع حميد يمبى يروح لعلي يستسمح منه>>مالت عليه النحيس

بإنتظار الجزء القااادم ع أحر أحر أحــــــــــــــــــر من الجمر>>متحمسه

[للدموع إحساس]

مســـــــــــــآآآآكم اللهـ بـ الخير ،،
خووووش نااااصفهـ ،،
و أخييييييييييييييراً علووووي بـ بيطلع ،،
مسكييييييييين حميدوو يكسر الخاطر ،،
تتوقعووو كيف بيكون موقف علي منهـ ؟!!
بـ الأنتظآآآآآآآآآآآآر ياالـ غلا ،،
يعطيكـ ربي ألف ألف عااااافيهـ ،،
و سلمت يمينكـ ،،
خااالص التحااايااا ،،
للدموع إحساس ،،

[كبرياء]

ويييييييييلييي على حميييييييد <--- كآآسر خآطري اهئ اهئ اهئ ...
هههههههههههع يسلموو أميرووهـ ع الجزء الروووعهـ ...
لآعدمـ ..
كبريآء

[Habit Roman]

ناصفه حلاوة على النبي صلوه

أحلى ناصفة والله على الاقل نأخذ ناصفة زي الناس بدل قعدتنا بدون ماناصف

بارت جدآآآآآآآآآ رائع تسلمين أموره

أنا بعد أتوقع أمجد يبغى يشوف علي ويستسمح منه

ومتى اشرفوه يتلحلح ويخطب حينب

أمورة غناتي متى تخلص القصة اتوقع ماعليها واجد؟

سلمت أناملك خيوه
تحياتي

[زهور الريف]

بسم الله الرحمن الرحيم

اللهم صل على محمد وآل محمد

وعجل فرجهم

أفضل الصلاة والسلاام عليك يا حبيب الله

مـــــــــــحــــــــــمــــــــــد


ككككللللللللللوووووششش


وأخيرا بيطلع علي

وحمييييييد وجاسموووه يستاهلوا

بس مو كأنه حرام 5 سنوات وااجد<<< مسرع ما غيرتي رأيك خخخخ


غناتي

جزء رووووووعة

تسلم الايادي

مقضية الحوائج إن شاء الله

وبالانتظار