..:: تجربة في حياتي::..(خيي عماد علي .. تفضل)

[همس الصمت]

بسم الله الرحمن الرحيم
السلام عليكم ورحمة الله وبركاته
بقول الكم عن تجربة صارت ليي قبل 3 سنوات تقريبا
خلتني أعيش في رعب فترة
وراح أتكلم وياكم بالعاميه أحسن ..
يالله نبدأ ..
من قبل شي 3 سنوات رحنا مكة وبعد ماوصلنا وخلصنا عمرتنا وبالظبط بعديومين
من وصولنا مكة وكان اليوم الي هدموا فيه جسر الكاظمية
كنا جالسين في السكن ملانيين فقالت أختي الكبيرة ويش رايكم تطلعوا تتمشوا احسن من هالقعده أهني
فقلنا يالله نطلع نغير جو ..
وقمنا وتجهزنا وطلعنا وكانت الساعة تقريباً خمس العصر ..
وأحنا نازلين كنت أقول لبنت أختي مدري ليش احس ان الاجواء مو طبيعية
فقالت لي صلي على محمد مافي الا الخير ان شاء الله أمشي بس
قلت الها يالله مشينا
وتونا ما بعدنا مسافه عن الفندق الا الدنيا تتغير حسيت بأشياء مو طبيعيه تصير
قلت الهم خلنا نرجع السكن .. فقالوا لا مافي شي بس كذا هواء غير ..
بس والله مدري حاسه ان في شي مو طبيعي بيصير .
وبعدنا شي خمس دقايق عن الفندق كااااااااااااااااااااااااااان
يااااااااالله تنقلب الاجواء فوق تحت
عواصف وهواء وغبار والدنيا صارت ظلام
كأنها الليل
وحوادث سيارات وأصوات الاسعاف في كل مكان
وما تشوف الا علب البيبسي والكرتون تتطاير هني وهناك
والعبي تتطاير من شدة الهواء
والناس كلهم وقفوا من الخوف ونزلوا من سياييرهم وخلوهم على جنب
والي واقف مو عارف ويش اسوي
والحوادث قامت تصير بين السيايير والاسعاف مو عارفين وين يروحوا
جد موقف كنا لانحسد عليه
كأنه يوم القيامه .
وأحنا كانوا معنا جهال وقاموا يتصارخوا وكل واحد يقول ياعلي احس إني بموت
والثاني يقول ياعلي احس اني بطير
وبنت أختي كانت تصارخ ياعلي ولدي بيطير من عندي مو قادره أمسكه تعالوا الحقوني
فراحت ومسكت بالمبة الي في الشارع لان الهوى كان مرة
قومي ويطير حتى الانسان لو ماكان ماسك نفسه .
وأني كنت أطالع واني ساكته مب عارفه ويش اسوي
بس كنت أحاول إني أكون قوية عشان يقدروا البقية يتماسكون ونقدر نرجع الفندق سالمين
بس الصراحه في نفس الوقت كنت أحس انها قامت القيامه
بس ماقلت لاحد عشان لايخافون أكثر ..
فقامت كل وحده منا لكبار مسكت ليها واحد من الصغار وحاولنا نسمك بعض ورجعنا الفندق
وطبعاً من الخوف أفترقنا وصرنا كل ثنتين او ثلاث مع بعض لغاية ماوصلت أنا
والمجموعه الي معي الفندق بس كنت خايفة على الي البقية الي كانوا معنا
فبمجرد وصلت الشقه وشفت أختي الكبيرة لانها ماراحت معنا لان ومثل
ماقلت كان هذاك اليوم يوم تهديم جسر الكاظمية وكانوا يقرون عندنا في السكن
فظلت في الفندق
وبمجرد شفتها صابتني حاله هستيريه من الصراخ صرت أصارح وأصارخ
لاشعورياً ومن قمة راسي
وكنت أقول بس محد كان فاهم لي من الصراخ
خلي احد من الرجال يروح يشوف البقية
لاني كنت خايفة على البقية
ومع إن الكل وصل بس ظليت أصارخ
وصار الكل معي ويحاول يهدي بس انا كنت بدون شعور
وخواتي كل وحده من جهه تهدي
والكل كان خايف علي لاني كنت مسويه عملية فكانوا يفتكرون ان الصياح كان من
ألم في العملية أوشي حتى إن زوج أختي كلم الاسعاف وخلوها تجي الفندق
بس أنا مارضيت أروح لان الي كان عندي مو من العملية
كان خوف من الموقف الي صار
وصارت اختي تقرأ عليي قران وأشوي أشوي بدأت أهدأ
وكان رجل أختي يقول لي شفتي شي في الغرفة او شي
او إذا مو مرتاحه في الشقه عادي تكلمي
وأنا صمت غريب كان عندي
وما صرت أتكلم بعده الا قليل
بعد كل إلي صار جلست عند النافذة بدون كلام
كنت أطالع في الجو كيف برة وكيف إن السما صارت تمطر وكأن الجو
صاير شتاء مو عز الصيف
وأنا طول الوقت أطالع والدموع تطيح من عيوني
بدون ولا كلمة
والصراحة الخوف الي كان متملكني إن حسيت إن بيني وبين الموت خطوة
والخوف الاكبر كان مو من الموت كان من ما بعد الموت
كنت طول الوقت أفكر إن لو توفيت في ذيك اللحظات هل أني قدمت لربي كل المطلوب مني
هل كل إلي أني سويته كافي إنه يدخلني الجنة
كنت أفكر بيوم القيامه كيف بيكون ويس بيصير مصيري
هل هو الجنة أو النار ..
جد هذا الخوف الي كان متملكني إن أموت وأني ما قدمت شي يرضي ربي عني
ومن حزتها وأنا الحمدلله أحاول إني أسوي كل شي يرضي ربي دنيا و آخرة
وأحاول إني ما أتأخر عن أي شي ممكن يدخلني الجنة
جد هذي التجربه الي كانت في حياتي غيرتني 180 درجه عن الا ول
ما أقول اني كنت مش ولا بد لا الحمدلله كنت ماشيه حياتي تمام التمام
لكن بعد الشي الي صار خلاني أفكر في أشياء ثانيه
وخلاني أكبر عشر سنوات لقدام ..
تغيرت حياتي غييييييييييييير
ويمكن من هذاك اليوم وأنا عايشه حالة صمت
لدرجة لغاية اليوم ماقلت إلى أهلي ويش سبب الي صار ليي هذاك اليوم
وترى من يتكلمون عنه أبدأ حالة صمت غريبه
وإلى الحين كلما سألوني عن ذاك اليوم أسكت عنهم وما أدر عليهم بأي شي ...
بس كل إلي أبي أقوله إن الانسان المفروض يكون متجهز لمواجهة الموت
ويكون على أستعداد تام لتلقيه بدون خوف
ويكون متجهز بأعماله وبكل شي يرضي ربه ..
الحمدلله على الشي الي صار ليي والي غير حياتي الى الاحسن والافضل ..

أعذروني إذا طولت عليكم بس جد هذي تجربه مرعبه في حياتي
وحبيت أوصلها ألكم عشان تستفيدون منها ونكون دائماً على أستعداد لملاقاة الرب
..
المعذرة مرة أخرى ..
وأشكر خيتي لوفلي لأختيارها لي في هذا المكان
وأشكر فطوم على الموضوع الجميل والرائع ..
تحياتي العطرة لكم جميعاً
وبالتوفيق للجميع ..
والله يبارك الكم بهذي المناسبه السعيده
الله يعودها علينا وعلى الجميع بالخير والبركة ..

وأختار بعدي ..
أممممممممممممممممممممم
والله مدري محتارة أختار مين .
بس يالله مافي غير
الغلا
دمعة على السطور ..
نبي نشوف تجربه من تجارب حياتها ..
تحياتي لك مقدماً الغلا دمّوع ..
بالتوفيق ..