بسم الله الرحمن الرحيم
اللهم صل على محمد وآل محمد
في زمن قديم مررررررررررره ومغبر مرررررررررره
بس فيه فلاجات
ذهبنا وسوينا هاللقاء ويا أم حسن بياعة الصبعبلي
لنتعرف عن هذا المنتج العجيب الغريب اللي يجدب اليهال
ويخلي الكبار يدوخوا من البروده ومزمزة الصبعبلي
جينا أنا ويايي أخويي شبكه نتمشى في ذاك الزرنوق وسألنا ياهل عن بيت أم حسن
النحيس ما رضى يعلمنا ببيتها الا يوم عطيناه فلافة قروش حق يشتري له صبعبلي على لبن
وصلنا البيت وكان هذا اللقاء
طق طق طق
أم حسن :- من يا غناتي ويش تمبوا ...صبعبلي على لبن ولا على ميمتو ؟
واحد فاضي :- نمبى صبعبلي على لبن وواحد على ميمتو وبعد وياه على برتكال .
أم حسن :- هذي بتسعة قروش ، برزوا بيزاتكم وداني با أييكم الحين
وانتظرنا شوي ويابت لينا فلافة أكياس وشوي الا قالت ....يوه خزى الله ابليس أبو مرره
نسيت أسألكم تمبوا في قلاصات ولا في أشياس (أكياس)
شبكه :- أم حسن نمباه في أشياس ( أكياس) وبعد نمبى نسوي وياش مقابله ونسألش كم سؤال
أم حسن :- يووووه يعني انتون تبع وشوه ....البلديه ولا وشوه
واحد فاضي :- لا لا لاتخافي يا أم حسن إحنا تبع
منتدى الناصره
أم حسن :- إيه إيه سمعت بهالمنتدى من زمان
هذا المنتدى حليو وزين إما زين
شبكه :- بارك الله فيش
أم حسن :- تفضلوا تفضلوا ...يوووه على العين والراس
واحد فاضي :- الحين يا أم حسن نمبى نسألش كيفه تسوي الصبعبلي ؟
أم حسن :- كيفه أسويه بعد ، أييب قلاصات ستنستيل وأحط فيهم الميمتو لو اللبن لو عصير الفودر برتكال وأحطهم في الفريز وتالي من يجمد أبيعه
شبكه :- نمبى نعرف كيفه تسويه من أول شي يعني من وينه تييبي اللبن وكده يعني ؟؟
أم حسن :- يا غناتي اللبنه من عند يارتنا أم محمد عرفتوها بت حجي حسن تعرفوه أكيد ، كل يوم تيب ليي قياسين لبن أقوم أحطهم في غضاره وأحط على اللبنه شوية ماي وتشونة ملح حق يطلع حليو له
واحد فاضي :- زين من وينه تييبي لعصي
أم حسن :- يا غناتي أشوف ليي سحارة رطب وأنقعها في الماي شويه وتالي أكسرها بسكينه وأحطهم في قلاصات السنستيل وتالي أصب عليهم اللبنه وأحطهم في تراي وتالي في الفريز
ومن يستوي أبسط به عدال الباب لو اليهيلات هم يدقوا الباب ويشتروا من عندي
واحد فاضي :- زين واذا ما فيه قلاصات
أم حسن :- ما يقصر ولدي حسن إييب ليي أشياس من الشركه وأسويه فيه وما يحتاج عصي ولا شي
بس أصبه وأربط الشيس وتالي في الفريز
شبكه :- حليو الصبعبلي
أم حسن :- حليت أيامك ببركة الصلاة على محمد وآل محمد
واحد فاضي :- رحم الله والديش يا أم حسن ، مشكوره وما قصرتي
أم حسن :- الشكر لله رب العالمين ، الحين متى بتحطوا هالمقابلة في المنتدى ؟؟
واحد فاضي :- خلاص يا أم حسن موجودة في المنتدى الحين
أم حسن :- خلاص داني با أروح أشوفها
شبكة :- يالله أجل فمان الله
أم حسن :- فمان الله يا غناتي ، جعل ربكم السلامه ان شاء الله
واحد فاضي :- فمان الله
هذي مقابلتنا ويا أم حسن أشهر وحده تسوي صبعبلي في زمانها
رد مع اقتباس
اللبن من يوم يومي هوسيه ما اضمنه 
ويتحسس بطني 
بس اسويه لروحي في البيت و الله عوضنا ببوظة اللبن حقت المطرود << قصة حياتها 
المفضلات