مرحباا
اخباركم..؟؟
ان شالله منيحين؟؟
ارجع ليكم وقصه جديده.. ظريفه وخفيفه..
بطلها شايب .. خلني اسميه حجي عباس
حجي عباس .. يحب حليبة البقره.. عنده ولد اخت راعي مزرعه .وفيها صندقة تسكن فيها هالبقره..
. وثنينهم هو وولد اخته.. يشتغلو في شركه وحده.. ..
اتصل حجي عباس على ولد اخته:
ــ الووه .. شحوالك يا ولدي عساك بخير
ــ هلا .. هلا خالي بخير الله يسلمك..
ــ شحوال الزراعه.. وفمرها << ثمرها
ــ الحمدلله بركات دعاكم تفمر والخير زايد..
ــ ايه ياولدي .. امم .. مم .. << يتمطق 
ــ هههههههه ويش فيك خالي تتمطق دي ساعه..؟؟ 
ــ افادي يا ولدي بحليبة بقر ..
ــ ههههههههه ويش بيدي عليك ياخالي .. بقرتي توي شارنها بكر .. لا حملت ولا ولدت حق احلبها لك.. قلت بمهل كم شهر الله ييسر و اشتري لو استأجر ثور..
حجي عباس يبغى حليب مشتهيه.. سكت شوي وفكر:
ــ اقول ياولدي ويش رايك اشتري انا الثور .. ونتشارك في الحليبة..
ــ والله ماعندي مانع يا خالي ..
وشرى حجي عباس الثور.. وزفوه للبقره .
. وضوت الصندقه وعمرت بالخيرات..
ويوم جى ولد الأخت بيحلب البقره.. الثوور مو راضي .. طالع ليهم حامي .. ويغاااار و لاحد يداني مرته.. 
اتصل حجي عباس :
ــ هااااا من متى ولدت ما شمينا ريحة هالحليبه 
ــ ويش اسووي يا خاااالي ثورك مهو راضي كلما دخلت بسطلي نافخ لي وعواينه تطلع شرر خفت ينطحني.. ويدبحني!!
حجي عباس حمق .. من متى ينتظر هالحليبه وهالثور بيخرب عليه.. وصرخ :
ــ مو على كيف امه .. نمبى حليبه حنا !! 
ـ تعااال تصرف وياه .. العمر غالي ...
ــ جاينك الحين..
راح حجي عباس .. وقف عن باب الصندقه..
ــ جيب لي سطلين ..
حمل السطلين .. ودخل ساحة المعركه .. يتسلح بالشجاعة المزعومه << ويش صاير قلبتي فصحه..
كح.. احم 
عطى الثور نظره .. يووو .. لو يعطيها ادمي نطحه مو بعد ثور.. << ويش تهلوسي .. 
المهم .. ووصل للبقره ولا هو داق خبر
قلب سطل وقعد عليه.. والسطل الثاني بيحلب فيه..
ما مداه بسم الله بيبدي حلب ..
الا طرررررررم طرررررررررراااااااخ
الدنيا سوووودااااا.. وما يحس الا وجهه خم الصندقه كلهااا..
نطحه الثور وظل ماشي به دحنه بكبر المكان...
ويطفر حجي عباس وولد اخته مختلع يصارخ ويسحبه لبرى .. وعلى طول المستشفى
ستين كسر وشموخ ورض .. عالجوه طبعا شكله حدث ولا حرج.. ملفف كنه مومياء
وبعد كم يوم راح العمل..
شافوه ربعه... << هلا والله هلا ..
وبدت الهدره::
ــ هااا حجي عباس .. ويش صاير خير عسى ما شر..
ــ الشر ما يجيكم .. لا بس طايح من فوق السطح..
<< صااااااااروخ
هيهي بلعوها هالشلخه وما صدقوه..
راحو لولد اخته.. معروف ولد اخته فتينه .. ما يخبي شي..
ــ هااا ياخوك ويش فيه خالك سلامات.. يقول طايح من فوق السطح .. زين يوم الله سلم عمره
ــ ههههههههههه سطح ويه بس .. يخرط عليكم خالي .. دحنه الثور تدحين..
ــ هااا اي ثووور
ويقص عليهم القصه..
ومن باب الدعابه يمسكوها عليه...
لين فورو دمه من المسخره..
وانتظر لين اعتدلت عظامه شويات,,, ويروح للصندقه بينتقم..ياخذ له عجره ((مربوع)) خشب ..
وهوز بناء البرتقالي ..
ويدخل ويطيح في الثور شدخ.. ورم بدنه توريم.. 
تالي باعه وتهنى بحليب بقرته..
وصار كلما اشتهى حليبه .. يستاجر ثور من احد .. ولا تنعاد له السالفه
وتوته توته .. خلصت الحدوته
طويله موو..
ما نمتووو؟؟؟ 
دمتم بخير
وبحفظ الرحمن
مو على كيف امه.. نمبى حليبه حنا !!
رد مع اقتباس
المفضلات